VOAL

VOAL

Please Wait ...
0%

Interfax: Në Venezuelë pritet të ketë trupa të tjera ruse

By | April 4, 2019

Komentet

Kina konfirmon se virusi i ri është ngjitës

Michael Brown

Ekspertët kinez të shëndetësisë kanë konfirmuar se virusi i ri i quajtur “korona” dhe që u ka marrë jetën katër njerëzve, është ngjitës, ndërsa është përhapur frika se virusi mund të përhapet me shpejtësi tek njerëzit. Qeveria kineze beson se shpërthimi i virusit të ri në qytetin Wuhan do të vihet nën kontroll.

Një zyrtar nga Ministria e Tregtisë po ashtu u përpoq të qetësonte shqetësimet për ndikimet që mund të ketë në tregje shpërthimi i virusit.

Zyrtari i lartë kinez Chu Shijia tha se ministria do të sigurohet që tregu është i mbrojtur gjatë shpërthimit të virusit.

Zyrtarët e shëndetit në qytetin Wuhan, ku edhe filloi përhapja e virusit, thonë se numri i rasteve tani e ka tejkaluar shifrën 200, me shumicën e rasteve të konfirmuara si simptoma të buta. Ndërkohë është konfirmuar viktima e fundit që ka humbur jetën, një burrë 89 vjeçar në qytetin Wuhan.

Zyrtarët e shëndetit në Korenë e Jugut thanë të hënën se kanë konfirmuar rastin e një gruaje të prekur nga virusi e cila kishte fluturuar nga qyteti Wuhan për në Incheon të Koresë së Jugut. Tailanda dhe Japonia po ashtu kanë konfirmuar raste të virusit.

Zyrtarët e shëndetit po u kërkojnë njerëzve që të tregohen të kujdesshëm por thanë se nuk ka arsye për panik. Organizata Botërore e Shëndetit nuk ka dhënë rekomandime kundër udhëtimeve drejt Kinës, ndërsa Komisioni Kombëtar i Shëndetit në Kinë thotë se përhapja aktuale e virusit është e parandalueshme dhe mund të kontrollohet.

“Nuk kishim zgjedhje tjetër”- Harry thyen heshtjen, pas vendimit për t’u shkëputur nga monarkia

Së fundmi, Princi Harry theu heshtjen duke folur rreth “trishtimit të tij të madh” sa i takon largimit nga Familja Mbretërore. Harry u shpreh se ai dhe e shoqja, Meghan-i nuk kishin zgjedhje tjetër përveç se të hiqnin dorë nga detyrat e tyre të larta mbretëore.

Në një fjalim emocionues, gjatë një darke private bamirësie në Ivy, Chelsea, 35-vjeçari tha se çifti mbretëror kishin shpresuar të vazhdonte t’i shërbente Mbretëreshës, Komonuelthit dhe shoqatave të tij ushtarake, pa ndonjë financim publik.

Duke këmbëngulur që Mbretëria e Bashkuar do të ishte gjithnjë shtëpia e tij, ai pohoi se gruaja e tij, Meghan, mbështet të njëjtat vlera si ai dhe se ishte “e ngazëllyer” dhe “e motivuar” për të luajtur një rol të plotë mbretëror pas dasmës së tyre.

Por ai tha se tani “realisht nuk kishte asnjë mundësi tjetër”, por të tërhiqeshin – një vendim që princi tha se nuk e bëri me lehtësi.

“Ne shpresuam se mund të vazhdonim t’i shërbenim mbretëreshës pa fonde publike, por kjo, fatkeqësisht, nuk ishte e mundur. Me Meghan-in, gjeta dashurinë dhe lumturinë për të cilën kishte shpresuar gjithë jetën time, por dua ta bëj të qartë se ne nuk po largohemi. Mbretëria e Bashkuar është shtëpia ime, është vendi që dua, dhe kjo nuk ka për të ndryshuar kurrë.”

Harry shtoi se kjo ishte shenjë e presioneve që po ndiente. Si ai, ashtu edhe e shoqja kanë folur që të dy për vështirësitë e jetës mbretërore dhe sidomos vëmendjen e tepruar mediatike. Harry pati thënë madje në një moment se druhej që bashkëshortja mund të binte viktimë e të “njëjtave forca të fuqishme” që çuan në vdekjen e së ëmës, princeshës së Wellsit, Diana. Si pjesë e marrëveshjes së finalizuar të shtunën mes mbretëreshës, figurave të tjera të larta mbretërore dhe çiftit, Harry dhe Meghani nuk do ta përfaqësojnë më zyrtarisht monarkinë, dhe duke nisur nga pranvera, nuk do të përdorin dot më as titujt e tyre mbretërore. top channel

Konferenca për Libinë bie dakord për një armëpushim, çfarë përfshin plani i liderëve botërorë

Marrëveshje ka gjithashtu për faktin se nuk ka zgjidhje ushtarake të konfliktit.

