VOAL

VOAL

Please Wait ...
0%

Laura Codruta Kövesi emërohet kryeprokurorja e parë e BE-së

By | September 25, 2019

Komentet

Merkel viziton për herë të parë Aushvicin

Kancelarja gjermane, Angela Merkel, viziton të premten ish-kampin nazist në Aushvic, për herë të parë në 14 vitet e saj si kancelare.

Vizita e Merkelit bëhet në një kohë kur Gjermania po shënon një ringjallje të anti-semitizmit dhe rritje të elementeve të krahut të djathtë.

Merkel është kancelarja e tretë gjermane që vizitoi ish-kampin në Poloni.

Udhëtimi i saj është jashtëzakonisht simbolik, pasi bëhet para shënimit të 75- vjetorit të çlirimit të këtij kampi nga trupat sovjetike më 27 janar 1945.

Në prag të udhëtimit të saj, Merkel tha se “lufta kundër anti-semitizmit dhe kundër të gjitha formave të urrejtjes” ishte përparësi për qeverinë e saj.
65-vjeçarja premtoi gjithashtu “vendosmëri” nga qeveria për të mundësuar që jeta e hebrenjëve të lulëzonte në Gjermani.

Memoriali i kampit në Aushvic – foto nga arkivi

Merkel do të mbajë një minut heshtje në “Murin e Vdekjes”, vendi ku mijëra të burgosur të kampit u qëlluan për vdekje.

Gjatë vizitës, Merkel gjithashtu do të mbajë një fjalim, si dhe të vendosë një kurorë me lulenë ish- kampin e afërt Birkenau.

“Vizita është një sinjal veçanërisht i rëndësishëm i vëmendjes dhe solidaritetit, në një kohë kur të mbijetuarit e Aushvicit janë viktima të fyerjeve anti-semitike dhe postimeve në rrjete sociale të cilat janë të mbushura me urrejtje”, tha Christoph Heubner, nënkryetar i Komitetit Ndërkombëtar të Aushvicit.

Përpara udhëtimit të saj, Gjermania miratoi një donacion prej 60 milionë eurosh për Fondacionin Aushvic-Birkenau.

Merkel do të shoqërohet nga kryeministri polak, Mateusz Morawiecki dhe një i mbijetuar i kampit.

Josef Schuster, kreu i Këshillit Qendror të Hebrenjve në Gjermani dhe Ronald Lauder, kreu i Kongresit Botëror të Hebrenjve, gjithashtu do të marrin pjesë në këtë vizitë.

Një milion hebrenjë u vranë në Aushvic-Birkenau, së bashku me 100,000 polakë jo-hebrenj, robër të luftës nga ish-Bashkimi Sovjetik, romë dhe luftëtarë tjerë anti-nazistë.

Merkel e ka quajtur Holokaustin një “ndarje me civilizimin” dhe ka shprehur shqetësimin për ngritjen e anti-semitizmit në Gjermani.

Përgatiti: Kestrin Kumnova

Presidenti Trump tha se presidenti francez e ka fyer NATO-n

Presidenti amerikan, Donald Trump, kritikoi të marrën presidentin francez Emmanuel Macron për komentet e tij në të cilat e përshkroi NATON si “klinikisht të vdekur”, duke thënë se komentet e udhëheqësit francez janë “deklaratë e keqe”.

Duke folur përkrah Sekretarit të Përgjithshëm të NATO-s, Jens Stoltenberg, derisa udhëheqësit e vendeve anëtare, u mblodhën për një samit në Londër, presidenti Trump tha se “ju thjesht nuk mund të shkoni vërdallë duke bërë deklarata të tilla sikurse ato për NATO-n”.

Komentet e presidentit Macron u bënë në një intervistë me revistën britanike The Economist, muajin e kaluar. Ai që atëherë ka mbrojtur qëndrimet e tij, duke thënë se NATO-s “kishte nevojë për një alarm zgjimi” dhe duhet të përqendrohet në çështje të ndryshme nga shuma e parave që secili anëtar shpenzon për mbrojtjen.

Presidenti Trump dhe presidenti Macron do të takohen gjatë së martës.

 

Shpenzimet e mbrojtjes janë nënvizuar vazhdimisht nga presidenti Trump që kur morri detyrën në vitin 2017 dhe u ankua se Shtetet e Bashkuara po bartin barrën e tepruar financiare.

