VOAL

VOAL

Please Wait ...
0%

Bakteri E.coli – Mësoni si të mbroheni nga ndotja e ushqimeve

By | June 14, 2018

Komentet

Farat e pjeprit – Vlerat shëndetësore dhe si t’i përdorni

Vitamina E tek farat e pjeprit mbron veshkat nga radikalet e lira

Pjepri është një nga frutat më të shijshme të verës dhe jo vetëm.

Tuli i pjeprit është mjaft freskues dhe i ëmbël dhe me të nuk ke të ngopur.

Brendësia e tij është e mbushur me fara të qullëta të cilat në shumicën e kohës përfundojnë në koshin e plehrave.

Në këtë artikull të AgroWeb.org do të mësoni më shumë për vlerat e panjohura të farave të pjeprit.

Ato janë të mbushura me ushqyes dhe kur thahen mund të konsumohen si një ushqim i shpejtë dhe shoqërues të pijeve të ndryshme.

Farat nuk kanë aromë, por shija e tyre të kujton ëmbëlsinë e arrave.

Farat e thata përdoren në pjekje, sallata, konfeta dhe pije.

Vlerat Shëndetësore Të Farave Të Pjeprit

Sipas të dhënave të AgroWeb.org, farat e pjeprit janë të pasur me acide yndyrore, fibër, minerale, vitaminë E dhe proteina.

Këto fara konsiderohen të pasura me antioksidantë që pastrojnë organizmin nga radikalet e lira.

Përmbajtja e lartë e proteinës tek farat i bën ato të rekomandueshme për flokë dhe thonj të shëndetshëm.

Burim Vitaminash Dhe Mineralesh

Farat e pjeprit përmbajnë sasi të konsiderueshme të vitaminës A dhe E.

Këto vitamina që treten në yndyrë shërbejnë si antioksidantë dhe mbrojnë sytë e parandalojnë kancerin.

Sipas të dhënave të AgroWeb.org farat e pjeprit janë gjithashtu një burim i mirë i kaliumit, magnezit dhe fosforit.

Këto minerale ndihmojnë në rregullimin e tensionit të gjakut, forcimin e kockave dhe mbajtjen larg të diabetit.

Shëndeti I Sistemit Tretës

Farat e pjeprit ndihmojnë në largimin e parazitëve nga zorrët.

Me përmbajtjen e lartë të fibrës, këto fara besohet të përmirësojnë tretjen e ushqimeve.

Farat E Pjeprit Për Zemrën

Sipas të dhënave të AgroWeb.org, farat e pjeprit përmbajnë sasi të konsiderueshme të acideve yndyrore omega-3 të cilat janë të dobishme për shëndetin e zemrës.

Studimet kanë konfirmuar se antioksidantët dhe acidet yndyrore tek farat e pjeprit e mbrojnë zemrën nga stresi oksidues dhe çrregullime të tjera.

Mineralet ndihmojnë në uljen e tensionit të gjakut.

Mbipesha

Farat e thata të pjeprit mund të shërbejnë si një ushqim i shëndetshëm për ata që duan të bien në peshë.

Këto fara ndihmojnë në eliminimin e lëngjeve të akumuluara në trup dhe rregullimin e tensionit të gjakut.

Farat E Pjeprit Kundër Stresit

Nëse farat i grini në një mikser dhe formoni me to një pastë të mirëfilltë të cilën më pas e aplikoni në pjesën e ballit, do të vëreni se do të jeni më pak të stresuar dhe do të keni më pak dhembje koke.

Shëndeti I Veshkave

Vitamina E tek farat e pjeprit mbron veshkat nga radikalet e lira.

Këto fara rekomandohen të përdoren për të mbrojtur shëndetin e veshkave.

Si T’i Konsumoni Farat E Pjeprit

Farat mund t’i hani të freskëta duke i përfshirë në sallata perimesh apo frutash.

Ato mund t’i thani ose t’i përfshini në lëngje dhe supa sepse ofrojnë trashësinë dhe ëmbëlsinë e duhur.

Uji i patëllxhanit – Zgjidhje për kolesterolin, zemrën, mëlçinë

Uji me patëllxhan është një mënyrë natyrale për të pastruar enët e gjakut dhe për të humbur në peshë

Uji me patëllxhan është një mënyrë shumë e mirë për të mbajtur nën kontroll nepsin e shfrenuar por edhe për të pastruar organizmin nga toksinat e dëmshme.

Ai është efikas për të mbajtur nivelet e kolesterolit nën kontroll, një aspekt shumë i rëndësishëm, duke pasur në konsideratë rolin negativ të kolesterolit në organizëm.

Akumulimi i yndyrnave në trup shkakton probleme kronike siç janë sëmundjet e zemrës, diabeti, dhimbjet e kyçeve e të tjerë.

Uji me patëllxhan është një mënyrë natyrale për të pastruar enët e gjakut dhe për të humbur në peshë.

Kjo pije është e pasur me fibër dhe antioksidantë që e nxisin organizmin të djegë më shumë kalori dhe të eliminojë lipidet e dëmshme.

Përfitimet e Ujit Me Patëllxhan

Një nga avantazhet e të pirit këtë ujë është se kjo pije ka efekt diuretik që zbraz lëngjet e akumuluara dhe lufton inflamacionin.

Falë vitaminës E, uji me patëllxhan promovon një sistem më të mirë qarkullimi dhe ul gjasat e shfaqjes së sëmundjeve të zemrës.