Pjesëmarrësit e Konferencës Ndërkombëtare për Libinë në Berlin ranë dakord për një armëpushim për këtë shtet të Afrikës Veriore. Dakordimi u arrit pas negociatave shumëorëshe të dielën në mbrëmje. Dakordimin pas rreth tetë orësh në Kancelarinë Federale e njoftuan kancelarja gjermane Angela Merkel dhe sekretari i Përgjithshëm i OKB-së, Antonio Guterres.

Pjesëmarrësit në konferencën e Libisë ranë dakord për një plan. “Ne mund të konstatojmë që të gjithë pajtohemi që duam të respektojmë embargon e armëve”, tha kancelarja Merkel në Berlin. Marrëveshje ka gjithashtu për faktin se nuk ka zgjidhje ushtarake të konfliktit.

Italia është e gatshme të marrë përsipër një rol drejtues në mbikqyrjen e armëpushimit në Libi. Këtë ua tha gazetarëve kryeministri Giuseppe Conte.
Një organ në Libi, sipas ministrit të Jashtëm rus Lavrov do të monitorojë armëpushimin.

Projekti i komunikatës përfundimtare, i bërë i njohur më parë, u bënte thirrje vendeve të huaja të “përmbahen e të mos ndërhyjnë” në konflikt, të rifillojnë bisedimet për një armëpushim më konkret, si dhe të ndërmarrin hapa drejt rifillimit të një procesi politik për të arritur paqen në rajon.

“Ne u bëjmë thirrje të gjitha palëve të interesuara të dyfishojnë përpjekjet e tyre për një pezullim të qëndrueshëm të armiqësive, deeskalim dhe për një armëpushim të përhershëm,” thuhej në projektin e komunikatës përfundimtare.

Projekti i komunikatës përmbante 55 pika. Ai bënte thirrje më tej edhe që të gjitha palët t’u japin fund akteve armiqësore kundër objekteve të naftës në Libi. Thirrja erdhi pasi forcat aleate të Haftarit vunë nën kontroll të premten portet e naftës në Libinë lindore.

Kryeredaktorja politike e DW Michaela Küfner tha se rezervat e naftës në Libi qenë një pikë qendrore kontestimi për palët e përfshira në bisedimet e së dielës.

Erdogani e quan samitin “hap të rëndësishëm”
Para udhëtimit për në Berlin, Presidenti turk Rexhep Tajip Erdogan tha që shpresonte se bisedimet në Berlin do të ndihmonin në forcimin e armëpushimit të brishtë në Libi.

“Ne e shohim samitin e Berlinit si një hap të rëndësishëm në rrugën për të forcuar armëpushimin dhe një zgjidhje politike,” u tha Erdogani gazetarëve.
Turqia mbështet fuqimisht qeverinë e Sarrajt në Tripoli dhe së fundmi ka zhvendosur trupa në Libi – një veprim që u dënua nga shumë në Evropë.

Përveç Erdoganit, në takim morën pjesë Presidenti rus Vladimir Putin, Sekretari i Shtetit i SHBA Mike Pompeo, Kryeministri britanik Boris Johnson, Presidenti drancez Emmanuel Macron dhe Presidentja e Komisionit Evropian Ursula von der Leyen.

Përpara konferencës, von der Leyen tha se krahu ekzekutiv i BE-së është “plotësisht i përkushtuar” për të mbështetur rezultatet e konferencës në Berlin dhe se do të mbështesë përpjekjet për zbatimin e marrëveshjeve./DW/

Koreja e Jugut konfirmon rastin e parë të koronavirusit

Seul

Koreja e Jugut ka konfirmuar rastin e parë të lidhur me virusin e zbuluar së fundmi në Kinë, transmeton Anadolu Agency (AA).

Mediat lokale raportojnë se rasti i paraqitur në Korenë e Jugut ka ngritur shqetësime se koronavirusi që shkakton simptoma të pneumonisë ka filluar të përhapet në Azi.

Autoritetet lokale të shëndetit thanë se një grua udhëtoi javën e kaluar në qytetin kinez Wuhan, e cila përjetoi ethe, probleme të frymëmarrjes dhe simptoma të tjera pasi arriti në Aeroportin Ndërkombëtar Incheon të Koresë së Jugut, ku u testua pozitive për virusin.

