VOAL

VOAL

Please Wait ...
0%

Samsung promovon smartphone-n e ri të palosshëm

By | November 8, 2018

Komentet

Siria kërcënon të godasë aeroportin e Tel Avivit

Damasku ka kërcënuar se do i kundërpërgjigjet  agresionit izraelit dhe shumë shpejt do synojë aeroportin e Tel Avivit, ndërkohë kërkohet edhe ndërhyrja e  Këshilli të Sigurimit të OKB-së, që t’i japë fund ndërhyrjeve të IDF-it në hapësirën ajrore siriane.

Ky reagim i Sirisë vjen si hakmarrje ndaj sulmeve izraelite në qiellin sirian dhe atyre të kryera në afërsi  të Aeroportit Ndërkombëtar të Damaskut.

“A nuk është koha tani që Këshilli i Sigurimit të OKB-së të ndalë agresionet e përsëritura izraelite në territoret e Republikës Arabe të Sirisë?”, u shpreh përfaqësuesi i përhershëm i Sirisë në OKB, Dr Bashar al-Jaafari.

Sulmet ajrore kundër objekteve të dyshuara iraniane në afërsi të aeroportit më të ngarkuar të Sirisë janë bërë një normë për Forcat e Mbrojtjes të Izraelit (IDF), ish-shefi i stafit të së cilës haptas rrëfeu muajin e kaluar për të drejtuar një fushatë bombardimi në shkallë të gjerë në Siri për vite me rradhë.

Përveç shkaktimit të viktimave dhe dëmtimeve materiale nga sulmet e tyre “pranë të përditshmes”, misionet luftarake izraelite në Siri kanë kërcënuar në mënyrë të përsëritur fluturimet që veprojnë mbi vendin e rrënuar nga konflikti.

(BalkanWeb)

Brexit, Partia Laburiste kërkon votim për një referendum të dytë

LONDËR – Në një amandament të dorëzuar mbrëmë, Partia Laburiste e opozitës së Britanisë i ka bërë thirrje parlamentit të mbaj një votim nese mbështetet ose jo një referendum i dytë për Brexit-in.

Amandamenti shënon një ndryshim të rëndësishëm në politikën e partisë në lidhje me një votim të dytë, ndërsa njëkohësisht synon të përjashtojë një Brexit pa marrëveshje dhe t’i japë parlamentit pushtet për të shqyrtuar planet alternative të propozuara nga deputetët për marrëveshjen e kryeministres Theresa May për tërheqje.

Propozimi përfshin “një marrëveshje alternative Brexit që mbron vendet e punës, standardet e jetesës dhe të drejtat e punëtorëve dhe starndardet mjedisore, duke përfshirë një union doganor të plotë me të drejtë fjale për Mbretërinë e Bashkuar dhe një marrëveshje të fuqishme të tregut të vetëm”.

Po ashtu, “opsioni i një votimi publik për një marrëveshje ose propozimi mbi marrëdhëniet e ardhshme të Mbretërisë së Bashkuar me Bashkimin Evropian (BE)” duhet të shqyrtohet nga parlamenti duke ndërprerë bllokimin e Brexit-it.

Amandamenti theksoi politikën e Partisë Laburiste për një opsion të emëruar si “Së pari punësime Brexit”, i cili u jep përparësi të drejtave të punëtorëve, standardeve tregtare dhe mbrojtjeve mjedisore që janë të harmonizuara me BE-në. Ai po ashtu mbështet politikën e konferencës së laburistëve për “mbajtjen e të gjitha opsioneve në tryezë”, duke përfshirë një votim publik.

Kreu i opozitës, Jeremy Corbyn, tha se, “Theresa May ka treguar sot se ajo nuk ka Plan B pas refuzimit gjithëpërfshirës të marrëveshjes së saj të bllokuar nga deputetët javën e kaluar. Kryeministrja po refuzon të ndryshojë ‘linjat e saj të kuqe’ dhe të pranojë realitetin e kërcënimit të largimit pa marrëveshje”.

“Amandamenti ynë do t’i lejojë deputetët të votojnë për opsionet për t’i dhënë fund këtij bllokimi të Brexit-it dhe për të parandaluar kaosin pa marrëveshje. Është koha që plani alternativ i laburistëve të marrë fazën qendrore, duke i mbajtur të gjitha opsionet në tryezë, përfshirë mundësinë e një votimi publik”, shtoi Corbyn.

