VOAL

VOAL

Please Wait ...
0%

DioGuardi: VMRO-DPMNE të futet në listën e zezë të SHBA-ve

By | May 19, 2017

Komentet

Tiranë: Përkujtohet rrëzimi i monumentit të diktatorit Hoxha

Veprimtarë e protagonistë të ngjarjeve të viteve 90, historianë e politikanë morën sot pjesë në një konferencë mbi 27 vjetorin e rrëzimit të monumentit të diktatorit Enver Hoxha.

Ish-presidenti i Republikës, Sali Berisha, tha në konferencën e organizuar nga Fondacioni Konrad Adenauer, se rrëzimi i monumentit ishte ngjarja më kulmore e fundit të diktaturës.

Ai tha se diktatura komuniste e Ramiz Alisë vrau dhe burgosi shqiptarët deri ditën e fundit.

“Diktatura e dytë ishte ajo e mjerimit e ndërtuar qëllimisht nga diktatori Enver Hoxha, por diktatura e tretë ishte kulti i individit. Sot është jashtë imagjinate ajo periudhë e errët” – tha zoti Berisha.

Ai tha se kulti i Enver Hoxhës ishte qëllimi kryesor i lëvizjes antikomuniste, ndaj mjediset universitare u kërkua të zbrazeshin nga bustet dhe fotot e diktatorit.

“Lëvizja studentore u mbështet nga sindikatat dhe qytetarët. Atë ditë Ramiz Alia dha urdhër në një mbledhje ushtarake që të qëllohej mbi protestuesit. Kjo është e vërteta, që urdhëri u dha, por mbetet në meritën e atyre që nuk qëlluan mbi qytetarët” – tha zoti Berisha.

Ai tha se Neritan Ceka shmangu një gjakderdhje, kur bindi protestuesit, që të mos shkonin drejt Bllokut të zbrazur të udhëheqjes komuniste.

Qytetarët ishin të vendosur të rrëzonin kultin e diktatorit Enver Hoxha dhe e arritën këtë, tha ai.

Diplomati dhe publicisti Besnik Mustafaj solli detaje nga 20 shkurti 1991, dita kur mijëra qytetarë u bashkuan në sheshin Skënderbej dhe rrëzuan monumentin e diktatorit Enver Hoxha.

“Zyra ime e gazetarit ishte shumë pranë sheshit dhe kjo më ndihmoi të raportoja shpejt një ngjarje mjaft të rëndësishme” – tha zoti Mustafaj, dikur bashkëpunëtor i agjencisë AFP.

Ai tha se atë ditë gjithë Qyteti Studenti ishte në shtetrrethim dhe mijëra ushtarë e oficerë kontrollonin hapësirat në kryeqytet.

“Ishte frikë e madhe dhe po aty ishte trimëri e madhe dhe njerëzit e vranë frikën, ndërsa lajmi e tejkaloi izolimin e Shqipërisë” – tha zoti Mustafaj.

Më tej e mori fjalën drejtori i “Zërit të Amerikës” për divizionin e Euro-Azisë, dr.Elez Biberaj. Ai kujtoi një mori detajesh nga mbulimi i atyre ngjarjeve të rëndësishme kur drejtonte radion “Zëri i Amerikës” në gjuhën shqipe. Zoti Biberaj ritransmetoi në sallë me zëra disa pjesë nga intervistat e transmetuara nga “Zëri i Amerikës” me personalitete të kohës si Ismail Kadare, Rexhep Qosja, Sali Berisha, Napoleon Roshi dhe studentëve drejtues të grevës së urisë si Arben Lika dhe studente e qytetare të thjeshta.

Radio “Zëri i Amerikës” ishte e vetmja media e rëndësishme ndërkombëtare, që mbuloi nga afër lëvizjen demokratike studentore në kapërcim të viteve 1990-1991, dhe ndikoi në rrjedhën e ngjarjeve me një mori lajmesh dhe intervistash me protagonistët e zhvillimeve.