Qendra Koreane për Kontrollin dhe Parandalimin e Sëmundjeve bëri të ditur se gruaja u pranua në një spital lokal, ku vazhdon të trajtohet.

Pekini ka deklaruar se lloji i ri i koronavirusit nuk është ngjitës, por Organizata Botërore e Shëndetësisë (OBSH) nuk përjashton transmetimin e virusit në kushte të caktuara nga personi në person.

Përveç Kinës dhe Koresë së Jugut, raste të virusit raportuan edhe Japonia dhe Tajlanda.

Oxfam: Miliarderët e botës kanë pasuri më shumë se 4.6 miliardë njerëz

“Ekonomitë seksiste” po përkeqësojnë pabarazinë globale të të ardhurave, derisa numri i miliarderëve është dyfishuar në dekadën e fundit, thotë në raportin e ri organizata ndërkombëtare bamirëse Oxfam.

I titulluar “Koha për kujdes”, raporti thotë se 2,153 miliarderët e botës posedojnë më shumë pasuri se 4.6 miliardë njerëz, që përbëjnë 60 për qind të popullsisë së planetit.

“Hendeku midis të pasurve dhe të varfërve nuk mund të zgjidhet pa politika që luftojnë pabarazinë dhe shumë pak qeveri janë të angazhuara në këtë drejtim”, tha shefi ekzekutiv i Oxfam-it në Indi, Amitabh Behar.

Raporti po ashtu thekson se 22 burrat më të pasur në botë kanë më shumë pasuri sesa të gjitha gratë në Afrikë.

Raporti vjetor i Oxfam-it për pabarazinë globale del zakonisht përpara se të hapet Forumi Botëror Ekonomik, i cili sivjet nis punimet më 21 janar në Davos të Zvicrës.

“Ekonomitë tona të prishura po mbushin xhepat e miliarderëve dhe bizneset e mëdha, në kurriz të burrave dhe grave të rëndomta”, tha Behar, i cili ndodhet në Davos për të përfaqësuar grupin Oxfam të organizatave joqeveritare. rel

Shkarkohet ministri brazilian, ia kopjoi fjalimin ministrit të Hitlerit

Ministri brazilian i kulturës, Roberto Alvim, është shkarkuar nga pozita për shkak të parafrazimit të ish-ministrit gjerman për propagandë në qeverinë e Hitlerit, Joseph Goebbels.

“Arti brazilian në dekadën e ardhshme do të jetë heroik dhe nacional. Ai do të jetë i pajisur me një kapacitet të madh për përfshirje emocionale dhe do të jetë po aq i domosdoshëm, sepse është thellësisht i lidhur me aspiratat urgjente të popullit tonë, në të kundërtën nuk do të jetë asgjë”, tha ministri i shkarkuar.

Këto fjalë janë mjaft të ngjashme me fjalimin që e kishte mbajtur ministri i Hitlerit në vitin 1933 para një grupi të menaxherëve dhe drejtorëve të teatrove. Ai kishte thënë: “Arti gjerman në dekadën e ardhshme do të jetë heroik, i sertë, por romantik, faktik, pa sentimentalizëm. Ai do të jetë nacionalist me një thellësi të madhe të ndjenjave, do të jetë i detyrueshëm dhe do t’i bashkojë njerëzit, në të kundërtën do të pushojë së ekzistuari.”

Përmes rrjetit social, Facebook, ministri i shkarkuar u arsyetua se kjo ngjashmëri është thjeshtë rastësi retorike.

Rivalët e presidentit Bolsonare e kanë akuzuar atë për marksizëm kulturor dhe për mohim të ndryshimeve klimatike dhe feminizmit.

Deklarata kundërthënëse e ish-ministrit të kulturës lidhej me promovimin e një fondi prej 4.8 milionë dollarësh për teatro, opera dhe ekspozita të artit dhe muzikës, ku prioritet do të ishin temat konservatore dhe religjioze, shkruan “The Guardian”, transmeton Gazeta Express.

Mishustin nuk u zgjodh rastësisht nga Putini për kryeministër

Todd Prince

Kryeministri i ri i Rusisë, Mikhail Mishustin, ka reputacionin e njeriut që i çon gjërat deri në fund.

Përgjatë qëndrimit të tij afro një dekadë në krye të shërbimit tatimor të Rusisë, me një ushtri prej afro 150 000 punëtorësh, të cilët mbikëqyrin pagesat e taksave, Mishustin ka trefishuar shumën e të hollave që kjo agjenci kontribuon në buxhet.

