VOAL

VOAL

Please Wait ...
0%

Blerim Reka bën thirrje për pjesëmarrje në votimet e 5 majit

By | May 2, 2019

Komentet

Maqedoni e Veriut, arrestohet një zyrtar qeveritar nga radhët e BDK

Është arrestuar Sekretari shtetëror në Ministrinë e Shoqërisë Informatike dhe Adminisratës të qeverisë së Maqedonisë nën akuzat për korrupsion. Jahi Jahija, përfaqësues i Bashkimit Demokratik për Integrim, i cili e ka ushtruar prej vitesh këtë funksion, akuzohet nga Prokuroria maqedonase për çështje të korrupsionit së bashku me një ish-kolege të tij për marrje ryshfeti prej disa dhjetëra mijë eurosh në vitin 2014/15 nga një firmë e cila kishte fituar në një tenderim.

Çështja ka marrë dimensione edhe jashtë shtetit me Shërbimin evropian për pengimin e mashtrimeve – OLAF (European Anti-Fraud Office), i cili është kyçur në hetime. Hetime janë bërë edhe në Itali. Policia maqedonase ka lënë të kuptohet se në këtë rast janë shpërdorur mjete të fondit evropian – IPA.

Dy të akuzuarit i kanë zbuluar informata të fshehta firmës që ka konkurruar në tenderin prej mbi një milion eurosh, në lidhje me tenderimin, sipas autoriteteve në Shkup. Firma e njejtë në vitin 2016 kishte filluar ta zbatojë projektin IPA kur dhe, sipas akuzës, i kishte shpërblyer dy zyrtarët e ministrisë maqedonase.

Bashkimi Demokratik për Integrim ka komentuar shkurt se do ta lënë që prokuroria të merret me çështjen dhe nëse Jahija gjendet fajtor atëherë ai le të bartë përgjegjësitë.

Jahija u arrestua të hënën në shtëpinë e tij në komunën e Likovës, afër Kumanovës. E akuzuara e dytë, emri i së cilës nuk bëhet publik, nuk është e kapshme për organet hetuese.

Pendarovski shprehet kundër idesë së korrigjimit të kufijve mes Kosovës dhe Serbisë: ide të këtilla nuk i takojnë shekullit të 21-të

Shkup

Tensionet në Republikën e Kosovës nuk mund të rrezikojnë stabilitetin Maqedonisë së Veriut dhe të rajonit, deklaroi Presidenti i Maqedonisë së Veriut, Stevo Pendarovski.

Presidenti i vendit realizoi vizitën e parë në Ministrinë e Mbrojtjes dhe në Shtatmadhorinë e Armatës, pas çka mbajtën një konferencë për media me ministren Radmilla Shekerinska ku u pyetën rreth tensioneve të fundit në Republikën e Kosovës dhe mundësinë e korrigjimit të kufijve.

Presidenti Pendarovski tha se institucionet kompetente me vëmendje e kanë ndjekur gjendjen në kufirin mes Maqedonisë së Veriut dhe Kosovës dhe se kanë qenë në bashkëpunim me forcat e KFOR-it.

“Vlerësimet e shërbimit të KFOR-it në Kosovë dhe të faktorëve kyç ndërkombëtarë, si dhe të institucioneve tona që bashkëpunojnë me ta, janë se në të ardhmen, edhe po të ketë situata të ngjashme, ato nuk do të jenë me proporcione të tilla që ta rrezikojnë sigurinë e Republikës së Maqedonisë së Veriut, e as të rrezikojnë sigurinë në rajon”, tha Pendarovski.

Ai gjithashtu u shpreh kundër idesë së korrigjimit të kufijve mes Kosovës dhe Serbisë, duke theksuar se ide të këtilla nuk i takojnë shekullit të 21-të.

Duke komentuar tensionet e fundit në Kosovë, ministrja e mbrojtjes së Maqedonisë së Veriut, Radmilla Shekerinska, theksoi rëndësinë e anëtarësimit të vendit në NATO.

“Për këtë në vitin 2017 e vendosëm fokusin në anëtarësimin tonë në NATO, në mënyrë që të sigurojmë që shteti ynë të ketë garanci shtesë të sigurisë, madje edhe në rast të jostabilitetit rajonal. Pikërisht për këtë nuk presim as ndikim të drejtpërdrejtë në siguri, e as ndikim ndaj treguesve ekonomikë”, tha Shekerinska.

