Nga Jonathan Baele, BBC

Irani është shumë më i madh se Izraeli gjeografikisht dhe ka një popullsi prej afro 90 milionë banorësh, pothuajse 10 herë më e madhe se ajo e Izraelit – por kjo nuk përkthehet në fuqi më të madhe ushtarake.

Irani ka investuar shumë në raketa dhe dronë. Ai ka një arsenal të madh të vetin, por gjithashtu ka furnizuar sasi të konsiderueshme për përfaqësuesit e saj – Huthit në Jemen dhe Hezbollahun në Liban.

Ajo që i mungon janë sistemet moderne të mbrojtjes ajrore dhe avionët luftarakë.

Rusia besohet se po bashkëpunon me Iranin për t’i përmirësuar ato, në këmbim të mbështetjes ushtarake që Teherani i ka dhënë Moskës në luftën e saj me Ukrainën – kryesisht në formën e dronëve Shahed, të cilët thuhet se rusët tani po i prodhojnë vetë.

Në të kundërt, Izraeli ka një nga forcat ajrore më të avancuara në botë. Sipas bilancit ushtarak të IISS, Izraeli ka të paktën 14 skuadrone avionësh – duke përfshirë F15, F16 dhe avionët më të fundit të fshehtë F-35.

Izraeli gjithashtu ka përvojë në kryerjen e sulmeve në thellësi të territorit armik.sn

Izraeli kërkoi të dielën që Këshilli i Sigurimit i Kombeve të Bashkuara të veprojë për të ndëshkuar Iranin, pas një sulmi të pashembullt ushtarak iranian ndaj Izraelit, që Teherani tha se ishte në hakmarrje për një sulm të dyshuar izraelit në ambasadën e tij në Siri, në fillim të këtij muaji.

“Sot, këshilli duhet të ndërmarrë veprime”, i tha Këshillit të Sigurimit i dërguari i Izraelit në OKB, Gilad Erdan. “Dënojeni Iranin për terrorin e tij; rivendosni sanksionet gjymtuese; shpallini Rojat Revolucionare iraniane si një organizatë terroriste. Duhet të veprohet tani. Jo për hir të Izraelit, jo për hir të rajonit, por për hir të botës”, tha ai.

Izraeli kërkoi takimin urgjent të këshillit pas një sulmi të drejtpërdrejtë në territorin e tij nga Irani, i cili tha se përfshinte 170 dronë dhe mbi 150 raketa. Izraeli tha se mbrojtja e tij ajrore, së bashku me ato të Shteteve të Bashkuara dhe aleatëve të tjerë, rrëzuan 99 për qind të tyre.

I dërguari izraelit Erdan kritikoi këshillin që nuk u vuri veshin paralajmërimeve të Izraelit përgjatë viteve për Iranin. Ai tha se komuniteti ndërkombëtar qëndroi i heshtur për ngritjen e “një Rajhu islamik shiit”, por me sulmin e drejtpërdrejtë të Iranit ndaj Izraelit, regjimi tani është shpërfaqur.

Ai tha se Irani kishte “kaluar çdo vijë të kuqe” dhe se Izraeli ruan të drejtën ligjore për t’u hakmarrë.

I dërguari i Iranit tha se iranianët nuk kishin zgjidhje tjetër veçse të ushtrojnë të drejtën e tyre për vetëmbrojtje pas sulmit të 1 prillit në ambasadën e tyre në Damask, dhe dështimit të Këshillit të Sigurimit për ta dënuar zyrtarisht atë.

Disa diplomatë të këshillit thanë se Shtetet e Bashkuara, Franca dhe Britania bllokuan një dënim të sulmit të 1 prillit, sepse kishin pikëpyetje nëse objektet iraniane po përdoreshin për operacione të fshehta.

“Ky regjim i paligjshëm ka kryer shumë krime mizore kundër popullit tonë”, tha ambasadori iranian Amir Saeid Iravani duke folur për Izraelin. “Ky regjim pranoi hapur përgjegjësinë e tij për operacionet terroriste dhe shkatërruese të kryera kundër zyrtarëve, shkencëtarëve dhe civilëve iranianë dhe sabotimit të infrastrukturës sonë bërthamore paqësore në vitet e fundit”.

Izraeli dyshohet se ka kryer disa sulme ajrore, atentate dhe sulme kibernetike ndaj Iranit në vitet e fundit, shumica të përqendruara në programin e tyre bërthamor. Izraeli kurrë nuk i konfirmon publikisht operacionet e tilla.