Uji me patëllxhan është i pasur me kalium dhe sodium, dy minerale që nëse merren në sasitë e duhura përmirësojnë shëndetin e sistemit nervor dhe kardiovaskular.

Fibra tek ky ujë përmirëson lëvizjet e zorrëve dhe parandalon shfaqjen e konstipacionit.

Një cilësi tjetër e kësaj pijeje është se patëllxhani mbron mëlçinë nga yndyrnat e tepërta.

Kjo pije e pasur me hekur konsiderohet një suplement i jashtëzakonshëm për ata që vuajnë nga anemia dhe problemet me imunitetin.

Si Ta Përgatisni Pijen E Shëndetshme

Përbërësit:

1 patëllxhan mesatar

Lëngu i një limoni

1 litër ujë

1 enë qelqi

Përgatitja:

Shpëlajeni patëllxhanin me ujë të bollshëm.

Më pas lëreni për pak minuta në një tas të mbushur me ujë dhe sodë buke ose uthull molle.

Prijeni patëllxhanin në kubikë ose feta dhe hidhini në një kavanoz të thellë qelqi.

Shtoni ujin dhe lëngun e limonit.

Mbylleni kapakun dhe kavanozin futeni në frigorifer.

Si Ta Konsumoni

Për të pastruar organizmin, këtë pije duhet ta konsumoni për të paktën shtatë ditë me rradhë çdo muaj.

Ju mund ta konsumoni edhe tre herë në javë ose atëherë kur nepsi është i papërmbajtshëm.

Ju mund të konsumoni nga një gotë me këtë lëng përpara çdo vakti.

Metabolizmi është i ndryshëm tek çdo njeri ndaj kura nuk funksionon në të njëjtën mënyrë tek të gjithë.

Tregoni kujdes!

Patëllxhani nuk mund të konsumohet i pagatuar dhe në sasi të mëdha për shkak të alkaloidit që shkakton të vjella dhe diare./AgroWeb.org

Qahia – Shija tradicionale e sofrës së Çamërisë

Qahia mbetet një ndër gatimet më karakteristike të amvisave të çamërisë dhe atyre të Kosovës

Qahia është një gatim autokton, tradicional i hershëm i kuzhinës shqiptare.

Receta e përgatitjes së saj është shumë e njohur si traditë e çamërisë por gjithashtu gjerësisht përgatitet edhe në Kosovë, konkretisht zona e Prizrenit.

Ashtu si dikur edhe sot, qahia mbetet një ndër gatimet më karakteristike të amvisave të çamërisë dhe atyre të Kosovës.

AgroWeb.org ju sugjeron më poshtë recetën autentike të përgatitjes së Qahisë krejt lehtë në shtëpi.

I quajtur edhe si byreku i butë me 16 petë, ky gatim  i përsosur kërkon pak përkujdesje dhe durim nga amvisat gjatë përgatitjes dhe me patjetër do të mbledhë gjithë familjen rreth tryezës për ta shijuar.

Sipas traditës së sofrës çame, Qahia shoqërohet në mënyrë të shkëlqyer me dhallë të freskët si dhe sallata me turshi të ndryshme shtëpie.

Përgatitja e Qahies në Shtëpi

Përbërësit

1 kg miell

2 filxhanë qumësht

3 vezë

Kripë

300 gr gjizë ose djathë i thërrmuar

150 gr gjalpë të freskët ose 3-4 lugë vaj ulliri (Për një gatim të shëndetshëm AgroWeb.org ju këshillon përdorimin e vajit të ullirit)

2 lugë gjelle maja buke

Përgatitja

Si fillim në një gotë me pak ujë të vakur hidhni majanë që të tretet.

Më pas, në një enë të madhe hidhni miellin, shtoni pak vaj ulliri, kripën, qumështin, majanë e tretur dhe përziejeni të gjitha bashkë.

AgroWeb.org ju udhëzon që të punoni masën me duar derisa brumi të bëhet homogjen.

Pasi keni përgatitur brumin, mbulojeni me një pecetë kuzhine dhe lëreni në një vend të errët që të pushojë përreth 30-40 minuta.

Në këtë mënyrë brumi do të dyfishojë masën e tij.

Ndërkohë, në një tas rrihni vezët bashkë me gjizën apo djathin e thërrmuar.

Më pas, ndajeni brumin në 16 toptha të vegjël, të cilët do t’i hapni në formën e petave përmes një petësi kuzhine.

Vendosni petat në tepsinë e lyer me pak vaj. Secilën petë që shtroni në tepsi spërkateni me pak gjalpë të freskët.

Pasi të keni shtruar petën e katërt hidhni një shtresë të hollë të gjizës apo djathit të thërrmuar me vezë. Kështu vijoni derisa të përfundoni vendosjen e të 16 petëve.

Spërkateni në fund me gjalpë dhe priteni në formën e katrorëve të vegjël ose rombit. Futeni të piqet në furrë të parangrohur në temperaturën prej 200 C derisa të marrë ngjyrën e kuqërremtë të pjekjes.

Pulë me kos dhe hudhra – Supa e lehtë e stinës

Kjo pjatë tipike e kuzhinës tradicionale është ideale për gjallërimin e organizmit

Aroma e mrekullueshme e kësaj recete të vjetër, traditë e nënave dhe gjysheve shqiptare mbush gjithë shtëpinë me dëshirën për ta konsumuar menjëherë sapo ajo shërbehet në tryezë.