Ismail Kadare tha në intervistën për “Zërin e Amerikës” atë ditë: “I bëj thirrje Presidentit Ramiz Alia që të mos dëgjojë këshilltarët e tij të këqij, por të dëgjojë zërin e studentëve shqiptarë. Ata e duan Shqipërinë më shumë se këshilltarët e keqij. Në qoftë se Presidenti Ramiz Alia dëshiron që bota përparimtare ta përkrahë aksionin e tij të pajtimit kombëtar e të demokracisë, në qoftë se ai e dëshiron më të vërtetë këtë pajtim, e unë shpresoj se është kështu, ai duhet të mbledhë mendjen njëherë e përgjithmonë se përpara interesave të Shqipërisë e të shqiptarëve s’mund të qëndrojë asgjë dhe askush, asnjë doktrinë, asnjë emër, asnjë parti, e asnjë shef partie. Shpresoj shumë që zëri i arsyes të dëgjohet në Shqipëri”.

Studiuesi Elez Biberaj theksoi se sot “27 vjet pas rrëzimit të monumentit të Hoxhës, shqiptarët ende nuk e kanë lënë pas të kaluarën e tyre të errët komuniste dhe ende nuk i kanë kapërcyer traumat që la pas regjimi i Enver Hoxhës. Paaftësia për të arritur në një konsensus për trashëgiminë e Hoxhës ka prodhuar konflikte të thella, polarizim të shoqërisë dhe debate të pafundme rreth kujtesës historike të Shqipërisë. Asnjë qeveri pas-komuniste nuk ka kërkuar falje për krimet e regjimit të Hoxhës” – tha zoti Biberaj.

Ai tha që megjithë natyrën shtypëse të regjimit të Hoxhës, shqiptarët kanë një qëndrim të paqartë rreth figurës së Hoxhës, vazhdojnë të jenë në konflikt për të dhe ndeshen me vështirësi kaq të mëdha për ta diskutuar pa pasion trashëgiminë e tij.

“Prirja mbizotëruese në vitin 1991, që dënonte krimet e së kaluarës komuniste të vendit, përgjithësisht është zëvendësuar nga një frymë alternative që nxjerr në pah rolin e Hoxhës gjatë luftës, vlerëson arritjet gjatë sundimit të tij, por pa dënuar me vendosmëri terrorin e ushtruar nga Hoxha dhe arrihet deri aty sa të vendosë në mënyrë të pamoralshme shenja të barazisë mes qëndrimeve komuniste dhe anti-komuniste” – tha zoti Biberaj.

Ai theksoi se kujtesa e krimeve të Hoxhës nuk është më pjesë e rëndësishme e debatit publik, se ajo është lënë mënjanë dhe se me ikjen e brezave të vjetër, ekziston rreziku që kjo kujtesë gradualisht të fshihet.

“Ndoshta kjo gjendje është pasqyrë e përpjekjeve të vështira të Shqipërisë drejt gjetjes së rrugës për një demokraci të konsoliduar dhe të qëndrueshme. Por shqiptarët dhe elitat e tyre kanë një përgjegjësi morale të përballen publikisht dhe të dënojnë çmenduritë e së kaluarës komuniste dhe të përpiqen të kapërcejnë traumat e lëna pas nga regjimi i Hoxhës. Është me rëndësi që kujtesa të mbijetojë, në mënyrë që aspekte të asaj periudhe të tmerrshme, të mos përsëriten kurrë më” – tha zoti Biberaj.

SHBA-të nuk përkrahin shkëmbimin e territoreve, kërkojnë zgjidhje kreative

Ambasadori amerikan në Prishtinë, Greg Delawie

Ambasada Amerikane në Prishtinë, ka bërë të ditur se Shtetet e Bashkuara të Amerikës, nuk e përkrahin idenë për shkëmbim territoresh mes Kosovës dhe Serbisë.

“Ne nuk e mbështesim shkëmbimin e territorit apo vendosjen e precedentëve që do të shkaktonin më shumë probleme sesa zgjidhje, por të gjitha palët duhet të jenë kreative në gjetjen e një zgjidhjeje”, thuhet në përgjigjen e Ambasadës amerikane në Prishtinë dhënë Radios Evropa e Lirë.

“Shtetet e Bashkuara vazhdojnë të mbështesin fuqishëm dialogun e ndërmjetësuar nga BE-ja, ndërmjet Kosovës dhe Serbisë dhe inkurajon të dyja palët që të përshpejtojnë përpjekjet e tyre për normalizimin e marrëdhënieve”, thuhet në këtë përgjigje.

SHBA-të i bëjnë thirrje të dyja palëve që t’i shfrytëzojnë mundësitë për të bërë përparim në këtë çështje.

Po ashtu, thuhet se SHBA-të do të mbështesin të dyja palët për të arritur një marrëveshje gjithëpërfshirëse, e cila është e vetmja mënyrë për të zhbllokuar të ardhmen e Kosovës dhe të Serbisë drejt perëndimit.