I dërguari Iravani tha se Irani “nuk kërkon përshkallëzim apo luftë në rajon”, por do të mbrohet nëse është e nevojshme.

Ai gjithashtu theksoi se Irani nuk dëshiron një konflikt me Shtetet e Bashkuara.

“Ne treguam përkushtimin tonë për paqen duke ushtruar përmbajtjen tonë për përfshirjen e ushtrisë amerikane në pengimin e dronëve dhe raketave iraniane të nisura kundër objektivave ushtarake në territoret e pushtuara palestineze”, tha ai. “Kjo nënvizon përkushtimin tonë për uljen e tensioneve dhe shmangien e zgjerimit të konfliktit”.

Por. ai shtoi se nëse ushtria e Shteteve të Bashkuara fillon ndonjë operacion kundër vendit të tij, qytetarëve ose interesave të tij të sigurisë, Irani do të “përgjigjet me të njëjtën masë”.

I dërguari i Shteteve të Bashkuara, Robert Wood, tha se Uashingtoni nuk po kërkon një përshkallëzim me Teheranin, por lëshoi një paralajmërim.

“Më lejoni të jem i qartë, nëse Irani ose zgjatimet e tij ndërmarrin veprime kundër Shteteve të Bashkuara ose veprime të mëtejshme kundër Izraelit, Irani do të mbahet përgjegjës”, tha ai.

I dërguari Wood tha se Shtetet e Bashkuara do të fillojnë këshillimet me vendet e tjera për të “shqyrtuar masa shtesë për ta mbajtur Iranin përgjegjës këtu në Kombet e Bashkuara”. Ai nuk dha hollësi se çfarë mund të përfshijë kjo, por i kërkoi Këshillit të Sigurimit të “dënojë pa mëdyshje” veprimet e Iranit dhe t’u bëjë thirrje partnerëve dhe zgjatimeve të tij t’i japin fund sulmeve të tyre.

Grupet e mbështetura nga Irani, përfshirë Hezbollahun në Liban dhe Huthit në Jemen, kanë qëlluar me raketa në drejtim të Izraelit, dhe Houthit kanë kryer sulme ndaj anijeve në Detin e Kuq dhe Ngushticën e Hormuzit.

Sekretari i Përgjithshëm i OKB-së iu drejtua takimit urgjent, duke bërë thirrje për ulje të tensioneve.

“Është koha të tërhiqemi nga buza e greminës”, tha sekretari Antonio Guterres, duke shtuar se as Lindja e Mesme dhe as bota nuk mund të përballojnë më shumë luftë.

Shumica e anëtarëve të Këshillit të Sigurimit dënoi përshkallëzimin dhe u bëri jehonë thirrjeve të shefit të ë OKB-së për ulje tensionesh dhe diplomaci, ndërsa shprehu shqetësimin për rrezikun e zgjerimit të trazirave rajonale.

Në një veprim të paprecedentë, Irani sulmoi të shtunën Izraelin ndërsa mbrojtja ajrore e këtij të fundit e ndihmuar edhe nga aleatët, SHBA, Britania, Jordania dhe Arabia Saudite arritën të rrëzojnë rreth 99 % të më shumë se 300 dronëve dhe raketave të lëshuara nga Irani. Por tensionet mbeten të larta, mes frikës për përshkallëzim të mëtejshëm në rast të një kundërsulmi të mundshëm izraelit. Presidenti amerikan, Joe Biden tha se do të thërrasë një takim të G-7-ës për të koordinuar një përgjigje të bashkuar diplomatike. Ekspertët thonë se ky sulm shënoi një kapitull të ri në histori.

Izraeli njoftoi të dielën se kishte përballuar me sukses sulmin e paprecedentë nga Irani, ndërsa ushtria izraelite dhe aleatët rrëzuan 99% të më shumë se 300 dronëve dhe raketave të lëshuara drejt territorit izraelit.

“Të shtunën Irani ndërmori një sulm kundër Izraelit dhe nisi më shumë se 300 dronë dhe raketa. Kërcënimi iranian u përball me epërsinë ajrore dhe teknologjike të Forcave të Mbrojtjes të Izraelit së bashku me një koalicion të fortë me aleatët, i cili së bashku goditi shumicën e dronëve dhe raketave. Ne goditëm 99% të kërcënimeve të lëshuara ndaj territorit të Izraelit. Kjo është një arritje strategjike shumë e rëndësishme”, tha zëdhënës i Ushtrisë izraelite.

