VOAL

VOAL

Please Wait ...
0%

Kush e shpiku “Panettone”-n? Ja receta e saj me fruta të thata

By | December 25, 2016

Komentet

Si të përgatisni petët sfoliate të freskëta vetë në shtëpi

Petët sfoliatë karakterizohen nga përbërja e tyre ku baza është gjalpi dhe nga shija unike që i jep çdo gatimi.

Mënyrat për ta përdorur janë të pafundme, duke filluar nga ëmbëlsirat e deri tek të kripurat.

Petët sfoliatë karakterizohen nga përbërja e tyre ku baza është gjalpi dhe nga shija unike që i jep çdo gatimi.

Përgatitja e petëve sfoliatë kërkon pak durim dhe pak eksperiencë me përgatitjen e brumrave, gjë që amvisat shqiptare e kanë.

Për të zbuluar të gjithë sekretet e përgatitjes së petëve sfoliatë në shtëpi, lexoni recetën e re që AgroWeb.org ka sjell për ju.

Përbërësit

175 g miell

100 g ujë

5 g kripë

Për bazën e gjalpit nevojiten

250 g gjalpë i freskët i ndarë në copa të vogla

150 g miell

Përgatitja

Për të përgatitur petët sfoliatë si fillim AgroWeb.org ju udhëzon të përgatisni brumin.

Në një gotë të vogël tresni kripën në sasinë e ujit të nevojitur. Miellin hidheni në një tas dhe shtoni ujin me kripën.

Duhet ta punoni derisa brumi të lidhet dhe përbërësit të kenë formuar një masë homogjene, e cila do të jetë jo shumë elastike.

Brumi nuk duhet që t’ju ngjitet në duar, prandaj nëse e shikoni që ka nevojë për miell mund t’i shtoni dhe pak kur ta punoni.

Mbulojeni këtë brum dhe lëreni në temperaturën e ambjentit.

Përgatitja e bazës së gjalpit

Në një tas tjetër hidhni pjesën tjetër të miellit për të përgatitur bazën me gjalpë.

AgroWeb.org ju këëshillon që gjalpin ta ndani në kubikë sa më të vegjël, pasi në këtë mënyrë do të punohet më mirë.

Me duar filloni të punoni miellin dhe gjalpin derisa të marrin formën e thërrimeve.

Kjo metodë lejon që baza e gjalpit të jetë e njëtrajtshme, duke i dhënë petës dëndësinë e duhur.

Më pas fillojeni dhe punojeni me ndihmën e një teli kuzhine apo lopate (spatule) kuzhine, ky brum nuk punohet me duar pasi gjalpi do të shkrijë nga temperatura e duarve.

Nuk ka nevojë të punohet gjatë, AgroWeb.org ju këshillon që mjafton që sipërfaqja e tij të jetë e lëmuar dhe pa kokrriza.

Hapja e petës

Vendoseni në tavolinën ku do ta punoni, dhe me miell dhe një petës jepini formën e një pete të vogël katrore.

Mund ta hapni dhe me duar nëse e keni më të lehtë më pas lëreni për pesë minuta në temeraturë ambjenti.

Nëse e shikoni që kjo bazë ju është bërë pak më e butë, AgroWeb.org ju këshillon ta vendosni në frigorifer përreth 10 minuta.

Merrni brumin e përgatitur me miell dhe ujë, fillojeni punojeni me petës derisa ta hapni në një petë katrore rreth 28 cm.

Brenda tij vendosni diagonalisht bazën e gjalpit, dhe mbulojeni si zarf me cepat e petës. Mundohuni që peta të ketë mbuluar plotësisht bazën e gjalpit.

Me petësin e trashë hapeni gjithmonë në gjatësi, jo në gjerësi, duke e spërkatur shumë pak me miell. Peta do të fillojë të marri formën e një drejtëkëndëshi, gjë që ju lehtëson me hapat e tjerë.

Paloseni petën për së gjati në tre shtresa, dhe fillojeni dhe hapeni përsëri me petës sa ajo të shtypet pak, më pas duhet ta lini përreth 30 minuta në frigorifer të mbuluar.

Nxirreni nga frigoriferi dhe punojeni përsëri me petës të trashë, përsëri në gjatësinë e petës.

Sapo ajo të jetë sheshuar pak do ta palosni përsëri në katër shtresa si një libër.

Pasi ta keni palosur, dhe shtypur pak me petës vendoseni përsëri në frigorifer.

Përsëriteni këtë hap dhe për dy herë të tjera: njëherë të palosur në tre shtresa, dhe më pas në katër.

Kur t’i keni kaluar të gjitha hapat, peta e sfoliatës duhet të qëndrojnë në frigorifer për 60 minuta që të jetë gati për t’u përdorur në receta.

Kura me sherebelë, mjaltë dhe spec djegës – Për fytin, kollën dhe gripin

Natyra na ka bekuar me sherebelën endemike, duke e pasur me bollëk kryesisht në zonën e Malësisë së Madhe.

Kur temperaturat kanë luhatje drastike, gjithmonë shoqërohen me raste në shtim të të prekurve me grip dhe me të ftohur.

Grupmoshat më të prekura janë fëmijët dhe të moshuarit.

Në të tilla raste, shpesh antibiotikët nuk janë zgjidhje pasi kanë edhe efekte anësore.