Shefi i delegacionit të Kosovës në dialogun ndërmjet Kosovës dhe Serbisë, Avni Arifi, ka thënë se shkëmbimi i territoreve nuk është fare në diskutim.

“Ajo nuk është temë e debatit, nuk është as orientim e as mendim i asnjë subjekti politik në Kosovë, pozitë apo opozitë, e as ndonjë mekanizmi tjetër shtetëror të Kosovës”, ka thënë Arifi për Radion Evropa e Lirë.

Një shkëmbim i tillë territoresh mes dy vendeve, sipas Petrit Zogajt nga Lëvizja FOL, do të shkaktonte efekte tek shtetet tjera të rajonit. Zogaj ka thënë për Radion Evropa e Lirë se kjo do të mund të nxiste edhe dhunë.

“Nuk shoh formulë të thjeshtëzuar se si do të mund të shkëmbeheshin territoret mes Kosovës dhe Serbisë, pa pasur efekte rajonale. Këto efekte rajonale sigurisht që mund të jenë të dhunshme. Mund të jenë me gjakderdhje dhe janë shumë të paparashikueshme si procese se sa që kishte me qenë një marrëveshje pajtuese mes Serbisë dhe Kosovës”, ka thënë Zogaj.

Debatet për shkëmbim territoresh mes Kosovës dhe Serbisë janë përmendur nga shumë media në Kosovë dhe Serbi si zgjidhje e mundshme mes Kosovës dhe Serbisë.

Presidenti serb Aleksandar Vuçiq i ka bërë thirrje Shteteve të Bashkuara që t’i ndihmojnë t’i bindin shqiptarët e Kosovës që të jenë gati për zgjidhje fleksibile që do të mundësojnë një kompromis.

  • 16x9 Image

    Amra Zejneli

    Ka lindur në Mitrovicë në vitin 1986. Studimet universitare i ka përfunduar në fushën e gazetarisë dhe të studimeve evropiane në Universitetin e Floridas në SHBA. Me gazetari ka nisur të merret nga viti 2001. Punon në transmetuesin publik – Radio Televizionin e Kosovës – si redaktore përgjegjëse në programin e gjuhëve të komuniteteve, ndërkaq Radios Evropa e Lirë i është bashkuar në vitin 2010.

Asociacioni, kusht i Listës Serbe për Demarkacionin

Ai ka theksuar se demarkacioni është me rëndësi për shqiptarët e Kosovës, por për serbët në Kosovë shumë më i rëndësishëm është formim i i AKS-së dhe avancimi i pozitës së serbëve në Kosovë.

“Ne po presim qe 1.767 ditë AKS-në përmbushjen e pikave të tjera nga marrëveshja e koalicionit në mënyrë që ta avancojmë jetën e serbëve në Kosovë. Për këto Lista Serbe dëshiron të flasë, e pastaj një herë në rend dite do të vijë demarkacioni”, citon RTS të ketë thënë Simiq.

Ai ka thënë se për votim shqiptarët e kanë shumicën e duhur në Kuvend.

“Kjo çështje nuk kërkon përkrahjen e shumicës së dy të tretave të komuniteteve jo shumicë, të deputetëve që vijnë nga bashkësitë serbe, rome e turke. Te shqiptarët ka mjaft vota që të zgjidhet kjo çështje. Ajo që ata e duan është pjesëmarrja e serbëve sepse kështu dëshirojnë ta manifestojnë karakterin shumetnik të këtij vendimi”, thotë ai.

Siç thekson Simiq, kjo çështje duhet rregulluar në të ardhmen e jo tash dhe se pikë së pari duhet themeluar AKS-në e pastaj të gjitha të tjerat.

Kur bëhet fjalë për themelimin e ushtrisë së Kosovës, Simiq ka thënë se në Kosovës, sipas Rezolutës 1244, KFOR është e vetmja forcë legjitime e armatosur dhe se kështu do të mbetet.

“Qëndrimi i Listës Serbe nuk do të ndryshojë, ne jemi absolutisht kundër ushtrisë së Kosovës”, ka thënë ai, transmeton Koha.net.

I pyetur për vazhdimin e dialogut të paralajmëruar për 26 shkurt në Bruksel, ai ka thënë se dialogu nuk ka alternativë, por në të duhet qasje e sinqertë nga dy palët.