Por tensionet rajonale mbeten të larta, mes frikës për përshkallëzim të mëtejshëm në rast të një kundërsulmi të mundshëm izraelit.

Presidenti amerikan Joe Biden tha se “ai do të thërriste një takim të G-7-ës (shtatë vendet më të industrializuara të botës) për t’u koordinuar një përgjigje të bashkuar diplomatike ndaj sulmit të paprecedentë të Iranit”.

Sipas analistëve, gjuha e deklaratës tregoi se administrata Biden nuk dëshiron të futet në një konflikt më të gjerë ushtarak. Një zyrtar i lartë amerikan tha se Uashingtoni e kishte informuar Izraelin se nuk planifikon të godasë vetë Iranin.

Sulmet iraniane ndaj Izraelit ndodhën pas një sulmi ajror në një ndërtesë konsullore iraniane në Siri në fillim të këtij muaji, ku u vranë dy gjeneralë iranianë. Izraeli as nuk e ka konfirmuar dhe as mohuar përgjegjësinë për këtë sulm.

“Mendoj se trysnia ndaj udhëheqësit suprem Ayatollah Khamenei u rrit deri në pikën ku Irani e ndjeu se ishte e nevojshme që nëse nuk i kryente këto sulme ndaj Izraelit, Izraeli thjesht do të vazhdonte të merrte gjeneralët iranianë një nga një”, thotë për Zërin e Amerikës, Barbara Slavin, eksperte pranë qendrës “Stimson” .

Prej vitesh, Izraeli dhe Irani kanë zhvilluar një luftë në hije me incidente si sulmi ndaj konsullatës në Damask, por sulmet e së shtunës ishin sulmet e para të drejtpërdrejta iraniane ndaj Izraelit, pavarësisht dekadave të armiqësisë që daton që nga Revolucioni Islamik i vitit 1979.

“Ky është një kapitull i ri për historinë e Lindjes së Mesme. Deri në këtë pikë, as Irani dhe as Izraeli nuk e kishin sulmuar drejtpërdrejt njëri-tjetrin nga territori i tij. Irani tani e ka ndryshuar këtë. Për Izraelin, kjo do të thotë se Irani mund të bëjë sulme të ngjashme në të ardhmen. Po kështu, kjo do të thotë se Izraeli tani ka të drejtë ta bëjë të njëjtat sulme kundër vetë Iranit. Veprimet e Iranit kanë ndryshuar rrjedhën e dinamikës së sigurisë rajonale”, thotë për Zërin e Amerikës eksperti Norman Roule.

“Përshkallëzimi i dhunës është shumë i rrezikshëm. Shumë prej nesh që e kemi parë me habi luftën e Gazës gjatë 6 muajve të fundit, jemi të shqetësuar se ky lloj përshkallëzimi mund të sillte një konflikt më të gjerë, nëse situata në Gaza nuk zgjidhet shpejt”, thotë për Zërin e Amerikës Barbara Slavin, eksperte pranë qendrës “Stimson” .

Izraeli ndër vite ka krijuar me ndihmën e Shteteve të Bashkuara një sistem të mbrojtjes ajrore, i aftë të përballojë një sërë kërcënimesh, duke përfshirë raketa me rreze të gjatë, dronë apo raketa me rreze të shkurtër veprimi.

Ky sistem, së bashku me avionët amerikanë, britanike dhe të aleatëve të tjerë bënë që Izraeli të përballonte me sukses sulmin masiv iranian, ndërkohë që ushtria është në luftë me grupin militant Hamas në Gazë dhe Hezbollahun në Liban. Si Hamasi ashtu edhe Hezbollahu mbështeten nga Irani.

“Teknologjia iraniane nuk arriti të depërtojë përtej mbrojtjes ajrore perëndimore. Po ashtu ushtria iraniane ishte në gjendje të demonstronte se ishte e gatshme të godiste Izraelin. Pavarësisht reputacionit ushtarak të Izraelit dhe pavarësisht mbështetjes së Izraelit nga Shtetet e Bashkuara dhe Mbretëria e Bashkuar. Por është e pamundur të thuhet sonte se Irani do të largohet nga ky sulm me ndjenjën se ka frenuar Izraelin apo Shtetet e Bashkuara”, thotë eksperti Norman Roule për Zërin e Amerikës.