E lehtë dhe plot shije, kjo pjatë tipike e kuzhinës tradicionale është ideale për gjallërimin e organizmit dhe shoqërohet në mënyrë të shkëlqyer me sallata të freskëta të stinës.

AgroWeb.org ju sugjeron më poshtë recetën e shijshme të përgatitjes së supës me mish pule dhe kos e hudhra në shtëpi.

Përgatitja e Supës me Mish Pule dhe Kos

(Përbërësit më poshtë janë për 4-5 persona)

4-5 thela mish pule

2 lugë gjelle miell gruri

Një filxhan çaji me kos

1 kokërr vezë

Vaj ulliri

Pak gjalpë i freskët

Piper

Kripë

Majdanoz

1-2 thelpinj hudhra të shtypura

Përgatitja

Si fillim, AgroWeb.org ju udhëzon të pastroni me ujë të rrjedhshëm thelat e pulës dhe më pas vendosini në një tenxhere ku keni hedhur pak vaj ulliri dhe pak gjalpë të freskët.

Kaurdisini për 1-2 minuta nga të dyja anët, shtoni kripë dhe mbulojini mirë me ujë.

Lërini të ziejnë derisa mishi i pulës të jetë zbutur.

Ndërkohë, në një tas më vete rrihni vezën, më pas shtoni kosin dhe përziejeni mirë masën derisa ajo të bëhet homogjene.

Në vijim, vendosni një tigan në zjarr. Shtoni pak gjalpë dhe pak vaj ulliri dhe kaurdisni miellin derisa të marrë ngjyrë të artë.

Në këtë moment hiqeni nga zjarri dhe nisni të hidhni nga pak masën e kosit dhe vezës duke e përzjerë masën në mënyrë të pandërprerë derisa e gjithë masa të bëhet e njëtrajtshme dhe të mos ketë kokërriza.

Pasi mishi i pulës të ketë zierë, i largojmë thelat nga tenxherja dhe i lëmë mënjanë.

AgroWeb.org ju udhëzon të shtoni masën e kosit me vezë dhe miell tek lëngu i pulës dhe përzjeheni mirë derisa masa të njëtrajtësohet me lëngun.

Vendoseni tenxheren në zjarr të ulët. Shtoni thelat e mishit të pulës dhe lëreni të zjejë për 5 minuta duke e përzierë herë pas here.

Në fund i hidhet piper, majdanoz, 1-2 thelpinj hudhra të shtypura sipas dëshirës.

Kur shërbehet i hidhet sipër sipas preferencës pak lëng limoni disa pika gjalpë të freskët të shkrirë.

Ngjyruesit ushqimorë me kimikate – Lista e dëmshme – Si të kontrolloni etiketat

Foto Ilustruese. Ngjyruesit ushqimorë kimikë raportohen se shkaktojnë shumë sëmundje, përfshirë edhe ato më të rënda si tumoret

Çdo gjë natyrale është shumë herë më e mirë se një ushqim i modifikuar, me ngjyra e aroma joshëse.

Ngjyruesit ushqimorë kimikë raportohen se shkaktojnë shumë sëmundje, përfshirë edhe ato më të rënda si tumoret.

Një ngjyrues kimik i quajtur Blue 1 që ndodhet te akulloret, ëmbëlsirat, por dhe në pije te ndryshme si ato me alkool, por edhe ato pa alkool e që konsumohen shpesh nga fëmijët konsiderohej me rrezik të ulët.

Por një studim konkludoi se Blue 2 po në të njëjtën kategori si lëndë ngjyruese, lidhet me tumorin e trurit, kjo sipas eksperimenteve që u bënë në laboratorë mjekësorë.

Red 40 është një tjetër ngjyrues që gjendet te ushqimet e procesuara si patatina dhe ushqime të tjera krokante me bazë drithrash të përpunuara, kryesisht të konsumuara nga fëmijët.

Ky kimikat sjell simptoma si hiperaktivitet tek fëmijet, agresivitet, nervozizëm dhe mungesë përqendrimi, kjo e lidhur dhe me lëndët konservuese që ndodhen te këto ushqime.

Yellow 6, një ngjyrues tjetër që ndodhet te ëmbësirat, salçiçet, pijet me gaz, ndikon në rritjen e rasteve të tumorit në veshka dhe mbiveshkoret.

Yellow 5 është lidhur me alergji, azëm, migrene, ankth dhe probleme në sjellje. Sipas një studimi në universitetin e Kalifornisë u vërtetua se pjesa më e madhe e ngjyruesve sjellin dobësim të sistemit tonë imunitar që na mbron nga sëmundjet, infeksionet dhe inflamacionet.

Ngjyruesit që nuk duhet të konsumohen nga të rriturit dhe fëmijët e që kur t’i shihni në etiketë duhet t’i evitoni.

Këto ngjyrues janë Ε102, Ε104, Ε107, Ε110, Ε112, Ε122, Ε123, Ε124, Ε127, Ε128, Ε131, Ε132, Ε150, Ε151, Ε154, Ε155, Ε160.

Bëhuni të vëmendshëm dhe lexoni etiketën e çdo ushqimi të paketuar para se ta blini dhe nëse shkruajnë Red 3, Red 40, Yellow 5, Yellow 6, Blue 1, Blue 2, Green 3 dhe Orange B, më mirë evitojini.

