VOAL

VOAL

Please Wait ...
0%

Yulia Skripal shpreson se do të kthehet në Rusi

By | May 23, 2018

Komentet

Airbus kërcënon se për shkak të Brexit do të largohet nga Britania

Kompania e cila në 25 lokacione në Britani ka punësuar rreth 14 mijë njerëz thotë se do të “shqyrtojë praninë e saj afatgjate në vend”

LONDËR – Gjiganti i aviacionit Airbus ka kërcënuar se do të largohet nga Britania e Madhe nëse vendi largohet nga Bashkimi Evropian pa arritur paraprakisht një marrëveshje rreth veprimtarisë së saj në të ardhmen.

Kompania e cila në 25 lokacione në Britani ka punësuar rreth 14 mijë njerëz thotë se do të “shqyrtojë praninë e saj afatgjate në vend”, nëse nuk arrihet një marrëveshje.

Airbus gjithashtu thekson se propozimi i marrëveshjes aktuale të tranzicionit, i cili vazhdon deri në dhjetor të vitit 2020 është tepër i shkurtër që kompania të riorganizojë zinxhirin e saj të furnizmit.

Kumtesa u publikua në bazë të vlerësimit të kanosjes së kompanisë nga Brexit-i, e cila u publikua të enjten.

“Në të gjitha skenarët Brexit ka pasoja serioze negative për industrinë e aviacionit të Britanisë së Madhe dhe Airbusit, prandaj duhet përshpejtuar masat urgjente lehtësuese”, ka thënë Tom Williams, drejtori kryesor operativ i avionëve komercial Airbus. aa

Kremlini: Këshilltari amerikan John Bolton planifikon vizitë në Moskë

Zëdhënësi i Kremlinit, Dmitry Peskov

Kremlini ka thënë se Këshilltari amerikan për Siguri Kombëtare John Bolton planifikon të vizitojë Moskën, pa ofruar detaje për udhëtimin.

“Deri tash e dimë vetëm se do të ndodhë takimi. Kjo është e gjitha që mund të themi tani”, ka thënë Dmitry Peskov, zëdhënës i presidentit rus, Vladimir Putin.

Më herët gjatë ditës, agjencia ruse e lajmeve, Interfax ka cituar disa burime në Uashington të kenë thënë se Bolton pritet të vizitojë Moskën javën e ardhshme, për t’u përgatitur rreth takimit të mundshëm në mes të Putinit dhe homologut të tij amerikan, Donald Trump.

Në po të njëjtën kohë, ministri i Jashtëm rus, Sergei Lavrov, ka thënë se Rusia është e “gatshme për të kontaktuar” me Shtetet e Bashkuara.

“Nëse arrihet marrëveshje për zhvillimin e takimit të nivelit të lartë, do ta bëjmë të ditur”, ka thënë Lavrov.

Më 9 qershor, Peskov ka thënë se presidenti rus dhe ai amerikan kanë diskutuar detaje të takimit të tyre, në një bisedë telefonike në muajin mars, duke përmendur Vjenën si vend të mundshëm për takim.

Presidenti amerikan pati thënë në muajin mars se do të takohej me Putinin, mirëpo nga ajo kohë marrëdhëniet në mes të Uashingtonit dhe Moskës janë përkeqësuar për shkak të konfliktit në Siri dhe helmimit të ish-spiunit rus, Sergei Skripal në Britani.

Algjeria ndal internetin që nxënësit të mos kopjojnë në provime

Qeveria e Algjerisë ka ndalur internetin në të gjithë vendin me qëllim që nxënësit të mos kopjojnë në provimet e shkollave të mesme.

Sipas lajmit të BBC-së, ministrja e Arsimit, Nouria Benghabrit, për mediat deklaroi se gjatë provimeve në shkollat e mesme në datat 20-25 qershor, për çdo sesion nga një orë do të ndalet qasja në shërbimin e internetit në mbarë vendin.

