VOAL

VOAL

Please Wait ...
0%

Macron e anulon vizitën në Serbi

By | December 3, 2018

Komentet

Përmbytja në Venecia – Italia do të shpallë gjendje të jashtëzakonshme

Venecia gjatë përmbytjeve.

Italia do të shpallë gjendje të jashtëzakonshme pasi qyteti i Venecias u përfshi nga nivelet e larta të ujit prej 1.87 metra, duke përmbytur bazilikën e tij historike dhe duke shkaktuar ndërprerje të energjisë.

Më shumë se 80 për qind e qytetit – i cili gjenden në listën e UNESCO-s për trashëgiminë botërore – është nën ujë si pasojë e përmbytjeve.

Një grua ecë pranë bazilikës së Shën Markut në Venecia.

Kryeministri i Italisë, Giuseppe Conte, e përshkroi përmbytjen si “një goditje në zemrën e vendit tonë”.

Ai tha se qeveria tani do të veprojë shpejt për të siguruar fonde dhe burime.

Gjatë ditës se enjte pritet të shpallen masat emergjente që do të ndërmarrë qeveria italiane.

Kryetari i Bashkisë së Venecias, Luigi Brugnaro, fajësoi ndryshimet klimatike për nivelin e lartë të ujit.

Njerëzit ecin në rrugët e përmbytura nga uji në Venecia.

Këto nivele të ujit, nuk janë shënuar në më shumë se 50 vjet dhe autoritetet thonë se kjo gjendje do të lerë pasoja të përhershme.

Sheshi i Shën Markut – një nga pjesët më të ulëta të qytetit – ishte një nga zonat më të goditura.

Macron: sistemi ndërkombëtar në një krizë “pa precedent”

Presidenti francez Emmanuel Macron gjatë fjalës në çelje të Forumit për Paqen

Presidenti francez Emmanuel Macron shprehu keqardhjen për “krizën e paprecedentë” në sistemin politik global dhe bëri thirrje për aleanca të reja që do të zgjidhnin problemet e botës, një thirrje kjo që u mbështet nga udhëheqësit kinezë dhe ata të Bashkimit Evropian.

Zoti Macron priti kryetarë shtetesh dhe qeverish në Forumin e Paqes në Paris vetëm pak ditë pasi shkaktoi valë tronditjeje në kryeqytetet perëndimore duke paralajmëruar për paqëndrueshmërinë e NATO-s dhe BE-së.

Po përjetojmë një krizë të paprecedentë në sistemin tonë ndërkombëtar”, tha zoti Macron, duke vazhduar në linjën e intervistës dhënë të enjten revistës “The Economist”, ku ai paralajmëroi se NATO po përjetonte “vdekje klinike” dhe se BE-ja rrezikon të bëhet e parëndësishme.

Forumi për Paqen

Forumi për Paqen

Presidenti francez, i cili ka kërkuar të zërë një vend parësor në skenën ndërkombëtare që kur mori pushtetin në vitin 2017, tha se “mënyra të reja bashkëpunimi, aleanca të reja” nevojiten mes shteteve dhe organizatave.

Ai shtoi se sistemi global politik dhe ekonomik i ndërtuar pas përfundimit të Luftës së Dytë Botërore, pati sjellë paqe në disa rajone dhe nxorri nga varfëria shumë njerëz.

Por, pabarazi të reja janë shfaqur mes njerëzve dhe vendeve duke shkaktuar rilindjen e nacionalizmit dhe unilateralizmi “madje edhe mes atyre që janë gardianët më të fundit të këtij sistemi ndërkombëtar”, tha zoti Macron.

Për t’u përballur me sfidat e sotme, varfëria, lufta, rritja pa kontroll e popullsisë, emigracioni dhe burimet e paqëndrueshme natyrore, botës i duhet “më shumë bashkëpunim”, tha ai.

Në vazhdim, zoti Macron paralajmëroi se nuk duhet të ketë më “hipokrizi” nëse vjen fjala për të vënë në pikëpyetje funksionimin organizatave shumëkombëshe si OKB-ja, të cilën e quajti “të bllokuar”.