Gjenerali Mohammad Hossein Bagheri, shefi i Shtabit të Forcave të armatosura iraniane, tha se operacioni kishte përfunduar, njoftoi agjencia shtetërore e lajmeve IRNA.

“Ne nuk kemi ndërmend të vazhdojmë operacionin kundër Izraelit”, citohet të ketë thënë ai.

Presidenti i Iranit, Ebrahim Raisi, pretendoi se Irani i kishte dhënë një mësim Izraelit dhe paralajmëroi se “çdo aventurë e re kundër interesave të kombit iranian do të përballej me një përgjigje më të rëndë dhe pa keqardhje nga Republika Islamike e Iranit”.

Ekspertët e mbrojtjes kanë folur për CNN nëse dhe si Izraeli mund t’i përgjigjet sulmeve të kësaj fundjave nga Irani.

Michael Oren, ish-ambasador izraelit në Shtetet e Bashkuara, i tha CNN se “rregullat duhet të ndryshohen” pas sulmit të së shtunës mbrëma, përcjell Telegrafi.

“Do të varet kryesisht nga shkalla e dëmit të shkaktuar nga kjo valë e parë e dronëve dhe raketave iraniane”, citohet të ketë thënë Oren.

“Por në çdo rast, ne jemi në Lindjen e Mesme dhe presioni dhe parandalimi llogariten shumë këtu. Nuk mendoj se Izraeli mund të goditet në këtë mënyrë në një shkallë kaq masive dhe të mos përgjigjet në një mënyrë domethënëse”.

Ndërsa Eyal Hulata, një ish-këshilltar izraelit për sigurinë kombëtare, theksoi se hakmarrja ushtarake nuk është përgjigja e vetme në dispozicion, duke shtuar se sanksione të tjera ndërkombëtare kundër Iranit mund të jenë të mundshme.

Ndryshe, SHBA njoftoi sanksione ndaj Iranit në shkurt – duke synuar një sërë nismash keqdashëse iraniane, duke përfshirë luftën kibernetike dhe programet e tyre me dron.

“Asgjë e tillë nuk ka ndodhur më parë. Ky është Irani që kalon të gjithë vijat. Por nuk mjafton vetëm të pyesim se çfarë duhet të bëjë Izraeli, por gjithashtu, çfarë duhet të bëjë komuniteti ndërkombëtar kur Irani ka bërë diçka kaq të paimagjinueshme”, mendon Hulata.

Irani ka qenë nën një mori sanksionesh ndërkombëtare për vite të tëra, të cilat kanë goditur ekonominë e vendit. Por ato kanë pasur ndikim të kufizuar në ndryshimin e qasjes së qeverisë ndaj Izraelit dhe Lindjes së Mesme më gjerë.sn

Ministri i mbrojtjes i Izraelit ka thënë se ai ka përfunduar një vlerësim të situatës operacionale me anëtarë të lartë të institucionit të mbrojtjes të Izraelit dhe ka arritur në përfundimin se IDF-ja “e pengoi” sulmin nga Irani “në një mënyrë mbresëlënëse”.

Së bashku me Shtetet e Bashkuara dhe partnerë shtesë, ne arritëm të mbronim territorin e shtetit të Izraelit. U shkaktuan shumë pak dëme – ky është rezultat i operacioneve mbresëlënëse të IDF-së.

Gallant tha se ndërsa “fushata nuk ka përfunduar ende”, Izraeli “e pengoi valën më të rëndësishme [të sulmit] dhe ne e bëmë këtë me sukses”.sn

Irani ka nisur mbrëmjen e të shtunës një sulm hakmarrës ndaj Izraelit duke lëshuar mbi 500 dronë kamikazë, të cilët raportohet se do të duan disa orë që të arrijnë në Izrael.- Advertisement –

Situata po zhvillohet me shpejtësi, me qeveritë në të gjithë Lindjen e Mesme të cilat po marrin masa në lidhje me sulmin.

Jordania, Libani dhe Iraku, tre shtete të vendosura në rrugën e mundshme të fluturimit të dronëve, kanë mbyllur hapësirën e tyre ajrore.

Irani dhe Izraeli gjithashtu kanë mbyllur hapësirat ajrore për të gjithë, përveç avionëve ushtarakë.

Ministra e Mbrojtjes së Izraelit bëri një deklaratë të fortë, ku tha se shtetet që do të lejojnë kalimin e dronëve kamikazë do të marrin përgjigje të fortë nga izraeli.

