VOAL

VOAL

Please Wait ...
0%

Izrael: Takim Carter-Netanyahu

By | July 21, 2015

Komentet

CPJ: Kina dhe Turqia me më së shumti gazetarë të burgosur

Të paktën 250 gazetarë janë të burgosur në botë. Në këtë drejtim prin Kina, si një vend autoritar që nuk e toleron pavarësinë e mediave, tha të mërkurën, Komiteti për Mbrojtjen e Gazetarëve (CPJ).

“Shumica e gazetarëve të burgosur janë akuzuar si “armiq të shtetit” apo për publikimin e “lajmeve të rreme”, theksoi organizata me seli në Nju Jork.

CPJ ka identifikuar të paktën 48 gazetarë të burgosur në Kinë, një më shumë se në vitin 2018.

Si vende tjera, ku ushtrimi i këtij profesioni është i rrezikshëm janë: Turqia, Arabia Saudite, Eritrea, Vietnami dhe Irani.

Në vendin e dytë pas Kinës është Turqia me 47 gazetarë të burgosur, që shënon ulje të numrit për dallim nga viti 2018, ku numëroheshin gjithsej 68 gazetarë të burgosur. Mirëpo, ky nuk vlerësohet si përmirësim i vërtetë i gjendjes, pasi Ankaraja arriti të mbyllte më shumë se 100 media duke ndjekur penalisht nën akuzat për “justifikim të terrorizmit”. Si pasojë, shumë gazetarë janë frikësuar dhe e kanë humbur vendin e punës.

“Dhjetëra gazetarë në Turqi janë në pritje të gjykimit, ndërsa të tjerët dënohen në mungesë dhe kërcënohen me arrest nëse kthehen në vendin e tyre”, theksoi Komiteti.

Arabia Saudite dhe Egjipti kanë nga 26 gazetarë në burg.

Në Arabinë Saudite 18 gazetarë janë burgosur pa e ditur se për çfarë u akuzuan. Komiteti për Mbrojtjen e Gazetarëve është gjithashtu i shqetësuar për rastet e “rrahjeve dhe kequshqyerjes së të burgosurve politikë, përfshirë katër gazetarë”.

Revista Time shpall Greta Thunbergun person të vitit

Greta Thunberg

Revista Time e ka shpallur aktivisten kundër ndryshimeve klimatike, Greta Thunberg, person të vitit.

Çdo vit, kjo revistë, e shpall si fitues një personalitet, grup ose lëvizje, që ka pasur më së shumti ndikim në 12 muajt e kaluar.

Në listën e Time këtë vit ishin edhe presidenti amerikan, Donald Trump, kryesuesja e Dhomës së Përfaqësuesve, Nancy Pelosi dhe protestuesit e Hong Kongut.

“Ajo ka arritur të krijojë në botë, një zhvendosje të qëndrimit për këtë çështje, duke kërkuar ndryshime urgjente. Ajo ka ofruar një thirrje morale për ata që janë të gatshëm të veprojnë”, tha revista Time, pasi e shpalli 16-vjeçaren suedeze person të vitit.

Por, sipas revistës, “veprimet për klimën janë aq komplekse sa vetë fenomeni dhe Thunberg nuk ka zgjidhje magjike për këtë çështje”.

Thunberg ka qenë favorite për të fituar Çmimin Nobel për Paqe për vitin 2019, mirëpo i njëjti është ndarë për kryeministrin e Etiopisë, Abiy Ahmed.

Më 30 tetor, Greta Thunberg, ka kthyer mbrapsht një çmim për ambientin, bashkë me një shumë të të hollave, me arsyetimin se “lëvizja për klimën nuk ka nevojë për më shumë çmime”. Ajo ka falënderuar Këshillin Nordik për ofrim të këtij shpërblimi, dhe ka thënë se për të është “një nder i madh”.
Mirëpo sipas saj “politikanët dhe njerëzit në pushtet” duhet të dëgjojnë “shkencën aktuale”.

Më 11 dhjetor në kuadët të samitit për klimën të Kombeve të Bashkuara që po mbahen në Spanjë, Thunberg tha se dekada e ardhshme do të përcaktojë të ardhmen e planetit. Ajo akuzoi liderët botërorë se po bëjnë përpjekje të vazhdueshme për të mos bërë ndryshime thelbësore në çështjen e klimës.

Dikur ikonë e demokracisë, sot në gjyq për gjenocid

Dikur u pa si mbështetëse e zëshme e të drejtave universale të njeriut – e gatshme për të hequr dorë nga liria e saj, për t’iu rezistuar gjeneralëve të pamëshirshëm, që sunduan Mianmarin për dekada me radhë.

Aung San Suu Kyi, në vitin 1991, u shpërblye edhe me Çmimin Nobel për Paqe dhe kryetari i Komitetit të Nobelit në atë kohë e përshkroi si “shembull të shquar të fuqisë së të pafuqishmëve”.

Sot, tre vjet pasi u bë udhëheqëse de facto e Mianmarit, ajo është në qendër të kritikave nga të njëjtit udhëheqës dhe aktivistë ndërkombëtarë, që dikur e mbështetën.