Pas këshillimit me mjekun dhe mjekimeve përkatëse sipas simptomave, gjithmonë kurat natyrale janë ideale për të mposhtur virozat.

Ndaj AgroWeb.org ju këshillon një përzierje shumë efikase për të qetësuar kollën, për të ringjallur organizmin dhe për më shumë energji.

Mjalti dhe sherebela janë dy dhurata të natyrës, që së bashku përbëjnë një superfuqi kundër virozave.

Në Shqipëri sherebela është një bimë me shumë rëndësi.

Natyra na ka bekuar me këtë bimë medicinale endemike, duke e pasur me bollëk kryesisht në zonën e Malësisë së Madhe.

Sherebela gjendet edhe në malësi të tjera të vendit të Veriut dhe të Jugut, aq sa dhe e eksportojmë në shumë vende të botës.

Sipas burimeve të AgroWeb.org, sherebela shqiptare është shumë e kërkuar në Shtetet e Bashkuara, Francë dhe Gjermani, për shkak të vlerave unike.

Përbërësit

  • 30 gramë gjethe të thata sherebele
  • Një majë luge piper i kuq djegës
  • 3 gota ujë
  • Mjaltë, mundësisht mjaltë lulesh
  • Lëng limoni, sipas dëshirës

Mënyra e përgatitjes

  • Përzieni sherebelën, piperin dhe ujin në një enë. Vendosini në zjarr për vlim, pastaj ulni pak nxehtësinë dhe ziejini derisa uji të përgjysmohet.
  • Më pas hiqeni nga zjarri dhe lereni të ftohet pak. Shtypni gjethet e sherebelës brenda çajit, në mënyrë që të nxirrni sa më shumë lëng prej tyre. Më pas kullojeni.
  • Shtoni mjaltë për shije dhe lëngun e limonit. Pas ftohjes vendoseni në frigorifer dhe pini nga 1-2 lugë gjelle ose më shumë sipas nevojës për qetësimin e dhimbjes së fytit për kollën dhe për infeksionet në rrugët e frymëmarrjes.

Për të mos u neglizhuar

Çaji i sherebelës këshillohet të mos përdoret tek gratë shtatëzëna.

Sipas informacioneve të AgroWeb.org, sasi të mëdha të sherebelës mund të shkaktojnë rrahje të shpeshta të zemrës.

Nëse vuani nga diabeti, përdoreni vetëm me këshillimin e mjekut.

Palca e kockave – Përfitimet e mrekullueshme për shëndetin

Palca përmban edhe minerale si kalçiumi, zinku, seleniumi, magnezi, mangani, fosfori e të tjerë.

Palca e kockave është një nga ushqimet që plotëson shumë nevoja të një organizmi të shëndetshëm.

Ajo ka përqindjen më të lartë të vitaminave, mineraleve, acideve yndyrore dhe lipideve.

Jo pa shkak gjyshërit dhe të parët tanë preferonin të thithnin kockat që të përfitonin sa më shumë prej saj.

Më poshtë do të gjeni nga AgroWeb.org përfitimet më të mëdha të palcës së ngrënshme.

Burim proteine

Palca ka një përmbajtje shumë të lartë proteine.

Në 100 gramë të këtij ushqimi do të merrni 14 përqind të nevojës ditore për proteinë.

Për më tepër, konsumi i palcës do t’i japë organizmit aftësinë për të rigjeneruar qelizat.

Burim kolagjeni

Palca është një burim i shkëlqyer kolagjeni, një proteinë për të cilën organizmi ka me të vërtetë shumë nevojë.

Kolagjeni është i nevojshëm për kockat, sistemin tretës, ekuilibrat e probiotikëve, bukurinë e lëkurës dhe zhdukjen e rrudhave.

Kolagjeni besohet të jetë i vyer edhe në mirëmbajtjen e sistemit imunitar.

Acidet Omega-3

Acidet yndyrore Omega-3 janë të dobishme për funksionin e trurit.

Palca është një burim i mirë glycine, një amino acid që riparon proteinat e tjera në organizëm.

Mungesa e këtyre acideve shkakton probleme shëndetsore dhe dobësi të sistemit imunitar.

Vitamina A

Konsumi i palcës së bashku me fruta dhe perime ju ushqen me vitaminë A.

Ky ushqyes i dobishëm promovon shëndetin e syve dhe parandalon humbjen e shikimit.

Burim hekuri

Në 100 gramë palcë do të përfitoni 25 përqind të nevojës ditore për hekur.

Ky i fundit do t’ju ndihmojë të mirëmbani ekuilibrat e lëngjeve dhe të parandaloni aneminë.

Përveç palcës ju mund të konsumoni edhe spinaq për të shmangur lodhjen kronike.

Palca përmban edhe minerale të tjera si kalçiumi, zinku, seleniumi, magnezi, mangani, fosfori e të tjerë.

Përmirëson kujtesën

Mineralet e shumta që gjenden tek palca janë të dobishme për një funksion të shkëlqyer të trurit dhe një kujtesë më të mirë.

Riparimi i qelizave

Prania e kolagjenit tek palca e bën procesin e riparimit të qelizave më të lehtë.

Kolagjeni ndihmon në shërimin e shpejtë dhe përmirëson funksionin e rruazave të kuqe dhe të bardha të gjakut.

Tretje më të mirë

Palca parandalon inflamacionin ne stomak.

