Partia Demokratike i ka dërguar një kërkesë urgjente KQZ në të cilën kërkohet, vendosja e ligjshmërisë në procesin e votimit të diasporës në Greqi.

Përfaqësuesi ligjor i PD-ASHM në KQZ Franci Nuri ka denoncuar  problemet me zarfet e votimit në Greqi, problem për të cilin PD kërkon nga KQZ-ja ndërhyrje të menjëhershme

Partia Demokratike dhe Aleanca për Shqipërinë Madhështore i kanë drejtuar një kërkesë Komisionierit Shtetëror të Zgjedhjeve ne lidhje me votimin e diasporës në Greqi për zgjedhjet e 11 majit. Në kërkesën e PD-ASHM, të përfaqësuar nga Franc Nuri thuhet se ndryshimi i befasishëm i tërheqjes individuale të zarfeve pranë DHL ka ngritur shqetësime serioze mbi transparencën, standardin dhe ligjshmërinë e procesit të votimit.

“Autoritetet zgjedhore garantuan publikisht se çdo zarf me votë do të dorëzohej në adresën e deklaruar të votuesi në PEL, përmes një shërbimi postar të drejtpërdrejt. Por papritur KQZ ndryshoi qasje. Përmes një njoftimi të thjeshtë në rrjetet sociale të KQZ, votuesit shqiptarë në Greqi duhet të paraqiteshin personalisht pranë pikave të DHL-së, për të tërhequr ose dorëzuar zarfin e votimit”, thuhet në kërkesën e PD-ASHM

Sipas PD-së ky ndryshim i befasishëm bie ndesh me rregullat dhe deklarata e mëparshme të KQZ-së.

Në kërkesën që mban datën e djeshme, 4 maj, thuhet gjithashtu se vetëm një javë para ditës së zgjedhjeve janë raportuar nga KQZ mbi 6 mijë zarfe të ardhura nga Greqia, ndërkohë që për disa javë më parë numri total i tyre ishte 17 700.

Sipas PD-së ky fluks i pazakontë përforcon dyshimet mbi integritetin e procesit.

Në këto kushte PD kërkon ndërhyrjen e menjëhershme të KQZ-së për kthimin në ligjshmëri të procesit të votimit dhe administrimit të votës në shtetin grek, duke garantuar rregullshmëri, siguri dhe besueshmëri për çdo votë të shqiptarëve që jetojnë në Greqi.

Kerkesa e KQZ-se

PËRFAQËSUAR NGA Z. FRANCI NURI.

Kushtetuta e RSH; Neni 123/1 e vijues i Kodit Zgjedhor.

Komisionerit Shtetëror te Zgjedhjeve z. Ilirjan Celibashi

Z. Komisioner Shtetëror i Zgjedhjeve,

Në cilësinë e përfaqësuesit ligjor të Koalicionit PD-ASHM, po ju drejtohem zyrtarisht në lidhje me një situatë tejet shqetësuese që po zhvillohet me procesin e votimit të shtetasve shqiptarë që ndodhen në Greqi, vetëm pak ditë përpara zgjedhjeve të përgjithshme parlamentare të 11 majit 2025.

1. Kur filloi nisma për përfshirjen e qytetarëve shqiptarë që jetojnë jashtë vendit në këto zgjedhje, autoritetet zgjedhore garantuan publikisht se çdo zarf me votë do të dorëzohej në adresën e deklaruar të votuesit në PER, përmes një shërbimi postar të drejtpërdrejtë. Votuesit u siguruan se nuk do të kishin nevojë të dilnin nga shtëpia dhe se procesi do të ishte personal, i sigurt dhe pa ndërmjetës.

2. Por më para pak ditësh, KQZ ndryshoi papritur qasje. Përmes një njoftimi të thjeshtë të publikuar nga në rrjetet sociale të KQZ, votuesit shqiptarë në Greqi, u njoftuan nga KQZ se duhet të paraqiten personalisht pranë pikave të DHL për të tërhequr ose dorëzuar zarfin e votimit. Ky ndryshim i

befasishëm ka sjellë jo vetëm konfuzion mes votuesve, por ka ngritur edhe shqetësime serioze për transparencën, standardin dhe ligjshmërinë e procesit.