Ajo theksoi se këtë masë e kanë marrë për të parandaluar përpjekjet për kopjim dhe mashtrim të bëra gjerësisht në vitin 2016. Benghabrit tha se gjatë provimeve në mbarë vendin do të ndalohet qasja edhe në rrjetin social, Facebook.

Pritet që në provime të hyjnë mbi 700 mijë nxënës. aa

Kanada, vitin e kaluar 4.000 të vdekur nga mbidoza e opioidit

Dr. Theresa Tam tha se në vitin 2016 numri i të vdekurve nga mbidoza e opioidit në Kanada ka qenë rreth 3.000 mijë, por që ky numër në vitin 2017 është rritur në mbi 4.000

OTTAWA – Vitin e kaluar nga mbidoza e opioidit në Kanada kanë vdekur mbi 4.000 persona.

Drejtoresha e Agjencisë së Shëndetit Publik në Kanada, Dr. Theresa Tam deklaroi se në vitin 2016 numri i të vdekurve nga mbidoza e opioidit në Kanada ka qenë rreth 3.000 mijë, por që ky numër në vitin 2017 është rritur në mbi 4.000.

Ajo tha se 72 për qind e vdekjeve që burojnë nga opioidi janë shkaktuar nga ilaçet e grupit fentanil. Tam thotë se Ministria e Shëndetësisë po planifikon që të vendosë kufizime serioze për dhënien e opioidëve nga mjekët, të cilat shiten me recetë.

Çka është opioidi dhe fentanili?

Opioidët janë një grup ilaçesh që mund të përdoren si qetësues por edhe si drogë.

Ndërsa fentanili, i cili është zbuluar në fillim të viteve 1950 në Belgjikë, si rezultat i hulumtimeve mjekësore, njihet si një drogë 80 fish më e fortë se morfini. Fentanili në fillim të viteve 1990 ka filluar të përdorej në mjekësi për trajtim, meqë është një qetësues efektiv dhe përdoret edhe për anestezion. aa

Numri i të zhvendosurve me forcë në botë arrin në 68.5 milionë

Sipas raportit “Trendet Globale 2017” të UNHCR-së, numri i personave të zhvendosur me forcë për shkak të luftrave, dhunës dhe persekutimit në vitin 2017 është rritur për rreth tre milionë, për të shkuar në 68.5 milionë

GJENEVË – Komisariati i Lartë për Refugjatë i Kombeve të Bashkuara (UNHCR) në raportin “Trendet Globale 2017” njoftoi se numri i të zhvendosurve me forcë për shkak të luftrave, dhunës dhe persekutimit vitin e kaluar ka arritur një shifër rekord prej 68.5 milionë njerëzish.

Raporti i shpalosur në një konferencë shtypi në zyrën e OKB-së në Gjenevë ka treguar se krizat e refugjatëve në botë kanë prekur në shumicë dërrmuese shtetet në zhvillim, ndërsa shkalla e pranimit të refugjatëve nga ana e shteteve të pasura është zvogëluar në mënyrë dramatike.

Nacionalizmi në rritje dhe rrymat e izolacionizmit në shtetet e zhvilluara kanë shkaktuar rënie prej 56 për qind në programin e rivendosjes së OKB-së, e cila vitin e kaluar ka arritur të vendosë në shtete të tjerë vetëm rreth 100 mijë refugjatë.

Sipas raportit, numri i personave të zhvendosur me forcë për shkak të luftrave, dhunës dhe persekutimit në vitin 2017 është rritur për rreth tre milionë, për të shkuar në 68.5 milionë. Kjo shifër përbëhet nga 25,4 milionë refugjatë dhe 43,1 milionë persona të zhvendosur brenda vendit.

Nga shifra totale, 16,2 milionë persona janë zhvendosur për herë të parë. Sipas shifrave, vitin e kaluar mesatarisht 44.400 persona në ditë ose një person në çdo dy sekonda janë shkëputur nga shtëpia e tyre.