Qindra-mijëra myslimanë Rohingya janë detyruar të zhvendosen nga Mianmari në Bangladesh, për shkak të sulmeve të ushtirisë. Dhe, Suu Kyi akuzohet se nuk ka bërë asgjë për të ndalur përdhunimet, vrasjet dhe gjenocidin e mundshëm. Ajo ka refuzuar të dënojë ushtrinë apo të pranojë mizoritë e kryera.

Mbështetësit e saj të paktë ndërkombëtarë thonë se ajo është politikane pragmatike, që përpiqet të qeverisë një vend multietnik, me një histori komplekse dhe me një shumicë budiste, që pëlqehet pak nga Rohingyat.

Ata po ashtu thonë se ushtria në Mianmar ende mban fuqi serioze politike.

Por, për kritikët, ajo e ka humbur qëndrimin moral dhe me siguri reputacionin e fuqishëm si dikush që është i gatshëm të ngrihet për të drejtat e njeriut, pavarësisht kostos personale.

Rruga drejt pushtetit

Suu Kyi, tani 73 vjeçe, e kaloi pjesën më të madhe të kohës nga viti 1989 deri më 2010 në një formë të paraburgimit, për shkak të përpjekjeve të saj për të sjellë demokraci në Mianmarin e udhëhequr nga ushtria. Ky fakt e bëri atë simbol ndërkombëtar të rezistencës paqësore kundrejt shtypjes.

Ajo udhëhoqi Lidhjen Kombëtare për Demokraci drejt fitores më 2015, në zgjedhjet e para të hapura në Mianmar pas 25 vjetësh.

Fitorja erdhi pesë vjet pasi u lirua nga arresti shtëpiak.

Edhe pse Kushtetuta e Mianmarit nuk e lejoi atë të bëhej presidente, sepse ka fëmijë që janë shtetas të huaj, Suu Kyi shihet gjerësisht si udhëheqëse de fakto.

Titulli i saj zyrtar është këshilltare e shtetit. Presidenti Win Myint është një ndihmës i saj i afërt.

Prejardhja politike

Aung San Suu Kyi është vajza e heroit të pavarësisë së Mianmarit – që ndryshe njihet edhe si Birmani – gjeneralit Aung San.

Ai u vra gjatë periudhës së tranzicionit, në korrik të vitit 1947, vetëm gjashtë muaj para pavarësisë dhe kur Suu Kyi ishte dy vjeçe.

Më 1960, ajo shkoi në Indi me nënën e saj, Daw Khin Kyi, e cila u emërua ambasadore e Mianmarit në Delhi.

Katër vjet më vonë, shkoi në Universitetin Oksford në Mbretërinë e Bashkuar, ku studioi filozofonë, politikën dhe ekonominë. Atje takoi bashkëshortin e saj të ardhshëm, akademikun Michael Aris.

Pas jetës dhe punës në Japoni dhe Butan, ajo u vendos në Mbretërinë e Bashkuar për të rritur fëmijët e saj, Alexander dhe Kim.

Kur u kthye në Mianmar, më 1988, për t’u kujdesur për nënën e saj të sëmurë, Mianmari ishte në mes të trazirave të mëdha politike.

Mijëra studentë, punonjës zyrash dhe murgj dolën në rrugë, duke kërkuar reforma demokratike.

Mbështetës të Suu Kyisë mbajnë fotografinë e saj dhe të babait të saj.

Mbështetës të Suu Kyisë mbajnë fotografinë e saj dhe të babait të saj.

“Si vajza e babait tim, nuk mund të qëndroja indiferente ndaj gjithçkaje që po ndodhte”, tha ajo në një fjalim në qytetin Rangon, më 26 gusht të vitit 1988, dhe mori përsipër udhëheqjen e revoltës kundër diktatorit të atëhershëm, gjeneralit Ne Win.

E frymëzuar nga fushatat jo të dhunshme të udhëheqësit të të drejtave civile në Shtetet e Bashkuara, Martin Luther King, dhe nga Mahatma Gandhi i Indisë, ajo organizoi tubime dhe udhëtoi anembanë vendit, duke bërë thirrje për reforma demokratike paqësore dhe zgjedhje të lira.

Por, demonstratat u shtypën brutalisht nga ushtria, e cila mori pushtetin me anë të një puçi, më 18 shtator, 1988. Suu Kyi u vendos në arrest shtëpiak vitin pasues.

Qeveria ushtarake i organizoi zgjedhjet kombëtare në maj të vitit 1990, në të cilat Lidhja Kombëtare për Demokraci e Suu Kyisë fitoi bindshëm, por ushtria nuk pranoi ta dorëzonte kontrollin.

Arresti shtëpiak

Suu Kyi mbeti në arrest shtëpiak në Rangon për gjashtë vjet, derisa u la e lirë në korrik të 1995-ës.

Ajo u dërgua sërish në arrest shtëpiak në shtator të vitit 2000, pasi u përpoq të udhëtonte në qytetin Mandalaj, në kundërshtim me kufizimet e udhëtimit.

Ajo u la e lirë pa kushte në maj të vitit 2002, por pak më shumë se një vit më vonë u burgos, për shkak të një përplasjeje midis mbështetësve të saj dhe një turme të mbështetur nga qeveria.