Duhet të evitojmë ushqimet që kanë ngjyrë shumë të fortë e që shkëlqejnë, pasi ngjyruesit natyral nuk janë ashtu.

Ushqimet sa më natyrale të jenë aq më mirë priten nga organizmi. Në supermarket zgjedhjet mos i lini në dorë të fëmijëve, të cilët joshen pikërisht nga ngjyruesit e bukur ushqimorë./AgroWeb.org

Faktet e reja – Ushqimet që ju duhen për kocka të forta

Nëpërmjet ushqimit, ne mund të marrim vitamina thelbësore për kockat

Osteporoza është një sëmundje të pakëson dendësinë minerale të kockave dhe sjell përkeqësim të indeve duke i bërë ato më të brishta dhe shkaktuar më shumë fraktura.

Kjo sëmundje është mjaft e përhapur dhe ka tendenca të rritet me rritjen e moshës.

Osteoporoza paraprihet nga një fazë tjetër e njohur si osteopenia ose humbja e masës kockore që ndodh në çdo fazë të jetës.

Mosha është shkaktar kyç i osteopenisë dhe osteoporozës.

Pas moshës 40 vjeçare, dendësia kockore pakësohet si tek gratë ashtu edhe tek burrat.

Në rastin e grave, kjo sëmundje përshpejtohet shumë pas menopauzës.

Si gjithmonë, parandalimi është një hap shumë i rëndësishëm.

Të rinjtë duhet të mos e teprojnë me alkolin, të mos pijnë duhan, duhet të kryejnë aktivitet fizik, të mos e teprojnë me ekspozimin në diell dhe të ushqehen mirë.

Nëpërmjet ushqimit, ne mund të marrim vitamina thelbësore për kockat siç janë: kalçiumi, fosfori dhe vitamina D.

Ne kemi nevojë edhe për vitaminën K, magnezin dhe zinkun që i mbajnë kokcat të shëndetshme në çdo fazë të jetës.

Ushqyerja e duhur për kockat

Kalçiumi është përbërësi kryesor i kockave të shëndetshme.

Të rriturit duhet të marrin 1,000 deri në 1,200 mg në ditë.

Ushqimet e mëposhtme mund të plotësojnë dozat ditore të kalçiumit:

  • Frutat dhe perimet si barishtet, portokallet dhe fiqtë e thatë.
  • Produktet e bulmetit si, kosi, djathi, qumështi.
  • Qumështi i arrorëve, sojës, orizit dhe tërshëra.
  • Bishtajoret si fasulet dhe qiqrat.
  • Frutat e thata, farat dhe drithërat si bajamet, farat e suzamit, arrat.
  • Peshku, kryesisht sardelet

Osteoporoza dhe ushqimet e pasura me vitaminë D

Vitamina D është e dobishme për përthithjen dhe metabolizimin e kalçiumit.

90% e kësaj vitamine merret nëpërmjet ekspozimit në diell ndërsa pjesa e mbetur nëpërmjet ushqimit.

  • Peshku: salmoni, skumbria, trofta, ngjala, peshku ton, sardelet  vaji i mëlçisë së merlucit
  • Kërpudhat
  • Ushqimet me proteinë: vezët, produktet e bulmetit, mëlçia e viçit.

Osteoporoza parandalohet edhe me:

Vitaminën K që ndihmon shëndetin e kockave ndaj përzgjidhni barishte si spinaqi, sallata jeshile, kale, shpargu, lakrat e vogla.

Estrogjenin me bazë bimore që gjendet tek drithërat, portokalli, rrushi, çaji dhe soja.

Kaliumin që përmirëson dhe ekuilibron kalçiumin. Bananet janë një burim i mirë i kaliumit.

Këshilla të tjera

Alkoli i tepërt, duhanpirja, jeta pa aktivitet janë të dëmshme për shëndetin e kockave.

Kafeina dhe kripa kanë efekt diuritik dhe nxjerrin kalçiumin nga organizmi.

Mos pini më shumë se 3 kafe në ditë.

Proteina e tepërt shkakton sëmundje të veshkave dhe dekalçifikim të kockave.

Ajo ndikon në metabolizimin e kalçiumit, fosforit dhe vitaminës D.

Qëndroni në ambient të jashtëm të merrni vitaminë D.

Kryeni aktivitet fizik që të ruani peshën e shëndetshme, të ruani masën kockore dhe forconi muskujt.

Hani ushqime të pasura me fosfor, magnez dhe acide yndyrore omega-3.

E fundit por jo nga rëndësia; parandalimi i osteoporozës kërkon kalçium që në fillim të jetës dhe shumë aktivitet fizik. Suplementët mund të përdoren më vonë kur shëndeti i kockave është më i dobët./AgroWeb.org

* Ky informacion ka për qëllim të plotësojë, të mos zëvendësojë këshilla nga mjeku juaj ose ofruesi i kujdesit shëndetësor dhe nuk ka për qëllim të mbulojë të gjitha përdorimet e mundshme, masat paraprake, ndërveprimet ose efektet negative. Ky informacion mund të mos i përshtatet rrethanave tuaja specifike shëndetësore.

Burimi: U.S. National Library of Medicine

Për forcimin e kujtesës – Produktet që ju duhen çdo ditë

Tabletat e vajit të peshkut përmirësojnë kujtesën dhe fuqinë e trurit

Ju ndodh shpesh të harroni ku keni vënë çelësat e shtëpisë, makinës, telefonin apo syzet , ndonëse më pas zbuloni se i keni të vëna?