Tensionet në Republikën e Kosovës u përshkallëzuan pas operacionit policor të realizuar të martën, ku u arrestuan 19 pjesëtarë të Policisë së Kosovës të dyshuar për disa vepra penale, mes tjerash “pjesëmarrje ose organizim i grupit kriminal”.

Aksioni u karakterizua me rezistencë të caktuar, ku si pasojë gjatë aksionit u lënduan pesë policë, njëri prej të cilëve mori plagë nga armë zjarri. aa

Autostrada Shkup-Bllacë e gjatë vetëm 12.5 kilometra as që ka filluar

Derisa Kosova përfundoi projektin e autostradës prej 65 km deri në kufirin me Maqedoninë e Veriut, autoritetet vendase shtyjnë edhe për disa muaj afatin e tenderimit të projektit prej 12,5 km të autostradës Shkup-Bllacë.

Në vend se këtë pranverë, siç u paralajmërua, njoftimi i fundit është se dy kilometrat e para të autostradës Shkup-Bllacë do të fillojnë të ndërtohen gjatë vjeshtës.

“Afatet janë më të mëdha në tenderët ndërkombëtarë në pjesën e autostradave, mendoj se janë mes 45 dhe 60 ditë, prandaj, deri në shtator, nëse të gjitha procedurat përfundojnë siç duhet të jetë në pjesën e tenderimit, do të duhet të fillojë” deklaroi Goran Sugarevski, Ministër i Transportit dhe Lidhjeve

Pjesa tjetër e mbetur prej 10 kilometra e gjysmë të autostradës, nëse projekti përfundon deri në fund të vitit, do të fillojë të ndërtohet në sezonin e ardhshëm ndërtimor.

“Nuk dua të spekuloj me afatet, pritjet tona janë diku në tetor-nëntor që të përfundojë projekti, kështu që pas kësaj, menjëherë do të shkojmë me tenderim” tha Goran Sugarevski.

Zëvendëskryeministri Bujar Osmani verën e kaluar premtoi se këtë pranverë do të fillojë ndërtimi i autostradës Shkup-Blacë, e cila është kërkesa e një dekade nga komuniteti i biznesit, shkruan Alsat.

Sipas paralajmërimeve nga Qeveria plani është që ndërtimi i këtij seksioni të bëhet në dy faza.

Faza e parë nga kalimi kufitar Bllacë deri në rrugën lidhëse drejt Bllacës, me një gjatësi rreth dy kilometra dhe duhet të ndërtohet në 18 muaj.

Pjesa e dytë, deri në Shkup, është e gjatë 10.5 kilometra, ndërtimi duhet të fillojë vitin e ardhshëm dhe të zgjasë rreth 36 muaj.

Pritjet janë që kjo autostradë të vihet në përdorim në vitin 2023. Autostrada, e cila do të ketë katër tunele dhe tetë ura, kushton rreth 110 milion euro.

Qeveria e RMV-së miratoi propozim-ligjin për regjistrim të popullsisë

Shkup

Qeveria e Republikës së Maqedonisë së Veriut në mbledhjen e 137-të ka miratuar tekstin e Propozim-ligjit për Regjistrim të popullsisë, amvisërive dhe banesave në Republikën e Maqedonisë së Veriut për vitin 2020, raporton Anadolu Agency (AA).

Në konferencën e rregullt për media që mbahet për mbledhjet e qeverisë, përpos zëdhënësit Muhamet Hoxha, i pranishëm ishte edhe drejtori i Entit Shtetëror për Statistikë (ESHS), Apostol Simovski, i cili në detaje sqaroi nevojën e miratimit të propozim ligjit dhe përmbajtjen e tij.

Simovski tha se për herë të parë në Maqedoninë e Veriut zbatohet e ashtuquajtura metodë e kombinuar, respektivisht përdorimi i informacioneve nga bazat e të dhënave dhe grumbullimi i të dhënave nga terreni. Ai gjithashtu theksoi se regjistrimi në terren do të bëhet në mënyrë elektronike me përdorim të laptopëve, që gjithashtu është një risi tjetër në vend, për të cilin Simovski tha se do të mundësojë grumbullim më të shpejtë dhe më cilësor të të dhënave.

