Ndalohet në Rinas biznesmeni Gani Manollari. Lajmi raportohet nga “Ora News, e cila shkruan se 41-vjeçari me pasaportë italiane është ndaluar një orë pas mesnatës së 16 tetorit ( Saktësisht ora 01:00 e 17 tetorit 2016)  në aeroportin “Nënë Tereza”.

Manollari dyshohet se i ka dhënë 18 mijë euro oficerit të policisë gjyqësore Fatos Lushi në këmbim të lirimit të një llogarie bankare të bllokuar prej 150 mijë eurosh.

Biznesmeni që filmoi oficerin e Policisë Gjyqësore, duke marrë 18 mijë euro kërkohej nga Prokuroria e Krimeve të Rënda për të dhënë deklarime në hetimin që ka nisur për skandalin.

Sipërmarrësi i ndërtimit, Gani Manollari, rezulton se prej muajsh ndodhet në Itali, ku edhe jeton e punon në biznesin e ndërtimit. Pas publikimit të videos që ai ka realizuar në bashkëpunim me emisionin “Stop” në TV “Klan”, ku biznesmeni i jep 18 mijë euro hetuesit të Prokurorisë, Krimet e Rënda nisën menjëherë hetimin, shkruan “Panorama”.

Vepra penale për të cilën po hetohet është ajo e “korrupsionit pasiv të ‘gjyqtarëve, prokurorëve dhe funksionarëve të tjerë të Drejtësisë’”.

Që prej datës 29 shtator 2016, dy prokurorët e çështjes te Krimet e Rënda kërkuan dëshminë e biznesmenit Manollari, por mësuan se ai ndodhej jashtë Shqipërisë.

Ai kishte dhënë ryshfet për zhbllokimin nga sekuestrimi të llogarisë së tij në të cilën ndodheshin 150 mijë euro të ardhura në Shqipëri nga Banka e Monakos më 27 gusht 2014.

Llogaria qëndroi e sekuestruar deri sa u bënë verifikimet përkatëse, për t’u liruar në fund të korrikut 2016, kohë kur edhe biznesmeni dha shumën e ryshfetit. Nga ana tjetër, çështja po hetohej nga prokurori Ardian Braho, i cili u përmend në videon e publikuar, por që në dëshminë e tij te Krimet e Rënda, ai ka hedhur poshtë të gjitha akuzat.

VIDEOJA E RYSHFETIT

Sipas hetimeve të Prokurorisë, videoja e dorëzimit të 18 mijë eurove është regjistruar në ditët e fundit të muajit korrik. Regjistrimi i videos është bërë nga të paktën dy kamera të montuara, njëra në makinën tip “Benz”, ku janë dhënë 18 mijë eurot dhe kamera tjetër e vendosur në trupin e personit që ka dhënë shumën e parave.

Ndërkohë mësohet se 150 mijë eurot në bankë janë liruar e tërhequr nga biznesmeni në muajin gusht, kohë kur prokurori Ardian Braho ka qenë me leje. Një dyshim tjetër që po verifikohet nga Prokuroria është origjina e parave të dhëna ryshfet, pasi disa ditë para se të kryente pagesën, qytetari thotë se kishte vetëm 3 mijë euro dhe nuk kishte të tjera.

Nga ana tjetër, nga pamjet në video, vihet re se 15 mijë eurot e tjera i janë dhënë oficerit Fatos Lushi nga qytetari me fasheta të bankës prej nga ishin tërhequr.