Falë kolagjenit ajo u jep forcë baktereve të mira në stomak, dhe përmirëson tretjen duke ruajtur shëndetin e stomakut.

Sistemi kardiovaskular

Palca promovon ndjeshmërinë ndaj insulinës dhe shpërbën yndyrnat duke parandaluar rrezikun e sëmundjeve kardiovaskulare.

Ajo ofron elektrolite që ndihmojnë shëndetin e zemrës dhe qarkullimin e gjakut.

Palca pakëson rrezikun e diabetit në të njëjtën kohë.

Gjymtyrë të forta

Palca është e nevojshme për një trup të shëndoshë dhe të fortë. Ajo rrit fleksibilitetin e gjymtyrëve dhe përmirëson lëvizshmërinë.

Si Ta Gatuani Palcën

Palcën mund ta përfshini në supa ose ta piqni me gjalpë dhe erëza.

Për një shije më krokante mund ta vishni me miell ose thërrime buke të thekur.

Kur ta blini sigurohuni që palca ka ardhur nga bagëti të ushqyera me bar./AgroWeb.org

Kungulli i artë i vjeshtës – Pse duhet patjetër për shëndetin

Kungulli është i mirë për sytë dhe për sistemin imunitar sepse është i pasur me vitaminë A. Një racion i vetëm me kungull ofron 200 përqind të dozës së rekomanduar ditore të këtij ushqyesi kaq të dobishëm për organizmin. Shëndeti i zemrës Kungulli përmban kalium dhe antioksidantë të cilët parandalojnë sëmundjet e zemrës por edhe disa lloje sëmundjesh të tjera.

Kungulli është një nga perimet më të dashura të vjeshtës. Ky ushqim i pasur në vlera, vitamina dhe minerale përmban pak kalori.

Farat, gjethet dhe lëngjet e nxjerra prej tij janë shumë të mira me shëndetin.

Një perime të tillë arrin të bëjë pjesë në regjimin ushqimor në mënyra të ndryshme.

Atë mund ta konsumojmë si ëmbëlsirë, supë, sallatë, komposto apo edhe si zëvëndësues për gjalpin nëse e përdorni në formë pureje për gatimet me pjekje.

Kungulli përmban kalium që ka një ndikim pozitiv në tensionin e gjakut. Antioksidantët tek kungulli munden të parandalojnë dëmet e shkaktuara nga radikalet e lira dhe të përmirësojnë shikimin.

Kungujt e paprerë mund të ruhen në një vend të freskët dhe në errësirë për 2 muaj.

Arsyet Përse Kungulli të Bën Mirë  

Shëndeti i syve dhe sistemi imunitar

Kungulli është i mirë për sytë dhe për sistemin imunitar sepse është i pasur me vitaminë A. Një racion i vetëm me kungull ofron 200 përqind të dozës së rekomanduar ditore të këtij ushqyesi kaq të dobishëm për organizmin.

Shëndeti i zemrës

Kungulli përmban kalium dhe antioksidantë të cilët mund të parandalojnë sëmundjet e zemrës por edhe disa lloje kanceri.

Kolesteroli

Sterolët bimorë tek farat e kungullit ndihmojnë në uljen e kolesterolit të keq. Të njëjtin rol luajnë edhe acidet yndyrore omega-3 që ulin trigliceridet dhe tensionin e gjakut.

Pesha trupore

Kungulli është një ushqim i lehtë dhe me pak kalori. Një racion i vetëm përmban vetëm 50 kalori. I njëjti racion përmban 3 gramë fibër që do të thotë se do të ndiheni të ngopur për më gjatë.

Ushqehuni me më shumë kungull

Përfshirja e kungullit në regjimin ditor ushqimor është e thjeshtë.

1. Kungullin mund ta piqni në furrë dhe ta përdorni në antipasta.

2. Purenë e kungullit mund ta përdorni në supa, jo vetëm për ta bërë lëngun më të trashë por edhe për të zëvëndësuar yndyrnat dhe karbohidratet.

3. Përdorni kungullin në vend të yndyrës në gatimet e brumit dhe në ëmbëlsira.

4. Shtojeni kungullin në kos bashkë me mjaltin për një recetë pikante por edhe të ëmbël.

5. Kungullin mund ta përdorni në lëngjet e plota të frutave apo perimeve.

6. Farat e kungullit mund t’i piqni dhe t’i përdorni në sallata ose me perime të pjekura./AgroWeb.org

Byrek i mbuluar me kos dhe hudhra – Traditë dhe shije

Në Kosovë, mantija përgatitet gjerësisht në të gjitha krahinat.

Mantija është një gatim fantastik i shijshëm i traditës kosovare.

Byrek i mbushur me mish të grirë e qepë apo gjizë dhe i mbuluar me kos e hudhra.

Një shije fantastike që të përfshin tërësisht. Në fakt, mantija është një gatim me prejardhje nga kuzhina orientale.

Në Kosovë, mantija përgatitet gjerësisht në të gjitha krahinat jo vetëm nga amvisat në shtëpi por shërbehet edhe në byrektore të ndryshme apo edhe restorante tradicionale.

AgroWeb.org ju sugjeron më poshtë recetën fantastike të përgatitjes së mantijas krejt lehtë në shtëpi.