“Beogradi dëshiron kompromis që do të mundësonte jetë normale dhe paqe të qëndrueshme, e te pala tjetër mungon sinqeriteti dhe dëshira për t’i zbatuar marrëveshjet e pastaj edhe qasja e sinqertë për zgjidhje të përhershme të çështjes”, ka përfunduar ai.

Policia Kundër Korrupsionit arreston shefin e Bankës Qendrore të Letonisë

Kryeministri letonez Maris Kucinskis siguroi vendin dhe Evropën se “nuk ka asnjë shenjë rreziku”, pasi policia anti-korrupsion arrestoi kreun e bankës qendrore letoneze të shtunën.

“Tani për tani, as unë, as ndonjë zyrtar tjetër nuk ka ndonjë arsye për të ndërhyrë në punën e Byrosë për Parandalimin e Korrupsionit”, tha Kucinskis.

As Kucinskis as policia nuk kanë dhënë ndonjë arsye pse guvernatori i bankës qendrore Ilmars Rimsevics u arrestua. Por një zëdhënëse e policisë tha se do të ketë një njoftim “sa më shpejt të jetë e mundur”.

Qeveria e Letonisë planifikon një takim urgjent të hënën.

Rimsevics  drejtonte bankën qendrore të vendit baltik, ai ishte një nga 19 guvernatorët në Bankën Qendrore Evropiane.

Departamenti i Thesarit i SHBA ka propozuar sanksione kundër një banke të madhe letoneze për pastrimin e parave  lidhur me programin e armëve të Koresë së Veriut.

Kosova kremton për të dytën ditë me radhë përvjetorin e pavarësisë

Kosova përmbylli të shtunën mbrëmja ditën e parë të kremtimeve me rastin e dhjetë vjetorit të pavarësisë, me një koncert të këngëtares britanike me prejardhje nga Kosova Rita Ora.

Rita Ora
Rita Ora

Forcat e policisë dhe ato të sigurisë së Kosovës parakaluan qendrës së Prishtinës në ditën e dytë të kremtimeve.

“Forca e Sigurisë së Kosovës dhe Policia e Kosovës të cilat janë më të mirat në rajon, janë fuqia e shtetit të Kosovës, janë garancia më e mirë e sigurisë dhe qëndrueshmërisë së Republikës së Kosovës. Prandaj momenti i shumë pritur i zyrtarizimit të ushtrisë tonë është duke trokitur në derën e hapur. Partnerët tanë strategjikë dhe NATO, e përkrahin plotësisht këtë proces të Ushtrisë së Kosovës sepse ajo do të jetë vetëm një vlerë tjetër e shtuar në shërbim të paqes dhe qëndrueshmërisë në rajon dhe më gjerë”, tha presidenti i Kosovws, Hashim Thaçi.

Parakalimi pasoi një mbledhje solemne të parlamentit të Kosovës gjatë se cilës ligjvënësi amerikan Eliot Engel tha se shteti i ri duhet të përqendrohet në të ardhmen e tij.

Eliot Engel
Eliot Engel

“Ka pasur kohëra kur njerëzit kanë thënë se Kosova nuk mundet kurrë të jetë një shtet i pavarur, s’ka për të ndodhur dhe unë kam vazhduar të them gjithnjë se një gjë e tillë do të ndodh. Njerëzit që janë këtu e kanë bërë të gjithë punën, ishte e lehtë për mua në Washington të ju jap mbështetjen time, por nëse shihni se ku ky vend ka qenë dhe se ku po shkon tash dhe sa kemi arritur, unë them urime ditëlindjen Kosovë e ke fituar një ditëlindje të mrekullueshme”, tha ai.

Zoti Engel vuri theksin edhe tek pajtimi i arritur dy ditë më parë ndërmjet Kosovës dhe Malit të Zi për të zgjidhur çështjen e diskutueshme të kufirit ndërmjet tyre…

“Ka gjëra të rëndësishme tani në të cilat vendi po punon, dua të uroj presidentin e Kosovës dhe atë të Malit të Zi për arritjen e marrëveshjes për kufirin mes dy shteteve, mbetem me shpresë që të gjithë anëtarët e këtij parlamenti do ta votojnë atë, në mënyrë që Kosova të mos vazhdojë më të jetë i vetmi vend në Ballkan qytetarët e të cilit nuk mund të udhëtojnë pa viza në Bashkimin Evropian. Disa prej këtyre vendimeve janë shumë të vështira dhe madje shpesh duken të padrejta por është më rëndësi që Kosova të marrë këto vendime sepse duhet të vazhdojë ecjen përpara”, tha zoti Engel.

