Banorët e Gramshit kanë përjetuar një situatë dramatike pas shpërthimit të një zjarri të fuqishëm që ka përfshirë fshatrat kryesore të zonës.

Zjarri vazhdon akoma, gjysma e zonave janë të djegura. Ka marrë flakë fshatrat kryesore, kanë ngordhur gomarë, dhi dhe kafshë të tjera. Janë djegur 4 fshatra, ne jemi në qendër të Skënderbegasit dhe nuk e dimë fare se si është gjendja më atje, na morën dhe na sollën këtu.

Kemi pasurinë atje, kemi punuar një jetë të tërë, mos e pyet, jemi shumë keq. Ne jemi nga Skënderbegasi, situata është shumë keq, me mall e me shtëpi na janë djegur, gruaja erdhi këtu përmes lumit- tha njëri prej banorëve për Syri TV.

Ata raportojnë se një pjesë e madhe e pasurisë është shkatërruar, duke përfshirë shtëpitë dhe kafshët. Mbi katër fshatra janë djegur dhe banorët janë detyruar të braktisin shtëpitë e tyre, duke ardhur në qendër të qytetit.

Një banor i fshatit thotë: “Situata është shumë e keqe, kemi lënë gjithçka pas, duke përfshirë shtëpitë, bagëtitë, pasurinë që kemi grumbulluar gjithë jetën. Jemi këtu pa asgjë, vetëm me rrobat që kemi mbi trup.”

Ata shprehin indinjatë për mosndihmën e duhur, duke theksuar se një avion që ka arritur në zonë nuk ka mundur të bëjë asgjë për ta.

Një tjetër banor shton: “Na morën dhe na sollën këtu, por nuk dimë se çfarë do të bëjmë. Dëmet janë të mëdha, kemi humbur gjithçka dhe askush nuk po na jep ndihmë të mjaftueshme. A i dhamë ne votat atij? Po, po, por tani ku është ai? Çfarë po bën për ne?”

Ata shprehin indinjatën e tyre për mungesën e reagimit nga qeveria, duke theksuar se janë lënë të përballen vetëm me katastrofën. “Na erdhi flaka në këmbë, dhe nuk na lanë asgjë, përveç se shkatërrimin e gjithçkaje. Si mundet që pas gjithë kësaj, askush të mos kujdeset për ne? A i dhamë votat për të qenë të lënë në harresë?”

Në këtë situatë tragjike, banorët kërkojnë një përgjigje të menjëhershme dhe ndihmën e shtetit për të riparuar dëmet dhe për të mbështetur ata që kanë humbur gjithçka.