“Në këtë regjistrim, për dallim nga regjistrimi i mëparshëm i cili fatkeqësisht ishte i pasuksesshëm, do t’i përfshijë të gjithë personat si njësi të regjistrimit. Domethënë, përfshihen edhe personat që janë të pranishëm në shtet, por edhe personat që janë jashtë shtetit”, tha Simovski, duke theksuar se gjithnjë do të respektohen standardet e parapara nga Kombet e Bashkuara dhe nga Drejtoria evropiane e statistikave – Eurostat.

Ai sqaroi se personat që ndodhen jashtë shtetit, do të kenë mundësi të vet-regjistrimit nëpërmjet web-aplikacionit i cili në faqen e internetit të ESHS-së do të jetë gati një muaj para fillimit të regjistrimit.

Regjistrimi i popullsisë do të përmbajë edhe pyetjet për përkatësinë fetare dhe etnike, edhe pse fillimisht kishte dilema për këto çështje.

Simovski gjithashtu tha se sipas planit të paraparë, regjistrimi duhet të realizohet në periudhën nga 1 deri më 21 prill të vitit 2020. Në të do të angazhohen rreth 6.000 persona ndërsa do të kushtojë rreth 8,5 milionë euro.

Në konferencën për media u tha se në Republikën e Maqedonisë së Veriut për 16 vite nuk është zbatuar regjistrim i popullsisë ndërsa regjistrimi i vitit 2011 ishte i pasuksesshëm për shkak të mosmarrëveshjeve mes partive politike.

Përpos propozim-ligjit për regjistrim të popullsisë, zëdhënësi Hoxha njoftoi edhe për vendimet tjera në mbledhjen e 137-të qeveritare.

Mes tjerash, ai tha se Qeveria miratoi Propozim-ligjin për menaxhim me trashëgiminë kulturore dhe natyrore në rajonin e Ohrit si dhe miratoi Strategjinë Fiskale të Republikës së Maqedonisë së Veriut për vitin 2020-2022.

UNESCO kërkon moratorium për ndërtimet në Ohër

UNESCO në raportin e saj të fundit rekomandon që Ohri dhe rajoni të vendosen në listën e vendeve të rrezikuara të Trashëgimisë Botërore.

UNESCO po kërkon të deklarohet moratorium për çdo lloj transformimi urban në brigjet e liqenit, por gjithashtu për çdo lloj transformimi urban. Arsyeja për këtë është përparimi i pamjaftueshëm deri në zgjidhjen e problemeve mjedisore, duke marrë parasysh kërcënimet e vazhdueshme dhe projektet e mëdha të ndërtimit në qytet dhe në rrethinat e saj.

Në raport rekomandohet të vlerësohet ndikimi i ndërtimeve pa leje në zonën e mbrojtur dhe rrënimin e atyre që paraqesin kërcënim, për trashëgiminë natyrore dhe kulturore.

“Luftëtarët kibernetikë” të SHBA-së edhe në Maqedoninë e Veriut

Një qendër në Evropë për mbrojtje nga sulmet kibernetike. Fotografi nga arkivi.

Ministria e Mbrojtjes e Maqedonisë së Veriut ka konfirmuar bashkëpunimin me komandën kibernetike të Shteteve të Bashkuara të Amerikës, pas informacionit të ditës së hënë se Shtetet e Bashkuara kanë ndërmarrë masa kundër sulmeve të internetit (kibernetike) ndaj demokracisë dhe institucioneve demokratike në disa shtete të Evropës Lindore, në mesin e të cilave është edhe Maqedonia e Veriut.

Në Ministrinë e Mbrojtjes thonë se bashkëpunimi me komandën kibernetike amerikane ka nisur në vitin 2018, me qëllim që t’u ndihmohet subjekteve kompetente nga Ministria e Mbrojtjes për arritjen e standardeve të NATO-s në këtë sferë.

“Me ndihmën e ekspertëve është shqyrtuar gjendja lidhur me rrjetin e apostrofuar për qasje në internet dhe në bazë të ekspertizës së bërë janë ndërmarrë masa për përmirësimin dhe mbrojtjen e rrjetit informatikë të Ministrisë së Mbrojtjes nga aktivitetet e padëshiruara”, thonë nga ky dikaster, duke u përgjigjur nëse janë pjesë e planit aksional të komandës kibernetike të SHBA-së në rritjen e sigurisë kibernetike dhe sulmeve ndaj internetit.

