Deputetja e PD Ina Zhupa në një reagim në facebook ka bërë thirrje për mbështetje të protestës së thirrur nga gazetarët ditën e hënë, 11 gusht në mbështetje të kolegëve të News24 të cilëve iu mbyllën dyert e televizionit nga policia.

Zhupa, teksa ka pohuar se do të jetë vetë e pranishme në protestën e paralajmëruar nga Asociacioni i Gazetarëve të Shqipërisë, iu drejtua në mesazh qytetarëve dhe aktivistëve të shoqërisë civile të mbrojnë të drejtat e gazetarëve.

Bashkohem thirrjes së Asociacioni i Gazetarëve të Shqipërisë!

“Të nderuar kolegë, aktivistë dhe qytetarë,

Fikja e sinjalit të News24 dhe rrethimi me forca policie i redaksive të News24, Gazeta Panorama, Gazeta Shqiptare dhe Balkanweb është një alarm i fortë për gjendjen e demokracisë dhe lirisë së medias në Shqipëri.

Ky nuk është thjesht një konflikt mes një institucioni dhe një kompanie, ky është një akt i rëndë që prek të drejtën e qytetarëve për t’u informuar dhe i dërgon një mesazh frikësues çdo gazetari.

I bëjmë thirrje urgjente Këshillit të Ministrave, Policisë së Shtetit dhe Ministrisë së Mbrojtjes të sqarojnë me dokumente pozicionet e tyre dhe bazën ligjore të këtij veprimi ekstrem. Heshtja nuk është opsion.

Në shenjë solidariteti me kolegët tanë dhe në mbrojtje të fjalës së lirë, ftojmë gazetarë, organizata dhe çdo qytetar që beson në demokraci të bashkohen me ne në protestë:

E hënë, 11 gusht 2025

Ora 12:00

Përpara godinës së Fokus Media Group

Demokracia vdes në errësirë “

bw