Përveç buxhetit vendet anëtare të NATO-s, tha sekretari Stolteberg, do të diskutojnë për luftën kundër terrorizmit, kontrollin e armatimeve, marrëdhëniet me Rusinë dhe Kinën.

Samiti po mbahet derisa presidenti Trump përballet në shtëpi me një hetim për shkarkimin e tij. Ai përsëriti kritikat e tij të martën për demokratët që kontrollojnë Dhomën e Përfaqësuesve, duke thënë se është e padrejtë të mbahen seanca ndërsa ai po merr pjesë në samit.

Por, ai mohoi mundësinë që procesi të ketë dobësuar pozitën e tij derisa po takohet me udhëheqësit botëror.

Komisionit të Nobelit për Letërsi i largohen dy anëtarë, njëri për shkak të Handke-s

Dy anëtarë të jashtëm të Komisionit të Nobelit për Letërsi kanë hequr dorë nga ky komision të hënën, duke e kritikuar Akademinë Suedeze të goditur nga skandalet.

Akademia 233-vjeçare u detyrua të miratojë rregulla të reja pas një skandali ku qe përfshirë bashkëshorti i një ish-anëtareje, i cili ndikoi që dhënia e Çmimit Nobel për Letërsi për vitin e kaluar të shtyhej.

Anëtarët e jashtëm ishin shtuar për të asistuar në përzgjedhjen e kandidatëve për Çmimin Nobel për Letërsi, të cilët më pas do të votoheshin nga Akademia Suedeze, transmeton Gazeta Express.

Shkrimtari Kristoffer Leandoer tha se po tërhiqet nga ky komision, sepse nuk ka kohë as durim që ta presë atë për t’i përfunduar reformat.

“Akademia dhe unë kemi pikëpamje të ndryshme për kohën. Një vit është kohë shumë e gjatë në jetën time dhe kohë shumë e shkurtër për Akademinë”, tha ai përmes një shkrimi të botuar në gazetën suedeze “Svenska Dagbladet”.

Ky shkrimtar tha se vendimi për t’u larguar nga komisioni nuk lidhet me ndarjen e Çmimit Nobel për Letërsi për shkrimtarin kundërthënës, Peter Handke, për të cilin Akademia Suedeze ka marrë kritika brenda dhe jashtë Suedisë.

Sidoqoftë, anëtarja tjetër e tërhequr, Gun-Britt Sundstrom, tha përmes një deklarate se zgjedhja e Handge-s është interpretuar sikur letërsia të qëndronte mbi politikën dhe se ajo nuk pajtohet me këtë pikëpamje, shkruan “Reuters”, transmeton Gazeta Express.

Erdogan e porosit Makronin: “duhet të kontrolloheni nëse ju jeni klinikisht i vdekur”

Presidenti turk Tayip Erdogan tha të premten se paralajmërimi i presidentit Emmanuel Macron se NATO-ja është klinikisht e vdekur, pasqyron një kuptim “të sëmurë dhe të cekët”, dhe iu drejtua presidentit francez me fjalët: “duhet të kontrolloheni nëse ju jeni klinikisht i vdekur”.

Komentet u bënë shkak për një qortim të menjëhershëm nga ana e ministrisë së jashtme franceze, e cila thirri ambasadorin e Turqisë në Paris për të protestuar ndaj asaj që një këshilltar presidencial francez e quajti “fyerje”.

Zoti Erdogan i bëri komentet pak ditë përpara samitit aleancës ushtarake, për të cilën zoti Macron ka thënë se po përjeton “vdekje klinike” për shkak të paparashikueshmërisë së SHBA nën Presidentin Donald Trump dhe tensionimit të marrëdhënieve me Turqinë.

Presidentët e Turqisë dhe të Francës, të cilët kanë shkëmbyer kritika mbi ofensivën ndërkufitare të Ankarasë në Sirinë verilindore, do të jenë midis udhëheqësve të NATO-s që do të takohen në një samit të aleancës transatlantike në Britani më 4 dhjetor.

“Po i drejtohem z. Macron nga Turqia dhe do ta them këtë në NATO: Jeni ju i pari që duhet të kontrolloheni nëse keni vdekur klinikisht,” tha zoti Erdogan.

