Ish-ministri i Brendshëm, Saimir Tahiri ka publikuar një video në rrjetet sociale, e cila ka tërhequr jo pak vëmendjen. Në pamje, Tahiri shfaqet në një ambient regjistrimi, përballë kamerave, ndërsa krahas videos ka zgjedhur një mesazh enigmatik: ““Disa histori i kam jetuar. Disa të tjera i kam dëgjuar të tregohen për mua. Do shihemi së shpejti. Ka kaq shumë për të thënë!”.

Postimi ka nxitur pikëpyetje mbi atë që ish-ministri mund të jetë duke përgatitur.

Fakti që videoja është realizuar në një ambient të përshtatur për regjistrime ka shtuar aludimet se Tahiri mund të jetë duke punuar për një rrëfim, intervistë apo projekt të ri.

Megjithatë, në postimin e tij ai nuk jep detaje të tjera dhe nuk sqaron se cilave histori u referohet apo se çfarë do të publikojë më tej.

Postimi i Tahirit
Disa histori i kam jetuar. Disa të tjera i kam dëgjuar të tregohen për mua.
Do shihemi së shpejti. Ka kaq shumë për të thënë!

Saimir Tahiri, ish-ministër i Brendshëm dhe një prej figurave të njohura të mazhorancës së Edi Ramës, u dënua në vitin 2022 për “shpërdorim detyre”, me 5 vite burg, dënim që për shkak të gjykimit të shkurtuar u reduktua në 3 vite e 4 muaj burgim. Ai u lirua nga burgu më 2 qershor 2023, pasi kishte vuajtur rreth 16 muaj burg. Pjesën e mbetur të dënimit e vazhdoi në arrest shtëpie. gsh