Përgatitja e Mantijas së Kosovës në Shtëpi

Përbërësit

1 kg miell,

2 gota ujë të vakët,

2 lugë gjelle vaj ulliri

Kripë për brumin

Dy gota kos i holluar pak

Dy-tre thelpinj hudhra

Mbushja

Për mbushjen mund të përdorni përbërës sipas preferencës, mish të grirë të përgatitur me qepë dhe salcë domate, gjizë apo djathë me vezë etj.

Në rast se do përdorni mbushje me mish të grirë atëherë do t’ju duhet 600 gr mish i grirë, një apo dy kokrra qepë dhe pak salcë domateje.

Në rast se do përdorni mbushje me gjizë, siç është rasti i mëposhtëm do t’ju duhet 500 gr gjizë me kripë dhe një apo dy kokrra vezë sipas dëshirës.

Përgatitja

Në tavolinën e kuzhinës ose në tepsi hidhet mielli, uji i vakët, vaji i ullirit, kripa dhe përzihen me dorë derisa brumi të bëhet homogjen.

Më pas, brumin e ndajmë në 30 toptha të vegjël.

Secilin nga topthat e hapim përmes një petësi në formën e një pete, jo më të madhe se pëllëmba e dorës.

Të gjithë topthat e hapur në petë i lyejmë pëmes një furçe kuzhine me gjalpë të freskët.

Më pas, AgroWeb.org ju sugjeron të bashkoni dhjetë nga topthat e hapur një mbi një dhe përmes një petësi hollojini në një petë të madhe.

Kështu bëni edhe me 20 petët e tjera duke krijuar me to dy petë të mëdhaja.

Më pas, bashkoni të tre petët e mëdha në një të vetme dhe ndajeni në katrorë të përshtatshëm për mbushjen e gjizës.

Në çdo katror shtohet një lugë gjelle gjizë mbështillet diagonalisht nga të katër anët (si zarf) dhe vihet me rradhë në tepsi për t’u pjekur.

Mantia piqet një gjysmë ore. Pasi është pjekur mbulohet me kos të holluar me pak ujë, kripë dhe hudhra të shtypura.  Për aromë mund të shtoni sipër pak nenexhik të freskët të prerë hollë.

Supë vjeshte me lulelakër dhe patate – Shije dhe shëndet i mirë

Vlerat ushqimore të saj, e bëjnë lulelakrën një nga perimet më të shëndetshme në botë.

E lehtë dhe shumë e shëndetshme, supa me lulelakra dhe patate është receta më e mirë për të mbajtur trupin në formë dhe organizmin të shëndetshëm.

Vlerat ushqimore të saj, e bëjnë lulelakrën një nga perimet më të shëndetshme në botë.

E kombinuar në një recetë supe dhe e gatuar me disa përbërës të tjerë po aq të shëndetshëm siç janë patatet, qepa, hudhrat, vaji i ullirit kjo pjatë është e mbushur plot me vlera shëndetësore krahas shijes së lehtë dhe kremoze të saj.

Mund ta shoqëroni me sallata të freskëta të stinës, byrekë të ndryshëm shtëpie, turshi etj.

Ndiqni më poshtë recetën e AgroWeb.org për supën me lulelakër, krejt lehtë dhe shpejtë për t’u përgatitur në shtëpi.

Si Ta Përgatisni Në Shtëpi

Përbërësit 

500 gr lulelakër

3 patate mesatare

3 lugë gjelle vaj ulliri

1 lugë gjelle gjalpë fshati i freskët

1 kokërr qepë

2-3 thelpinj hudhër

1 karrotë

1 filxhan çaji me qumësht

800 ml lëng pule ose perimesh

Kripë

Piper i zi

Piper i kuq

Përgatitja  

Si fillim, AgroWeb.org ju udhëzon që të kaurdisni me vaj ulliri qepën dhe hudhrat e grira hollë.

Shtoni karrotat e prera në kubikë, kaurdisini e më pas shtoni patatet e prera në kubikë gjithashtu.

Kaurdisini me një tjetrën, shtoni kripën, piperin e zi dhe të kuq dhe shtoni lëngun e pulës.

Lërini të zjejnë për 15 minuta derisa perimet të zbuten, më pas shtoni degëzat e lulelakrës dhe lërini të zjejnë nue zjarr të ngadaltë derisa lulelakrat të zbuten plotësisht.

Supën e përftuar kalojeni në mikser në mënyrë të bëhet kremoze.

Vendoseni edhe për 2-3 minuta sërish në zjarr dhe shtoni edhe qumështin.

Përziejeni nëse ka kripë sa duhet dhe kur ta servirni spërkateni me pak gjalpë të freskët të tretur, me disa copëza mishi të thatë, pra pastërma, nëse preferoni me pak bukë të thekur apo edhe qepë të njoma të grira hollë, ashtu si edhe copëza karrotash.

Do mrekulloheni me shijen e saj.

Si të pastroni siç duhet perimet dhe frutat

Lloje të ndryshme produktesh kërkojnë mënyra të ndryshme pastrimi

Lexuesit e AgroWeb.org janë të mirëinformuar për rëndësinë e të ngrënit ushqime të pastra e pa kimikate. Tani që tregjet janë të mbushura me fruta dhe perime nga më të larmishmet, dëshira për t’i konsumuar menjëherë të vjen natyrshëm.