Më vonë u lejua të kthehej në shtëpi, por përsëri nën arrest shtëpiak.

Disa herë iu mundësua të takonte zyrtarë të partisë së saj dhe diplomatë të përzgjedhur, por ajo nuk u lejua t’i shihte dy djemtë e saj apo burrin, i cili vdiq nga kanceri në mars, 1999.

Autoritetet ushtarake e lejuan të udhëtonte në Mbretërinë e Bashkuar kur ai ishte shumë i sëmurë, por ajo u detyrua të refuzonte nga frika se nuk do të lejohej të kthehej më në Birmani.

Rikthimi në politikë

Suu Kyi nuk u lejua të marrë pjesë në zgjedhjet e 7 nëntorit, 2010, të parat në Mianmar pas dy dekadash, por ajo u lirua nga arresti shtëpiak gjashtë ditë më vonë.

Djali i saj, Kim Aris, u lejua ta vizitonte për herë të parë pas dhjetë vjetësh.

Pasi qeveria e re filloi një proces reformimi, Suu Kyi dhe partia e saj iu ribashkuan procesit politik.

Kur zgjedhjet plotësuese u mbajtën në prill të vitit 2012, ajo dhe partia e saj fituan 43 nga 45 vendet në garë dhe ajo u betua si deputete dhe udhëheqëse e opozitës.

Në muajin maj të atij viti, Suu Kyi udhëtoi jashtë Mianmarit për herë të parë në 24 vjet.

“Tepër optimiste”

Megjithatë, ajo u irritua me ritmin e zhvillimit demokratik.

Në nëntor të vitit 2014, ajo tha se Mianmari nuk ka bërë ndonjë reformë të vërtetë dhe se Shtetet e Bashkuara, të cilat kanë hequr pjesën më të madhe të sanksioneve kundër Mianmarit më 2012, kanë qenë “shumë optimiste” në të kaluarën.

Dhe në qershor të 2015-ës, Parlamenti i Mianmarit nuk arriti të heqë veton e ushtrisë për ndryshimet kushtetuese.

Katër muaj më vonë, më 8 nëntor, 2015, Mianmari mbajti zgjedhjet e para të hapura në 25 vjet. Lidhja Kombëtare për Demokraci shënoi fitore bindëse.

Edhe pse nuk u lejua të bëhej presidente për shkak të një kufizimi kushtetues, Suu Kyi u bë udhëheqëse de fakto në vitin 2016.

Që atëherë, udhëheqja e saj është përcaktuar nga kriza me Rohingyat.

Video: Heshtja ndaj spastrimit etnik

Pas sulmeve vdekjeprurëse në stacionet e policisë në shtetin Rakhine, në gusht të vitit 2017, ushtria e Mianmarit filloi sulme brutale ndaj pakicës etnike, duke detyruar qindra mijëra të iknin përtej kufirit në Bangladesh.

Kritikët thonë se Suu Kyi nuk bëri sa duhet për të dënuar ushtrinë.

Ajo dhe Mianmari tani përballen me një proces gjyqësor në Gjykatën Ndërkombëtare të Drejtësisë, me qendër në Hagë, dhe Suu Kyi udhëtoi këtë javë drejt Holandës, ku do t’i luftojë akuzat për gjenocid kundër vendit të saj.

Që nga marrja e pushtetit, Suu Kyi dhe qeveria e saj janë përballur me kritika edhe për ndjekjen penale të gazetarëve dhe aktivistëve, duke përdorur ligje të epokës koloniale.

Përparim është bërë në disa fusha, por ushtria vazhdon të mbajë një të katërtën e vendeve në parlament dhe kontrollin e ministrive kryesore – përfshirë atë të Mbrojtjes, të Punëve të Brendshme dhe të Çështjeve Kufitare.

Përgatiti: Valona Tela

Trump, Pompeo takohen me ministrin e jashtëm rus Lavrov

Presidenti Donald Trump u takua të martën pasdite pas dyerve të mbyllura në Shtëpinë e Bardhë me ministrin e Jashtëm të Rusisë, Sergei Lavrov. Takimi erdhi pas shpalljes nga komisioni i ligjeve i Dhomës së Përfaqësuesve të akuzave që synojnë shkarkimin e presidentit.

Përpara kësaj, Sekretari i Shtetit Mike Pompeo pati një takim me ministrin rus në Departamentin e Shtetit, ku deklaroi se çdo ndërhyrje e huaj në zgjedhjet amerikane është “e papranueshme” dhe paralajmëroi Rusinë dhe të tjerët se administrata Trump do të mbrojë integritetin e votës.

Në bisedimet e tij të gjera me homologun rus që përfshinin edhe mosmarrëveshjet për kontrollin e armëve, Ukrainën, Sirinë dhe Venezuelën, zoti Pompeo tha në një konferencë të përbashkët shtypi se administrata do t’i kundërvihet ndërhyrjes në zgjedhje, si në ato të kaluara ashtu edhe në të ardhmen.

Para takimit me Presidentin Donald Trump në Shtëpinë e Bardhë, ministri Lavrov përsëriti mohimet ruse për ndërhyrje në zgjedhjet presidenciale të vitit 2016. Ai tha se përfundimi i arritur nga bashkësia amerikane e inteligjencës se Rusia ndërhyri në favor të zotit Trump është “e pabazë”.