Intervista e zotit Macron me revistën “The Economist” pati shkaktuar shumë debat. Kancelarja gjermane Angela Merkel u shpreh se komentet e tij ishin shumë “drastike”. Sekretari amerikan i Shtetit Mike Pompeo këmbënguli se NATO është “e rëndësishme dhe vendimtare”.

Por, komentet e zotit Macron, i cili gjithashtu ka qartësuar se dëshiron të dialogojë me Presidentin rus Vladimir Putin, u mbështetën me ngrohtësi nga Rusia.

Ndoshta duke iu drejtuar kritikëve të tij, zoti Macron tha të martën se e folura pa doreza është e rëndësishme. “Mendoj se na duhet e vërteta… heshtja nuk është zgjidhje”, tha ai.

Ministri i Jashtëm gjerman Heiko Maas ra dakort se ekziston “nevoja për veprim në bashkëpunimin ndërkombëtar” përfshirë edhe brenda NATO-s, duke shtuar se çështja të tilla “diskutohen haptazi”.

Në po këtë forum, Presidentja e zgjedhur e Komisionit Evropian Ursula von der Leyen këmbënguli se trajtimi i sfidave të sotshme kërkon “institucione të forta dhe një bashkëpunim ndërkombëtar më efektiv”.

“Megjithatë, ndodh shpesh e kundërta; fuqitë ekzistuese po ndjekin të vetmuar shtegtime të reja; fuqi të reja po shfaqen, të tjera po rishfaqen dhe po konsolidohen”, tha zonja Von der Leyen.

Presidenti francez bisedon me Presidenten e zgjedhur të Komisionit Evropian Ursula Von der Leyen

Presidenti francez bisedon me Presidenten e zgjedhur të Komisionit Evropian Ursula Von der Leyen

Ajo shtoi se Bashkimi Evropian duhet të ushtrojë më shumë peshë politike në skenën ndërkombëtare.

Zonja Von der Leyen tha se nën mbikqyrjen e saj shpreson ta bëjë komisionin “vërtet gjeopolitik”.

Dëshiroj një Bashkim Evropian të orientuar më shumë jashtë tij, një Evropë që të mbrojë kolektivisht vlerat dhe interesat tona të përbashkëta në botë”, tha ajo.

Zonja Von der Leyen tha se multilateralizmi krijoi një Evropë të pasluftës e cila më në fund ishte “në paqe, e bashkuar dhe që zgjidhte dallimet tona përreth tryezave dhe jo në llogore”.

“Nuk duhet të harrojmë kurrë sa larg kemi mbërritur dhe pse”, tha ajo duke iu bashkuar paralajmërimit të zotit Macron ndaj hegjemonisë dhe nacionalizmit, për të cilin Presidenti francez tha se është testuar më parë dhe “na dha luftën”.

Nënpresidenti kinez Wang Qishan iu bashkua thirrje për unitet më të madh global.

Përhapja e unilateralizmit, proteksionizmit dhe populizmit, si dhe tendenca për të zëvendësuar mendimin dhe veprimin racional me shpërthimin e emocioneve, nuk ndihmojnë në zgjidhjen e problemeve”, tha zoti Wang.

“Kemi shpresë se vendet mund të punojnë së bashku për të reduktuar defiçitin e paqes, duke zgjeruar interesat e ndërthurura, duke përforcuar masat mbrojtëse të paqes, duke ruajtuar multilateralizmin… dhe duke forcuar lidhjen e paqes nëpërmjet inkurajimit të dialogut mes civilizimeve”, tha ai.

* Marrë nga Agjensia Franceze e Lajmeve (AFP)

Macron bën bashkë Hashim Thaçin e Aleksandër Vuçiçin në Paris

Presidenti i Kosovës Hashim Thaçi dhe ai i Serbisë, Aleksandër Vuçiç u takuan të martën në Paris me ndërmjetësimin e presidentit francez, Emmanuel Macron.

Takimi u bë në margjinat e Forumit për Paqe që po i zhvillon punimet në kryeqytetin e Francës.

Ende nuk dihen hollësi rreth takimit që ndodhi pas një periudhe të gjatë të pezullimit të bisedimeve ndërmjet të dyja palëve.