AgroWeb.org do t’ju tregojë për disa këshilla praktike për pastrimin e duhur të frutave dhe perimeve. E vërteta është se nuk ju nevojiten detergjentë, locione të dedikuara për të pastruar perimet dhe frutat. Uji është ai që ju nevojitet dhe maksimumi mund të shtoni uthull ose sodë buke.

Si të pastroni siç duhet perimet dhe frutat

Mënyra më e mirë për të pakësuar sasinë e baktereve të padëshiruara është t’i lajmë në ujë të rrjedhshëm të ftohtë deri në 10 gradë më të ftohtë se perimet dhe frutat. Shpëlajini në ujë të rrjedhshëm për 30-60 sekonda. Nuk ka nevojë t’i mbani në ujë. Fërkojini që të largoni papastërtitë.

Përpara se t’i gatuani ose t’i prisni, pastroni mirë sipërfaqet e gatimit, enët, thikat dhe çdo gjë tjetër që do të përdorni. Lani edhe duart me sapun dhe ujë. Përpiquni që të shmangni ruajtjen e perimeve dhe frutave për shumë kohë.

Larja dhe më pas ruajtja në frigorifer e perimeve dhe frutave, përshpejton rritjen e baktereve dhe kalbjen e tyre. Ndaj perimet dhe frutat duhen larë pak përpara përdorimit.

Larja është e rëndësishme në varësi të produktit

Lloje të ndryshme produktesh kërkojnë mënyra të ndryshme pastrimi. Më poshtë do të gjeni  udhëzime të qarta për mënyrën e pastrimit, sipas produkteve të ndryshme që përdorni në shtëpi.

Frutat e pyllit dhe rrushi

Shpëlajini me ujë të ftohtë e të rrjedhshëm. Mos i lejoni të qëndrojnë në ujë. Hiqni kokrrat e kalbura që të shmangni shpërndarjen e mikroorganizmave.

Barishtet

Prini pjesën e bazës së barishtes dhe largoni gjethet e jashtme ose ato të dëmtuara. Zhytini në një enë të mbushur me ujë të ftohtë për disa minuta. Nëse jeni veçanërisht të shqetësuar për ndotjen e baktereve shtoni gjysmë gote me uthull për çdo gotë me ujë të ftohtë.

Më pas shpëlajini gjethet e barishteve në ujë të rrjedhshëm për 30 deri në 60 sekonda. Thajini gjethet nga uji me letër kuzhine.

Mollët dhe produkte të ngjashme

Lajini dhe fërkojini fort që të hiqni dyllin ose papastërtitë e tjera.

Erëzat e freskëta
Futini në një enë me ujë të ftohtë dhe fërkojini lehtë. Më pas thajini me letër kuzhine.

Kërpudhat

Përdorni një furçë të butë për të larguar papastërtitë dhe më pas një leckë të lagur.

Pjeshkët dhe frutat e buta

Pjeshkët duhen larë butësisht nën ujë të rrjedhshëm dhe të thahen me letër kuzhine.

Pjepri dhe shalqini

Frutat me lëkurë të fortë dhe të pangrënshme siç janë pjepri dhe shalqini apo edhe portokalli duhen larë përpara se t’i qëroni, sepse bakteret e jashtme mund të transferohen brenda tulit.

Karrotat dhe perimet e nëntokës

Produktet si karrotat ose patatet kanë nevojë që të fërkohen me furçë, e cila më pas duhet pastruar edhe ajo.

Domatet turshi, xhevahiri i kuzhinës shqiptare

Domatet turshi janë pjesë e çmuar e kuzhinës tradicionale të Shqipërisë. Përgatitja e tyre kërkon kohë, zemër dhe përkushtim nga amvisat shqiptare.

Ato njihen zakonisht si “zahire” dhe përgatiten gjatë verës për t’u bërë gati dhe konsumuar në dimër.

Të bërit turshi nëpërmjet fermentimit me shëllirë ose uthull është një teknikë e mirë e ruajtjes së perimeve.

Recetat e turshive variojnë nga kultura dhe vende të ndryshme dhe shpesh përfshijnë edhe përdorimin e erëzave.

Llojet më të përhapura të turshive në Shqipëri janë ato të domates, lakrës, specave, perimeve të përziera, kastravecave, patëllxhanëve dhe panxharit.

Domatet turshi janë ndër më të preferuarat për shumë shqiptarë.

Përveç vitaminës C, fermentimi çliron acidin laktik dhe probiotikët të cilët ndihmojnë tretjen.

Siç e dimë, frutat dhe perimet e freskëta përmbajnë antioksidantë natyralë që parandalojnë shfaqjen e sëmundjeve të zemrës dhe kancerit.

Megjithatë, jo të gjithë e dinë se fermentimi në ndryshim nga gatimi i ruan antioksidantët.

Turshitë përmbajnë sasi të moderuara të hekurit, magnezit, fosforit, kaliumit, thiaminës, riboflavinës, niacinës, vitaminës B-6, folatit, vitaminës B-12, vitaminës A, vitaminës E, vitaminës D, dhe vitaminës K.

AgroWeb.org dëshiron të ndajë me ju recetën më të mirë shqiptare të domateve turshi.