Nga ana e tij zoti Pompeo u shpreh: “Unë kam qenë i qartë: Ishte e papranueshme, dhe në fakt i bëra të qarta pritshmëritë tona për Rusinë.” “Administrata Trump, tha ai, gjithmonë do të punojë për të mbrojtur integritetin e zgjedhjeve tona. Pikë. Nëse Rusia ose ndonjë aktor i huaj ndërmarrin hapa për të minuar proceset tona demokratike, ne do të ndërmarrim veprime si kundërpërgjigje.”

Ministri i jashtëm rus, Lavrov ironizoi “valën e dyshimeve që ka përmbytur Uashingtonin” në lidhje me ndërhyrjen në zgjedhje, duke kërkuar përsëri që Moskës t’i dorëzohen provat e një veprimtarie të tillë nëse ekzistojnë.

“Të gjitha spekulimet në lidhje me ndërhyrjen tonë të pretenduar në proceset e brendshme të Shteteve të Bashkuara janë të pabaza,” tha zoti Lavrov. “Askush nuk na e ka dhënë këtë dëshmi sepse ajo thjesht nuk ekziston,” tha ai. Ministri hodhi një propozim të përsëritur të Rusisë për publikimin e komunikimeve konfidenciale me SHBA, për të zgjidhur shqetësimet për zgjedhjet e 2016-s që ai tha se administrata Obama nuk e pranoi.

Sekretari Pompeo nuk u shfaq i impresionuar nga oferta e zotit Lavrov dhe tha se SHBA tashmë i kanë bërë publike konkluzionet e tyre.

Vizita e zotit Lavrov në Uashington është e para që nga maji 2017.

Lavrov dhe Pompeo vunë në dukje bashkëpunimin në luftën kundër terrorizmit dhe anti-narkotikëve që ka vazhduar megjithë tensionet dhe shprehën shpresë se synimet e përbashkëta për Korenë e Veriut dhe Iranin mund të realizohen.

Por, ata pranuan gjithashtu se mosmarrëveshjet janë të mëdha dhe përfshijnë traktatin e ri për kontrollin e armëve që skadon vitin e ardhshëm dhe dëbimin reciprok të diplomatëve nga të dyja vendet. zëri i amerikës

Peter Handke mori çmimin Nobel mes reagimesh e protestash

Shoqatat e viktimave të luftës në Bosnje, vendosën një ekran gjigant elektronik në qendër të Sarajevës, duke portretizuar laureatin e çmimit Nobel për letërsinë, Peter Handke, si një djall që qëndron pranë kafkave, me një mesazh ku thuhet “turp të keni”.

Në Stokholm, grupe protestuesish vendosën slogane si “Jo Nobel për lajme të rreme”, dhe thirrje “Handke kërkoi ndjesë për viktimat e Srebrenicës. Sot”,

Këto ishin pjesë e protestave kundër autorit Handke, të cilin kritikët e quajnë mohues të gjenocidit, dhe vënë në pah lidhjet e tij me Sllobodan Millosheviçin, deklaratat në mbrojtje të nacionalizmit serb dhe kundër ndërhyrjes së NATO-s në Kosovë. Ai kishte mbajtur edhe fjalim në vitin 2006 në funeralin e ish presidentit serb i cili vdiq në Hagë derisa po gjykohej për krime lufte dhe gjenocid.

Ambasadorët e Kosovës, Shqipërisë, Bosnjës, Kroacisë, Maqedonisë së Veriut dhe Truqisë, bojkotuan ceremoninë.

“Sot është ditë e turpshme për Evropën dhe njerëzimin”, shkroi ministri i jashtëm i Kosovës në largim, Behgjet Pacolli. Kjo, tha ai “tregon se Evropa vuan nga harresa për atë çfarë ka ndodhur në Kosovë, Bosnjë e Kroaci”, shkroi ai.

Ministri i Jashtëm i Maqedonisë së Veriut, Nikolla Dimitrov, shkroi se “Mohimi i gjenocidit duhet të kundërshtohet Kemi udhëzuar ambasadorin e Maqedonisë së Veriut në Suedi që të mos marrë pjesë në ceremoninë e ndarjes së çmimit Nobel për (Peter) Handken”, shkroi ai.

Presidenti turk, Recep Tayyip Erdogan, më herët gjatë ditës akuzoi Akademinë Suedeze për shpërblim të shkelësve të të drejtave të njeriut duke i dhënë çmimin Nobel autorit Handke.

Të hënën edhe Kroacia e Bosnja thanë se kanë udhëzuar ambasadorët të bojkotojnë ceremoninë.

Peter Handke refuzoi javën e kaluar t’u përgjigjej pyetjeve në lidhje me mbështetjen e tij për Sllobodan Millosheviçin, në një paraqitje në Stokholm. zëri i amerikës

OSBE-ja paralajmëron Shqipërinë të mos kufizojë lirinë e mediave online

Organizata për Siguri dhe Bashkëpunim në Evropë (OSBE) u ka bërë thirrje autoriteteve në Shqipëri që të ndryshojnë projektligjin rreth sistemit të ri të regjistrimit të mediave online.