Një natë më parë, presidenti i Kosovës, Hashim Thaçi shkroi se presidentit Macron i ka konfirmuar që “Kosova është e vullnetshme dhe e gatshme për marrëveshje paqësore me Serbinë, e cila duhet të sjellë njohje reciproke dhe anëtarësim të Kosovës në Kombet e Bashkuara. Marrëveshja e Paqes garanton më shumë mundësi për zhvillim dhe për jetë më të mirë, si dhe më shumë prosperitet për të gjithë qytetarët tanë”.

Ndërsa presidenti serb, Aleksandër Vuçiç, tha se nuk ka asgjë të re në deklarimet e presidentit të Kosovës.

“Ai po flet thua se ne duhet të jemi të lumtur nëse na njohin. Ne jemi vend i njohur në Kombet e Bashkuara dhe nuk na duhet njohja juaj”, tha ai.

Procesi i bisedimeve është pezulluar tash e një vit që kur Prishtina u vuri tarifa prej 100 për qind mallrave serbe në shenjë kundërshtimi ndaj fushatës së Beogradit kundër shtetësisë së Kosovës.

Beogradi kushtëzon rifillimin e bisedimeve me heqjen e tarifave, ndërsa diplomatët shpresojnë që ripërtëritja e bisedimeve të ndodhë menjëherë pas formimit të qeverisë së re të Kosovës.

zëri i amerikës

Protestuesit katalanas bllokojnë rrugën kryesore në kufirin Spanjë-Francë

Oviedo

Automjetet dhe protestuesit kanë paralizuar trafikun në kufirin midis Katalonjës dhe Francës që nga fillimi i së hënës, për të cilën grupi separatist katalanas tha se kishte filluar një valë të re protestash, raporton Anadolu Agency (AA).

Organizatorët e demonstratave thanë se mijëra automjete kanë bllokuar fluksin e trafikut në të dy drejtimet.

Bllokimet e trafikut tani shtrihen me kilometra në kufi, ku autostrada spanjolle A-7 takohet me autostradën franceze A-9, sipas të përditshmes katalanase La Vanguardia.

Automjetet po ridrejtohen përmes rrugëve nacionale, por edhe në ato rrugë dytësore janë ngritur bllokada gjithashtu.

Aksioni po drejtohet nga “Cunami Demokratik”, një grup që ka qëndruar prapa disa trazirave në Katalonjë gjatë muajit të fundit. Protestat filluan si përgjigje ndaj dënimeve me burg, të cilat u shqiptuan për nëntë liderët separatistë katalanas.

Kjo protestë, tha grupi në një deklaratë, synon të paralajmërojë bashkësinë ndërkombëtare për nevojën që politikanët nga Katalonja dhe Spanja të “ulen dhe të flasin” në vazhdën e zgjedhjeve të përgjithshme të dielën.

Deri më tani, kryeministri i përkohshëm i Spanjës nuk ka pranuar të flasë me udhëheqësin separatist katalan, Quim Torra, duke thënë se Torra së pari duhet t’i bindet ligjit. Torra është zotuar të mbajë një tjetër referendum të paligjshëm të pavarësisë në rajonin e pasur verilindor.

“Sot, ne fillojmë një mënyrë të re të protestës, duke përdorur teknologjinë për të mbrojtur të drejtat dhe lirinë kolektive. Me këtë model të ri, automjetet bëhen protagonistët e veprimit”, tha organizata në Twitter.

Protestuesit kanë ngritur një skenë në mes të autostradës dhe u kanë bërë thirrje protestueseve të sjellin thasë për gjumë, veshje të ngrohtë dhe bateri për telefonat e tyre celular. Fotografitë tregojnë se janë mbledhur sasi të konsiderueshme të furnizimeve të tjera, përfshirë pajisjet e gatimit, ushqimin dhe pijet. ACN, një tjetër grup i pavarësisë, tha se gjithashtu janë vendosur tualete të lëvizshëm dhe një kuzhinë.

“Cunami Demokratik” theksoi se kjo ishte e dita e parë nga tre ditët e protestave të planifikuara. Mediat lokale raportojnë se grupi planifikon të qëndrojë në kufi për 72 orë.

Një numër i madh policësh, francezë dhe spanjollë u vendosën në të dyja anët e kufirit.