Numri i të zhvendosurve në pesë vitet e fundit me radhë ka tejkaluar shifrat e viteve të mëparshme.

Rol të rëndësishëm në këtë rritje kanë pasur mbi 700 mijë myslimanë të Arakanit të ikur nga Mianmari në Bangladesh. Shkak tjetër në rritje kanë qenë edhe qindra mijëra njerëz që kanë ikur nga lufta civile në Sudanin Jugor dhe janë strehuar në vendet fqinje.

Siria, kryesuese në rritjet e shifrave

Lufta civile në Siri që vazhdon nga viti 2011 ka vazhduar të jetë lufta që ka shkaktuar numrin më të madh të refugjatëve në botë. Për shkak të luftës, 6,3 milionë njerëz janë përpjekur të strehohen në vende të tjera.

Pas Sirisë, Afganistani radhitet e dytë me 2,6 milionë refugjatë, ndërsa pas tij vijnë Sudani Jugor me 2,4 milionë njerëz, refugjatët e Arakanit me 1,2 milion dhe somalezët me 987 mijë.

Turqia, vendi që ka pritur më së shumti refugjatë

Sipas raportit, Turqia është vendi që ka pranuar numrin më të madh të refugjatëve në botë. Sipas OKB-së, Turqia strehon 3,5 milionë refugjatë, shumica sirianë.

Vendi që strehon numrin më të madh të refugjatëve pas Turqisë është Pakistani me 1,4 milionë njerëz, shumica të ardhur nga Afganistani.

Pas tyre radhitet Uganda me 1,4 milionë refugjatë, ndërsa e katërta është Libani, i cili strehon një milion refugjatë, shumica nga Siria dhe Iraku, ndërsa pason Irani me 979.400 refugjatë të pranuar.

Në listën e vendeve që strehojnë numrin më të madh të refugjatëve radhiten edhe Gjermania me 970.400 refugjatë, Bangladeshi me 932.200 dhe Sudani me 906.600.

Qasje gjithëpërfshirëse për zhvendosjet e detyruara

Fakt tjetër që tërheq vëmendje në raport është se 52 për qind e personave të zhvendosur me forcë janë fëmijë të moshës nën 18 vjeç. Ndërkohë, 178.800 fëmijë janë të ndarë nga familja dhe pa shoqërues.

Filippo Grandi, Komisari i Lartë për Refugjatët i OKB-së, në deklaratën e tij rreth raportit theksoi se shtetet dhe komunitetet e përballura me krizën e refugjatëve janë lënë në duar të fatit dhe se komuniteti ndërkombëtar ka qëndruar indiferent.

Grandi nënvizoi nevojën për një qasje të re dhe më gjithëpërfshirëse në lidhje me zhvendosjet e detyruara.

Duke iu referuar edhe dramës së muslimanëve të Arakanit, Grandi rikujtoi se qindra mijëra persona të detyruar të strehohen në Bangladesh për shkak të sulmeve të ushtrisë dhe budistëve fanatikë, përballen me persekutim prej dhjetra vitesh, privohen nga e drejta për shtetësi dhe përjashtohen.

Më 20 qershor, Ditën Botërore të Refugjatëve përkujtohen njerëzit e ikur dhe shkëputur nga shtëpitë e tyre për shkak të dhunës dhe persekutimit.

UNHCR një ditë para 20 qershorit çdo vit publikon raportin “Trendet Globale”, duke u bazuar në të dhëna nga partneri i tij “Qendra për Monitorminin e Zhvendosjeve të Brendshme” dhe qeveritë. aa

Shtohet pasuria e njerëzve më të pasur në botë, arrin 70 trilionë dollarë

SAN FRANCISKO – Pasuria kumulative e milionerëve dhe miliarderëve të botës, në vitin 2017 është rritur me 10 për qind, duke arritur në 70.2 trilionë dollarë.