Përfaqësuesi për liri të mediave në këtë organizatë, Harlem Desir, ka kërkuar nga Parlamenti i Shqipërisë që ndryshimet të bëhen ndonëse shumica prej tyre do të varen nga “zbatimi”.

Ai ka theksuar se agjencia rregullatore duhet të jetë plotësisht e pavarur dhe e lirë nga ndikimi politik.

Projektligji i vitit të kaluar për mediat online dhe kërcënimet e qeverisë për vendosje të gjobave të ashpra në mediat e paregjistruara elektronike janë kritikuar nga OSBE-ja dhe organizatat e mediave.

Desire ka thënë se ligji nuk duhet të interpretohet si e drejtë për censurë apo kufizim i lirisë së shprehjes.

Sipas tij mundësia e bllokimit të qasjes në materiale online duhet të kufizohet në tri aspekte: pornografi të fëmijëve, promovimi i akteve terroriste dhe shkelja e sigurisë kombëtare.

Kriza në lindje të Ukrainës kthehet në axhendën globale

Gjermania, Franca, Rusia dhe Ukraina rifillojnë dialogun në formatin e Normandisë për të gjetur një zgjidhje të krizës në Ukrainën lindore, raporton Anadolu Agency (AA).

Samiti i Katërshes së Normandisë do të zhvillohet sot në Paris me pjesëmarrjen e Kancelares gjermane, Angela Merkel, Presidentit të Francës, Emmanuel Macron, Presidentit të Rusisë, Vladimir Putin dhe Presidentit të Ukrainës, Volodymyr Zelensky.

Kjo do të jetë ngjarja e parë zyrtare me pjesëmarrjen e liderëve ukrainas dhe rusë, të cilët do të zhvillojnë një takim dypalësh të veçantë në margjinat e samitit për të diskutuar mbi situatën në Krime dhe Donbass.

Zelensky vazhdon përpjekjet e tij për t’i dhënë fund krizës në Ukrainën lindore, në përputhje me premtimet e tij zgjedhore, dhe ka arritur të ndërmarrë disa hapa të rëndësishëm, duke përfshirë shkëmbimin e të arrestuarve dhe kthimin e anijeve ukrainase të kapura nga Rusia në një konfrontim vitin e kaluar.

Presidenti i Ukrainës nxiti rifillimin e bisedimeve në formatin e Katërshes së Normandisë, që pezulluan në vitin 2016 dhe dukej se ishin harruar nga Perëndimi.

Grupi trepalësh i kontaktit në Donbas, falë Zelenskyt, miratoi planin e veprimit “formula e Steinmeier-it” gjatë bisedimeve të shtatorit në Minsk.

Ky është një mekanizëm që sugjeron zbatimin gradual të marrëveshjes së Minskut të vitit 2015 për të ndaluar konfliktin në Ukrainën lindore, duke propozuar një autonomi më të gjerë në rajonet Donetsk dhe Lugansk të Ukrainës dhe mbajtja e zgjedhjeve lokale nën mbikëqyrjen e Kievit.

Është arritur dakordim që Formula Steinmeier të paracaktojë samitin e Normandisë gjatë takimit në Minsk.

Ish-Presidenti i Ukrainës, Petro Poroshenko, mohoi formulën e Steinmeier, duke thënë se forconte pozicionet e separatistëve. Moska e quajti të pamundur takimin e Putinit dhe Zelenskyt pa marrëveshje për këtë çështje të veçantë.

Megjithë presionin e madh të opozitës, Zelensky miratoi mekanizmin, duke gjetur reagim pozitiv te Gjermania, Franca dhe Rusia.

Pozicioni rus ka qenë i vazhdueshëm që nga fillimi i krizës në Ukrainën lindore, ndërsa Ukraina, nën drejtimin e Zelenskyt, provon mjete diplomatike dhe nuk kërkon konfrontim të mëtejshëm me Moskën.

Edhe pse Zelensky shihet si një politikan i papërvojë, ekspertët thonë se hapat e tij të ardhshëm mund të çojnë në një zgjidhje paqësore të tensioneve në lindje të Ukrainës.

Së paku pesë të vdekur nga vullkani në Zelandën e Re

Kryeministrja e Zelandës së Re, Jacinda Ardern.

Një vullkan shpërtheu në Zelandën e Re, duke lënë të vdekur së paku pesë persona dhe plagosur disa të tjerë.

Vullkani shpërtheu në Ishullin e Bardhë, nga ku u shpëtuan 23 vetë.

Autoritetet thanë se rreth 100 persona besohet të kenë qenë pranë.

“E dimë se ka pasur një numër turistësh në dhe përreth ishullit në atë kohë, si qytetarë të vendit, ashtu edhe vizitorë”, tha kryeministrja e Zelandës së Re, Jacinda Ardern.

Ajo shtoi se policia ka nisur operacionin e kërkim-shpëtimit, porse hiri i vullkanit po i pengon përpjekjet.

Vullkani në Ishullin e Bardhë është një nga më aktivët në Zelandën e Re.

Më 3 dhjetor, ueb-faqja e monitorimit të rreziqeve gjeologjike GeoNet paralajmëroi se “vullkani mund të jetë duke hyrë në një periudhë kur aktiviteti shpërthyes ka më shumë gjasa të ndodhë”, megjithëse shtoi se “niveli aktual i aktivitetit nuk paraqet rrezik të drejtpërdrejtë për vizitorët”.