Si të përgatisni domatet jeshile turshi

Përbërësit

* 1 kg domate jeshile, të pastruara dhe të prera në katër.
* 1 gotë me uthull të bardhë
* 1 gotë me ujë
* 1 lugë gjelle me kripë e fortë
* 3 lugë çaji me fara lulekopre
* 6 thelbinj hudhër të qëruar
* 3 deri në 4 lugë çaji me piper kokërr
* 3 gjethe dafine

Udhëzimet

1. Sterilizoni katër kavanozë qelqi në ujë të valuar. Vendosini kapakët në një tenxhere. Mbulojini me ujë dhe lërini të ziejnë në temperaturë të ulët.
2. Në një tenxhere tjetër kombinoni uthullën, ujin dhe kripën dhe lërini të ziejnë.
3. Shtroni një napë në banak dhe mbi të vendosni kavanozët dhe kapakët e sterilizuar. Më pas në secilin prej tyre hidhni :

-1 lugë çaji me fara lulekopre
-2 thelbinj hudhër
-Çerek luge çaji me piper kokërr
-1 gjethe dafine

4. Shtoni kokrrat e domateve në kavanozë. Hidhni ujin e kripur mbi to duke lënë hapësirë në sipërfaqe. Përdorni lugë druri për të larguar bulëzat e ajrit dhe shtoni ujë me kripë nëse është e nevojshme. Fshini grykën e kavanozëve me një napë të pastër dhe mbyllini kapakët.
5. Vendosini në një tenxhere me ujë të valuar dhe lërini të ziejnë për 10 minuta. Më pas lërini të ftohen mbi një peshqir të vendosur në banak. Kur kavanozët të jenë ftohur plotësisht sigurohuni që kapakët janë të izoluar dhe puthitur mirë.
6. Prisni të paktën një javë përpara konsumimit. Ruajini kavanozët në një vend të ftohtë e të errët deri në një vit.

Përfitimet e domates jeshile

Vitaminat antiokisdantë: Një domate e madhe jeshile përmban 43 miligramë vitaminë C duke plotësuar gjysmën e dozës së rekomanduar ditore për meshkujt dhe pothuaj 60 përqind të dozës ditore për femrat.

Në të njëjtën kokërr gjeni 58 mikrogramë të vitaminës A, duke plotësuar një të dhjetën e dozës së rekomanduar ditore. Marrja e këtyre vitaminave e mbron sistemin imunitar dhe parandalon plakjen e parakohshme.

Vitamina K dhe Vitaminat B: Vitaminat B e ndihmojnë organizmin të përdorë proteinat, yndyrnat dhe karbohidratet për prodhimin e energjisë. Ato luajnë një rol të rëndësishëm në prodhimin e qelizave të kuqe të gjakut.

Një domate jeshile ofron 10 përqind të dozës së rekomanduar të vitaminave B, thiaminës, acidit pantotenik dhe më pak se 10 përqind të riboflavinës dhe niacinës për të cilat keni nevojë çdo ditë.

Minerale, Proteina dhe Fibra: Ndonëse domatja jeshile përmban pak minerale, ajo plotëson nivelin e ushqyesve të rekomanduar me 5-10 përqind të hekurit, magnezit, fosforit, kaliumit dhe manganit. Këto minerale ushqejnë gjakun, nervat, kockat dhe muskujt./AgroWeb.org

Pastiço me mish të grirë dhe krem qumështi – Receta me shije të përkryer

Një recetë fantastike që të mrekullon me shijen e saj

Në doni të provoni diçka speciale e që t’ju mrekullojë tërësisht me shijen e saj provoni të përgatisni recetën e pastiços me mish të grirë dhe krem qumështi, apo siç njihet ndryshe me beshamelë.

AgroWeb.org ju sjell më poshtë të gjithë hapat që duhet të ndiqni për përgatitjen e kësaj recete fantastike.

Përgatitja e Pastiços me Mish të Grirë

Përbërësit

Përbërësit bazë

350 gr makarona (të gjata apo të shkurtra në formë tubi)

110 gr djathë të bardhë

2 kokrra vezë

Për salcën me mish të grirë

700 gr mish të grirë

2 kokrra qepë

3 thelpinj hudhra

400 gr domate të grira

1 lugë salcë domatesh pure

Një gotë verë (nëse preferoni)

1 gjethe dafine

3 lugë gjelle vaj ulliri

Kripë

Piper i zi

Për kremin e qumështit (beshamelën)

½ filxhan çaji me miell gruri

½ filxhan çaji me gjalpë të tretur

900 ml qumësht

2 të verdha veze

100 gr djathë të grirë kaçkavall

Përgatitja

Përgatitjen e kësaj recete, AgroWeb.org ju udhëzon ta nisni duke përgatitur si fillim salcën me mish të grirë.

Vendosni një tigan të madh në zjarr dhe shtoni vajin e ullirit. Shtoni qepët e grira hollë dhe përzjeini derisa të zbuten.

Shtoni më pas hudhrat e grira, lugën me salcën e domateve dhe mishin e grirë. Kaurdisini të gjitha bashkë përmes një luge druri.

Pasi masa të mos ketë më lëng shtojini nëse preferoni gotën me verë dhe prisni derisa ajo të avullojë.

Më pas, AgroWeb.org ju udhëzon të shtoni domatet, kripën, piperin e zi dhe gjethen e dafinës.

Lërini të ziejnë me lëngun e domateve në zjarr të ngadaltë dhe kaurdiseni masën herë pas here derisa lëngu të avullojë. Pasi të jetë gati, gjethen e dafinës largojeni nga salca.