Kujtesa e dobët është një problem që prek miliona njerëz në botë dhe që në përdtishmëri mund të jetë me të vërtetë një kokëçarje.

Problemet me kujtesën janë gjithnjë e në rritje me kalimin e moshës.

Ato ndikohen dhe nxiten nga problemet me gjumin, stresin, depresioni, mungesa e vitaminës B, tiroidja, alkoli, duhanpirja dhe ilaçet.

Në raste më të rënda, kujtesa e varfër nxitet edhe nga skleroza apo sëmundja e Alzheimerit.

Ky artikull i AgroWeb.org trajton probleme më të thjeshta me kujtesën që nuk kanë të bëjnë me sëmundjet e lartpërmendura.

Sëmundjet e rënda te kujtesës, kërkojnë trajtim të specializuar mjekësor dhe jo thjesht kura natyrale që mund të përgatiten në shtëpi.

Më poshtë do të zbuloni ushqimet që ju nevojiten për një mendje në formë.

Bajamet për kujtesë të mirë 

Bajamet përmirësojnë kujtesën dhe fuqinë e trurit.

Ato janë të pasura me antioksidantë dhe acide yndyrore Omega-3  të cilat janë fantastike për kujtesën dhe për shëndetin e syve.

Zhysni 5-10 bajame në ujë dhe të nesërmen grijini në mikser pa lëkurë.

Masën e përftuar ziejeni duke e bashkuar me një gotë qumësht.

Shtoni mjaltë dhe pijeni çdo ditë për 30-40 ditë.

Rozmarina  për kujtesë të mirë 

Kjo bimë fantastike është ideale për kujtesën dhe për trurin.

Ziejeni një tufë rozmarinë në ujë për pesë minuta. Kullojeni lëngun dhe shtoni mjaltë.

Pijeni çdo ditë për 3-4 javë.

Ju mund të përdorni edhe vaj esencial rozmarine duke e nuhatur çdo ditë.

Vaji i peshkut

Suplementët me vaj peshku përmirësojnë kujtesën dhe funksionet e trurit.

Acidet yndyrore tek vaji i peshkut parandalojnë formimin e pllakave të trurit që kanë lidhje me sëmundjen e Alzheimerit.

Merrni 600 mg vaj peshku çdo ditë.

Ushqehuni rregullisht sa të keni munduesi me salmon, sardele, harengë dhe skumbri.

Frutat e pyllit

Frutat e pyllit siç janë boronicat, qershitë dhe manaferrat janë një burim i shkëlqyer flavonoidësh që përmirësojnë funksionin e trurit dhe kujtesën.

Konsumojini ato rregullisht që të merrni vlerat më të mira.

Ndër ushqimet e tjera më të mira për shëndetin e trurit, sipas të dhënave të AgroWeb.org janë avokado, panxhari, lëngu i kockave të mishit, brokoli, selinoja, vaji i arrës së kokosit dhe çokollata e zezë.

Kungulleshka të pjekura me djathë – të lehta, plot vlera dhe shije

Kjo recetë kërkon pak kohë në përgatitje dhe është një kombinim i shkëlqyer

Janë perimet më fantastike të stinës, të lehta, plot shije e të pasura me vlera ushqyese.

Të përgatitura në gjellë e tava të ndryshme, sallata apo edhe supa, kungulleshkat të mrekullojnë me shijen e tyre fantastike në çdo recetë gatimi.

Agroweb.org ju sugjeron më poshtë përgatitjen e kungulleshkave të pjekura me gjizë, një recetë e thjeshtë dhe shumë e shijshme.

Kjo recetë kërkon pak kohë në përgatitje dhe është një kombinim i shkëlqyer i kungulleshkave dhe djathit ose gjizës, vezëve dhe erëzave.

Përgatitja e Kungulleshkave me Djathë

Përbërësit

5-6 Kungulleshka mesatare

4 vezë

300 gr djathë të thërrmuar ose gjizë

4-5 lugë miell

Kripë

Piper

Majdanoz

Përgatitja

Kungulleshkat i lajmë, u presim bishtat dhe më pas i vendosim në një tenxhere me ujë për t’i zierë 5 minuta.

Mund t’i provoni me një pirun, nëse janë zbutur mjaftueshëm, piruni do të depërtojë lehtësisht.

Më pas, AgroWeb.org ju udhëzon që të hiqni tenxheren nga zjarri, t’i kulloni kungulleshkat dhe t’i vendosni në një pjatë për t’u ftohur.

Kur të jenë ftohur i presim në mes (për së gjati) dhe me ndihmën e një luge heqim tulin por jo plotësisht.

Në një tas tulin e kungulleshkave, e përziejmë me vezët, djathin e thërrmuar ose gjizën, majdanozin e prerë hollë, kripën piperin dhe miellin.

AgroWeb.org ju udhëzon ta përzieni me kujdes, deri sa masa të jetë homogjene.

Në zjarr kemi vendosur një tigan ku kemi hedhur me vaj ulliri, kungulleshkat i mbushim me masën që përgatitëm dhe i vendosim për t’i skuqur në fillim nga ana e lëkurave të kungulleshkave dhe kur të kenë marr pak formë kthehen dhe nga ana tjetër.

Në këtë mënyrë ruhet forma që duam.

Pasi i heqim nga tigani i vendosim në një pjatë me letër kuzhine për të thithur yndyrën e tepërt.