Teksa Rusia përballet me rritje të ngadalshme ekonomike për shkak të sanksioneve dhe uljes së çmimit të naftës, rezultatet e mira e kanë shpërblyer Mishustinin, prandaj qeveria e ka zëvendësuar atë në vend të Dmitry Medvedevit, i cili ka dhënë dorëheqje nga pozita e kryeministrit më 15 janar.

Qeveria e Medvedevit me vështirësi ka tentuar të realizojë ambiciet e presidentit rus, Vladimir Putin, sidomos ato për projekte kombëtare në vlerë të 400 miliardë dollarëve. Kjo qeveri po ashtu ka dështuar të përmbushë premtimin e Putinit të dhënë në maj të vitit 2018 për rritje të pagave për disa nivele të punëtorëve shtetërorë.

“Pas disa vjetëve të fokusimit në sigurime, duke përfshirë rrezikun në sanksionet e ardhshme, autoritetet ruse duhet të fokusohen në çështje të brendshme siç është ofrimi më i mirë i shërbimeve publike”, ka thënë për Radion Evropa e Lirë, ekonomistja, Elina Ribakova, që mbikëqyr Rusinë në Institutin Ndërkombëtar të Financave.

“Ekziston nevoja e një menaxheri efektiv që do të sigurohet se projektet kombëtare realizohen dhe përmbushen objektivat”.

Megjithatë, Mishustin, të cilin televizioni shtetëror rus e ka quajtur “forcë speciale e politikës financiare qeveritare”, një referencë për fuqitë e tij në fushën e taksave, mund të jetë një zgjedhje ideale për të mbajtur nën kontroll fraksionet brenda elitës.

Njoftimi i Putinit më 15 janar për ndryshime kushtetuese ka rezultuar me dorëheqjen e Medvedevit, ndonëse analistët këtë vendim e përshkruajnë si “shkarkim” nga Putini.

Këto zhvillime pritet të ndajnë fituesit dhe humbësit brenda elitës.

“E gjithë ajo çfarë kemi parë më 15 janar, na tregon se marrëdhënia me popullin nuk është shqetësimi kryesor i Rusisë. Asaj më shumë i intereson mbajtja e elitës në linjë të kontrollit”, ka thënë Sam Greene, drejtor i Institutit për Rusinë në Kolegjin King të Londrës.

“Andaj një person, i cili është zbatues i ligjit dhe vjen nga sfondi i tatimeve, ku kanë dijeni ku varrosen trupat, është më i dobishëm për ta pasur afër”, ka thënë Greene.

Ndyshimi i kryeministrit për herë të tretë

Putin ka synuar të promovojë ndjenjën e stabilitetit qeveritar gjatë 20 vjetëve në pushtet, duke ndryshuar qeveritë në mes të mandatit vetëm dy herë tjera.

Putin pati shkarkuar Mikhail Kasyanov në shkurt të vitit 2004 pak para rizgjedhjes, duke e zëvendësuar atë me Mikhail Fradkov, një burokrat.

Fradkov “ka dhënë doëheqje” më 2007, pas mbajtjes së zgjedhjeve parlamentare dhe atyre presidenciale, dhe vendin e tij e ka zënë, Viktor Zubkov.

Të dy, si Fradkov, ashtu edhe Zubkov kanë punuar për shërbimin kombëtar të taksave. Fradkov një kohë ka udhëhequr agjencinë policore të taksave, një agjenci, e cila te shumë persona ngjall frikë.

Zubkov ka qenë përgjegjës në këtë agjenci në rajonin verior, dhe më vonë ka drejtuar agjencinë në luftimin e pastrimit të parave.

Greene ka thënë se e kaluara e njëjtë e Mishustinit, Fradkovit, and Zubkovit nuk është e rastësishme.

Mishustin ka të përbashkët edhe diçka tjetër me këta dy burra, thonë analistët. Ai është person që nuk ka ambicie politike dhe, i cili pavarësisht pozitës së tij të fuqishme, nuk konsiderohet pasardhës i Putinit kur këtij të fundit t’i përfundojë mandati më 2024.

“Mishustin nuk ka përvojë politike apo famë tek elektorati dhe nuk është pjesë e rrethit të ngushtë të Putinit”, ka thënë analistja politike, Tatiana Stanovaya.

“Ai është aty vetëm sa për të qenë”, ka thënë ajo.

Përbërja e kabinetit të Mushustinit nuk pritet të ndryshojë shumë nga ai i Medvedevit, pasi ministrat e njëjtë pritet të jenë në fushën e ekonomisë dhe financave.

Njeri i taksave digjitale

Rusia ka hasur në vështirësi, sidomos në vitet 1990 për të luftuar evazionin e përhapur fiskal, krim të cilin një analist e ka cilësuar “burim të krenarisë” në mesin e kompanive dhe qytetarëve rusë.