Presidenti Macron tha në një intervistë tre javë më parë se ka mungesë të koordinimit strategjik midis aleatëve evropianë nga njëra anë dhe Shteteve të Bashkuara e Turqisë, nga ana tjetër. Ai kritikoi gjithashtu pamundësinë e NATO-s për të reaguar ndaj asaj që ai e quajti një ofensivë e çmendur turke në veri të Sirisë.

Të Premten, zyrtarët francezë thanë se prisnin sqarime të hollësishme nga zoti Erdogan në vend të një lufte fjalësh.

“Le të jemi të qartë, këto nuk janë deklarata, ato janë fyerje,” tha një këshilltar presidencial.” zëri i amerikës

Gjermani, vjedhje prej mbi 1 miliard dollarë në një muze

Berlin

Rreth 1 miliard euro (1.1 miliardë dollarë) thesar u vodhën gjatë bastisjes në një muze të Gjermanisë, raportoi sot e përditshmja Bild, transmeton Anadolu Agency (AA).

Kasaforta e Gjelbër (Vault Green) në Dresden u vu në shënjestër të hajdutëve që hynë në ndërtesë në orët e para të mëngjesit. “Mund të konfirmojmë grabitjen në Kasafortën e Gjelbër”, tha zëdhënësi i policisë, Thomas Geithner.

“Grupi hetues i krimit është në vendin e ngjarjes. Autorët janë në arrati”, shtoi ai.

Hajdutët ndërprenë furnizimin me energji elektrike në ndërtesë në orën 5 të mëngjesit përpara se të thyenin dritaren në muzeun e fortifikuar.

Vjedhja spektakolare e artit ndoshta është vjedhja më e madhe në historinë gjermane të pas luftës.

Sipas Bild, banda e hajdutëve ka vjedhur bizhuteri historike, diamante dhe gurë të çmuar. Dëmi mund të shkojë në miliarda, pasi hajdutët e artit kanë vjedhur ekskluzivisht bizhuteri.

Megjithatë, hajdutët mund të kenë humbur një kënd. Megjithëse, mbyllën furnizimin me energji elektrike, një kamerë vëzhgimi thuhet se ka regjistruar një video të tyre.

Sipas Bild, disa autorë “dukshëm të vegjël” u panë në videon. Kasaforta e Gjelbër është e famshme në botë për thesaret e saj të artit.

Ka ar dhe gurë të çmuar, porcelan, vepra arti qelibar, gdhendje të jashtëzakonshme prej fildishi dhe një gur qershie në të cilin janë gdhendur 185 fytyra. Të gjithë ato janë tepër të çmueshme.

Policia gjermane kërkon autorin 23 vjet pas vrasjes së të miturës

Berlin

Policia në qytetin gjerman Grevenbroich ka kërkuar që rreth 900 meshkuj të paraqiten në polici për shkak të testit të ADN-së me qëllim të zbardhjes së vrasjes makabre të një vajze 11-vjeçare 23 vite më parë, transmeton Anadolu Agency (AA).

Vajza Claudia Ruf u rrëmbye, u përdhunua dhe u mbyt në vitin 1996, kurse trupi i saj u gjet në Euskirchen, 70 kilometra në jug të qytetit Grevenbroich.

Agjencia gjermane e lajmeve DPA raportoi se rreth 900 meshkuj të moshës midis 14 dhe 70 vjeç në kohën kur u vra Ruf, janë ftuar të bëjnë ekzaminimin e pështymës për të konstatuar ADN-në.

Megjithëse hetuesit në vitin 2010 kryen teste gjenetike tek 350 burra, vrasësi ende nuk është gjetur.

Ukraina përkujton viktimat e tragjedisë së Holodomorit

Skulptura e një vajze, që është pjesë e memorialit të viktimave të Holodomorit.

Ukrainasit po shënojnë 86-vjetorin e urisë në epokën staliniste, të njohur si Holodomor, ku miliona njerëz vdiqën nga uria, vdekje për të cilat fajtor konsiderohen politikat sovjetike në fillim të viteve ‘30.