Trump realizon vizitën e parë në Afganistan

Presidenti amerikan, Donald Trump ka thënë se Shtetet e Bashkuara kanë rinisur bisedimet me talibanët, teksa ka realizuar një vizitë të papritur për Festën e Falënderimeve te trupat amerikane në Afganistan, duke shënuar kështu vizitën e parë në shtetin e shkatërruar nga lufta prej kur ka nisur udhëheqësinë më 2017.

Talibanët dëshirojnë të arrijnë një marrëveshje dhe ne do të takohemi me ata”, u ka thënë ai gazetarëve në veri të Kabulit, duke shtuar: “Ne kemi thënë se duhet të ketë armëpushim dhe ata më parë nuk kanë dëshiruar armëpushim dhe tani duan të kenë armëpushim”.

“Me siguri se do të funksionojë ashtu”, ka thënë ai.

Udhëtimi i Trumpit vjen një javë pas lirimit të dy pengjeve perëndimore nga talibanët, në këmbim të tre të burgosurve talibanë, duke rritur kështu shpresat për rikthim të bisedimeve për paqe.

Shtetet e Bashkuara dhe talibanët kanë zhvilluar bisedime gati një vit për t’i dhënë fund luftës 18-vjeçare në Afganistan, para se Trump të pezullonte bisedimet në muajin shtator.

Agjencia e lajmeve, Reuters ka raportuar se zyrtarë talibanë ka thënë se ky grup është takuar me zyrtarë të lartë amerikanë në Doha në fundjavën e kaluar, duke shtuar se shumë shpejt do të rikthehen bisedimet.

“Qëndrimi jonë vazhdon të jetë i njëjtë. Nëse nisin bisedimet për paqe, do të vazhdojnë aty ku janë ndalur”, ka thënë zëdhënësi i talibanëve, Zabihullah Mujahid për Reuters, pak pasi Trump ka thënë se bisedimet do të rinisin.

Në bazën ajrore në Bagram, presidenti amerikan ka pranuar se numri i trupave amerikane është duke u zvogëluar, mirëpo ka insistuar se SHBA-ja do të vazhdojë të ketë prezencë aty derisa të arrihet marrëveshje apo të ketë fitore, meqë sipas tij talibanët duan që patjetër të ketë marrëveshje.

Aktualisht janë rreth 13,000 trupa ushtarake në Afganistan, dhe forca evropiane që marrin pjesë në kuadër të misionit të NATO-s.

Presidenti amerikan, Donald Trump dhe homologu i tij afgan, Ashtaf Ghani.

Presidenti amerikan, Donald Trump dhe homologu i tij afgan, Ashtaf Ghani.

Ekipi i presidentit afgan, Ashraf Ghani ka publikuar muajin e kaluar një propozim prej shtatë pikave, me qëllim të rikthimit të bisedimeve mes SHBA-së dhe talibanëve.

Deri më tani talibanët kanë refuzuar që të bisedojnë me Qeverinë afgane, duke e konsideruar kukull të perëndimit.

Në Bagram, Trump është pritur nga gjenerali ushtarak amerikan, Mark Milley.

Presidenti amerikan është shoqëruar nga Këshilltari amerikan për Siguri Kombëtare, Robert O’Brien, është takuar me presidentin afgan Ghani, zyrtarët e të cilit kanë thënë se kanë kuptuar për vizitën e Trumpit vetëm disa orë përpara.

Lideri afgan ka falënderuar Trumpin për “shtyrje përpara të paqes që do të garantonte arritjet e vitit të kaluar dhe do të garantonte siguri”.

Më vonë, përmes një postimi në rrjetin social, Twitter, Ghani ka thënë se “në takimin tonë bilateral, ne kemi diskutuar përparimin e rëndësishëm që kemi bërë bashkërisht në përpjekjet ushtarake në fushëbetejë, duke përfshirë shkatërrimin e grupit militant, Shteti Islamik në lindje të Afganistanit. Presidenti Trump ka vlerësuar përpjekjet e palodhshme të forcave afgane të sigurisë në këto luftime”.

“Të dyja palët kanë vlerësuar se nëse talibanët janë të sinqertë në përkushtimin e tyre për arritje të paqes, ata duhet të pranojnë armëpushimin. Ne po ashtu kemi vlerësuar se për të zgjatur paqja, strehët e sigurta për terroristët jashtë Afganistanit, duhet të shpërbëhen”, ka shkruar Ghani.

Gjatë vizitës së tij në bazën ushtarake, Trump ka shtruar darkë për trupat amerikane, për nder të Festës së Falënderimeve.

Presidenti Trump u ka shërbyer ushqim ushtarëve amerikanë për nderë të Festës së Falënderimeve.

Presidenti Trump u ka shërbyer ushqim ushtarëve amerikanë për nderë të Festës së Falënderimeve.

Në këtë festë, që është traditë në SHBA, që familjet amerikane të darkojnë së bashku.

Përgatiti: Krenare Cubolli

Sudani shpërbën partinë e diktatorit Omar al-Bashir

Pamje nga protestat në Sudan para disa muajve.