Amandamenti i propozuar thekson përpjekjen e udhëheqjes në mbylljen e ndarjeve midis zyrtarëve të lartë që janë në mosmarrëveshje, si Corbyn, i cili është skeptik për një referendum të dytë dhe për sekretarin e Brexit-it, Keir Starmer, i cili është i hapur për idenë e votimit të popullit.

Javën e kaluar, 71 deputetë laburistë dhe 13 anëtarë të Parlamentit Evropian deklaruan mbështetjen e tyre për një referendum të dytë, duke shtuar presionin mbi Corbyn-in dhe udhëheqjen për ta mbështetur atë. Megjithatë, Corbyn e ka bërë të qartë se mbajtja e zgjedhjeve të përgjithshme është përparësia e tij kryesore.

Partia Laburiste tani po punon për një marrëveshje alternative të Brexit-it që do të komandojë mbështetjen e partive në Parlament pas humbjes së votës për mosbesim në përpjekjen për të rrëzuar kryeministren May të mërkurën e kaluar.

Pas një humbjeje historike të javës së kaluar në parlament, kur deputetët votuan me një shumicë të madhe, 432 kundrejt 202 votave, kundër marrëveshjes së saj për Brexit, May më 29 janar do të paraqesë “Planin B” në parlament, i cili do të përballet me një votim nga deputetët.

Mbretëria e Bashkuar është vendosur të largohet nga BE-ja më 29 mars të vitit 2019. aa

Izraeli konfirmon sulmin ndaj forcave iraniane në Siri

Ushtria izraelite ka konfirmuar më 21 janar se ka sulmuar disa pika të ushtrisë iraniane në Siri, disa orë pasi forcat izraelite kanë kryer sulme ajrore afër Aeroportit Ndërkombëtar të Damaskut.

Deklarata është publikuar pak kohë pasi raketat izraelite për mbrojtje kanë ndaluar një raketë që ishte nisur nga Lartësitë Golan, në kohën e nisjes së sulmeve të Izraelit.

“Ne kemi nisur sulm ndaj iranianëve në territorin sirian”, ka thënë ushtria izraelite përmes një deklarate.

“Ne paralajmërojnë Forcat e Armatosura Siriane që synojnë të dëmtojnë forcat apo territorin izraelit”.

Megjithatë, kjo deklaratë nuk ka ofruar të dhëna për sulmet ajrore.

Ndërkohë, Vëzhguesi Sirian për të Drejtat e Njeriut, me bazë në Britani ka raportuar për sulmet ajrore me raketa afët Aeroportit të Damaskut dhe në zonat afër kryeqytetit, duke thënë se raketat kanë qëlluar një depo të armëve të forcave iraniane dhe grupit militant shiit, Hezbollah.

Ky grup ka raportuar për 11 viktima në këtë incident.

Izraeli vazhdimisht është kufizuar në konfirmimin publik të operacioneve ushtarake në Sirinë fqinje, me qëllim që të mënjanojë përfshirjen më të madhe në luftën tetëvjeçare në këtë shtet.

Ushtria siriane ka thënë se Izraeli ka kryer sulme ajrore intensive pasi raketat janë nisur në mënyrë të njëpasnjëshme më 21 janar.

Sipas kësaj ushtrie, sistemet ajrore për mbrojtje kanë shkatërruar shumicën e raketave para se të arrijnë shënjestrat, derisa media shtetërore siriane ka thënë se sistemet ajrore kanë ndaluar një sulm ajror izraelit në Aeroportin e Damaskut.

Televizioni shtetëror sirian ka thënë se Izraeli ka nisur gjashtë raketa në zonën afër Aeroportit të Damkaskut, mirëpo pesë prej tyre janë rrëzuar dhe një tjetër ka rënë në një zonë të pabanuar.

Agjencia shtetërore e lajmeve në Rusi, RIA Novosti ja cituar më 21 janar Qendrën Kombëtare për Menaxhimin e Mbrojtjes të ketë thënë që më shumë se 30 raketa izraelite dhe bomba janë rrëzuar.

Moska po ashtu ka thënë se katër ushtarë sirianë janë vrarë në incident dhe gjashtë tjerë janë plagosur.