3. Ndryshimi i mënyrës së shpërndarjes së zarfeve bie ndesh me deklaratat dhe rregullat e mëparshme të KQZ-së. Sipas kuadrit ligjor dhe rregullator në fuqi, operatori postar ishte i detyruar të dorëzonte fizikisht çdo zarf tek votuesi, kundrejt nënshkrimit dhe paraqitjes së një dokumenti identifikimi. Madje u theksua publikisht se asnjë anëtar familje nuk mund të merrte zarfin në emër të një tjetri dhe do të bëheshin tre tentativa për t’u gjetur votuesi në adresë.

4. Në Greqi prej javësh kemi raportime se zarfat me vota nuk po u dorëzohen qytetarëve në dorë në banesë, por shpesh herë po përvetësohen në mënyrë të organizuar nga individë të caktuar që mund të paraqiten pranë pikave postare (qoftë zyrtare, qoftë nënpagesë si zyra bastesh, apo hyrje pallatesh), duke përdorur makina me qira me targa shqiptare për të shmangur gjurmët. Këta persona, të dyshuar tëlidhur me Partinë Socialiste dhe strukturat e saj, ka njoftime se mund të kenë grumbulluar zarfa me fletët e votimit, cka është totalisht e ndaluar dhe penalisht e dënueshme.

5. Ndërkohë, siç dihet, Shteti shqiptar ka firmosur një kontratë me vlerë rreth 9.2 milionë Euro me kompaninë postare DHL për të garantuar shpërndarjen dhe grumbullimin korrekt të zarfeve kudo të Botë për 246.000 zgjedhës të regjistruar në PER. Ky ndryshim i papritur në mënyrën e dorëzimit – nga “zarfi vjen në shtëpi” në “shko e merre vetë” – jo vetëm që rrit vështirësitë praktike për mijëra votues, por krijon dhe hapësirë për ndërhyrje, parregullsi dhe potencialisht manipulime procesi.

6. Sot më 4 maj 2025, vetëm një javë para ditës së zgjedhjeve, janë raportuar nga KQZ se mbi 6,000 zarfe të ardhura në Tiranë nga Greqia, ndërkohë që për disa javë më parë numri total ishte 17,700.

Si shpjegohet që një e treta e të gjithë zarfave të Greqisë vijnë në një ditë të vetme?

Ky fluks i pazakontë dhe i papritur, në kontekstin e problemeve të raportuara, përforcon dyshimet mbi integritetin e procesit.

7. Shqetësimi ynë është i thellë jo vetëm për integritetin e votës, por edhe për pasoja të rënda që kjo situatë mund të ketë në besimin e publikut te procesi zgjedhor dhe demokracia në tërësi. Nëse kjo situatë nuk korrigjohet menjëherë,procesi i votimit të Diasporës rrezikon të mbetet një eksperiment i dështuar, i shtrenjtë dhe me pasoja serioze për vendin.

8. Dëshirojmë të theksojmë se një pjesë e këtyre shqetësimeve janë ngritur dhe komunikuar prej nesh në mënyrë periodike dhe publike gjatë javëve të fundit, përmes deklaratave për shtyp, denoncimeve zyrtare dhe përfaqësimeve në media. Megjithatë, duke parë përmasat që po merr situata dhe mungesën e ndërhyrjes konkrete nga ana e institucionit tuaj, po ju parashtrojmë këto problematika edhe zyrtarisht dhe të përmbledhura përmes kësaj shkrese, së cilës i bashkëlidhen dokumente dhe raportime ilustruese që vërtetojnë një pjesë të fakteve të përmendura.

Për të gjitha sa më sipër, kërkojmë ndërhyrjen tuaj të menjëhershme për kthimin e menjëhershëm në ligjshmëri të procesit të votimit dhe administrimit të votës në shtetin grek, duke garantuar rregullshmëri, siguri dhe besueshmëri për çdo votë të shqiptarëve që jetojnë atje.