Sipas informacioneve që janë konfirmuar edhe nga ambasada amerikane në Mal të Zi , SHBA-ja po vendos të ashtuquajturit “luftëtarë kibernetikë” në disa shtete të saj mike në Evropën Lindore, si në Maqedoni të Veriut, Mal të Zi dhe Ukrainë, që t’i “ndihmojnë në përballjen me sulmet e vazhdueshme dhe kërcënimet kibernetike ndaj demokracisë”.

“Komanda kibernetike amerikane që kontrollon operacionet në hapësirën kibernetike për mbrojtjen e interesave amerikane, po bashkëpunon me autoritetet e këtyre vendeve që t’i pengojë kërcënimet potenciale. Komanda amerikane evropiane dhe komanda kibernetike amerikane bashkëpunojnë ngushtë me aleatët e NATO-s”, kanë deklaruar për BIRN nga ambasada amerikane në Mal të Zi, por pa saktësuar detaje tjera.

Kohë më parë, sipas portalit të specializuar “SaberScoop”, gjenerali amerikan Timothy Haugh, komandant i forcave të misionit kombëtar të komandës kibernetike, kishte deklaruar se si pjesë e operacionit të koduar “Teologjia sintetike”, komanda ka vendosur “luftëtarë kibernetikë” në Ukrainë, Maqedoni të Veriut dhe Mal të Zi, që të ndihmojë këto vende që të “mbrohen dhe të mblidhen të dhëna për armiqtë”.

Sipas profesorit të sigurisë në universitetin Fon të Shkupit, Bashkim Selmani, sulmet kibernetike dhe kërcënimet e këtij lloji paraqesin “terrorizëm bashkëkohor” mes shteteve dhe se nga këto sulme nuk përjashtohet as Maqedonia e Veriut.

“Është fakt se nëse analizohet funksionaliteti i këtij vendi, në këtë vakum që ka pasur si një shtet i ndjeshëm sa i përket problemeve si brenda ashtu edhe jashtë, tash po i paraqitet edhe sulmi i radhës Maqedonisë së Veriut, apo sulmet kibernetike. Realisht dyshohet se ato vijnë nga Rusia, megjithatë ato nuk mund të argumentohen, por duke e ditur synimin e saj për anëtarësim në NATO dhe BE, ajo ende më shumë do të jetë e rrezikuar në këtë formë të sulmeve”, thotë Selmani.

Sipas Selmanit, Maqedonia e Veriut nuk është aq e përgatitur që të përballet me këto sulme, andaj edhe është e logjikshme të kërkojë ndihmë.

Në raportin e “SaberScoop” thuhet se SHBA-ja ka synuar “që të mënyrë aktive të pengojë përzierjen eventuale në zgjedhje nga vendet si Rusia”.

Në kontekst të kërcënimit të sigurisë kibernetike janë edhe zgjedhjet presidenciale amerikane dhe hetimi për përzierjen e mundshme ruse. Në këtë hartë është edhe Maqedonia e Veriut me lajmet e rreme nga qytetit i Velesit në mbështetje të Donald Trump.

Edhe themeluesi i Facebook-ut, Mark Zuckerberg kishte përmendur Maqedoninë e Veriut si burim të lajmeve të rreme dhe kjo çoi që më vonë Facebook të mbyllë 212 faqe interneti në Maqedoninë e Veriut dhe Kosovë, për shpërndarje të materialit në kundërshtim me politikat e kompanisë.

Maqedonia e Veriut i njeh lejet e vozitjes të Kosovës

Isuf Kadriu

Kuvendi i Maqedonisë së Veriut e ratifikoi marrëveshjen me Republikën e Kosovës për njohjen reciproke të lejeve për vozitje, bazuar në marrëveshjen e arritur mes dy shteteve më 28 janar 2019.

“Me qëllim përmirësimin e sigurisë në komunikacionin rrugor në territoret e shteteve nënshkruese të marrëveshjes, dy palët, në mënyrë reciproke, i njohin lejet e vozitjes, të lëshuara në territoret e shteteve të tyre në bazë të qëndrimit të rregullt të përcaktuar nga institucionet përkatëse”, thuhet mes tjerash në nenet e marrëveshjes së ratifikuar.