Nëse preferoni kungulleshkat pasi i keni zjerë mund të vijoni me mbushjen dhe t’i piqni në furrë.

Shoqërohen me kos të freskët apo dhallë si dhe sallata të freskëta të stinës.

Cilët janë përbërësit e salçiçeve – Faktet dhe të vërtetat e pathëna më parë

Shumë pak konsumatorë dinë se cilët janë përbërësit e vërtetë të salçiçeve apo produkteve të tjera të mishit të përpunuar

Salçiçet janë ndër produktet që konsumohen masivisht nga tryeza e shtëpisë tek fast food-et dhe restorantet.

Por shumë pak konsumatorë dinë se cilët janë përbërësit e vërtetë të salçiçeve apo produkteve të tjera të mishit të përpunuar.

Vërtet salçiçet që blejmë në dyqane, markete e supermarkete janë të paketuara dhe kanë një etiketë në të cilën shkruhen përbërësit e saj.

Por thuajse në të gjitha rastet, të dhënat e etiketës nuk përfshijnë të gjithë përbërësit e vërtetë.

Për nga mungesa e informacionit, situata është edhe më alarmante në rastet kur produkti i salçiçeve blihet i hapur, pra me kilogramë.

Në këtë rast, konsumatori as që e ka idenë se çfarë po konsumon dhe nga ana e prodhuesve të këtij produkti e deri tek shitësit nuk ka asnjë informacion mbi përbërësit.

Përveç mishit apo kombinimit të mishit të përdorur, por edhe kjo nuk vlen për të gjithë prodhuesit.

AgroWeb.org sjell më poshtë listën e përbërësve të salçiçeve të zakonshme e që shiten masivisht në dyqane e markete.

Një informacion i detajuar që do të ndihmojë konsumatorin për të kuptuar se çfarë konsumon vërtetë përmes këtij produkti kaq popullor.

Zbuloni Përbërësit e Salçiçeve

Mish

Zakonisht për përgatitjen e salçiçeve përdoren pjesët e mbetura të derrit, viçit apo pulës. Këtu përfshihen të gjitha pjesët e mishit të cilat janë të pamundura për t’u shitur si mish i freskët.

Mishi i përdorur kushton 10 herë më lirë se mishi i zakonshëm. Ai përftohet me anë të procesit mekanik të zhveshjes së skeletit të kafshës me injektim uji me presion të lartë.

Kjo lëndë nuk mund të tregtohet si mish, por duhet të etiketohet si produkt i përftuar mekanikisht.

E gjithë përzierja e lëndës së parë shtypet derisa formon një pastë e cila bashkohet me ujë, kripë, erëza dhe ngjyrues.

Ujë

Uji zakonisht shtohet në përbërjen e salsiçeve për të krijuar një masë sa më të butë për pastën e mishit. Por edhe për të shtuar volumin e masës përfundimtare.

Niseshte

Të gjitha salçiçet, nga ato më të lirat e deri tek ato që etiketohen si bio, mbushen me sasi të mëdha me niseshteje. Në mjaft raste është niseshte patatesh, por edhe drithërash.

Niseshteja i jep salçiçes volum, si dhe përdoret për të lidhur përbërësit së bashku.

Kripa

Një salsiçe normale përmban rreth 2-4% kripë, kjo i bën të renditen tek ushqimet me nivelin e lartë të kripës.

Konsumimi i kësaj kripe të fshehur rrit rrezikun e shfaqjes dhe përkeqësimin e sëmundjeve të zemrës dhe të presionit të gjakut.

Ndërkohë tek fëmijët, sipas të dhënave të cilave i referohet AgroWeb.org, rritet rrezikshmëria e shfaqjes së obesitetit, në sajë të kripës së shtuar.

Proteinat e qumështit

Mund të duket e pazakontë, por një nga përbërësit e salçiçeve është qumështi pluhur. Kjo për t’i shtuar proteina ekstra pjesëve të përdorura të mishit që nuk shquhen për pasuri me proteina, por edhe për lidhje më të mirë.

Nuk ka ndikim në shëndetin e personave, por nëse janë intolerantë ndaj produkteve të bulmetit do të kenë reaksion ndaj tyre.

Nitrat natriumi

Studime nga ekspertë të shumtë të Organizatës Botërore të Shëndetësisë, të cilave i referohet AgroWeb.org, nitrati i natriumitqë gjendet në shumë ushqime të procesuara, është shkaktari kryesor i shfaqjes së tumorit në zorrën e trashë.

Trifosfate Potasi dhe Natriumi (E541)

Këto përbërës prodhohen nga kripëra në mënyrë sintetike, për t’i dhënë salçiçeve qëndrueshmëri dhe jetëgjatësi më të madhe.

Këto përbërës përdoren gjithashtu dhe tek detergjentët dhe zbutësit e rrobave, si dhe përdoren në prodhimin e antifrizës së makinave. Nuk ka ende ndonjë studim për sigurinë e tyre ushqimore.

Ngjyrues

Nëse keni menduar se salçiçet janë pa ngjyrues kimikë, duhet të ndryshoni mendim. Ngjyruesit kimikë i japin salsiçeve ngjyrën karakteristike rozë deri në të kuqen e fortë.

Organizata Botërore e Shëndetësisë këshillon të mos përdorni më tepër se 50 gramë produkte mishi të përpunuar në ditë./AgroWeb.org

*AgroWeb.org ju këshillon të tregoheni të kujdesshëm dhe të informoheni imtësisht mbi produktet që konsumoni çdo ditë.