Viti i kaluar shënoi herën e parë që pasuria e njerëzve më të pasur në botë të ketë arritur në 70 trilionë dollarë, ndërkohë që ishte rritja e dytë më e madhe vjetore që nga viti 2011.

Hulumtimi në fjalë u publikua nga kompania konsulente e Capgemini në raportin e saj vjetor të pasurisë botërore.

Në nivel global, në vitin 2017 botës i janë shtuar 1.6 milionë “individë me vlerë të lartë neto” (HNWI), të cilët përshkruhen si njerëz me asete mbi një milion dollarë.

Kompania konsulente beson se në vitin 2025, pasuria e njerëzve më të pasur do të tejkalojë 100 trilionë dollarë.

Capgemini beson se rritja e tregjeve globale, është arsyeja kryesore që njerëzit më të pasur rritën pasuritë e tyre në mënyrë të shpejtë.

“Individë me vlerë të lartë neto, vitin e kaluar për të dytin vit radhazi, shënuan 20 për qind profit nga investimet e tyre”, deklaroi presidenti i kompanisë Capgemini, Anirban Bose.

Mbi 61 për qind e personave HNWI jetojnë në SHBA, Japoni, Gjermani dhe Kinë. Nga milionerët e rinj gjatë vitit 2017, 62 për qind jetojnë në këto shtete.

Për të përpiluar raportin, Capgemini anketoi 2.600 milionerë dhe miliarderë të cilët jetojnë në 19 rajone të ndryshme. aa

Presidenti kinez Xi takohet me udhëheqësin koreanoverior Kim Jong Un

Presidenti kinez Xi Jinping i tha të martën kreut të Koresë së Veriut Kim Jong Un se ai shpreson që Peniani dhe Uashingtoni të mund të zbatojnë plotësisht rezultatin e samitit të javës ku Kim Jong Un premtoi të punojë drejt çnuklearizimit në këmbim të garancive të sigurisë nga SHBA.

Takimi i nivelit të lartë në Singapor shënoi një “hap të rëndësishëm drejt zgjidhjes politike të çështjes bërthamore të Gadishullit Korean”, tha zoti Xi Jinping Xi gjatë takimit në Pekin me udhëheqësin koreanoverior.

Kina shpreson se Koreja e Veriut dhe SHBA do të mund të zbatojnë mirë rezultatet e arritura në Singapor,” tha zoti Xi. Kina do të luajë si gjithmonë një rol konstruktiv” në këtë proces, tha ai.

Vizita dy ditore e Kim Jong Unit në Kinë nuk ishte paralajmëruar më parë, por pritej si pjesë e traditës së fqinjëve komunistë për t’i raportuar njëri-tjetrit rreth zhvillimeve të rëndësishme.

Rusia “rinovon” bunkerin e armëve bërthamore?!

Fotografi satelitore, të publikuara së voni, sugjerojnë se Rusia ka rindërtuar një bunker të magazinimit të armëve në Kaliningrad – enklavë e saj në Detin Baltik – dhe se po konsideron vendosjen e armëve bërthamore atje.

Fotografitë e publikuara nga Federata e Shkencëtarëve Amerikanë janë burimi i fundit i shqetësimit për vëzhguesit ushtarakë perëndimorë, në lidhje me kapacitetet e Rusisë në rajon.

Hans Kristensen, ekspert bërthamor nga Federata e Shkencëtarëve Amerikanë, tha se fotografitë tregojnë se bunkeri i armëve, i vendosur rreth 50 kilometra nga kufiri me Poloninë, është në rinovim qysh në vitin 2016.

“Me sa di unë, ai është vendi i vetëm i magazinimit të armëve bërthamore në rajonin e Kaliningradit”.

“Punimet e fundit padyshim se ngrenë pyetje se cili është statusi operacional i lokacionit. Imazhet satelitore nuk japin përgjigje përfundimtare për këto pyetje”, tha Kristensen.