Ndërsa kryeministri i Shqipërisë, Edi Rama, tha se e ardhmja e rajonit do të jetë e tillë që do të lërë prapa të kaluarën dhe një ditë shqiptarët e serbët do të bashkëjetojnë në funksion të së ardhmes si dy popuj me fqinjësi të mirë dhe pjesë e pandarë e Bashkimit Evropian.

“Kosova dhe Shqipëria do të kenë një politikë të jashtme, jo veç ambasada dhe përfaqësi diplomatike të njëjta, po pse jo një president, simbol të unitetit kombëtar dhe një politikë kombëtare të sigurisë. Ndoshta ky parafytyrim sot nuk është i këshillueshëm në rrafshin e nacionales por historia na këshillon se çka është e drejtë të ëndërrohet nuk është e pamundur të realizohet, e ardhmja u takon atyre që i paraprijnë asaj”, tha kryeministri Rama.

Kosova shpalli pavarësinë më 17 shkurt të vitit 2008, gati nëntë vjet pas përfundimit të luftës me ndërhyrjen e NATO-s që i dha fund shtypjes së shqiptarëve nga Serbia.

Mbi 115 vende të botë, përfshirë Shtetet e Bashkuara dhe vendet kryesore të Bashkimit Evropian e kanë njohur pavarësinë e saj e cila kundërshtohet nga Serbia e cila është përfshirë në një proces bisedimesh me Kosovën për normalizimin e marrëdhënieve në shkëmbim të anëtarësimit në Bashkimin Evropian.

Mesazhi i veçantë i Eliot Engelit: E dua popullin e Kosovës, ma kanë ndryshuar jetën

Kongresmeni amerikan, Eliot Engel, ka mbajtur një fjalë rasti në seancën solemne të Kuvendit të Kosovës për nder të dhjetë vjetorit të pavarësisë.

Engel ka theksuar miqësinë që ka SHBA-ja me Kosovën.

 

Ai në 10-vjetorin e pavarësisë së Kosovës ka thënë se vendi duhet të reflektojë mbi atë që ka arritur për 10 vite.

Ndërkaq, Engel ka folur rreth krijimit të Ushtrisë duke thënë se Kosova ka nevojë për një armatë që do të jetë krahë për krahë me SHBA-në për ta ndihmuar paqen.

“E di tragjeditë e viteve `99. E di që ka pasur një dekadë për pritjen për pavarësinë. 10 vjet më vonë ka gjëra për të punuar por duhet të reflektojmë mbi atë se si kemi ardhur deri këtu. Ka pasur njerëz që kanë thënë se Kosova kurrë nuk do të jetë vend i pavarur, por nëse e shihni se ku ka qenë ky vend dhe ku po shkon e sa ka arritur unë them përnjëmend urime ditëlindjen Kosovë”.

“Janë gjëra që duhet të bëhen me muaj apo dekada më vonë dhe duket sikur vendi nuk po ecë shpejtë përpara sic do të dëshironim por unë si vizitor shoh përparimin. Kam qenë nëpër tërë botën si anëtar i Komisionit për Punë të Jashtme por askund në botë nuk ka miq SHBA-ja, siç ka në Kosovë. Ky vend duhet ta ketë një armatë krahë për krahë me SHBA-në për ta ndihmuar paqen në botë. E dua popullin e Kosovës”, tha ndër të tjera Engel./Telegrafi/

Çfarë po ndodh! 12 lëkundje tërmeti në 24 orë

Në vetëm 24 orë, 12 lëkundje tërmeti janë regjistruar në Shqipëri. Lëkundjet më të forta kanë qenë në orët e para të mëngjesit të së shtunës.

Sipas Institutit të Gjeoshkencave, Energjisë, Ujit dhe Mjedisit tërmeti i djeshëm ka qenë me magnitudë 4 ballë i shkallës Rihter në Ersekë.

Në këtë zonë janë regjistruar gjithsej 8 lëkundje tërmeti në 24 orë. Por mëngjesin e së dielës lëkundje janë ndierë në Berat dhe Bulqizë.

