Presidentja e Kosovës, Vjosa Osmani, tha se partneriteti strategjik me Shtetet e Bashkuara të Amerikës është shtylla kryesore për garantimin e stabilitetit afatgjatë në Ballkanin Perëndimor.
Këto deklarata ajo i bëri në takimin me delegacionin e Kongresit amerikan të udhëhequr nga kongresistet, Claudia Tenney dhe Chrissy Houlahan si dhe me të ngarkuarën me punë në Ambasadën amerikane në Kosovë, Anu Prattipati.
“Ajo [Osmani] nënvizoi se sa herë që SHBA-ja ka qenë e përfshirë dhe ka luajtur rol aktiv në rajonin tonë, janë arritur zgjidhje të qëndrueshme dhe është shënuar përparim i rëndësishëm”, u tha në njoftimin për media të lëshuar nga Presidenca e Kosovës.
Sipas njoftimit, presidentja Osmani me dy kongresistet amerikane ka diskutuar për situatën politike dhe atë të sigurisë në Kosovë, por edhe për forcimin e partneritetit strategjik me SHBA-në, veçmas në fushën e mbrojtjes, investimeve dhe avancimit të mëtejmë të raporteve dypalëshe.
“Duke falënderuar kongresistët për mbështetjen amerikane ndaj Kosovës, presidentja Osmani theksoi se bashkëpunimi i ngushtë me Shtetet e Bashkuara është po ashtu jetik për realizimin e synimeve euroatlantike të vendit, që mbeten qëllim i palëkundur për Republikën e Kosovës”, tha Presidenca e Kosovës.
Kosova synon që një ditë të bëhet pjesë e aleancës së NATO-s dhe Shtetet e Bashkuara e kanë ndihmuar në ngritjen e kapaciteteve të mbrojtjes. Uashingtoni po ashtu mbështet rrugën e Kosovës drejt integrimit në Bashkimin Evropian.
Qëndrimi i kongresistet Tenney në Kosovë vjen dy ditë pasi ajo vizitoi Beogradin ku u takua me presidentin e Serbisë, Aleksandar Vuçiq.
Vuçiq i dha një dekoratë kongresistet Tenney për “forcimin e marrëdhënieve Serbi-SHBA”.
Udhëheqësi serb e falënderoi atë “për kritikën e saj të guximshme ndaj veprimeve të njëanshme” të Qeverisë së Kosovës.
Gjatë fjalës së saj në Beograd, republikania Tenney tha se lidhjet e saj me këtë rajon datojnë që nga fillimi i viteve ‘80, kur ajo ishte studente në Beograd, në Jugosllavinë e atëhershme.
Tenney është bashkëkryetare e Grupit Parlamentar Serb në Kongres dhe është e përfshirë në mënyrë aktive në çështjet që lidhen me Ballkanin Perëndimor. Në nëntor 2022, ajo kishte shprehur shqetësim në lidhje me tensionet midis Serbisë dhe Kosovës, duke bërë thirrje për një zgjatje të moratoriumit mbi zbatimin e politikës së targave dhe kthimin në negociata.
Po ashtu, gjatë të premtes, edhe kryeministri në detyrë i Kosovës, Albin Kurti, është takuar me një delegacion të përbërë nga anëtarë të stafit të Kongresit amerikan dhe anëtarë të Këshillit të Atlantikut.
Kurti tha se me anëtarët e stafit të Kongresit amerikan ka biseduar për zhvillimet aktuale politike në Kosovë, për reformat, luftën kundër korrupsionit, por edhe për rrugëtimin e Kosovës drejt Bashkimit Evropian.
Kryeministria tha se në takim po ashtu është diskutuar për fuqizimin e subjektivitetit ndërkombëtar të Kosovës dhe procesin e dialogut mes Kosovës dhe Serbisë, që ndërmjetësohet nga Bashkimi Evropian.
Takimet në Prishtinë të krerëve shtetërorë me përfaqësues të Kongresit amerikan, vijnë në kohën kur faktori ndërkombëtar po i bën thirrje Kosovës që të formojë sa më shpejt institucionet e reja të vendit, pas mbajtjes së zgjedhjeve në shkurt.
Procesi i formimit të institucioneve ka ngecur, pasi deputetët nuk po arrijnë që të zgjedhin kreun e ri të Kuvendit dhe të konstituojnë organin ligjvënës. Pas këtij hapi, do të hapej rruga për formimin e ekzekutivit të ri.
