Presidenti i SHBA, Donald Trump ka deklaruar se Vladimir Putin mund të ketë ambicie territoriale përtej Ukrainës. Deklarata e Trump u bë gjatë një prononcimi për mediat teksa ai largohej nga Samiti i NATO-s në Hagë. Në bisedën telefonike që së fundmi kanë zhvilluar dy liderët, Trump mësohet t’i ketë thënë Putinit “më ndihmo të gjej një marrëveshje me ty”, me qëllim për t’i dhënë fund luftës 3-vjeçare në Ukrainë.

Shefi i Shtëpisë së Bardhë tha ndërkohë nga Haga se Kievi dëshiron sistemin antiraketor Patriot, të cilët janë shumë efektivë për luftën ajrore. “Do të shohim nëse mund të gjejmë disa”, tha Trump duke shtuar se “edhe ne kemi nevojë për to”. Një sistem i tillë i është dërguar edhe Izraelit pas luftës 12 ditore me Iranin. Këtë deklaratë Trump e bëri pasi u pyet nga një gazetare ukrainase që është strehuar në Poloni, burri i së cilës është në ushtri në atdheun e tij.

Gjithashtu, Trump u duk se kishte ndryshuar mendim për presidentin e Ukrainës, Volodymyr Zelensky kur tha se “ai po zhvillon një betejë të guximshme”. Por, shtoi presidenti amerikan, ka ardhur koha për t’i dhënë fund luftës.

“Kam folur me Zelenskyn, ai ka qenë i sjellshëm. Në fakt, në kohë të vështira, ndonjëherë nuk mund të kishte qenë më i sjellshëm. Mendoj se ai do të donte të shihte një fund të kësaj. Mendoj se është një kohë e shkëlqyer për ta përfunduar. Do të flas me Vladimir Putinin dhe do të shohim nëse mund ta zgjidhim këtë çështje”, tha ai.

Lufta në terren po prodhon bilance tragjike, tha Tump, duke kujtuar se 1 javë më parë u vranë 7 mijë ushtarë të rinj, nga të dy krahët.

“Por këta janë njerëz të guximshëm. Ata po luftojnë. Javën e kaluar u vranë pothuajse 7,000 ushtarë të rinj, ushtarë rusë dhe ukrainasë, 7,000 brenda një jave. Është çmenduri. Kështu që do të flas me Putinin. Pata një takim të mirë me Zelenskyn dhe kam pasur shumë takime të mira me shumë njerëz, shumë udhëheqës të shkëlqyer. Por ai po lufton një luftë të guximshme. Është një luftë e vështirë”, tha ai. bw