Spanjë, mbahen zgjedhjet e përgjithshme të parakohshme

Madrid

Në Spanjë ka filluar procesi i votimit për zgjedhjet e përgjithshme të parakohshme ku të drejtë vote kanë rreth 37 milionë qytetarë, transmeton Anadolu Agency (AA).

Në procesin zgjedhor që ka filluar në orën 09:00 sipas kohës lokale, spanjollët do të votojnë për herë të katërt brenda 4 viteve të fundit për të zgjedhur 350 deputetë dhe 208 senatorë.

Për zgjedhjet e 16-ta të përgjithshme që zhvillohen në historinë e demokracisë së vendit janë hapur 211.200 vendvotime, ku për herë të parë do të mund të votojnë edhe 226.771 persona të cilët kanë mbushur moshën 18 vjeç.

Sipas të dhënave të Ministrisë së Brendshme, në zgjedhje janë mobilizuar më shumë se 92 mijë forca policore dhe të xhandarmërisë.

Sondazhet nxjerrin fitues Partinë Socialiste të Punëtorëve Spanjollë (PSOE)

Ndërkohë janë marrë masa të veçanta kundër akteve të mundshme të dhunës në Katalonjë ku grupet radikale pro pavarësisë kanë bërë thirrje për bojkotimin e zgjedhjeve. Për shkak të kësaj janë mobilizuar më shumë se 12 mijë forca sigurie.

Sipas sondazheve, fituese e zgjedhjeve, ashtu sikurse edhe në zgjedhjet e mbajtura më 28 prill parashihet të jetë Partia Socialiste e Punëtorëve Spanjollë (PSOE), por e cila nuk do të mund të arrijë shumicën e nevojshme për të formuar e vetme qeverinë.

Gjithashtu pritet që edhe partia e ekstremit të djathtë Vox të rrisë numrin e votave të saj.

Në zgjedhjet e parakohshme të përgjithshme që u mbajtën së fundmi në vend më 28 prill pjesëmarrja ishte 71 për qind.

Procesi i votimit në vend do të përfundjë në orën 20:00 sipas kohës lokale ndërsa në Ishujt Kanare në jug të vendit do të përfundojnë 1 orë më vonë për shkak të ndryshimit kohor.

Macron: BE të reformohet para se të hapë negociatat me Tiranën dhe Shkupin

Në një intervistë me revistën The Economist, të publikuar të enjten, Presidenti Macron tha se Bashkimi Evropian ka nevojë për të reformuar procedurat e anëtarësimit para se të hapë negociatat me Shqipërinë dhe Maqedoninë e Veriut.

Nëse duam një Evropë të fuqishme, ajo duhet të lëvizë më shpejt dhe të jetë më e integruar. Kjo nuk përputhet me hapjen e një procesi zgjerimi tani, tha zoti Macron.

Të paktën, nëse themi se ‘do të përpiqemi, do të investojmë, do t’i nxisim bizneset të lëvin me shpejtësi përpara, do të investojmë për zhvillimin, kulturën dhe edukimin’, kjo do të kishte kuptim. Por është absurde të hapësh një proces thjesht burokratik, u shpreh zoti Macron.

“Pyetini ata (vendet e BE-së) nesër nëse duan të hapin derën për Shqipërinë. Gjysma e tyre do të thonë jo. Ata duan të hapen me Maqedoninë e Veriut, e cila është vend i vogël dhe ka ndryshuar emrin, gjë që është një arritje e vërtetë historike. Nuk frikëson askënd. E vërteta është që nëse nuk i hapemi Shqipërisë, do të shkaktojmë një traumë të tmerrshme në rajon. Kudo ka komunitete shqipfolëse. Nëse poshtëron Shqipërinë, atëherë rajoni destabilizohet në mënyrë të pakthyeshme.

Pra, bindja ime është se, së pari, ne duhet të reformojmë procedurat tona të anëtarësimit, të cilat nuk janë më të përshtatshme për qëllimin e tyre, nuk janë strategjike. Ato nuk janë politike, janë tepër burokratike dhe jo të kthyeshme, ndërkohë që duhet të jemi në gjendje në një moment të caktuar të marrim në konsideratë çështjen e kthyeshmërisë,” tha Presidenti Macron.