Sudani ka urdhëruar partinë politike të diktatorit të rrëzuar nga pushteti, Omar al-Bashir, që të shpërbëhet dhe asetet t’i konfiskohen, teksa ky shtet i Afrikës verilindore ka marrë një tjetër hap drejt demokracisë, pas disa mujave të protestave.

Autoritetet e reja po ashtu kanë shfuqizuar një ligj të kohës së Bashirit për të rregulluar sjelljen dhe veshjen e grave.

Në dekret është thënë se “Partia e Kongresit Kombëtar do të shpërbëhet dhe regjistrimi i saj do të anulohet nga lista e partive politike në Sudan”, duke shtuar se një komiteti do të formohet për të konfiskuar të gjitha pronat dhe asetet.

Bashir me partinë e tij kanë udhëhequr shtetin nga 30 qershori i vitit 1989, para se të nisin protestat për largimin e tij nga pushteti më herët gjatë këtij viti.

Pas largimit të Bashirit dhe disa javëve të protestave pro-demokracisë, gjeneralët e Sudanit patën arritur një marrëveshje në korrik për ndarje të pushtetit dhe liderët e protestave, në mënyrë që të mos përshkallëzohet më shumë situata.

Bashir fillimisht ka qenë në arrest shtëpiak dhe më pas është transferuar në burgun në Kartum.

Protestuesit kanë kërkuar që ai të dërgohet në Gjykatën Ndërkombëtare Penale në Hagë, ku përballet me akuza duke përfshirë krime kundër njerëzimit.

Profesori italian më 1943: Tërmetet, Shqipëria e dyta në botë pas Japonisë, ja zonat e rrezikuara

Rezarta Delisula – Duke kërkuar në bibliotekën personale mes gazetave të vjetra e librave shkencorë mbi tërmetet, gjeta gazetën “Roja Kombëtare” të ditës së mërkurë më 4 prill 1943 dhe pikërisht një shkrim mbi tërmetet në vendin tonë. Titulli i bazuar në studimin e Dr. Carlo Morelli “Tërmetet, Shqipëria zë vendin e parë në Europë e të dytin në botë pas Japonisë” më tërhoqi vëmendjen ndaj për lexuesit e “Gazeta Shqiptare” po risjellim këtë artikull të vitit 1943, por që për ne është fare i panjohur.

Pyeta dje një shok:- A s’më thua sikur të kqyrim Shqipërinë nga pikpamja e veprimtarisë sizmike në lidhje me shtetet e tjera të botës, ç’vend kujton ti se ka për të zënë? Mejtoi pak dhe pastaj u-përgjegj: – Sigurisht vendin e fundit. Nuk e pyeta se ku u-bazua por e mora me mendje se këtë përfundim e nxorri pasi solli në mëndje popullsinë e Shqipërisë dhe hapësirën e saj në kilometra katrorë, domethënë shteti më i vogël i botës. Pra i vogël duhet të figurojë dhe në shkallëzimin e lëkundjeve të tërmetit. Dhe duket se u bazua në të tilla argumenta sepse e pashë të hapij sytë nga habija kur dëgjoi ti thoshja:- Shqipëria zë vëndin e parë në të gjitha shtetet e Europës dhe po ta kqyrim në lidhje me shtetet e gjithë botës, kjo vjen e dyta se vendin e parë në tërmete e zë Japonia! – Bëri sikur të më kundërshonte po s’e lash. – Këndo, shtova librin e këtyre muajvet të fundit që ka botuar Dr.Carlo Morelli me titullin “Carta sismica del l’Albania” nën kujdesin e Akademisë Mbre-tërore të Italisë dhe do të bindesh. Uli kryet, por nga habitja nuk hoqi dorë. Zaten edhe unë kur këndova këtë libër hapa sytë. Po ju përkthej fjalë për fjalë një pjesë të hyrjes së librit:

“Veprimtaria sismike e shtratit superficial të tokës është shumë e ndryshme: këtu mund të dallohen vënde në të cilat askush nuk mba mënd të ketë dëgjuar tërmete kurse në vënde të tjera, fatkeqësisht, lëkundjet janë shumë të shpeshta dhe shumë herë edhe çkatërronjëse. Nga kjo pikpamje, po të kqyret çështja, toka shqiptaremund të konsiderohet klasike për tërmete, kaq përsa u përket përsëritjevet, sa dhe, sidomos, përsa i përket intensitetit. Në të vërtetë Shqipëria është vëndi i Evropës ku përsëriten më shpesh tërmetet çkatëronjës, dhe midis vendevet që janë edhe Ekstra-evropjane. Shqipëria nga kjo pikpamje vjen e dyta pas Japonisë. Natyrisht nuk e japim në mënyrë sihariqi këtë konstatim dhe do të preferonim që nga kjo pikpamje Shqipëria të mos përmendej fare, sesa të kishte primatin në Evropë dhe vëndin e dytë në të gjithë botën. Por fakti është ky fatkeqësisht sipas të thënavet të Morellit, dhe meqënë se është një gjë që i përket vëndit t’onë, është mirë t’a njohim vëndin t’onë dhe nga kjo pikpamje. Nuk është vetëm për të kënaqur një kureshtje ose për të shtuar njoftunitë t’ona, por më shumë është dhe për arësyen që duke patur njoftime të plota kush bën shtëpi në vëndet ku janë shënuar më shumë lëkundje t, të përpiqen që t’i bëjnë sa është e mundur më antisismike. Morelli e ka shpurë studimin që në vitëret e moçme kaq sa shënon edhe vitin 334 Pas krishtit, por lëkundjet e epokës së largme nuk mund të dihen me saktësi sepse mungonin veglat edhe pse nuk gjënden kollaj shënimet. Tërmetet e atyre korhravet, nëse dihen edhe sot, kanë qënë nga ata tërmete që kanë bërë kërdinë, kurse lëkundjet më të lehta, por edhe këto ckatrim-tarenuk kishin mundësi të diheshin dhe të merreshin e të mbaheshin shënime. Për shëmbëll kujton tërmetin e vitit 334 pas Krishtit që çkatëroi Durrësin por ne do të merremi vetëm me ato lëkundje që kanë ngjatë nga viti 1800 e tëhu.

