Piromani na qënkish Promete?!- Poezi nga FATBARDH AMURSI

August 15, 2025

Vrasësi,

Akuzon varrëmihësin për viktimën e radhës,

Fantazmat,

Po shpallen pronarë të botës virtuale.

Gangsteri,

Ankohet se e vodhën në një plazh nudo,

Veç statujat po më duken të veshura në parqe.

Piromani

Padit Prometeon për zjarrvënie,

Dhe shqiponjën nga flamuri ia lëshon mbi trup,

Po kur ankohet për përdhunim

Nga semafori një prostitutë?!

Teveqeli,

Të thotë ty se nuk mbush,

Mira Murati për të një debile,

Edhe dhelpra s`mbetet pas

Duke akuzuar një dede për skile.

Peshkaqeni

Delfinin na e shpall terrorist,

Zvarranikët ua marrin qiellin zogjve

Me letra të falsifikuara,

Ndonjëherë ti e ke të vështirë të dallosh

Cilin të quash burrë dhe kë grua?!

.

E refuzoj botën tuaj të ndyrë

Ku skarcitetet këshilloni për ushqim,

Si të bëhem unë me ju, matrapaz të shpirtit,

Kur po e zvogëloni njeriun?!

Kur paçavuret na mbahen si të fisëm

Kur eunukët hiqen për heronj homerik,

Kur për dashurinë shkruan

Kusari që të ka zënë diku pritë?!

.

Fatbardh Amursi

• twitter

  Follow
• facebook
• linkedin

Fjalë kyçe: Fatbardh Amursi