Lëkundjet e fundit të regjistruara nga Instituti i Gjeoshkencave, Energjisë, Ujit dhe Mjedisit janë në Fushë-Lurë, në orën 6:40. Tërmeti ka qenë me magnitudë 2.1 ballë, me një thellësi 6 kilometra.

“Çamëria nuk shuhet”, shqiptarët manifestojnë para ambasadës greke më 24 shkurt

Më datë 24 shkurt shoqata Patriotike Çamëria ka thirrur një protestë përpara ambasadës greke.

Në ftesë thuhet se kjo është një përgjigje ndaj ministrit grek Nikos Kotzias i cili kërkon që në librat shqip të mos përmendet fjala Çamëri.

“Ne 24 shkurt ju ftojme te gjitheve te behemi bashke per te protestuar para ambasades greke, tek hyrja e bllokut te ambasadave ne rrugen e Durresit, sheshi “Adem Jashari”.

Ne oren 12 , te shtunen ne 24 shkurt, Ne duhet te jemi te gjithe aty, qe ti tregojme Greqise dhe te gjithe nderkombetareve qe Çameria nuk shuhet, se jemi gjalle dhe ne kembe…”

Greqia ka kërkuar të mos përmendet emri “Çamëri” në tekstet shkollore shqiptare. Kështu ka bërë të ditur ministri i Jashtëm grek, Nikos Kotzias, në një letër përgjigje drejtuar deputetit Haris Theoharis.

Duke iu referuar takimit të fundit të komisionit dypalësh për rishikimin e teksteve shkollore, zhvilluar më 18 janar 2018, dhe i cituar nga portali militaire.gr, ministri i Jashtëm grek shkruan:

“Pala greke insistoi në heqjen e kapitullit “Treva shqiptare në Greqi”, që është i papranueshëm dhe ofendues. Ka kërkuar gjithashtu heqjen e referimeve dhe hartave ku zona gjeografike greke paraqiten si “Çamëri” dhe të cilat për fat të keq dëshmojnë se shteti shqiptar mbetet i mbërthyer në koncepte anakronike nacionaliste, të cilat në radhë të parë i bëjnë dëm vetë Shqipërisë”.

Në argumentimin e kërkesës, parlamentari grek nënvizonte që “me gjithë marrëveshjet ndërshtetërore, tekstet shkollore shqiptare e paraqesin Çamërinë të shtrihet gjeografikisht nga Teba deri në Prevezë. Ndërkaq, ministria greke e arsimit i ka bërë ndryshimet në tekstet shkollore greke. Megjithëse kanë kaluar tre muaj, pala shqiptare nuk ka dërguar –ashtu siç ishte angazhuar- tekstet e reja me ndryshimet e nevojshme”.

Gjenerali Wesley Clark uron popullin e Kosovës për 10 vjetorin e pavarësisë!

Ish-shefi i forcave të NATO-s gjenerali Wesley Clark, ka uruar qytetarët e Kosovës, me rastin e dhjetë vjetorit të Pavarësisë.

Ai ka publikuar një imazh nga koha e luftës në llogarinë e tij në Facebook.

“Urime qytetarëve të Kosovës, të cilët po festojnë dhjetë vjetorin e pavarësisë”, ka shkruar ai sipër imazhit.

Fotoreportazh i The Guardian: Kosova shteti i 51 i SHBA!

4 Korriku, Dita e Pavarësisë të SHBA festohet edhe në Kosovë, si festë e përbashkët

 

Voal po i sjell lexuesave një fotoreportazh nga The Guardian me titullin Kosova shteti i 51 i SHBA!

“Kosova, shkruan The Guardian, vazhdon të ketë lidhje emocionale, politike dhe ekonomike me vendin që 20 vjet më parë bëri një ndërhyrje perëndimore në luftë me ish-Republikën Federale të Jugosllavisë, duke çuar përfundimisht në shpalljen e pavarësisë së Kosovës.

Disa sondazhe sugjerojnë se Kosova është vendi më amerikandashës në botë dhe më mbështetësi i qeverive Amerikane.

Klinton Bajgora, 13 veç, sipas presidentit Bill Clinton, i ulur midis prindërve të tji në shtëpi në Podujevë.

KFORI Amerikan i vendosur pranë Ferizajt prej 1999 shihen prej shqiptarëve të Kosovës si çlirues.

Fëmijëve shqiptarë sa lindin prindërit u mësojnë të duan Amerikën dhe t’i jenë mirënjohës

Kosova, shteti i 51 i SHBA sepse shumë kompani Amerikane kanë lidhje ekonomike dhe pune me Kosovën.