Marrëveshja është mbështetur nga të gjithë deputetët, përfshirë edhe ata të partisë opozitare VMRO DPMNE, por vërejtja e tyre ka pasur të bëjë me zvarritjen e procedurave për nisjen e punimeve ndërtimore për autostradën Shkup-Bllacë, që lidh Maqedoninë e Veriut me Republikën e Kosovës.

Deputeti Ilija Dimovski tha se janë të pakuptimta vonesat e autoriteteve kur kihet parasysh fakti se pala kosovare e ka përfunduar pjesën e saj të autostradës Prishtinë-Shkup.

Me këtë, sipas deputetit të opozitës maqedonase, qeveria ka dështuar në premtimin e saj për ndërtimin e infrastrukturës me shtetin fqinj.

Nga Qeveria e Maqedonisë së Veriut është njoftuar se projekti është në përfundim e sipër, ndërsa punimet pritet të nisin gjatë këtij viti.

Të dënuarit e “Kumanovës”: Fol shqip, këtu është Shqipëri (video)

MAQEDONI E VERIUT

Në atmosferë të tensionuar ka filluar seanca e sotme e Gjykatës së Apelit, në të cilën shqyrtohen ankesat e Grupit të Kumanovës, të cilët janë dënuar me burg për ngjarjet në Lagjen e Trimave. Seanca filloi me një minutë heshtje për pjesëtarët e vdekur nga Grupi i Kumanovës, të cilën në emër të të gjithëve e kërkoi Genci Sefa.

Më pas ai së bashku me të akuzuarit e tjerë kërkoi që të lexohet deklarata e përbashkët e tyre, por nga gjykata u paralajmëruan se janë në seancë publike, e jo në gjykim. Pas kësaj, pjesëtarët e Grupit të Kumanovës kërkuan që gjykatësja të flasë shqip. “Katër vjet presim të flasim. Kërkojmë hetim ndërkombëtar, nuk jemi të kënaqur nga avokatët, një vit nuk kemi pasur komunikim. Kjo është Shqipëri, ne jemi autokton”, kanë thënë disa nga të akuzuarit në seancë, raportojnë mediat në gjuhën shqipe në Maqedoninë Veriore.

Pasi gjykatësja nuk ju lejoi të lexojnë deklaratën e përbashkët, ata u çuan në këmbë dhe kërkuan të mos e vazhdojnë seancën, ndërsa gjykatësja i lejoi pasi prania nuk është e detyrueshme. Në deklaratën e përbashkët të tyre, të akuzuarit për ngjarjet në Kumanovë kërkojnë nga kryeministri Zoran Zaev t’i nxjerrë dëshmitë e vërteta, për këtë rast, të cilin ata e quajnë të montuar politikisht.

Në deklaratën e lexuar, shihet se Grupi i Kumanovës si dëshmitarë për këtë rast ka propozuar ish-kryeministrin Nikolla Gruevski, kryetarin e BDI-së Ali Ahmeti, Gordana Jankulloskën, Musa Xhaferin, Gjorge Ivanovin, Bekir Asanin dhe disa ish-funksionarë tjerë shtetërorë. Seanca në Gjykatën e Apelit do të vazhdojë sot dhe nesër pa praninë e disa të akuzuarve. Ndërsa ankesat e tyre do t’i përfaqësojnë avokatët e tyre. Jashtë Gjykatës së Apelit ka forca policore, ndërsa familjarëve e të akuzuarve nuk u është lejuar të fusin në gjykatë lëndë të forta.

Të dënuarit e Grupit të Kumanovës kërkojnë hetim ndërkombëtar

Isuf Kadriu

Gjykata e Apelit në Shkup ka nisur shqyrtimin e ankesave të 33 pjesëtarëve të njohur si Grupi i Kumanovës, të cilët gjykata e shkallës së parë i kishte dënuar me 746 vjet burgim për veprën penale, terrorizëm.