“Më 21 janar, 2019, në mes të orës 2:11 shë 2:56 të mëngjesit, Izraeli ka kryer tri sulme me territorin siriane nga drejtimet perëndimore, jugperëndimore dhe jugore”, ka thënë ushtria ruse përmes një deklarate.

Rusia dhe Irani i kanë thënë mbështetje vendimtare ushtrisë së presidentit sirian, Bashar al-Assad në luftën që ka lënë të vrarë mijëra persona dhe ka zhvendosur nga shtëpitë mijëra të tjerë.

Izraeli është zotuar për t’i pamundësuar Iranit përfshirjen në konfliktin në Siri, duke kryer qindra sulme ajrore kundër shënjestrave iraniane dhe atyre ku gjendet Hezbollahu.

Përgatiti: Krenare Cubolli

SHBA dërgon luftanije në Detin e Zi për “operacione të sigurisë”

Marina amerikane tha se luftanija USS Donald Cook është nisur drejt Detit të Zi për të kryer operacione të sigurisë detare dhe për të përmirësuar stabilitetin detar me aleatët e NATO-s në rajon.

Luftanija amerikane, që ka kapacitet për të shkatërruar raketa, ishte duke lundruar në Ngushticën e Dardaneleve në Turqi më 19 janar, kur u nis drejt Detit të Zi, njoftoi marina amerikane përmes një deklarate.

“Marina amerikane operon në Detin e Zi në përputhje me Konventën e Montreuksit dhe ligjit ndërkombëtar”, thuhet në njoftim.

Autoritetet amerikane nuk dhanë ndonjë datë se kur luftanija do të arrijë në Detin e Zi, por agjencia ruse e lajmeve TASS, citoi Qendrën e Kontrollit të Ministrisë së Mbrojtjes së Rusisë të ketë thënë se është duke “vëzhguar lëvizjet” e luftanijes USS Donald Cook, që sipas konventës ndërkombëtare, mund të qëndrojë në Detin e Zi jo më shumë se 21 ditë.

Tensionet në rajon janë rritur që nga 25 nëntori, kur forcat ruse të sigurisë kapën tri anije ruse pranë Ngushticës së Kërçit, që lidh Detin e Zi me Detin Azov.

Moska pretendon se anijet ukrainase kishin hyrë në mënyrë të paligjshme në ujërat territoriale ruse pranë Krimesë, gadishullit ukrainas, të cilin Moska e aneksoi më 2014. Rusia po mban 24 marinarë ukrainas, të cilët mund të gjykohen nën akuza për kalim të jashtëligjshëm të kufirit.

Shtetet e Bashkuara, Bashkimi Evropian dhe vende të tjera Perëndimore, kanë bërë thirrje për lirimin e tyre.

“Shtetet e Bashkuara dhe Marina amerikane qëndrojnë pranë aleatëve në mbrojtjen e interesave të përbashkëta në rajon dhe stabilitetit detar”, tha komandanti Matthew J.Powel, i cili është oficer komandues i Donald Cook.

“Prania jonë në Detin e Zi do të tregojë ndërveprimin e Marinës në ndjekjen e objektivave të përbashkëta të sigurisë, duke bërë të mundur që të reagojmë në mënyrë efektive ndaj krizave në të ardhmen ose të pengojmë agresionin”, shtoi komandanti Powel.

Këshilltari për siguri kombëtare i SHBA-së, John Bolton në dhjetorin e vitit të kaluar kishte deklaruar se nuk do të ketë takim ndërmjet presidentit amerikan, Donald Trump dhe atij rus, Vladimir Putin, derisa Moska të mbajë anijet dhe marinarët e Ukrainës.

Rusia mori nën kontroll Gadishullin ukrainas të Krimesë, pasi presidenti ukrainas Viktor Yanukovych u largua nga pushteti, pas protestave pro-evropiane në shkurtin e vitit 2014.

Qeveria e Putinit dërgoi trupa në gadishulli, mori nën kontroll ndërtesat kryesore dhe organizoi një referendum, që u konsiderua i paligjshëm nga të paktën 100 shtete anëtare të Kombeve të Bashkuara.

Rusia po ashtu ka nxitur trazira dhe ka mbështetur kundërshtarët e Kievit në lindje të Ukrainës, ku më shumë se 10,300 persona janë vrarë që prej se ka nisur konflikti në prill të vitit 2014.