NJë përshëndetje lamtumire në një restaurant të Prishtinës për atë që do të niset me punë në SHBA.

4 Korriku, Dita e Pavarësisë të SHBA festohet edhe në Kosovë, si festë e përbashkët

 

 

Një dekadë shtet, ish-presidenti i SHBA letër Kosovës: Krenar që pranova kërkesën, tani…

Ish-presidenti i Shteteve të Bashkuara të Amerikës, George W. Bush ka uruar gjithë shqiptarët me rastin e 10 vjetorit të Pavarësisë së Kosovës. Në një letër ai ka thënë disa fjalë me rastin e kësaj dite të rëndësishme për Republikën tonë.

Bush ka përmendur edhe momentin kur SHBA-të kanë njohur shtetësinë e Kosovës. 

“Laura dhe unë përgëzojmë popullin e Kosovës në këtë rast të rëndësishëm dhe dërgojmë urimet tona më të mira për një të ardhme paqësore, demokratike dhe të begatë”, ka shkruar ndër të tjera, raporton Express.

Letra e plotë:

Përshëndetjet më të përzemërta qytetarëve të Kosovës të cilët festojnë 10 vjetorin e Deklaratës së Pavarësisë. Në vitin 2008, Presidenti Sejdiu ra dakord të merrte përgjegjësitë e përcaktuara nga Plani i Ahtisaarit për të nxitur lirinë, tolerancën dhe drejtësinë për qytetarët e Kosovës, pavarësisht nga përkatësia e tyre etnike. Isha krenar që pranoja kërkesën e tij për Shtetet e Bashkuara të njohin Kosovën si shtet sovran dhe të pavarur. Dhjetë vjet më vonë, kjo ditë historike është një reflektim i angazhimit të vendit për të vazhduar ndjekjen e standardeve më të larta të dinjitetit njerëzor dhe për të çuar përpara çështjen e lirisë. Laura dhe unë përgëzojmë popullin e Kosovës në këtë rast të rëndësishëm dhe dërgojmë urimet tona më të mira për një të ardhme paqësore, demokratike dhe të begatë. Zoti të bekoftë.

VIDEO – Ish-Presidenti Clinton uron 10-vjetorin e Pavarësisë së Kosovë: Gjithmonë do keni një vend të veçantë në zemrën time

Një urim i veçantë për Kosovën në 10 vjetorin e Pavarësisë ka ardhur nga ish-Presidenti amerikan Bill Clinton. Përmes një video-mesazhi në rrjetet sociale, ish-Presidenti Clinton uron shqiptarët e Kosovës për 10 vjetorin e Pavarësisë.

Që në nisje të fjalës ai thekson se Kosova gjithnjë do të ketë një vend të veçantë në zemrën e tij.

“Kosova gjithmonë do ta ketë një vend të veçantë në zemrën time. Dhe jam shumë mirënjohës që si President i Shteteve të Bashkuara të Amerikës, munda t’ju ndihmoj që të ndiqni një të ardhme të prosperitetit të lirisë dhe tolerancës.

Juve ju është dashur të merrni shumë hapa të rëndësishëm gjatë dekadës së fundit për ta kuptuar atë të ardhme. Dhe kjo duhet t’jua japë një mundësi që të shikoni përpara dhe t’i kaloni sfidat që kanë mbetur thotë ai.

Unë vazhdoj të besoj se vendi i merituar i Kosovës është si një anëtare e plotë e Bashkimit Evropian, NATO-s dhe Komunitetit Ndërkombëtar. Është e rëndësishme për miqtë tuaj përreth botës që të vazhdoni të punoni, për t’i lënë konfliktet e së kaluarës prapa jush.

Ju bashkohem juve, në festën e 10 vjetorit të Pavarësisë. Gjithmonë do të jem i nderuar që pata shansin t’ju ndihmoj t’ia fillonit. Dhe shpresoj se do të jem gjallë edhe për një kohë t’ju shoh ta dërgoni topin në shtëpi, deri në fund. Paçi fat!” shprehet Clinton mes të tjerave.

Bill Clinton është presidenti amerikan që autorizoi ndërhyrjen ushtarake të forcave të NATO-s në Luftën e Kosovës, një ndërhyrje vendimtare për fatin e miliona shqiptarëve dhe të ardhmen e shtetit më të ri, Kosovës.