Kundër infeksionit në veshka – Trajtimet e duhura në kushtet e shtëpisë

Infeksioni i veshkave është një problem i rëndë mjekësor që kërkon trajtim të specializuar.

Infeksioni i veshkave shpesh nis si një infeksion i traktit urinar ose i fshikëzës së urinës që më pas përhapet tek njëra ose të dyja veshkat.

Krahas trajtimit mjekësor, AgroWeb.org ju sjell më poshtë edhe kujdesin që duhet të tregoni në kushtet e shtëpisë në rastet e infeksionit në veshka.

Simptomat e infeksionit të veshkave

Ethe dhe temperaturë;

Dhimbje të shpinës ose pjesës anësore;

Dhimbje abdominale;

Të vjella dhe të përziera;

Urinim i shpeshtë;

Urinë me aromë të keqe dhe me njolla gjaku.

Trajtimi Mjekësor I Infeksionit Të Veshkave

Antibiotikët përbëjnë linjën e parë të sulmit kundër infeksionit.

Nëse infeksioni nuk është i një grade të rëndë, mjeku gjithnjë rekomandon përdorimin e antibiotikëve nga goja.

Antibiotikët në fjalë duhen përdorur për 10 deri në 14 ditë.

Infeksionet më të rënda të veshkave, zakonisht kërkojnë një trajtim më të specializuar që mund të kryhet vetëm në spital.

Trajtimet Natyrale Kundër Infeksioneve Të Veshkave  

Hidratimi

AgroWeb.org ju këshillon se pirja e ujit ndihmon në largimin e baktereve nga trupi dhe eliminimin e shpejtë të infeksionit.

Pirja e ujit parandalon infeksionet e traktit urinar ndaj përpiquni të pini të paktën 8 gota me ujë ose lëngje të shëndetshme në ditë.

Lëngu I Boronicës Së Kuqe

Lëngu i boronicës së kuqe është një kurë e mirë natyrale kundër infeksionit të traktit urinar dhe të fshikëzës së urinës.

Në këto raste zgjidhni suplementët e lëngut të boronicës së kuqe ose lëng natyral dhe të paëmbëlsuar të këtij fruti.

Kujdes Nga Kafeja Dhe Alkoli

Roli primar i veshkave është të filtrojë toksinat dhe substancat e dëmshme.

Alkoli dhe kafeina janë një stërmundim për veshkat dhe mund të pengojnë procesin e shërimit nga infeksioni.

Për një shërim më të shpejtë, nuk duhet të përzieni alkolin me antibiotikët.

Probiotikët

Probiotikët ndihmojnë në rikthimin e ekuilibrave mes baktereve të mira dhe të këqija në organizëm.

Për më tepër, ato i ndihmojnë veshkat të përpunojnë më  mirë substancat e ndryshme dhe të funksionojnë më mirë.

Vitamina C

Vitamina C është një antioksidant i fuqishëm që mbron shëndetin e veshkave.

Sipas të dhënave të cilave i referohet AgroWeb.org, vitamina C parandalon dëmtime të thella të veshkave gjatë një infeksioni.

Lëngu i Majdanozit

Lëngu i majdanozit është shumë i pasur me ushqyes.

Ai rrit frekuencën e urinimit dhe sasinë e urinës së nxjerrë nga trupi.

Kësisoj, bakteret dalin më shpejt nga trupi dhe antibiotikët kryejnë një punë më efikase.

Molla

Molla ka një përmbajtje acidike dhe rrjedhimisht pengon rritjen e mëtejshme të baktereve.

Ushqyesit e saj i ndihmojnë veshkat të shërohen më shpejt.

Një Këshillë E Fundit

Kurat natyrale kundër infeksioneve të veshkave janë një trajtim shtesë për lehtësimin e simptomave.

Ato kurrësesi nuk mund të zëvendësojnë një trajtim të specializuar e të rekomanduar nga mjeku.

* Ky informacion ka për qëllim të plotësojë, të mos zëvendësojë këshilla nga mjeku juaj ose ofruesi i kujdesit shëndetësor dhe nuk ka për qëllim të mbulojë të gjitha përdorimet e mundshme, masat paraprake, ndërveprimet ose efektet negative. Ky informacion mund të mos i përshtatet rrethanave tuaja specifike shëndetësore.

Burimi: U.S. National Library of Medicine

Nëse nuk ha mëngjes – a shton në peshë

Një studim amerikan të cilit i referohet AgroWeb.org thotë se 26.7 përqind e njerëzve që nuk hanë mëngjes janë mbipeshë

Shumë njerëz e kanë zakon të dalin nga shtëpia pa ngrënë mëngjes.

Të tjerë kanë idenë se duke kufizuar ushqimin, sidomos vaktin e mëngjesit do të bien në peshë.

Në fakt, duke mos ngrënë mëngjes ndodh e kundërta.

Një studim amerikan të cilit i referohet AgroWeb.org thotë se 26.7 përqind e njerëzve që nuk hanë mëngjes janë mbipeshë.

Sipas të dhënave, konsumi jo i rregullt i mëngjesit nxit të gjithë treguesit e mbipeshës, ndërsa njerëzit që ushqehen në mëngjes i kanë këto tregues në nivele të ulëta.

Për më tepër, njerëzit që nuk hanë kurrë mëngjes raportojnë shtimin më të madh në peshë në 12 muaj.