Më pas, nisni përgatitjen e kremit të qumështit, siç njihet ndryshe edhe beshamelë.

Vendosni një tigan të madh në zjarr të ngadaltë. Shtoni gjalpin e tretur dhe më pas miellin dhe përzjeini të dyja bashkë derisa të shkrihen me njëra tjetrën duke krijuar një salcë.

Shtoni nga pak qumësht të ngrohtë dhe përzjeheni vazhdimisht në mënyrë që salcë të mos bëhet me kokërriza.

Përzjeheni derisa salca të trashet dhe të bëhet kremoze.

Më pas, largojeni nga zjarri, shtojini dy të verdhat e rrahura të vezës dhe përzejeheni shpejt që të mos pritet. Shtoni kripë, piper.

Pasi të keni bërë gati gati salcën me mish të grirë dhe kremin e qumështit. Mbushni një tenxhere me ujë, hidhini pak kripë vendoseni në zjarr dhe sapo uji të nisë të vlojë shtoni aty makaronat.

Lërini të ziejnë për maksimumi 3-4 minuta. Më pas, largojini makaronat nga zjarri dhe kullojini.

Në një tas shtoni dy vezë dhe përzjeini me djathin e bardhë. Me këtë masë lyeni makaronat që sapo keni kulluar.

Më pas, lyejeni tepsinë me gjalpë në të gjithë sipërfaqen e saj, shtoni makaronat e përzjera me djathin e bardhë dhe vezët. Shtoni sipër salcën me mish të grirë dhe më pas shtoni në të gjithë sipërfaqen kremin e qumështit dhe spërkateni me djathin kaçkavall të grirë.

Futeni të piqet në furrë të parangrohur në 200 gradë për 40 minuta derisa sipërfaqja të marrë ngjyrë të kuqërremtë të artë.

Pasi të fikni furrën lëreni të ftohet për 30 minuta e më pas shërbejeni.

Pulë e pjekur në qumësht – Receta me shije të mrekullueshme

I gatuar në këtë mënyrë, mishi i pulës merr një shije të mrekullueshme, bëhet tërësisht i shkrifët dhe i butë

Receta e mishit të pjekur të pulës në qumësht është një recetë e veçantë e speciale, e cila mund të përgatitet në çdo kohë por edhe në raste festash apo gëzimesh familjare.

Një recetë fantastike, e thjeshtë dhe unike në shije e cila padyshim, pasi ta keni provuar njëherë do të shndërrohet në më të preferuarën.

AgroWeb.org ju sjell më poshtë këtë recetë fantastike, e cila përgatitet krejt lehtë dhe shpejt në shtëpi pa ju munduar dhe pa ju marrë kohë.

I gatuar në këtë mënyrë, mishi i pulës merr një shije të mrekullueshme, bëhet tërësisht i shkrifët dhe i butë.

Përgatitja e Pulës së Pjekur me Qumësht

 Përbërësit

 (Përbërësit më poshtë janë për 4-5 persona)

1 pulë e freskët 1 kg

400 ml qumësht

Kripë

Piper i zi

2 lugë gjelle gjalpë fshati

Përgatitja

Si fillim, pastroni mirë pulën me ujë të bollshëm. Sipas preferencës, pulën mund ta prisni në thela ose ta lini të plotë. Kriposeni sipas preferences.

Hidhini piper të zi dhe nëse preferoni edhe pak nenexhik

Në vijim, AgroWeb.org ju udhëzon të vendosni me rradhë thelat e mishit të pulës apo pulën e plotë në një tavë ose tepsi.

Më pas, hidhuni sipër thelave të mishit qumështin dhe më pas gjalpin të ndarë në copëza të vogla.

Për këtë recetë në vend të mishit të pulës mund të përdorni edhe mish qengji, keci ose mish viçi.

Më pas, futeni tavën në furrë të piqet përreth 2 orë në temperaturën 150 gradë.

Lëreni të piqet derisa masa e qumështit të avullojë dhe sipërfaqja e mishit të marrë ngjyrën e kuqërremtë të pjekjes.

Kjo recetë shoqërohet me gatime të ndryshme, sallata të freskëta të stinës, perime të pjekura, patate të gatuara në mënyra të ndryshme, por edhe supa të lehta etj

Mund ta shoqëroni në mënyrë të shkëlqyer edhe me salca dhe dajthra të ndryshëm.

Terapia e limonit të ngrirë për shëndet të shkëlqyer

Terapia e limonit të ngrirë ofron një metodë të thjeshtë e të shijshme për të përfituar këto vlera të rëndësishme shëndetësore.

Në shumë prej artikujve kushtuar agrumeve dhe të jetuarit shëndetshëm, ekspertët kanë nënvizuar rëndësinë e të pirit ujë me limon në mëngjes.

Në këtë artikull do të mësoni për cilësitë e mira që ofron një limon i ngrirë.

Terapia e limonit të ngrirë ofron një metodë të thjeshtë e të shijshme për të përfituar këto vlera të rëndësishme shëndetësore.

Antioksidantët tek limoni luftojnë qelizat e këqija dhe rrisin fuqitë mbrojtëse të trupit.

Limoni i ngrirë luan një rol plotësues, parandalues dhe kundërveprues ndaj radikaleve të lira.

Thesar vitaminash

Lëkura e limonit përmban 10 herë më shumë vitamina se lëngu.