2000 të vrarë
në Vlonë
Nga viti 1833 Vlona është lëkundun tridhjet e tri herë por vetëm 13 kanë qenë ato që kanë bërë çkatërime dhe viktima. Por lëkundja më e fortë dhe që ka bërë dëmet më të mëdha është shënuar më 12 tetor të viti 1851. Godinat e qytetit po thuaj të gjitha pësuan dëme të mëdha kurse shumica e tyre u shëmb. Ujrat e detit u-ngritnë përpjetë më shumë se gjysmë metro dhe pikërisht 66 centimetra. Tjatër lëkundje shënohet në shtator 1859. Në titin 1866 janë bërë shtat lëkundje të forta dhe me dëme jo të vogla…Pas tre vjet Vlona përsëri ka tërmet: Më 14 gusht 1869 dhe më 18 dhjetor 1920 shënon tërmetin e fundit por mjaft të madh.

Elbasani vjen në serën e dytë
Pas vlonës vjen Elbasani me 10 lëkundje. Këtu tërmeti i parë u dëgjua më 1843, datë 5 shtator, me dëme të ndjeshme. Lëkundja e dytë u bë më 20 tetor tëtor 1851 edhe ky me dëme. Pas 13 vjetvet përsëritet lëkundja dhe kështu më 21 gusht 1864 kemi dëme të tjera në Elbasan. Pastaj kemi më 21 qershor 1895, më 1 mars 1906, më 16 gusht 1907, 13 shkurt 1912, 18 dhjetor 1920, 21 tetor 1921 dhe 7 janar 1923.

Në sërë të tretë vjen Kanima (besoj se flitet për Kaninën) e cila është më pranë Vlonës. Po shënojmë datat e nënd lëkundjevet që ka vuajtur Kanima: Më 1833, 1851, 1858, 1859, 1860, 1862, 1866 (tri herë, 1867 dhe 1869).
Durrësi që nga fillimi shekullit që kaloi (i referohet shekullit të XVIII) e gjer më 1926 ka pësuar 9 troditje të forta nga të cilat më të dëmshmet kanë qenë ato të vitit të fundit. E para lëkundje më 1 shtator 1869, e dyta 6 korrik 1895, 10 shkurt 1986 dhe ajo e fundit në vitin 1926 mr tri përsëritje 16, 17 dhe 25 dhjetor. Lëkundja e parë e vitit të fundit u dëgjua në orën 17,54 minuta dhe 52 sekonda që bën më shumë dëme në rrethet e Shijakut. Të nesërmen pas një lëkundje të fortë në orën 06.21 minuta e 16 sekonda ndjehet një lëkundje e dytë katastrofike që lë dëme të mëdha në shtëpi dhe shtrëngon me mijra njerëz të gjejnë strëhime në baraka. Vazhdojnë lëkundje të lehta gjer më 25 dhjetor, kur në orën 16.14 minuta dhe 22 sekondadëgjohen dy lëkundje përsëri katastrofike që përsëriten më 27 të atij muaji. Lëkundje të lehta vazhduan për disa muaj. Më pas renditet Berati dhe Shkodra dhe çkatërimi i Tepelenës më 1920 me 200 të vrarë.
Carlo Morelli: Carta sismica dell’Albania- Felice Le Monnier-Firenze, 1942Lit.45

Presidenti turk u kërkon vendeve islamike të ndihmojnë Shqipërinë

Presidenti i Turqisë, Recep Tayyip Erdoga u kërkoi vendeve islamike që të ndihmojnë Shqipërinë të tejkalojë situatën e rënduar pas goditjes nga tërmetit që shkaktoi shumë viktima.

“Përgjegjësia bie mbi ne. Është obligim i yni si Organizatë Islamike për Bashkëpunim, që të bëjmë hapin e parë në planifikimin dhe organizimin e donatorëve. Tani, duhet të mbështesim Shqipërinë në trajtimin e të lënduarve dhe strehimin e atyre që iu shkatërruan shtëpitë. Marrja e këtij hapi mendoj se është i dobishëm dhe në të njëjtën kohë e kemi detyrim ndaj vëllezërve tanë”. zëri i amerikës