Ukraina ka shpallur të shtunën e katërt të nëntorit si Ditën e Përkujtimit të Viktimave të Holodomorit dhe për çdo vit përkujton personat që vdiqën në këtë tragjedi, që shumica e ukrainasve konsiderojnë se ishte një akt gjenocidi, që kishte për qëllim të zhdukte fermerët ukrainas.

Organizatorët u kanë bërë thirrje qytetarëve që në dritaret e tyre të vendosin qirinj në orën 16:00 për të përkujtuar viktimat e Holodomorit.

Miliona vdiqën pasi autoritetet sovjetike detyruan fshatarët në Ukrainë që t’iu bashkoheshin fermave kolektive, duke iu kërkuar atyre grurin dhe produktet e tjera ushqimore.

Shifrat e personave që vdiqën në këtë periudhë variojnë nga 3 deri në 7 milionë njerëz.

Kisha Ortodokse ukrainase përmes një deklarate tha se sot “ne mund të flasim për të vërtetën (rreth tragjedisë) dhe këtë duhet ta bëjmë me zë të lartë sepse e keqja nuk duhet fshehur, siç u bë për dekada, nga regjimi sovjetik”.

Diplomatët e Shteteve të Bashkuara dhe të Australisë në Kiev, shprehën solidaritetin e tyre me qytetarët ukrainas dhe u zotuan se kurrë nuk do të harrojnë këtë tragjedi dhe viktimat e kësaj ngjarjeje.

“Ne bashkohemi me njerëzit e Ukrainës duke kujtuar personat që humbën jetën gjatë tragjedisë së vitit 1932-33 të Holodomorit”, thuhet në një postim në Twitter të ambasadës amerikane të Kiev. Në këtë postim po ashtu është bashkëngjitur një video-mesazh i ambasadorit amerikan në Kiev, William Taylor, i cili e ka përshkruar tragjedinë si artificiale dhe që ka ardhur si pasojë e veprimeve të autoriteteve sovjetike.

Parlamenti ukrainas më 2006 e ka shpallur Holodomorin si “gjenocid” ndaj popullit ukrainas.

Rusia e hedh poshtë këtë gjë, duke mohuar se autoritetet sovjetike në mënyrë sistematike kanë pasur për cak ukrainasit.

Autoritetet ruse theksojnë se të korrurat e pakta në atë kohë prekën shumë pjesë të Bashkimit Sovjetik dhe shumë rusë, kazakë dhe të tjerë vdiqën në këtë periudhë,

Të paktën 15 shtete e njohin si gjencodi Holodomorin, por jo edhe Shtetet e Bashkuara. rel

Stoltenberg: I takon Serbisë të vendosë për çështje të teknologjisë

Sekretari i Përgjithshëm i NATO-s, Jens Stoltenberg tha se i takon Serbisë të vendosë se çfarë lloji të teknologjisë dëshiron të ketë.

I pyetur nga Zëri i Amerikës për shqetësimet në rritje në lidhje me rolin e Kinës në rajonin e Ballkanit Perëndimor, kur bëhet fjalë për teknologjinë e saj 5G, Stoltenberg tha se ekzistojnë kushte që NATO-ja u kërkon vendeve anëtare sa i përket teknologjisë 5G, mirëpo sipas tij, kjo nuk vlen për vendet që nuk janë anëtare të Aleancës.

“Ne mund t’i këshillojmë ata, por varet nga Serbia që të vendosë se çfarë lloj telekomunikacioni dëshiron dhe si e organizon infrastrukturën e saj civile. Ne e mirëpresim faktin që Serbia është një partner i ngushtë i NATO-s. Ne po bashkëpunojmë me Serbinë”, tha Stoltenbeg.

5G është gjenerata e fundit e teknologjisë së internetit që ofron për përdoruesit qasje në internet me një shpejtësi shumë më të madhe sesa ofrohet aktualisht.

Mirëpo, ekzistojnë shqetësime në shumë vende, që Kina po e përdorë këtë teknologji për qëllime qeveritare dhe për të spiunuar përdoruesit.

Kompania kineze e teknologjisë Huawei po synon të investojë më shumë në tregun serb.

Më 4 tetor, gjatë një vizite në Kinë, kryeministrja e Serbisë, Ana Bërnabiq, ka shfaqur shpresën që kompania kineze e teknologjisë Huawei të vendosë për hapjen e qendrës së të dhënave për Evropën Juglindore në Kragujevc të Serbisë.