Prokuroria ka mbrojtur gjykimin e shkallës së parë, ndërsa të dënuarit vetëm për pak çaste kanë qëndruar në seancë, pasi u larguan nga policia për shkak të reagimeve të zëshme dhe brohoritjeve të ndryshme në shenjë revolte, për, siç kanë thënë, dënimin e shqiptuar dhe mosmarrjen në konsideratë të reagimeve të tyre gjatë katër vjetëve të kaluar.

Valdet Zekaj, në emër të të dënuarve, edhe një herë ka kërkuar hetim ndërkombëtar të rastit, si dhe dëshmitë e shumë ish-zyrtarëve të Qeverisë së kaluar, e që janë pjesë edhe e Qeverisë së tanishme duke i akuzuar për tradhti për rastin në fjalë.

Ai ka akuzuar ish-kryeministrin Nikolla Gruevski dhe shumë ministra e zyrtarë të tjerë, përfshirë edhe ata shqiptarë si Ali Ahmetin, Musa Xhaferin e të tjerë.

“Ne, por edhe avokatët tanë, para gjykatës së shkallës së parë kemi propozuar dëshmitarët krucial që të vijnë këtu dhe të dëshmojnë me qëllim që të zbardhet çdo detaj dhe të hiqet çdo dilemë rreth këtij rasti…Por, gjykata i refuzoj të gjithë dëshmitarët, përfshirë edhe njërin që kishte pranuar të fliste”, ka thënë Zekaj.

Edhe pala mbrojtëse ka kërkuar hetim ndërkombëtar, ndërsa ka përsëritur qëndrimet se rasti ka qenë i orkestruar nga Qeveria e kaluar për të shpërqendruar vëmendjen nga skandalet, me të cilat përballej ajo, në veçanti me aferën e përgjimeve dhe raste tjera.

“Sot, djemtë ishin decid, të saktë. Nuk kanë besim në këtë gjykatë, andaj edhe kërkojnë hetim dhe gjykim ndërkombëtar, që të kuptohet se çfarë konkretisht ka ndodhur më 9 dhe 10 maj në Lagjen e Trimave në Kumanovë, dhe të vërtetën ta dinë, si ata, ashtu edhe opinioni”, ka deklaruar Mefail Arsllani, një nga avokatët e të dënuarve.

Sa i përket kërkesës për hetim ndërkombëtar, nga Qeveria kanë thënë se mbeten në qëndrimin mbi nevojën e zbardhjes së këtij rasti dhe se pasi të ketë një epilog gjyqësor, do të mund të inkuadrohen ekspertët ndërkombëtar. Por njohësit e çështjeve juridike thonë se ndërkombëtarët mund vetëm të ndihmojnë me informacione, nëse posedojnë, por jo edhe ta hetojnë rastin.

“Nëse ka indikacione se e gjitha ajo që ka ndodhur, është planifikuar apo nxitur nga jashtë, apo nga shtete tjera, atëherë mund të kërkohet ndihmë nga shërbimet më të zhvilluara nga jashtë. Ata në këtë rast do të na ndihmonin që të arrijmë tek e vërteta. Kjo do të ishte edhe në interesin tonë si shtet. Pra, konsultime mund të ketë, por jo edhe pjesëmarrje të drejtpërdrejtë të jashtme në hetimin e asaj që ka ndodhur në Kumanovë”, ka vlerësuar Borçe Davitkovaki, njohës i çështjeve juridike.

Pjesëtarët e Grupit të Kumanovës, më 2 nëntor të vitit 2017, ishin shpallur fajtorë për veprën terrorizëm lidhur me luftimet e 9 dhe 10 majit të vitit 2015 në Lagjen e Trimave në Kumanovë ku kishin mbetur të vdekur 8 policë dhe 10 anëtarë të grupit të armatosur, që ishin prezantuar si ish-pjesëtarë të Ushtrisë Çlirimtare Kombëtare, e që kishin nisur konfliktin për, siç kanë thënë, “tërheqjen vërejtjes autoriteteve maqedonase për gjendjen e rëndë të shqiptarëve dhe mosrealizimin e të drejtave të tyre kombëtare”.

*Video nga arkivi: Shpërthime e të shtëna në Kumanovë

Shtatë anëtarë të grupit janë dënuar me burgim të përjetshëm; Dem Shehu, Nasuf Zeqiri, Valdet Zekaj, Fejzulla Rushitovski, Andi Krasniqi, Fadil Fejzullahu dhe Bek Bajra. Trembëdhjetë janë dënuar me nga 40 vjet burgim, gjashtë me nga 20 vjet, një me 18 vjet, dy me nga 14 vjet, dy me 13 vjet dhe dy me nga 12 vjet burgim.