Kaliningrad

Sipas tij, politikë e deklaruar e Rusisë është se të ashtuquajturat sisteme të armëve jostrategjike, si armët e vogla dhe me rreze të shkurtër veprimi, ruhen në një strukturë brenda kufijve kryesorë të Rusisë. Rinovimi i lokacionit në Kaliningrad, në Kulikovo, do të thotë se ai mund të furnizohet me raketa apo armë të tjera shpërthyese në rast krize.

Kristensen tha se nuk është e qartë nëse ka koka bërthamore në këtë lokacion ose nëse Rusia planifikon të vendosë të tilla atje – gjë që do t’i rriste tensionet me NATO-n.

Lokacioni i Kaliningradit e bën atë veçanërisht problematik për planifikuesit ushtarakë të NATO-s. Edhe armët me rreze të shkurtër veprimi, të vendosura të këtë lokacion, do t’i vinin në rrezik disa qytete anëtare të NATO-s, si Varshava dhe Berlini.

Në fund të janarit, komandanti ushtarak në rajonin e Kaliningradit, Anatoly Gorodetsky, ka thënë se inxhinierët kanë përfunduar ndërtimin e infrastrukturës së nevojshme për të strehuar sistemin e avancuar raketor Iskander-M.

Disa ditë më vonë, Vladimir Shamanov, një ish-komandant ushtarak, i cili tani kryeson Komitetin e Mbrojtjes në Dhomën e Ulët të Parlamentit të Rusisë, i bëri jehonë kësaj vërejtjeje dhe tha se sistemet Iskander-M kanë qenë vërtet të dislokuara. Ministri i mbrojtjes i Lituanisë gjithashtu e konfirmoi vendosjen.

Zyrtarët e Shteteve të Bashkuara dhe të NATO-s kanë thënë se vendndodhja e këtyre sistemeve të raketave është destabilizuese.

Shtetet e Bashkuara thonë se për shkak të gamës së tyre, armët Iskander përbëjnë shkelje të Traktatit të Forcave Bërthamore me Rreze të Ndërmjetme, i nënshkruar në vitin 1987.

Ndryshe nga NATO, ushtria ruse, sidomos flota e saj, ka mbajtur shumë prej sistemeve të saj të armatimit taktik, me kapacitet bërthamor.

Derisa tensionet e saj me Perëndimin janë rritur, për shkak të ndërhyrjes së Rusisë në luftërat në Ukrainë dhe në Siri, presidenti rus, Vladimir Putin, ka shpalosur një brez të ri të armëve bërthamore, duke thënë se ato tejkalojnë secilën mbrojtje perëndimore.

Përgatiti: Valona Tela

Ngordh orangutangu më i vjetër në botë

Orangutangu më i vjetër në botë Sumatran ngordhi në një kopsht zoologjik të Australisë në moshën 62-vjeçare, duke lënë pas 54 pasardhës.

Puan, e përshkruar si “zonja e madhe e vjetër” e kopshtit Perth, ngordhi si pasojë e ndërlikimeve që lidhen me moshën.

Ajo ka qenë në këtë kopsht qysh në vitin 1968 dhe është njohur zyrtarisht nga Libri i Rekordeve Guiness si specia më e vjetër e llojit të vet në vitin 2016.

Orangutangët Sumatran rrallë arrijnë moshën 50 vjeç.

Puan, e cila besohet se ka lindur në një xhungël në Sumatra të Indonezisë në vitin 1956, ka lënë një “trashëgimi të pabesueshme” në SHBA, Evropë dhe gjetkë, thanë zyrtarë të kopshtit zoologjik.

Google do të investojë 550 milionë dollarë në JD.com

Siç bën të ditur Google, pritet që deri në vitin 2025, konsumatorët në Azinë Juglindore të shpenzojnë rreth 88.1 miliardë dollarë

SEUL – Gjiganti teknologjik Google, sot bëri të ditur se do të investojë 550 milionë dollarë në kompaninë JD.com, që është konkurenti kryesor i kompanisë Alibaba.