Në muajin maj, Uashingtoni e përfshiu në listë të zezë Huawei-n, duke pretenduar se kompania kineze është përfshirë në aktivitete në kundërshtim me sigurinë kombëtare të SHBA-së, ose interesat e politikës së jashtme. rel

Përmbytja në Venecia – Italia do të shpallë gjendje të jashtëzakonshme

Venecia gjatë përmbytjeve.

Italia do të shpallë gjendje të jashtëzakonshme pasi qyteti i Venecias u përfshi nga nivelet e larta të ujit prej 1.87 metra, duke përmbytur bazilikën e tij historike dhe duke shkaktuar ndërprerje të energjisë.

Më shumë se 80 për qind e qytetit – i cili gjenden në listën e UNESCO-s për trashëgiminë botërore – është nën ujë si pasojë e përmbytjeve.

Një grua ecë pranë bazilikës së Shën Markut në Venecia.

Kryeministri i Italisë, Giuseppe Conte, e përshkroi përmbytjen si “një goditje në zemrën e vendit tonë”.

Ai tha se qeveria tani do të veprojë shpejt për të siguruar fonde dhe burime.

Gjatë ditës se enjte pritet të shpallen masat emergjente që do të ndërmarrë qeveria italiane.

Kryetari i Bashkisë së Venecias, Luigi Brugnaro, fajësoi ndryshimet klimatike për nivelin e lartë të ujit.

Njerëzit ecin në rrugët e përmbytura nga uji në Venecia.

Këto nivele të ujit, nuk janë shënuar në më shumë se 50 vjet dhe autoritetet thonë se kjo gjendje do të lerë pasoja të përhershme.

Sheshi i Shën Markut – një nga pjesët më të ulëta të qytetit – ishte një nga zonat më të goditura.

Macron: sistemi ndërkombëtar në një krizë “pa precedent”

Presidenti francez Emmanuel Macron gjatë fjalës në çelje të Forumit për Paqen

Presidenti francez Emmanuel Macron shprehu keqardhjen për “krizën e paprecedentë” në sistemin politik global dhe bëri thirrje për aleanca të reja që do të zgjidhnin problemet e botës, një thirrje kjo që u mbështet nga udhëheqësit kinezë dhe ata të Bashkimit Evropian.

Zoti Macron priti kryetarë shtetesh dhe qeverish në Forumin e Paqes në Paris vetëm pak ditë pasi shkaktoi valë tronditjeje në kryeqytetet perëndimore duke paralajmëruar për paqëndrueshmërinë e NATO-s dhe BE-së.

Po përjetojmë një krizë të paprecedentë në sistemin tonë ndërkombëtar”, tha zoti Macron, duke vazhduar në linjën e intervistës dhënë të enjten revistës “The Economist”, ku ai paralajmëroi se NATO po përjetonte “vdekje klinike” dhe se BE-ja rrezikon të bëhet e parëndësishme.

Forumi për Paqen

Forumi për Paqen

Presidenti francez, i cili ka kërkuar të zërë një vend parësor në skenën ndërkombëtare që kur mori pushtetin në vitin 2017, tha se “mënyra të reja bashkëpunimi, aleanca të reja” nevojiten mes shteteve dhe organizatave.

Ai shtoi se sistemi global politik dhe ekonomik i ndërtuar pas përfundimit të Luftës së Dytë Botërore, pati sjellë paqe në disa rajone dhe nxorri nga varfëria shumë njerëz.

Por, pabarazi të reja janë shfaqur mes njerëzve dhe vendeve duke shkaktuar rilindjen e nacionalizmit dhe unilateralizmi “madje edhe mes atyre që janë gardianët më të fundit të këtij sistemi ndërkombëtar”, tha zoti Macron.

Për t’u përballur me sfidat e sotme, varfëria, lufta, rritja pa kontroll e popullsisë, emigracioni dhe burimet e paqëndrueshme natyrore, botës i duhet “më shumë bashkëpunim”, tha ai.

Në vazhdim, zoti Macron paralajmëroi se nuk duhet të ketë më “hipokrizi” nëse vjen fjala për të vënë në pikëpyetje funksionimin organizatave shumëkombëshe si OKB-ja, të cilën e quajti “të bllokuar”.