Ai tha se “nëse shqetësohemi për këtë rajon, pyetja e parë nuk është as Maqedonia e Veriut, as Shqipëria, por Bosnje-Hercegovina,” të cilën ai e quajti një bombë me sahat, pasi po përballet me problemin e kthimit të xhihadistëve.

Presidenti Macron tha se Bashkimi Evropian ka nevojë për të reformuar procedurat e anëtarësimit para se të hapë negociatat.

“Nëse e arrijmë këtë reformë në muajt e ardhshëm, unë do të jem i gatshëm të hap negociatat, nëse ata bëjnë edhe disa përpjekje shtesë që kanë mbetur. Por unë nuk dua asnjë anëtar tjetër të ri pa u reformuar vetë Bashkimi Evropian. Për mua, ky është një parakusht i sinqertë dhe i domosdoshëm.” zëri i amerikës

Macron: Mungesa e udhëheqjes amerikane po shkakton “vdekjen klinike” të NATO-s

Presidenti francez Emmanuel Macron tha se mungesa e udhëheqjes amerikane po shkakton “vdekjen klinike” të NATO-s dhe se Bashkimi Evropian duhet të fillojë të veprojë si një fuqi strategjike botërore.

Zoti Macron i tha revistës The Economist se Shtetet e Bashkuara nën Presidentin Donald Trump duket se po ‘na kthejnë shpinën’, sidomos me tërheqjen e trupave nga Siria verilindore pa paralajmërim.

Presidenti Macron tha se anëtarët evropianë të aleancës 29 vendëshe, ‘duhet të rivlerësojnë realitetin e ri të NATO nën dritën e angazhimit të Shteteve të Bashkuara’.

Në intervistë, zoti Macron tha se Presidenti Trump ‘nuk ndan idenë tonë për projektin evropian’. Ai shtoi se Evropa ndodhet në ‘buzë të një gremine’ dhe duhet të fillojë të mendojë si një fuqi gjeopolitike, përndryshe ‘ne nuk do të jemi më në kontroll të fatit tonë’.

Kancelarja gjermane Angela Merkel tha të enjten se kjo nuk ishte pikëpamja e saj. “NATO-ja mbetet një gur themeli i sigurisë sonë,” tha ajo për gazetarët.

Edhe Sekretari i Përgjithshëm i NATO-s, Jens Stoltenberg e kundërshtoi këtë karakterizim të aleancës gjatë një konference të përbashkët shtypi në Berlin. zëri i amerikës

NATO-ja përkujton 30-vjetorin e rënies së Murit të Berlinit

Sekretari i Përgjithshëm i NATO-s, Jens Stoltenberg ka nderuar ngjarjet e tri dekadave të më parë, që kanë rrëzuar Murin e Berlinit, të cilin e ka konsideruar “plagë në fytyrën e Evropës”.

“Përmes kullave me armë dhe qenve roje, (muri) ka tentuar të mbajë njerëzit brenda dhe idetë jashtë. Mirëpo ka dështur”, ka thënë Stoltenberg më 6 nëntor, jashtë selisë së NATO-s në Bruksel, ku është dërguar një copëz e Murit të Berlinit.

“Liria, demokracia dhe dinjiteti njerëzor, të njëjtat vlera që na bashkojnë neve sot, inspiruan njerëzit 30 vjet më parë, për të arritur diçka të jashtëzakonshme”, ka thënë shefi i NATO-s.

Ambasadori gjerman në NATO, Hans-Dieter Lucas, e ka cilësuar rënien e Murit të Berlinit në nëntor të vitit 1989, “një nga momentet në histori, që kanë ndryshuar botën”.

Më vonë gjatë ditës, Stoltenberg pritet të arrijë në kryeqytetin e Gjermanisë, Berlin për një vizitë dyditore, gjatë së cilës do të vizitojë presidentin gjerman, Frank-Walter Steinmeier, kancelaren gjermane, Angela Merkel dhe zyrtarë tjerë.