Gjykata Ndërkombëtare për Krime në nëntor të vitit 2016 vendosi se luftimet në Ukrainën Lindore janë “një konflikt i armatosur ndërkombëtar ndërmjet Ukrainës dhe Federatës Ruse”.

Përgatiti: Mimoza Sadiku

Valë rekorde e të nxehtit përfshin Australinë

Vala e nxehtë ka nisur qysh të shtunën, duke shkaktuar vdekjen e kafshëve të egra, zjarre dhe shtim të pacientëve në spitale.

Byroja e Meteorologjisë në Austriali tha se temperatura në ditë arrin në 40 gradë Celsius.

Në qytetin Nuna në Nju Sauth Uells, temperatura arriti në 35.9 gradë natën.

Kjo është temperatura më e lartë minimale e regjistruar ndonjëherë në Australi, tha Byroja e Meteorologjisë.

Parashikuesit po i krahasojnë kushtet me valën më të madhe të nxehtësisë në Australi që është regjistuar në vitin 2013, kur temperatura ka shënuar 39 gradë Celsius për shtatë ditë rresht.

Dita më e nxehtë për Australinë tash për tash mbetet 7 janari, 2013, kur mesatarja kombëtare e temperaturës ka qenë 40.3 gradë Celsius.

Dy avionë bombardues rusë përplasen në stërvitje

MOSKË – Dy avionë bombardues rusë të tipit Su-34 janë përplasur në qiell gjatë një fluturimi trajnues këtë mëngjes.

Ministria ruse e Mbrojtjes bëri të ditur se incidenti ndodhi në Lindjen e Largët të Rusisë mbi Detin e Japonisë, përderisa avionët po praktikonin manovrime. Ministria theksoi se avionët u afruan ngushtë duke manovruar, gjë që shkaktoi përplasjen.

“Avioni An-12 dhe dy helikopterë kërkimi dhe shpëtimi Mi-8 po kërkojnë për pilotët në zonë. Avionët kryen fluturimin e stërvitjes pa municion”, tha Ministria e Mbrojtjes.

Su-34 është një bombardues multifunksional që mund të sulmojë shënjestra në ajër, tokë, det dhe sipërfaqe. Ai ka një ekuipazh prej dy personash.

Britani, më 29 janar do të votohet për “Planin B” rreth Brexitit

LONDËR – Në Britani më 29 janar do të votohet në Parlament e Britanisë “Plani B” i qeverisë në lidhje me çështjen e Brexitit.

Zyrtarë të qeverisë britanike kanë bërë të ditur se më 29 janar do të votohet “Plani B Brexit” që do të paraqitet në parlament nga kryeministrja Theresa May.

Në votimin e zhvilluar ditën e martë në Parlamentin e Britanisë marrëveshja Brexit që May arriti me BE-në u refuzua me shumicë votash.

Sipas vendimit që parlamenti ka marrë më parë, May “Planin B” duhet ta ndajë brenda 3 ditëve me deputetët.

May, e cila po zhvillon një seri bisedimesh me partitë opozitare, “Planin B” që do të përgatisë pritet të paraqesë gjatë fjalimit që do të mbajë ditën e hënë në parlament. aa

Kremlini hedh poshtë pretendimet se Trump është agjent rus

Flamuri i SHBA-së dhe ai i Rusisë.

Zyrtarë të lartë rusë kanë hedhur poshtë pretendimet se presidenti amerikan, Donald Trump mund të ketë punuar për interesat e Moskës, duke i cilësuar këto deklarata si “absurde” dhe “të çmendura”.

Ministri i Jashtëm rus, Sergei Lavrov ka thënë në një konferencë për media më 16 janar se raportimet e mediave amerikane lidhur me këtë çështje reflektojnë një rënie drastike të standardeve të gazetarisë.

Gazeta The New York Times ka raportuar javën e kaluar se pas shkarkimit të James Comeyt nga pozita e drejtorit të FBI-së më 2017, kjo agjenci ka nisur hetime lidhur me atë nëse Trump ka qenë duke punuar për interesat e Rusisë.

Ky shkarkim ka rezultuar me emërimin e Robert Muellerit në pozitën e Këshilltarit Special, i cili është angazhuar për të hetuar nëse ka pasur ndërhyrje ruse në zgjedhjet presidenciale të mbajtura më 2016 në SHBA, dhe nëse ndihmësit e Trumpit kanë bashkëpunuar me Moskën.