Intervista e zotit Macron me revistën “The Economist” pati shkaktuar shumë debat. Kancelarja gjermane Angela Merkel u shpreh se komentet e tij ishin shumë “drastike”. Sekretari amerikan i Shtetit Mike Pompeo këmbënguli se NATO është “e rëndësishme dhe vendimtare”.

Por, komentet e zotit Macron, i cili gjithashtu ka qartësuar se dëshiron të dialogojë me Presidentin rus Vladimir Putin, u mbështetën me ngrohtësi nga Rusia.

Ndoshta duke iu drejtuar kritikëve të tij, zoti Macron tha të martën se e folura pa doreza është e rëndësishme. “Mendoj se na duhet e vërteta… heshtja nuk është zgjidhje”, tha ai.

Ministri i Jashtëm gjerman Heiko Maas ra dakort se ekziston “nevoja për veprim në bashkëpunimin ndërkombëtar” përfshirë edhe brenda NATO-s, duke shtuar se çështja të tilla “diskutohen haptazi”.

Në po këtë forum, Presidentja e zgjedhur e Komisionit Evropian Ursula von der Leyen këmbënguli se trajtimi i sfidave të sotshme kërkon “institucione të forta dhe një bashkëpunim ndërkombëtar më efektiv”.

“Megjithatë, ndodh shpesh e kundërta; fuqitë ekzistuese po ndjekin të vetmuar shtegtime të reja; fuqi të reja po shfaqen, të tjera po rishfaqen dhe po konsolidohen”, tha zonja Von der Leyen.

Presidenti francez bisedon me Presidenten e zgjedhur të Komisionit Evropian Ursula Von der Leyen

Presidenti francez bisedon me Presidenten e zgjedhur të Komisionit Evropian Ursula Von der Leyen

Ajo shtoi se Bashkimi Evropian duhet të ushtrojë më shumë peshë politike në skenën ndërkombëtare.

Zonja Von der Leyen tha se nën mbikqyrjen e saj shpreson ta bëjë komisionin “vërtet gjeopolitik”.

Dëshiroj një Bashkim Evropian të orientuar më shumë jashtë tij, një Evropë që të mbrojë kolektivisht vlerat dhe interesat tona të përbashkëta në botë”, tha ajo.

Zonja Von der Leyen tha se multilateralizmi krijoi një Evropë të pasluftës e cila më në fund ishte “në paqe, e bashkuar dhe që zgjidhte dallimet tona përreth tryezave dhe jo në llogore”.

“Nuk duhet të harrojmë kurrë sa larg kemi mbërritur dhe pse”, tha ajo duke iu bashkuar paralajmërimit të zotit Macron ndaj hegjemonisë dhe nacionalizmit, për të cilin Presidenti francez tha se është testuar më parë dhe “na dha luftën”.

Nënpresidenti kinez Wang Qishan iu bashkua thirrje për unitet më të madh global.

Përhapja e unilateralizmit, proteksionizmit dhe populizmit, si dhe tendenca për të zëvendësuar mendimin dhe veprimin racional me shpërthimin e emocioneve, nuk ndihmojnë në zgjidhjen e problemeve”, tha zoti Wang.

“Kemi shpresë se vendet mund të punojnë së bashku për të reduktuar defiçitin e paqes, duke zgjeruar interesat e ndërthurura, duke përforcuar masat mbrojtëse të paqes, duke ruajtuar multilateralizmin… dhe duke forcuar lidhjen e paqes nëpërmjet inkurajimit të dialogut mes civilizimeve”, tha ai.

* Marrë nga Agjensia Franceze e Lajmeve (AFP)

Macron bën bashkë Hashim Thaçin e Aleksandër Vuçiçin në Paris

Presidenti i Kosovës Hashim Thaçi dhe ai i Serbisë, Aleksandër Vuçiç u takuan të martën në Paris me ndërmjetësimin e presidentit francez, Emmanuel Macron.

Takimi u bë në margjinat e Forumit për Paqe që po i zhvillon punimet në kryeqytetin e Francës.

Ende nuk dihen hollësi rreth takimit që ndodhi pas një periudhe të gjatë të pezullimit të bisedimeve ndërmjet të dyja palëve.