Rusët dhe kompanitë e pasura në këtë vend dërgojnë të hollat në banka të dyshimta jashtë shtetit për t’iu ikur taksave.

Një pjesë e madhe e ekonomisë ka qenë në hije, pasi Rusia ka humbur 16.2 miliadë dollarë në vit nga tatimet, pati thënë ish-drejtori i Bankës Qendrore, Sergei Ignatyev më 2013.

Mirëpo Mishustin, 53-vjeçar ka vënë në funksion së fundmi teknologjinë e fjalës së fundit për të penguar evazionin fiskal.

Ndërtesa e shërbimeve për taksa në Moskë, dikur zonë ushtarake, tani është e mbushur me serverë të të dhënave dhe specialistë të teknologjisë informative.

Më 2018 kjo agjenci ka mbledhur 345 miliardë dollarë taksa, apo tre herë më shumë sesa kur Mishustin ka nisur udhëheqësinë më 2010, transmeton agjencia ruse e lajmeve, TASS.

Mishustin i ka thënë Putinit në nëntor, gjatë një takimi në Kremlin, se vlera e taksave më 2019 është 8 për qind më e madhe, në krahasim me vitin paraprak.

Rritja e fitimit nga taksat ka ndikuar në aktivitetin ekonomik në dekadën e fundit, duke i ndihmuar qeverisë të mbyllë vrimat problematike, pasi ekonomia është dobësuar si pasojë e sanksioneve.

Alexis Rodzianko, kryetar i Odës Ekonomike Amerikane në Moskë, ka thënë për Radion Evropa e Lirë se bilanci i taksave ka qenë kryesisht e mirë gjatë udhëheqësisë së Mishustinit.

“Efikasiteti i mbledhjes së taksave është rritur dhe profesionalizmi po ashtu. Përvoja jonë është pozitive. Në gjysmën e kaluar të vitit, kualiteti i dialogut ka qenë i mirë dhe konstruktiv”.

Agjencia e Mishustinit ka prezantuar një faqe online për individë dhe kompani, duke thjeshtësuar deklarimin e taksave.

Përgatiti: Krenare Cubolli

Toyota investon në zhvillimin e veturave që fluturojnë

Prodhuesi i veturave, Toyota i Japonisë thotë se do të investojë rreth 400 milionë dollarë në një kompani që punon për të zhvilluar vetura fluturuese të cilat do të siguronin “shërbime të shpejta, të qeta dhe të përballueshme të transportit ajror”.

Toyota, më 16 janar, tha se investimi në transportin ajror ka qenë një “qëllim afatgjatë”.

Presidenti i kompanisë, Akio Toyoda, tha se kompania që ai e udhëheq po transformohet.

“Ndërsa ne vazhdojmë punën tonë në biznesin e veturave, kjo marrëveshje vendos vështrimin tonë në qiell”, tha Toyoda në një deklaratë.

“Përmes kësaj përpjekjeje të re dhe emocionuese, shpresojmë të ofrojmë lirinë e lëvizjes dhe kënaqësisë tek klientët kudo, në tokë, dhe tani, në qiell” tha ai.

Investimi i Toyota-s do të bëhet në kompaninë Joby Aviation, e cila po zhvillon një mjet transporti elektrik, me katër pasagjerë, që ngritet dhe ateron vertikalisht, si një helikopter.

Kompania parashikon që prodhimi i saj të përdoret për transport komercial. rel

INSTAGRAM sjell risinë që të gjithë e kemi pritur prej kohësh

Instagram-i sa vjen dhe përmirëson opsionet e tij, duke jua lehtësuar kështu “jetën” përdoruesve të tij. Shumica prej jush me siguri e hapin Instagramin nga telefoni dhe DM (Direct Message) e keni të aksesueshëm nga celulari.


Mirëpo, çfarë ndodh kur ju e hapni llogarinë tuaj të Instagramit në kompjuter? Nuk ka një opsion ku ju mund të flisni me mesazhe me miqtë tuaj.

Epo, së shpejti Instagram do të ketë të aksesueshme në kompjuter edhe DM. Ju mund të flisni me mesazhe, të bëni like dhe komente nga kompjuteri njësoj si në celular. Kjo gjë po testohet dhe së shpejti do të jetë e aksesueshme për të gjithë.

Qeveria e Medvedevit jep dorëheqje

Qeveria e kryeministrit të Rusisë, Dmitry Medvedev, dorëzoi të mërkurën dorëheqjen te presidenti Vladimir Putin.