Shumica e të dënuarve janë shtetas të Kosovës dhe konsiderohen si organizatorë të ngjarjes së rëndë. Në mesin e të vrarëve janë edhe dy ish- komandantë të UÇK-së, Beg Rizaj dhe Mirsad Ndrecaj, por pala mbrojtëse, familjarët si dhe disa nga të dënuarit, në vazhdimësi kanë deklaruar se këta dy persona janë vrarë pasi ishin dorëzuar.

Stevo Pendarovski inaugurohet president i Maqedonisë së Veriut

Isuf Kadriu

Në Kuvendin e Maqedonisë, të dielën, është bërë inaugurimi i presidentit të ri të Maqedonisë së Veriut, Stevo Pendarovski, fitues i zgjedhjeve presidenciale, të mbajtura më 5 maj.

Pendarovski është betuar para deputetëve dhe përfaqësuesve më të lartë të institucioneve shtetërore e fetare, se gjatë mandatit pesëvjeçar do të respektojë Kushtetutën dhe ligjet në fuqi, dhe se do të mbrojë sovranitetin dhe integritetin territorial të Maqedonisë së Veriut.

Në seancën solmne kanë marrë pjesë edhe presidentë e përfaqësues të lartë të më shumë shteteve, si presidentët e Shqipërisë e Kosovës, Ilir Meta e Hashim Thaçi, presidenti i Serbisë, Aleksandar Vuçiq, presidenti i Bullgarisë, Rumen Radev, ministrat e Jashtëm të Greqisë dhe Malit të Zi si dhe zyrtarë tjerë të jashtëm.

“Publikisht e them dhe obligohem se do të jem president i të gjithëve, edhe i atyre që votuan për mua, edhe i atyre që votuan për ndonjërin nga kundër kandidatët e mi, por edhe i atyre që për çfarëdo arsyeje nuk dolën të votojnë. Në sferën politike, punën e parë që do ta bëjë, e për të cilën shpesh herë kam folur gjatë dy muajve të kaluar, është shtrirja e dorës opozitës për bashkëpunim. E ndjej se përgjegjësia ime e parë si president që isha propozuar nga partitë në pushtet është që të mbroj të drejtat dhe statusin e pakicës, pasi demokracia ekziston vetëm kur të gjithë të jenë të barabartë nga veprimet e pushtetit”, ka deklaruar Pendarovski, duke theksuar edhe përkushtimin e tij për ruajtjen dhe zhvillimin e raporteve ndëretnike në shtet.

“Raportet ndëretnike dhe baraspesha mes të gjitha mes të gjitha etniteteve gjithmonë ka qenë fryt stabilitetit dhe sigurisë tonë të brendshme. Problemi më i madh ka qenë dhe mbetet sjellja e partive më të mëdha politike, të cilat shpeshherë pozicionin e tyre ndaj raporteve ndëretnike e kanë shprehur varësisht nëse janë në pushtet apo opozitë, andaj edhe për çdo veprim apo sjellje do të kërkoj përgjegjësi politike”, është shprehur kreu i ri i shtetit, duke u ndalur më parë në procesin e integrimit euroatlantik, si prioritet kryesor i qytetarëve të Maqedonisë së Veriut, për të ardhmen dhe zhvillimin e vendit.

“Raportet e shkëlqyera me të gjitha pesë shtetet fqinje dhe bashkëpunimi i frytshëm rajonal janë parakusht themelor për zhvillimin e një shteti me pozitë specifike gjeografike. Marrëveshjet me Bullgarinë dhe Greqinë janë shembuj pozitiv dhe paraqesin guxim politik për lënien anash të stereotipeve politike dhe ruajtjen e interesave nacionale dhe në të njëjtën kohë të promovohen interesat strategjike të shtetit”, ka deklaruar Pendarovski.

Ai në fjalimin e tij ka theksuar nevojën për ngritjen e ekonomisë së vendit dhe luftën kundër krimit të organizuar dhe korrupsionit, krijimin e kushteve për parandalimit e ikjes së të rinjve nga vendit, pa të cilët siç tha shteti nuk mund të ketë të ardhme.