“Çdo vend që hap hapësirën ajrore apo territorin e tij për Izraelin për të sulmuar Iranin, do të marrë një përgjigje të fortë nga ne”, tha zëdhënësi i ministrisë së Mbrojtjes së Izraelit.

Zyrtarët amerikanë parashikojnë që Irani të lëshojë deri në 500 dronë dhe raketa nga Irani, Iraku, Siria, Libani dhe Jemeni. Kjo është pjesë e “Operacionit “Premtimi i Vërtetë” i Iranit si një përgjigje ndaj bombardimit të Izraelit ndaj ambasadës iraniane në Siri, duke vrarë shumë oficerë të IRGC.sn

Korpusi i Gardës Revolucionare Islamike të Iranit tha se lëshoi dhjetëra dronë dhe raketa në drejtim të Izraelit, natën mes 13 dhe 14 prillit.

Operacioni që ngriti shqetësime për përshkallëzimin e konfliktit në Lindjen e Mesme, u zhvillua pas një sulmi në konsullatën e Iranit në Siri, më 1 prill, kur u vranë shtatë oficerë ushtarakë.

Ndonëse Irani e akuzoi Izraelin për kryerjen e këtij sulmi, ky i fundit as nuk e konfirmoi, as nuk e mohoi.

Kryeministri izraelit, Benjamin Netanyahu, tha se vendi i tij “është gati për çdo skenar”.

“Në vitet e fundit, e sidomos në javët e fundit, Izraeli është përgatitur për një sulm të drejtpërdrejtë nga Irani. Shteti i Izraelit është i fortë”, tha ai.

“Ne vlerësojmë qëndrimin e SHBA-së përkrah Izraelit, si dhe mbështetjen e Britanisë, Francës dhe shumë vendeve të tjera. Ne kemi përcaktuar një parim të qartë: këdo që na dëmton, ne do ta dëmtojmë”, shtoi kryeministri izraelit.

Misioni i Iranit në Kombet e Bashkuara tha se operacioni ushtarak i Iranit ishte “në përgjigje të agresionit të regjimit zionist kundër objekteve tona diplomatike në Damask” dhe shtoi se ai “mund të konsiderohet i përfunduar”.

“Megjithatë, nëse regjimi izraelit bën ndonjë gabim tjetër, përgjigjja e Iranit do të jetë dukshëm më e ashpër. Është një konflikt mes Iranit dhe regjimit mashtrues izraelit, nga i cili SHBA-ja duhet të qëndrojë larg”, shkroi misioni i përhershëm i Iranit në OKB në platformën X.

Presidenti amerikan, Joe Biden, tha se ka zhvilluar një takim me ekipin e tij të sigurisë kombëtare dhe u zotua se SHBA-ja do ta mbështesë fuqishëm Izraelin.

“Përkushtimi ynë për sigurinë e Izraelit kundër kërcënimeve nga Irani dhe grupet e tij është i hekurt”, tha Biden.

Bota duhet të sigurohet se “Izraeli nuk është vetëm”, tha kryetari i Dhomës së Përfaqësuesve të SHBA-së, Mike Johnson.

Sekretari i përgjithshëm i OKB-së, Antonio Guterres, tha se e dënon ashpër sulmin e Iranit dhe bëri thirrje për ndërprerje të menjëhershme të armiqësive.

“Jam thellësisht i shqetësuar për rrezikun shumë real të përshkallëzimit shkatërrues të situatës në gjithë rajonin”, tha Guterres.

“Unë e kam theksuar vazhdimisht se as rajoni dhe as bota nuk mund të përballojnë një luftë tjetër”, kujtoi ai.

Kryeministri britanik, Rishi Sunak, tha se sulmet e Iranit rrezikojnë t’i ndezin tensionet dhe ta destabilizojnë rajonin.

“Irani ka dëshmuar edhe një herë se do të shkaktojë kaos në oborrin e tij”, tha ai.

“Bashkë me aleatët, ne po punojmë urgjentisht për ta stabilizuar situatën dhe për ta parandaluar përshkallëzimin e mëtejshëm. Askush nuk dëshiron të shohë më shumë gjakderdhje”, tha kryeministri britanik.

Kryeministri i Kanadasë, Justin Trudeau, tha se mbështet “të drejtën e Izraelit për të mbrojtur veten dhe popullin e tij nga këto sulme”.