Ky zhvillim vjen vetëm pak orë pasi Putin, gjatë fjalimit vjetor drejtuar kombit, bëri thirrje për ndryshime të mëdha kushtetuese, që do të rrisnin kompetencat e parlamentit, përpara përfundimit të mandatit të tij, më 2024.

“Pas miratimit të ndryshimeve kushtetuese, do të ketë ndryshime të rëndësishme, sa i përket balancës së pushtetit”, tha Medvedev gjatë një transmetimi të drejtpërdrejtë televiziv.

“Në këtë kontekst, ne, si Qeveri e Federatës Ruse, duhet t’ia sigurojmë presidentit të vendit tonë mundësinë për të ndërmarrë të gjitha vendimet e nevojshme. Në kushtet e tilla, mendoj se Qeveria e Federatës Ruse ka bërë hapin e duhur me dorëheqje”, tha Medvedev.

Putin, duke iu adresuar Asamblesë Federale, tha se Kushtetuta e Rusisë, e vitit 1993, duhet ndryshuar, për t’i dhënë Dumës Shtetërore, që është Dhoma e Ulët e Parlamentit, të drejtën për të emëruar ministrat e kabinetit dhe kryeministrin.

Këto kompetenca aktualisht i takojnë presidentit.

Putin po ashtu tha se Rusia duhet të mbetet “republikë e fuqishme presidenciale”.

“Presidenti duhet të ruajë të drejtën për të përcaktuar detyrat dhe përparësitë e qeverisë, si dhe të drejtën për të shkarkuar kryeministrin, zëvendësat e tij dhe ministrat federalë, në rast të moskryerjes së detyrave ose humbjes së besimit”, tha Putin.

Ai po ashtu tha se duhen ashpërsuar kushtet për t’u bërë president dhe se çdo president i ardhshëm duhet të ketë jetuar në Rusi për së paku 25 vjet dhe të mos ketë ndonjë shtetësi të huaj.

Putin, 67 vjeç, ka dominuar politikën ruse për dy dekada, duke shërbyer herë si president, herë si kryeministër nga viti 1999.

Në vitin 2018, ai është rizgjedhur president për një mandat të ri 6-vjeçar.

Me ligjin aktual, ai do të duhet të tërhiqet pas përfundimit të mandatit. rel

Britania, Franca dhe Gjermania kërkojnë zgjidhje për shkeljet e Iranit

Britania, Franca dhe Gjermania njoftuan të martën se hapat e Iranit në kundërshtim me marrëveshjen bërthamore të vitit 2015, nuk u lënë atyre zgjidhje tjetër veçse ta kalojnë çështjen në një proces të zgjidhjes së mosmarrëveshjeve të parashtruar në dispozitat e marrëveshjes.

Vendet thonë se ata kanë përmbushur përgjegjësitë e tyre në bazë të Planit të Përbashkët të Veprimit, përfshirë heqjen e sanksioneve ekonomike kundër Iranit dhe duke punuar për të promovuar tregtinë e ligjshme me Teheranin.

“Megjithatë, Irani ndërkohë ka vazhduar të thyejë kufizimet kryesore të përcaktuara në marrëveshje,” thuhet në një deklaratë të përbashkët. “Veprimet e Iranit janë në kundërshtim me dispozitat e marrëveshjes bërthamore dhe kanë ndikime gjithnjë e më të rënda dhe të pakthyeshme të përhapjes së armëve bërthamore.”

Marrëveshja, e nënshkruar gjithashtu nga Shtetet e Bashkuara, Kina dhe Rusia, kishte për qëllim të ulte shqetësimet se Irani po punonte për të ndërtuar një armë bërthamore dhe vendoste kufizime në programin e tij bërthamor, që synonin ta bënin të pamundur një gjë të tillë. Në këmbim, Irani u lehtësua nga sanksionet që dëmtuan keq ekonominë e tij.

Por pasi Shtetet e Bashkuara u tërhoqën nga marrëveshja në vitin 2018, Irani filloi të zvogëlojë pajtueshmërinë e tij me hapa të tillë si tejkalimi i kufijve të lejuar të sasisë së uraniumit të pasuruar, që mund të rezervojë, duke e pasuruar në nivele më të larta dhe duke përdorur më shumë centrifuga sesa lejohet.

Irani e bëri këtë përmes një seri hapash, duke pohuar çdo herë se ato ishin të kthyeshme nëse nënshkruesit e tjerë punonin me Iranin, kryesisht për ta ndihmuar atë ekonomikisht pasi Shtetet e Bashkuara vendosën sanksione të reja.