Ndërkohë The Washington Post ka raportuar se Trump ka tentuar të fshehë detajet e bisedës së tij me presidentin rus, Vladimir Putin.

The Post ka raportuar se në një rast, Trump i ka marrë shkresat e bëra nga përkthyesi i tij dhe e ka urdhëruar atë që të mos diskutojë se çfarë ka ndodhur në takim.

Vetë Trump ka thënë javën e kaluar se ai kurrë nuk ka vepruar në favor të Rusisë dhe ka përsëritur pretendimet se hetimet për lidhjet e tij me Rusinë janë mashtrim.

Ndaras Lavrovit, Yury Ushakov, këshilltari i presidentit rus, Vladimir Putin për Çështje të Huaja po ashtu është tallur me mendimin se Trump mund të ketë punuar për interesat e Rusisë.

“Për çfarë marrëzie jeni duke biseduar?”, ka thënë Ushakov kur është pyetur nëse Trumpi është agjent rus.

“Si mund të komentojë dikush një çmenduri të tillë? Këto komente kanë arritur shkallë aq të madhe dhe është e çuditshme të flitet për to”.

“Si mund të jetë presidenti i SHBA-së, agjent i një shteti tjetër, vetëm mendojeni vetë”, ka deklaruar ai.

Ushakov ka thënë se marrëdhëniet në mes të Rusisë dhe SHBA-së “nuk mund të jenë në nivel më të keq”. rel

Qeveria britanike i mbijeton votëbesimit

Kryeministrja britanike Theresa May i mbijetoi votës së mosbesimit në parlament, duke bërë të mundur që ajo të vazhdojë punën për arritjen e një konsensusi mes ligjvënësve për marrëveshjen me BE-në lidhur me Brexitin. Ligjvënësit i dhanë qeverisë së Kryeministres May 325 vota pro dhe 306 kundër, vetëm 24 orë pasi e hodhën poshtë me një votë dërrmuese propozimin për Brexitin që ajo kishte arritur me Bashkimin Evropian.

Ndërkohë që afron 29 marsi, data e caktuar për shkëputjen e Britanisë nga Bashkimi Evropian, Britania e gjen veten të zhytur në krizën më të rëndë politike në gjysmë shekulli, duke u ballafaquar me dilemën se si ose nëse vërtetë duhet të shkëputet nga Bashkimi ku u përfshi në vitin 1973.

Kryeministrja May është zotuar të punojë me politikanë në të dyja krahët për të gjetur një kompromis që do të shmangte rrezikun e një shkëputjeje të pakontrolluar, apo të një referendumi tjetër për shkëputjen. Por ajo ka thënë se nuk tërhiqet nga marrëveshja që është arritur me BE-në dhe që ka acaruar të dyja palët, edhe ithtarët e daljes nga BE-ja edhe ata që duan të mbeten brenda Bashkimit.

John McDonnell i laburistëve të opozitës, tha se zonja May mund të arrijë të sigurojë miratim në parlament, nëse negocion një marrëveshje me Partinë Laburiste. Laburistët kërkojnë një treg të bashkuar mes BE-së dhe Britanisë, si dhe mbrojtje të punëtorëve dhe konsumatorëve në transaksionet tregtare mes Britanisë dhe Bashkimit.

Kryeministrja britanike përballet me votë mosbesimi

Ligjvënësit britanikë kanë kundërshtuar planin e kryeministres britanike, Theresa May për largimin e Britanisë nga Bashkimi Evropian, duke krijuar kaos në procesin e Brexitit dhe duke nxitur votë mosbesimi që mund të rrëzojë Qeverinë aktuale.

Kundërshtimi veçse ishte pritur, mirëpo jo edhe shkalla e pakënaqësisë, pasi 432 vota kanë qenë kundër planit të kryeministres britanike dhe 202 kanë mbështetur atë.

Ky rezultat ka treguar edhe udhëheqësinë e brishtë të lideres May në Britani.

Kjo shifër njëherësh ka shënuar edhe mposhtjen më të madhe të ndonjë plani qeveritar në historinë moderne të Britnanisë, transmeton AP.

Ligjëvënësit do të votojnë të mërkurën një mocion mosbesimi në orën 19:00 sipas kohës lokale. Nëse Qeveria nuk ka përkrahje edhe tani, ajo do të ketë 14 ditë për të përmbysur rezultatin ose do të përballet me zgjedhje kombëtare.