Ai po ashtu pritet të jetë pjesë e ceremonive përkujtimore për të shënuar 30-vjetorin e rënies së Murit të Berlinit, si dhe të pranojë një medalje nga ministria gjermane e Mbrojtjes për kontributin e tij në NATO. rel

Merkel viziton memorialin e viktimave të neo-nazistëve

Berlin

Kancelarja gjermane, Angela Merkel, të hënën vizitoi memorialin e viktimave të grupit terrorist neo-nazist dhe bëri thirrje për guxim dhe përgjegjësi për të luftuar racizmin, raporton Anadolu Agency (AA).

Merkel së bashku me një grup studentësh vendosën lule të bardha në memorialin në qytetin lindor gjerman Zwickau, i cili u ngrit për 10 personat e vrarë nga grupi terrorist NSU.

“Ashtu siç u kam premtuar familjarëve të viktimave disa vjet më parë, ne si Qeveri Federale, do të bëjmë gjithçka për të parandaluar që krime të tilla të mos ndodhin përsëri”, tha ajo.

“Por për këtë, ne gjithashtu kemi nevojë për njerëz të guximshëm, dhe është mirë që sot jemi këtu me të rinjtë, të cilët thonë se dëshirojnë të sigurojnë që gjëra të tilla të mos ndodhin përsëri në Gjermani”, shtoi ajo.

Anëtarët e NSU, të cilët jetuan nën tokë për shumë vite në Zwickau, vranë tetë emigrantë turq, një shtetas grek dhe një police gjermane midis viteve 2000 dhe 2007.

Opinioni gjerman për herë të parë për ekzistimin e këtij grupi mësoi në vitin 2011, kur dy prej anëtarëve të tij vdiqën më 4 nëntor gjatë një përpjekje për vjedhje të një banke. Materiale të ndryshme propagande, më vonë në rrënojat e banesës së NSU-së në Zwickau u gjetën armë.

Deri në vitin 2011, policia e Gjermanisë dhe shërbimet e inteligjencës hodhën poshtë çdo motiv racor për vrasjet dhe u trajtuan familjet emigrante si të dyshuar, duke i pyetur ata lidhur me lidhjet e dyshuara me grupet mafioze dhe trafikantët e drogës.

Gjatë vizitës së Merkel në memorialin në Zwickau, dhjetëra demonstrues të krahut të djathtë protestuan kundër kancelares, duke brohoritur parulla si “Merkel duhet të shkojë” dhe “Stop propagandës”.

Memoriali me pemën e mbjellë në shenjë kujtimi u vandalizua muajin e kaluar dhe pema për Enver Simsek, viktima e parë e NSU-së, u shkatërrua nga të dyshuar të panjohur.

Gjermania ka qenë dëshmitare e ksenofobisë dhe e urrejtjes antiemigrante në vitet e fundit, e nxitur nga propaganda e grupeve neo-naziste dhe partisë ekstremiste islamofobike Alternativa për Gjermaninë (AfD).

Policia regjistroi më shumë se 19,000 krime të së djathtës ekstreme në vitin 2018, sipas shifrave të fundit të qeverisë, ku ekstremistët kryen rreth 1.000 sulme të dhunshme kundër të huajve, emigrantëve ose rivalëve politikë.

Pothuajse 500 persona u plagosën në sulme të frymëzuara nga ideologji të ekstremit të djathtë.

Policia çeke heton shitjen e maskave të Hitlerit në Pragë (foto)

Policia çeke është duke hetuar shitjen e maskave të Adolf Hitlerit në një dyqan në qendër të Pragës.

Ambasadori i Gjermanisë në Pragë, Christoph Israng, e postoi në Twitter fotografinë e maskës së ekspozuar.

“Çekët kanë vuajtur aq shumë nën regjimin nazist. Përse shiten mbeturina të tilla në qendër të Pragës tani?”, pyeti Israng.

Ai nuk e përmendi emrin e dyqanit.
Policia tha se ka nisur hetime për të përcaktuar nëse është shkelur ndonjë ligj.

“Mund të konfirmoj se po e trajtojmë rastin e shitjes së maskave në qendër të Pragës”, tha një zëdhënëse e policisë për agjencinë çeke të lajmeve CTK.

Si udhëheqës i Gjermanisë naziste, Hitleri ka mbikëqyrur aneksimin dhe pushtimin e Republikës Çeke – dikur Çekosllovaki – nga viti 1938 deri më 1945.