Pikërisht tek lëkura fshihen vlerat më të mira mjekësore të limonit të cilat ne për fat të keq i hedhim tutje.

Sipas të dhënave të AgroWeb.org, lëkura e limonit përmban pektinë, vitaminë C, flavonoidë dhe më shumë se 22 përbërës të tjerë që ngadalësojnë oksidimin e qelizave.

Sistemi imunitar

Terapia e limonit të ngrirë është ideale për të luftuar një sërë sëmundjesh të përditshme ndaj të cilave jemi të ekspozuar siç janë e ftohura, infeksionet apo gripi.

Gjatë gatimit, lëkura e limonit humbet 40 përqind të vlerave por nëse ngrihet lëkura i ruan të gjitha.

Rënia në peshë

Siç e dini, limoni është ideal për të pastruar organizmin dhe për të pastruar gjakun nga lipidet të cilat shkaktojnë kolesterolin e keq që më pas akumulohet si yndyrë.

Ekspertët thonë se njerëzit duhet të konsumojnë të paktën 75 gramë limon në ditë si pjesë e një regjimi të shëndetshëm ushqimor.

Si Të Ngrini Limonin

Përgatitja e terapisë së limonit të ngrirë është shumë e thjeshtë.

Përbërësit:

2 limonë

Grirëse

Përgatitja:

Ju mund të mbani në ngrirje 2 limonë ose t’i prisni në copa dhe t’i grini e më pas t’i fusni në ngrirje.

Ekspertët gjithësesi rekomandojnë ngrirjen e limonit të plotë.

Si konsumohet limoni i ngrirë

Pasi limoni të jetë ngrirë, grijini në grirëse.

Shpërthimi i aromës karakteristike do të jetë i menjëhershëm. Ju mund të përfshini grimcat e limonit në gatime të ndryshme.

Merrni 25 gramë nga pluhuri i grirë dhe konsumojeni me kos.

Të njëjtën sasi mund ta shtoni në sallatën me spinaq, arra, djathë e domate qershi.

Limonin e grirë mund ta shtoni në çaj ose në sallatë frutash.

Nëpërmjet kësaj taktike, mund të shfrytëzoni të gjithë këtë agrume të mrekullueshme dhe të merrni prej saj një mburojë të hekurt për shëndetin.

Mish qengji me kos dhe hudhra – Receta plot vlera dhe shije unike

Kjo është një recetë e thjeshtë por fantastike si në shije ashtu edhe vlera ushqyese.

AgroWeb.org ju sjellë recetën e mishit të qengjit me kos dhe hudhra, e cila përgatitet në shumë pak minuta dhe krijon një pjatë të mrekullueshme.

Kjo recetë përgatitet edhe me lloje të tjera mishi siç është mishi i pulës apo i viçit.

Kjo do të jetë një recetë që do t’ju mahnisë, mishi qëndron i butë e plot lëng, por gjithashtu ka një shije perfekte nga erëzat e përdorura.

Përgatitja e Mishit të Qengjit me Kos e Hudhra

Përbërësit për 4-5 persona

4-5 thela të plota të mëdha mish qengji ose një pjesë e mirë e paprerë qengji, shpatull apo kofshue

2 gota me kos

6-8 thelpinj hudhër

2-3 lugë gjelle me vaj ulliri

Kripë

Piper

Majdanoz i grirë

Përgatitja e recetës

Thelat e mishit të pastruara ose pjesën e paprerë të qengjit vendoseni në një tenxhere me ujë dhe pak kripë dhe  vendosini të zjejë për 20 minuta. Më pas, hiqeni dhe lëreni të ftohet.

Në një tas hedhim kosin, pak kripë e piper sipas dëshirës, dhe i përziejmë në mënyrë që të formojnë një masë të njëtrajtshme.

AgroWeb.org ju këshillon që në rast se përdorni kos të përgatitur në shtëpi, duhet t’i kulloni lëngun që lëshon vetë kosi.

Kjo recetë mund të bëhet me çdo lloj kosi, por më ideali është ai i deles, pasi është dhe më kremoz.

Pasi e kemi përgatitur kosin, kalojmë aty copat e mishit të qengjit ose pjesën e paprerë dhe përziejini me një lugë druri.

Në një tavë qelqi ose balte, hidhni vajin e ullirit dhe mundohuni që ta përhapni në të gjithë sipërfaqen e saj.

Më pas qëroni hudhrat dhe mjafton t’i ndani në gjysmë.

Masën me kosin dhe mishin e qengjit vendoseni në tavë, shtoni aty dhe hudhrat e prera.

E vendosim për t’u pjekur në furrë të parangrohur me 220 gradë celsius, përreth 40 minuta, ose derisa mishi i qengjit të jetë pjekur plotësisht.

Nëse dëshironi t’i forconi shijen kësaj recete mund t’i shtoni dhe disa feta limoni pasi kanë kaluar 20 minuta nga pjekja.

AgroWeb.org ju sugjeron që kur mishi i qengjit të ketë marrë një ngjyrë të kuqërremtë, ta kthejni nga ana tjetër, kështu do të piqet uniform.

Para se ta servirni në tryezën tuaj, hidhini sipër majdanozin e freskët, të cilin e keni grirë imët, dhe përgatituni për një shije unike.

Mund të shoqërohet me bukë të thekur apo me sallatë perimesh të stinës për një vakt sa më të lehtë