Ministri i Jashtëm iranian, Mohammad Javad Zarif tha të hënën se të tre vendet evropiane “ishin përkulur ndaj diktatit amerikan” dhe se një qasje e tillë kurrë nuk do të arrijë asgjë.

“E3 mund të shpëtojë marrëveshjen por jo duke kënaqur bullistin dhe duke i bërë presion palës përgjegjëse,” tha zoti Zarif në Twitter. “Përkundrazi duhet të marr guximin për të përmbushur detyrimet e veta.”

Administrata e Presidentit Donald Trump argumentoi se marrëveshja ishte shumë bujare për Iranin dhe nuk e kufizonte atë që e quajti sjellje armiqësore të Iranit në Lindjen e Mesme. Ajo ka realizuar atë që e quan një fushatë “presioni maksimal” për të detyruar udhëheqësit e Iranit të ndryshojnë kursin e tyre.

Britania, Franca dhe Gjermania përsëritën “keqardhjen dhe shqetësimin” e tyre për tërheqjen e SHBA nga marrëveshja dhe e sqaruan të martën në deklaratën e tyre se kërkimi i një rezolute nga Komisioni i Përbashkët nuk do të thotë se ata po mbështesin strategjinë amerikane.

“Tri vendet tona nuk po bashkohen në një fushatë për të zbatuar presionin maksimal kundër Iranit,” thuhet në deklaratë. “Shpresa jonë është që ta kthejmë Iranin në përputhje të plotë me angazhimet e tij sipas marrëveshjes.”

Komisioni i Përbashkët përbëhet nga një anëtar nga secili nga nënshkruesit, dhe sipas marrëveshjes ata kanë 15 ditë për të zgjidhur një mosmarrëveshje. Hapi është i pari në një seri mekanizmash të zgjidhjes së mundshme, i fundit prej të cilave përfshin referimin e çështjes në Këshillin e Sigurimit të OKB-së. zëri i amerikës

Protestat e studentëve përbëjnë kërcënim të ri për regjimin e Iranit

Frud Bezhan

Protestat e udhëhequra nga studentët në Iran mund të përbëjnë rrezik më të madh për autoritetet sesa protestat kombëtare të nëntorit të vitit të kaluar, përmes së cilave është kundërshtuar rritja e çmimeve të naftës.

Në këto protesta situata ishte përshkallëzuar, meqë janë vrarë qindra persona, duke shënuar kështu përgjigjjen më të përgjakshme në historinë 40-vjeçare të regjimit, që është themeluar më 1979 gjatë Revolucionit Islamik, kanë thënë analistët.

Irani është goditur për muaj nga një varg protestash kundër qeverisë, të nxitura nga menaxhimi i dobët dhe vështirësitë financiare, në të cilat janë vrarë apo burgosur protestuesit.

Trazirat e brendshme kanë qetësuar tensionet e ngritura si pasojë e vrasjes së gjeneralit ushtarak, Qasem Soleimani nga Shtetet e Bashkuara përmes një droni në Bagdad më 3 janar.

Zemërimi për vrasjen e gjeneralit të famshëm, njëherësh një prej figurave më të fuqishme në këtë shtet, shumë shpejt ka bashkuar iranianët.

Gjenerali i vrarë iranian, Qasem Soleimani.

Gjenerali i vrarë iranian, Qasem Soleimani.

Mirëpo një valë e re e protestave kundër qeverisë, këtë herë e udhëhequr nga të rinjtë e zemëruar, ka shpërthyer pas lajmeve se ushtria iraniane ka rrëzuar një aeroplan të një linje ajrore ukrainase duke lënë të vdekur 176 persona më 8 janar.

Autoritetet iraniane janë akuzuar për tentim të fshehjes së këtij incidenti, pasi fillimisht kanë mohuar përfshirjen në këtë fatkeqësi.

Tri ditë më vonë, ata kanë thënë se një gabim njerëzor ka shkaktuar rrëzimin e aeroplanit, çka ka nxitur reagime ndërkombëtare.

“Teksa ka çështje të llogaridhënies të lidhura me këto aspekte ekonomike, fshehja e rrëzimit të aeroplanit ukrainas ngrit dilemat nëse iranianët mund t’i besojnë regjimit, qoftë edhe liderit suprem kur është në pyetje jeta apo vdekja?”, ka thënë Scott Lucas, ekspert për Iranin në Universitetin Birmingham dhe redaktor në faqen, EA World View.

“Vdekje dikatatorit”

Protestat e studentëve kanë nisur në mbrëmjen e 11 janarit, pas përkujtimit të viktimave të rrëzimit të aeroplanit. Në mesin e pasagjerëve kanë qenë shumë iranianë të rinj, të cilët ishin nisur në Kanada, përmes Ukrainës, për të studiuar.