Ndonëse May tani nuk ka shumicë në Parlament, ajo synon t’i mbijetojë kësaj vote, përveç rastit kur do të rebeloheshim edhe pjesëtarë të Partisë së saj Konservatore.

“Parlamenti ka folur dhe Qeveria do të dëgjojë”, ka thënë May pas votimit, i cili ka ndodhur vetëm 10 javë pasi Britania të largohet nga BE-ja, përkatësisht më 29 mars.

May ka premtuar se do të konsultohet me ligjëvënësit në hapat e ardhshëm mirëpo nuk ka dhënë detaje se çfarë planifikon të bëjë.

Parlamenti në anën tjetër i ka dhënë afat Qeverisë deri në ditën e hënë që të bëjë një propozim të ri.

Mirëpo pa shumicë të qartë në Parlament, në Britani janë rritur mundësitë për shtyrje të datës së largimit, derisa politikanët të punojnë në ndonjë plan të ri ose të kthejnë vendimin sërish në duart e votuesve, duke organizuar një referendum të dytë.

“Nëse nuk mund të zgjidhet bllokada këtu në Parlament, atëherë duhet kthyer prapë te njerëzit”, ka thënë ligjvënësi i Partisë Laburiste, Chuka Umunna, i cili mbështet një referendum të dytë.

May, e cila pati shtyrë votën për planin e saj të Brexitit nga muaji dhjetor në janar, për faktin se i ishte bërë e qartë që nuk ka mbështetje, ka lutur ligjëvënsit para votimit të 15 janarit që të punojnë bazuar në rezultatin e referendimit të vitit 2016 për largim të Britanisë nga BE-ja.

Mirëpo plani i saj është kundërshtuar nga dy palët e ndara për çështjen e Brexitit. Ligjvënësit pro këtij procesi kanë thënë se Britania me këtë dokuemnt do të mbetej tejet e lidhur me rregullat e bllokut evropian, derisa politikanët pro-BE-së kanë thënë se favrizojnë lidhjet ekonomike edhe më të ngushta me Evropën.

Çështje më problematike në planin e kryeminitres May ka qenë lidhur me kufirin në mes të Irlandës Veriore dhe Republikës së Irlandës dhe mundësisë për vënie të ndalesave fizike në këtë zonë, çka do të vështirësonte çështjet tregtare.

Edhe dy vjet e gjysmë pas referendumit, Britania vazhdon të mbetet e ndarë në atë se si apo nëse do të largohet nga BE-ja.

Ndërkohë liderët e zemëruar evropianë i kanë bërë thirrje kryeministres britanike që t’i bëjë të qarta synimet e saj për të ardhmen e Brexiti.

“Tani është koha për Britaninë që të na tregojë hapat e ardhshëm”, ka thënë shefi negociator i bllokut evropian për Brexit, Michael Barnier.

Presidenti i Komisionit Evropian, Jean-Claude Juncker ka thënë se kundërshtimi i planit të Mayt ka rritur “rrezikun për largim të çrregullt të Mbretërisë së Bashkuar”.

“Koha veçse ka ardhur”, ka thënë ai.

Ekonomistët kanë paraljmëruar se ndonjë largim i paparashikuar nga BE-ja mund të dëmtojë ekonominë britanike dhe të krijuar skena kaotike në kufij, porte dhe aeroporte.

Madje grupet biznesore kanë thënë të jenë alarmuar nga ideja e Brexitit pa marrëveshje.

Presidenti i Këshillit Evropian, Donald Tusk ka përmendur “moçalin” në të cilin është futur Britania dhe ka vlerësuar se zgjidhja më e mirë do të ishte sikur Britania të mos largohej fare nga blloku evropian.

“Nëse marrëveshja është e mundshme dhe askush nuk dëshiron marrëveshje, atëherë kush do të marrë guximin për të thënë se cila është zgjidhja e vetëm pozitive?”, ka thënë ai përmes një postimit në Twitter.

Britania e Madhe është paraparë të largohet nga BE-ja më 29 mars të këtij viti.

Në referendumin e 23 qershorit më 2016, 17.4 milionë persona apo 51.9 për qind e votuesve kanë përkrahur largimin nga BE-ja derisa 16.1 milionë të tjerë apo 48.1 për qind të tjerë kanë votuar kundër Brexitit.
Përgatiti: Krenare Cubolli

The Intercept: “John Bolton dëshiron të bombardojë Iranin”

UASHINGTON – Këshilltari i Sigurisë Kombëtare i Shteteve të Bashkuara të Amerikës (SHBA), John Bolton, “tani dëshiron një luftë me Iranin”, ka shkruar Mehdi Hasan, kolumnist në faqen “The Intercept” në SHBA.