Një natë më parë, presidenti i Kosovës, Hashim Thaçi shkroi se presidentit Macron i ka konfirmuar që “Kosova është e vullnetshme dhe e gatshme për marrëveshje paqësore me Serbinë, e cila duhet të sjellë njohje reciproke dhe anëtarësim të Kosovës në Kombet e Bashkuara. Marrëveshja e Paqes garanton më shumë mundësi për zhvillim dhe për jetë më të mirë, si dhe më shumë prosperitet për të gjithë qytetarët tanë”.

Ndërsa presidenti serb, Aleksandër Vuçiç, tha se nuk ka asgjë të re në deklarimet e presidentit të Kosovës.

“Ai po flet thua se ne duhet të jemi të lumtur nëse na njohin. Ne jemi vend i njohur në Kombet e Bashkuara dhe nuk na duhet njohja juaj”, tha ai.

Procesi i bisedimeve është pezulluar tash e një vit që kur Prishtina u vuri tarifa prej 100 për qind mallrave serbe në shenjë kundërshtimi ndaj fushatës së Beogradit kundër shtetësisë së Kosovës.

Beogradi kushtëzon rifillimin e bisedimeve me heqjen e tarifave, ndërsa diplomatët shpresojnë që ripërtëritja e bisedimeve të ndodhë menjëherë pas formimit të qeverisë së re të Kosovës.

zëri i amerikës

Protestuesit katalanas bllokojnë rrugën kryesore në kufirin Spanjë-Francë

Oviedo

Automjetet dhe protestuesit kanë paralizuar trafikun në kufirin midis Katalonjës dhe Francës që nga fillimi i së hënës, për të cilën grupi separatist katalanas tha se kishte filluar një valë të re protestash, raporton Anadolu Agency (AA).

Organizatorët e demonstratave thanë se mijëra automjete kanë bllokuar fluksin e trafikut në të dy drejtimet.

Bllokimet e trafikut tani shtrihen me kilometra në kufi, ku autostrada spanjolle A-7 takohet me autostradën franceze A-9, sipas të përditshmes katalanase La Vanguardia.

Automjetet po ridrejtohen përmes rrugëve nacionale, por edhe në ato rrugë dytësore janë ngritur bllokada gjithashtu.

Aksioni po drejtohet nga “Cunami Demokratik”, një grup që ka qëndruar prapa disa trazirave në Katalonjë gjatë muajit të fundit. Protestat filluan si përgjigje ndaj dënimeve me burg, të cilat u shqiptuan për nëntë liderët separatistë katalanas.

Kjo protestë, tha grupi në një deklaratë, synon të paralajmërojë bashkësinë ndërkombëtare për nevojën që politikanët nga Katalonja dhe Spanja të “ulen dhe të flasin” në vazhdën e zgjedhjeve të përgjithshme të dielën.

Deri më tani, kryeministri i përkohshëm i Spanjës nuk ka pranuar të flasë me udhëheqësin separatist katalan, Quim Torra, duke thënë se Torra së pari duhet t’i bindet ligjit. Torra është zotuar të mbajë një tjetër referendum të paligjshëm të pavarësisë në rajonin e pasur verilindor.

“Sot, ne fillojmë një mënyrë të re të protestës, duke përdorur teknologjinë për të mbrojtur të drejtat dhe lirinë kolektive. Me këtë model të ri, automjetet bëhen protagonistët e veprimit”, tha organizata në Twitter.

Protestuesit kanë ngritur një skenë në mes të autostradës dhe u kanë bërë thirrje protestueseve të sjellin thasë për gjumë, veshje të ngrohtë dhe bateri për telefonat e tyre celular. Fotografitë tregojnë se janë mbledhur sasi të konsiderueshme të furnizimeve të tjera, përfshirë pajisjet e gatimit, ushqimin dhe pijet. ACN, një tjetër grup i pavarësisë, tha se gjithashtu janë vendosur tualete të lëvizshëm dhe një kuzhinë.

“Cunami Demokratik” theksoi se kjo ishte e dita e parë nga tre ditët e protestave të planifikuara. Mediat lokale raportojnë se grupi planifikon të qëndrojë në kufi për 72 orë.

Një numër i madh policësh, francezë dhe spanjollë u vendosën në të dyja anët e kufirit.