Google, synon të rrisë praninë e saj në tregun aziatik të tregtimit online, për çka në kuadër të partneritetit me JD.com, është paraparë që produktet e kësaj të fundit të shfaqen në shitoren online të Google, që do t’i mundësojë qasje jashtë Azisë, ndërkohë që edhe Google do të ketë në shfrytëzim zinxhirin kinez të furnizimit me mallra, përfshirë logjistikën dhe teknologjinë e JD.com.

Google tha se përmes partneritetit të dakorduar, kompanitë në fjalë do të tentojnë të gjejnë zgjidhje të reja për përmirësimin e ofertës së blerjes online.

Mbetet e paqartë nëse vallë ky partneritet, paraqet tentativë të kompanisë amerikane për të depërtuar në tregun kinez, ku Google ka të bllokuar shërbimet e saj kryesore, përshirë e-postën dhe kërkuesin.

Siç bën të ditur Google, pritet që deri në vitin 2025, konsumatorët në Azinë Juglindore të shpenzojnë rreth 88.1 miliardë dollarë.

JD.com është kompania e dytë më e madhe kineze e tregtisë, pas kompanisë Alibaba.

Pjesë e marrëveshjes është që Google të marrë 27.1 milionë aksione të JD.com të klasit A.

Hawaii, arrestohen personat që dëshironin të vëzhgonin llavën vullkanike

Dhjetra persona të cilët kanë hyrë në zonat e mbyllura për publikun për të vëzhguar ose fotografuar llavën e vullkanit Kilauea e cila u aktivizua në shtetin amerikan Hawaii janë arrestuar.

Sipas “Hawaii News Now”, në ishullin ku llava ka arritur oqeanin, pavarësisht barrikadës së policisë dhe kushteve të rrezikshme, vazhdon të depërtojë në zonat e bllokuara nga zyrtarët.

Zyrtarët nga Administrata e Tokës dhe Burimeve Natyrore, njoftuan se që nga fillimi i shpërthimeve rreth 40 persona të cilët qarkullojnë në zonat ku rrjedh llava janë arrestuar.

Sipas rregullores së publikuar në fillim të këtij muaji nga guvernatori i Hawaiit, David Ige, janë rritur gjobat për ata që qarkullojnë në këto zona.

Ata që kapen në këto zona mund të gjobiten deri në 5.000 dollarë ose deri në 1 vjet burgim.

Që nga fillimi i aktivizimit të vullkanit Kilauea nga rajoni janë evakuuar rreth 2.000 persona në vende të sigurta.

Në vullkanin Kilauea, një nga vullkanet më aktivë në botë, ndodhin shpërthime që nga viti 1983.

Autoritetet kanë paralajmëruar banorët t’i braktisin shtëpitë e tyre për shkak të rritjes së shpërthimeve në vullkan dhe rrjedhjes së madhe të llavës javën e fundit. Policia ka njoftuar se do të pasojnë arrestime për ata që refuzojnë t’i braktisin shtëpitë. aa

FOTOT – Oktapodë dhe krijesa deti “bien” nga qielli

Foto të pabesueshme janë shkrepur në Kinë, teksa tregojnë oktapodë dhe krijesa të tjera të detit që “bien” nga qielli, pas një stuhi të madhe.

Ngjarja ndodhi në qytetin bregdetar Qingdao, në provincën Shandong të Kinës lindore, të mërkurën.

Edhe pse imazhet mund të duken të pabesueshme, por një tornado e fuqishme i tërhoqi nga deti, duke bërë që ato të “fluturonin” në ajër.

Një fenomen i ngjashëm ka ndodhur në Meksikë në 2017-ën, kur peshqit ranë “si shi” nga qielli në qytetin e Tampico si edhe një “rrebesh” me peshq në qytetin e Kerala, Indi në 2008-ën.

Agjencia kombëtare e motit të Kinës, konfirmoi se kishte një numër të krijesave të detit të hedhura në tokë nga një vorbull uji.