Në postin e presidentit, Stevo Pendarovski zëvendëson kreun e deritanishëm Gjorge Ivanov, i cili për dy mandate ishte president i Maqedonisë së Veriut. Pendarovski në zgjedhjet presidenciale mundi kandidaten e opozitës, Gordana Siljanovska-Davkova.

Pendarovski shpallet kryetar i shtetit me certifikatë në gjuhën shqipe dhe maqedonase

Stevo Pendarovski është Presidenti i parë i Maqedonisë së Veriut që cetrifikatën nga KSHZ e merr edhe në gjuhën shqipe.Siç duket, KSHZ është një nga institucionet e para që ka filluar zyrtarizimin e gjuhës shqipe, siç është e paraparë edhe me Ligjin për përdorimin e gjuhëve i cili pas shumë tensioneve dhe problemeve arriti të miratohet në Kuvend.

Certifikata e KSHZ=së në gjuhën maqeodnase dhe në gjuhën shqipe për Presidentin e ri të Maqedonisë së Veriut, Stevo Pendarovski

Gazeta Express mëson se anëtarët e KSHZ-së fillmisht kanë hezituar që certifikata të shkruhet në dy gjuhë, por pas insistimit të dy anëtarëve shqiptarë në KSHZ, Enver Salihi dhe Ditmrire Shehu, ka rezultuar që certifikata të shkruhet edhe në gjuhën shqipe.

Ivanov shkon në histori, nuk ka më mundësi të amnistojë askënd

Presidenti në largim Gjorgji Ivanov nuk do t’u kthehet amfiteatrove të universitetit. Ai zgjodhi të gëzojë të drejtat që i takojnë si ish president, pension aq sa e kishte edhe rrogën, pra rreth 1500 euro, një zyre në rrokaqiejt në lagjen aerodrom dhe 3 të punësuar.

Megjithatë, Ivanov ka dhe 48 orë mandat dhe të drejta të plota si President. Ende nuk dihet nëse Ivanov do t’i falë të dënuarit për terrorizëm në ngjarjet e 27 prillit, pasi ata pak kohë parë kërkuan nga presidenti që ti amnistojë.

Televizioni Alsat edhe njëherë herë adresoi pyetje në kabinetin e tij në lidhje me faljen e mundshme, por ai përsëri zgjodhi të heshtë, si shumë herë më parë.

Juristi Sejfulla Osmani thotë se është thuajse e pamundur që Ivanov të falë në këto orë mandat që i kanë mbetur. Megjithatë, Osmani thotë se Ivanov do të duhet të përgjigjet edhe për shkeljet ligjore që i ka bërë në të kaluarën, siç ishte rasti me mos-dekretimin e ligjeve të miratuara në Kuvend.

“Mendoj se mundësia është shumë e vogël që të ndodhë një gjë e tillë. Kryetari në ikje mendoj se edhe teknikisht nuk ka mundësi që për 24 orë t’i kompletojë të gjithë këto procedura të sjell një akt të tillë, së paku ai duhet vendimet që i sjell edhe t’i shpall në Gazetën Zyrtare të Maqedonisë, një mundësi e tillë nuk ekziston. Po që se bën një veprim të tillë ai do të bëj edhe shkelje ligjore, gjë e cila nuk i ka munguar edhe në të kaluarën në disa raste ne kemi pasur evidente kur ai nuk ka respektuar as kushtetutën e as ligjin e posaçërisht kur bëhet fjalë për ligje që për së dyti herë janë lexuar dhe votuar në Parlament, mendoj se në në të ardhmen organet përgjegjëse duhet të marrin veprime adekuate ligjore” tha Sejfulla Osmani – Jurist

Kryetarja e Komisionit për Sistem Politik në VMRO-DPMNE Tanja Karakamisheva ka kërkuar nga Ivanov që orët e fundit si President t’i shfrytëzojë duke i amnistuar të dënuarit e 27 prillit.

Megjithatë ekspertët juridikë janë të ndarë rreth asaj nëse neni 11 i ligjit për falje ekziston në sistemin e drejtësisë apo jo.

Prandaj edhe funksionarët qeveritarë me opozitarët interpretojnë në mënyrë të ndryshme këtë çështje.