Shefi i politikës së jashtme të Bashkimit Evropian, Josep Borrell, e konsideroi sulmin e Iranit si një “përshkallëzim të paprecedentë” dhe një “kërcënim të rëndë për sigurinë rajonale”.

Ministrja e Jashtme e Gjermanisë, Annalena Baerbock, tha se e dënon fuqishëm sulmin e Iranit, i cili “mund ta zhysë të gjithë rajonin në kaos”.

“Situatë shumë shqetësuese në Lindjen e Mesme”, tha kryeministri holandez, Mark Rutte.

“Holanda i dënon ashpër sulmet e Iranit ndaj Izraelit. Përshkallëzimi i mëtejshëm i situatës duhet të parandalohet”, tha ai.

“Roli destabilizues i Iranit në Lindjen e Mesme është i papranueshëm, e po ashtu edhe ky sulm”, tha ministri i Jashtëm danez, Lars Lokke Rasmussen.

“Sjellja agresive e Iranit po e pengon rajonin e Lindjes së Mesme të jetojë në paqe dhe siguri”, sipas Ministrisë së Jashtme çeke.

Presidenti i Argjentinës, Javier Milei, tha se shpreh “solidaritet dhe përkushtim të palëkundur ndaj shtetit të Izraelit”.

Ngjashëm edhe presidenti i Paraguajt, Santiago Pena. “Në momente të tilla të vështira, ne shprehim mbështetjen tonë të plotë për popullin e Izraelit dhe jemi të shqetësuar për rritjen e dhunës në rajon”, tha ai.

Ministri i Jashtëm i Kilit, Alberto Van Klaveren, tha se shpreh shqetësim për tensionet e përshkallëzuara në Lindjen e Mesme dhe për sulmet e Iranit kundër Izraelit.

Ministria e Jashtme e Meksikës bëri thirrje, po ashtu, për përmbajtje dhe kërkoi gjetjen e një zgjidhjeje “për të shmangur një konflikt më të përgjithshëm në Lindjen e Mesme”.

Përgatiti: Valona Tela

Pjesëtarë të Gardës Revolucionare të Iranit kanë zbritur të shtunën prej helikopterit në një anije me mallra afër Ngushticës së Hormuzit, duke pretenduar se anija është “e lidhur me Izraelin”.

Izraeli, në anën tjetër, ka thënë se Irani do t’i paguajë pasojat e përshkallëzimit të tensioneve në Lindje të Mesme.

Lindja e Mesme është shtrënguar nga mundësia e një hakmarrjeje eventuale iraniane, pasi për sulmin e 1 prillit në konsullatën iraniane në Siri, që i ka lënë të vdekur 12 persona, Irani mban përgjegjës Izraelin.

Në këtë sulm kanë mbetur të vrarë edhe figura të larta ushtarake iraniane.

Agjencia shtetërore e lajmeve në Iran, Irna, ka thënë se forcat e njësitit special të Gardës e kanë kryer sulmin në anije.

Disa media tjera e kanë identifikuar anijen si të lidhur me kompaninë me bazë në Londër, Zodiac Maritime.

Zodiac Maritime është pjesë e Grupit Zodiac të miliarderit izraelit, Eyal Ofer.

Një zyrtar i mbrojtjes në Lindje të Mesme, që ka folur në kushte anonime, e ka ndarë me agjencinë e lajmeve Associated Press një video kur komandot iraniane shihen duke u ulur në kontejnerët e anijes.

Helikopteri i përdorur besohet se është i periudhës sovjetike Mil Mi-17, të cilin e kanë përdorur në të kaluarën si Garda Revolucionare e Iranit, ashtu edhe rebelët Huthi të Jemenit, për të kryer bastisje nëpër anije.

Ushtria britanike ka thënë se anija është “konfiskuar prej autoriteteve rajonale” në Gjirin e Omanit, pa dhënë më shumë hollësi.

Anija ka qenë për herë të fundit në Dubai dhe është nisur më pas drejt Ngushticës së Hormuzit.

Anija i ka bllokuar të gjitha të dhënat e veta për vëzhgim lëvizjesh, një veprim tashmë i zakonshëm për anijet e lidhura me Izraelin, që kalojnë nëpër atë rajon.

Prej vitit 2019, Irani është përfshirë në një mori rastesh të konfiskimit të anijeve.

Gjiri i Omanit është afër Ngushticës së Hormuzit, e cila mundëson hyrjen në Gjirin Persik, nëpër të cilin kalon një e pesta e gjithë naftës së tregtuar në botë.REL