Mirëpo kjo ceremoni në njërin prej universiteteve të Iranit është kthyer shpejt në protestë, pasi iranianët kanë dalë nëpër rrugët dhe sheshet e Teheranit.

Protestuesit kanë bërtitur “Vdekje gënjeshtarëve”, “Ju nuk keni turp” dhe “Vdekje dikatorit”, duke iu referuar liderit suprem, Ayatollah Ali Khamenei. Në disa fotografi janë parë disa protestues duke shqyer fotografitë e Soleimanit.

Në Iran vazhdojnë protestat pas rrëzimit të aeroplanit

Për të tretën ditë me radhë, në Iran mbahen protesta kundër regjimit, i cili ka pranuar se ka rrëzuar një avion ukrainas të pasagjerëve

Në pamjet e publikuara në rrjetet sociale janë parë forca të sigurisë dhe zyrtarë policorë duke hedhur gaz lotësjellës, plumba gome dhe kanë shtënë me armë zjarri për të shpërndarë protestuesit në Teheran.

Më 12 janar, pakënaqësitë janë zgjeruar përtej kryeqytetit, duke përfshirë dhjetëra qytete të Iranit.

Protestat kundër-qeverisë kanë vazhduar për të tretën ditë me radhë më 13 janar. Protestat janë zhvilluar në Universitetin Sharif në Teheran dhe Universitetin, Amir Kabir.

Shefi i policisë së Teheranit ka mohuar që zyrtarët tjerë policorë kanë shtënë me armë zjarri, duke thënë se atyre u është dhënë urdhër që të tregojnë “përmbajtje”.

Pamjet në rrjetet sociale kanë shfaqur protestues dhe rrugë të gjakosura. Dëshmitarët kanë pretenduar se dhjetëra protestues janë plagosur.

Autoritetet iraniane janë duke u përballur me kritika të ashpra nga të dyja palët e ndara të Iranit. Edhe pjesëtarët e linjës së ashpër kanë kritikuar qeverinë për mënyrën si ka menaxhuar fatkeqësinë, duke akuzuar autoritetet për mashtrim të publikut.

Autoritetet iraniane fillimisht kanë përmendur probleme teknike për rrëzim të aeroplanit dhe kanë thënë se akuzat që Teherani kinse ka rrëzuar këtë pajisje janë propagandë amerikane.

Më vonë ushtria iraniane ka pranuar se ka rrëzuar aeroplanin, duke e konsideruar aeroplanin gabimisht si “shënjestër armiqësore”.

Rrëzimi i aeroplanit ka ndodhur disa ditë pas vrasjes së Soleimanit në Bagdad dhe po të njëjtën ditë kur ushtria iraniane ka sulmuar dy baza ushtarake amerikane në Irak.

Një një moment të rrallë, udëheqësi i trupave të Gardës Revolucionare Islamike, gjenerali, Hossein Salami, ka bërë lutje për falje.

Më 12 janar, në po të njëjtën ditë, lideri suprem, Khamenei ka shprehur ngushëllimet e tij për familjet e 176 personave dhe u ka bërë thirrje forcave të armatosura që të hetojnë se ku qëndron faji për “këtë incident të dhimbshëm”.

Megjithatë, fjalët e tij kanë bërë shumë pak për të qetësuar protestuesit tejet të zemëruar.

Lideri Suprem i Iranit, Ayatollah Ali Khamenei.

Lideri Suprem i Iranit, Ayatollah Ali Khamenei.

Liderët mund “t’i fryejnë zjarrit”

Lucas ka thënë se protestat e studentëve kanë nxitur “zemërim dhe ndjenjë të tradhtisë”.

“Mbetet të shihet nëse kjo do të lidhet me shqetësimet ekonomike që kanë shkaktuar protestat masive të nëntorit”, ka thënë ai.

“Dhe mbetet të shihet nëse regjimi do të kryejë shtypje të njëjtë të përgjakshme sikurse dy muaj më parë, duke vrarë qindra persona dhe duke burgosur mijëra të tjerë, pasi ka rrezik të përshkallëzimit të mëtejmë”, ka shtuar mes tjersh Lucas.

Narges Bajoghli, profesoreshë në Universitetin Johns Hopkins ka thënë se shtypja qeveritare e protestave të studentëve mund të “përkeqësojë situatën”.

“Nëse ata mendojnë se mund ta ‘ndalin’ zemërimin përmes shtypjes për atë që kanë bërë, ata vetëm do t’i fryejnë zjarrit”, ka thënë Bajoghli në një postim në Twitter.

Përgatiti: Krenare Cubolli