Gazetari dhe kolumnisti Hasan, në një kolumnë me titullin “John Bolton dëshiron të bombardojë Iranin” të publikuar në “The Intercept”, ka tërhequr vëmendjen në ndikimin në rritje të John Boltonit dhe ka thënë se ai ka arritur një fuqi të lartë në administratën amerikane dhe po bind vendin të hyjë në luftë me Iranin.

Hasan ka cituar ish-sekretarin e Mbrojtjes Jim Mattis i cili e ka përshkruar Boltonin si “inkarnim i djallit”, duke theksuar se shumë persona në administratë që kanë pasur mosmarrëveshje me Boltonin janë larguar nga puna, ndërsa ai vetë ka vazhduar në detyrë dhe ka mundësuar që në vendet e liruara të sillen emra që mbështesin luftën kundër Iranit.

Edhe pse Donald Trump ka deklaruar se trupat amerikane nga Siria do të tërhiqen sa më parë, Bolton ka bërë koment të kundër me këtë deklaratë, ka shkruar Hasan.

Hasan ka thënë se Bolton është një nga aktorët kryesorë të okupimit të Irakut në vitin 2002 me pretendimin e pabazë të armëve bërthamore, duke u bërë kështu bashkëfajtor në vrasjen e qindra mijëra irakianëve.

Sipas tij, vitin e kaluar Bolton kishte kërkuar opcione ushtarake nga Pentagoni për ta goditur Iranin.

“Tani ai dëshiron luftë me Iranin”, është shprehur Hasan.

Hasan ka shkruar se zyrtarët e Pentagonit janë të frikësuar se Bolton do ta përshpejtojë konfliktin me Iranin dhe se brenda administratës, ai ka shumë aleatë kundër Iranit.

Ai ka thënë se Bolton bashkëpunon me figura që njihen me deklaratat e tyre kundër Iranit, ndërsa neutralizon emrat që janë kundër luftës dhe së shpejti mund të inicojë një luftë kundër Iranit. aa

Putin: Ballkani i destabilizuar nga prezenca e SHBA-së

Presidenti rus, Vladimir Putin ka supozuar se Shtetet e Bashkuara janë duke destabilizuar Ballkanin duke treguar “rol dominues” në këtë rajon, kanë raportuar gazetat serbe.

Putin i ka bërë këto komente gazetat serbe, Veçernje Novosti dhe Politika, të publikuara më 15 janar, pak para se të vizitojë Serbinë këtë javë.

Komentet e presidentit rus janë publikuar edhe në faqen online të Kremlinit.

Në deklaratat e tij është theksuar edhe një herë lidhja e ngushtë historike e Moskës me Serbinë, si dhe paralajmërimi për ndikimin perëndimor.

Komentet e tij kanë qenë edhe në kundërshtim me paralajmërimet nga Uashingtoni dhe nga disa vende evropiane që janë të shqetësuara për tentimet e Rusisë që ta destabilizojë rajonin, duke përfshirë, Malin e Zi, Bosnje Hercegovinën dhe Maqedoninë.

Në këto intervista, Putin ka rikujtuar edhe bombardimet e NATO-s në Serbi më 1999 gjatë luftës në Kosovë, si dhe pavarësinë e Kosovës.

“Për aq kohë sa situata në Ballkan është shqetësuese, politika e Shteteve të Bashkuara dhe disa kombeve perëndimore që tregojnë rolin e tyre dominant, vazhdon të jetë faktor serioz i destabilizimit”, është cituar të ketë thënë Putin.

Analistët kanë thënë se vizita kryesore e Putinit në Serbi do të fokusohet në Kishën Ortodokose në Beograd, Shën Vava.

Organizatorët e takimit kanë thënë se Putin dhe nikoqiri i tij, presidenti serb, Aleksandar Vuçiq pritet t’iu drejtohen mijëra personave jashtë Kishës, e cila njëherësh konsiderohet “simbol i lidhjeve vllazërore” mes të dyja shteteve.

Putin nis vizitën në Serbi më 17 janar.