Nën okupimin nazist, civilë çekë janë masakruar dhe janë dërguar në kampe përqendrimi gjatë Luftës së Dytë Botërore.

Duke iu përgjigjur ambasadorit Israng në Twitter, ministri i Brendshëm çek, Jan Hamacek, tha se policia po merret me çështjen. rel

Venecia do të vendosë tarifë hyrëse për turistët

Qendra turistike e Venecias në Itali do të fillojë të tarifojë hyrjen e vizitorëve në korrik të vitit 2020.

Sipas agjencisë së lajmeve ANSA me qendër në Romë, Këshilli bashkiak i qytetit vendosi që jorezidentët të cilët kërkojnë hyrje do të paguajnë tarifë hyrëse midis 3 euro (3.3 dollarë) dhe 8 euro (9 dollarë).

Raportet theksojnë se tarifat do të rriten në vitin 2021 në mes 6 euro (6.6 dollarë) dhe 10 euro (11 dollarë).

Sipas të përditshmes Telegraph, qyteti çdo vit mirëpret 20 milionë turistë, duke tejkaluar kapacitetin e tij. aa

PE: Gabim strategjik mos hapja e bisedimeve me Tiranën e Shkupin

Parlamenti Europian e konsideron një “gabim strategjik” mungesën e një vendimi nga ana e shteteve anëtarë të Bashkimit Europian, javën e shkuar, për hapjen e bisedimeve për anëtarësim me Shqipërinë dhe Maqedoninë e Veriut. Në një rezolutë të miratuar të enjten, me 412 vota pro, 136 kundër dhe 30 abstenim, Parlamenti Europian thekson se “të dy vendet plotësojnë kërkesat për të filluar negociatat”, duke shprehur “zhgënjim të thellë” për mungesën e konsensusit në Këshillin europian.

Sipas një deklarate të Parlamentit Europian “eurodeputetët shprehin keqardhje për masën e Francës, Danimarkës dhe Hollandës për të bllokuar vendimin” pasi sipas tyre “Shqipëria dhe Maqedonia e Veriut kanë bërë përpjekje të konsiderueshme gjatë viteve të fundit dhe plotësojnë kriteret e BE për të filluar bisedimet e anëtarësimit”. Duke vlerësuar “përpjekjet e Maqedonisë së Veriut për të zgjidhur çështje të vështira bilaterale me vendet e saj fqinje”, eurodeputetët gjithashtu “mirëpresin reformat e fundit të gjyqësorit në Shqipëri”.

Sipas rezolutës, mungesa e një vendimi nga ana e udhëheqësve të BE-së “dëmton besueshmërinë e BE-së dhe dërgon një mesazh negativ për vendet e tjera të mundshme kandidate. Ajo gjithashtu, mund të bëjë që aktorët e tjerë të huaj – veprimtaria e të cilëve mund të mos jetë në përputhje me vlerat dhe interesat e BE-së – të angazhohen më ngushtë me Shqipërinë dhe Maqedoninë e Veriut”.

Vendimi për hapjen e bisedimeve për anëtarësim u pengua kryesisht nga Franca për shkak të këmbënguljes së presidentit francez Emmanuel Macron për të rishikuar procesin e bisedimeve, në kuadër të reformimit të të gjithë politikës së zgjerimit. “Një reformë e procesit të zgjerimit, e mbrojtur nga disa vende, nuk duhet të pengojë Shqipërinë dhe Maqedoninë e Veriut, të cilat tashmë plotësojnë kërkesat për t’u vlerësuar në bazë të meritave të tyre dhe kritereve objektive, dhe jo të gjykohen nga agjendat politike të brendshme në vendet e tjera”, thekson rezoluta.

Këshilli Europian deklaroi se çështja do të rishqyrtohet para Takimit të Nivelit të Lartë për Ballkanin Perëndimor, që pritet të organizohet në muajin maj në Zagreb. Por sipas eurodeputetëve “koha është tani”, duke i kërkuar vendeve anëtare “të veprojnë me përgjegjësi ndaj Shqipërisë dhe Maqedonisë së Veriut dhe të marrin një vendim unanim pozitiv në mbledhjen e ardhshme”. zëri i amerikës