Gjatë studimit, ekspertët mbikqyrën sjelljen e 347 njerëzve të ndryshëm gjatë harkut kohor të 2005-2017.

Pjesëmarrësit në studim ishin të grupmoshës 18-87 vjeç.

Secili prej tyre plotësoi të dhënat e peshës trupore dhe përmasat.

Rezultatet e Studimit

Studimi zbuloi se dimensioni i belit të njerëzve që nuk hanin mëngjes arrinte në 97.5 cm, ose 9.8 centimetra më shumë se njerëzit që hanin mëngjes të paktën 5 herë në javë.

Humbja E Mëngjesit Dëmton Zemrën

Studime të mëparshme që disponon AgroWeb.org mbi vaktin e mëngjesit kanë konfirmuar se njerëzit që hanë mëngjes të bollshëm e të shëndetshëm kanë një formë të mirë fizike, nivele të mira të tensionit të gjakut dhe zemër të fortë.

Studiuesit amerikanë thonë se njerëzit që humbin mëngjesin ose konsumojnë shumë pak ushqim janë më të rrezikuar nga ngurtësimi i enëve të gjakut.

Për më tepër, këta njerëz janë më të prirur të sëmuren edhe nga diabeti.

Ushqimet që duhen konsumuar në mëngjes

Tërshëra

Ajo krijon një shtresë mbrojtëse në stomak dhe parandalon çlirimin e acidit hidroklorik që është mjaft i dëmshëm për muret e stomakut.

Tërshëra përmban fibër të tretshme që është mjaft e mirë për uljen e kolesterolit në organizëm.

Vezët

Shkencëtarët kanë zbuluar që ngrënia e vezëve në mëngjes jep energji dhe njëkohësisht pakëson nivelin e kalorive ditore në mënyrë të ndjeshme.

Ndaj ju do të ndjeheni të lehtë gjatë gjithë ditës.

Boronicat

Studime të kohëve të fundit tregojnë se ngrënia e boronicave në mënyrë të rregullt dhe veçanërisht në mëngjes përmirëson kujtesën dhe rregullon tensionin e gjakut dhe metabolizmin.

Arrorët

Arrorët duhen ngrënë për mëngjes sepse përmirësojnë sistemin tretës dhe normalizojnë pehashin në stomak. Kujdes me sasinë.

Mjalti

Mjalti zgjon organizmin dhe i jep atij forcë dhe energji. Aktiviteti i trurit përmirësohet dhe nivelet e serotoninës, hormonit të humorit të mirë rriten.

Kura 30 ditore me qumësht blete – Sekreti i përdorimit për shëndet të fortë

Kërkesa për qumështin e bletës është gjithnjë në rritje, ndaj dhe bletarët janë duke i kushtuar vëmendje të lartë nxjerrjes së këtij qumështi të artë

Është koha kur bletërritësit krahas mbledhjes së mjaltit të ri nisin edhe mbledhjen e qumështit të bletës, i cilësuar si shëruesi natyral i shumë sëmundjeve.

E ndërsa tani është pikërisht sezoni i mbledhjes së këtij lëngu mrekullibërës për shëndetin, bletërritësit shprehen për AgroWeb.org se kërkesat për qumështin e bletës janë gjithnjë e në rritje.

Përdorimi i qumështit të bletës çmohet për lehtësimin dhe kurimin e shumë problemeve shëndetësore.

AgroWeb.org ju sjell më poshtë një kurë popullore e cila zgjat nga 1 deri në 3 muaj në përdorimin të qumështit të bletës për shëndetin e gjithë organeve dhe trupit në përgjithësi.

Qumështin e bletës mund ta gjeni tek çdo bletërritës apo dhe pranë dyqaneve me produkte organike. 

Përdorimi i Qumështit të Bletës

Kura popullore me qumësht blete rekomandohet që të konsumohet herët në mëngjes me stomakun bosh.

Këshillohet që doza që do të merret fillimisht vendoset poshtë gjuhës, mbahet për 2 minuta dhe më pas kapërdihet.

Rekomandohet të mbahet nën gjuhë pasi aty ka mjaft enë gjaku që bëjnë thithjen e menjëhershme dhe kalimin në gjak.

Zgjatja e kurimit është e ndryshme dhe varet nga shkalla e sëmundjes ose qëllimi për të cilin përdoret, por asnjëhere më pak se një muaj.

Megjithatë, rekomandohet që kjo kurë të zgjasë nga 30 deri në 90 ditë dhe më pas ndërpritet.

Efektet e saj në organizëm nisin pas dy javësh, pra pas 15 ditësh.

Ndarja e Dozave dhe Si ta Ruani atë

Doza ditore vendoset në bazë të moshës dhe peshës trupore.

Për të rriturit, doza që rekomandohet është 1 gram në ditë ndërsa për fëmijët rekomandohet 0.3 deri në 0.5 gram në ditë.

Megjithatë në çdo rast, për përcaktimin e dozës AgroWeb.org jukëshillon që të këshilloheni me një mjek që njeh gjendjen tuaj shëndetësore.

Fëmijët që janë me qumësht gjiri rekomandohet ta marrin vetëm në raste specifike me këshillën e pediatrit.

Qumështin e bletës mund ta ruani në frigorifer, në temperaturë 3-5 gradë.

Duhet të ruhet në shishe të errëta dhe i mbështjellë me një letër të errët gjithashtu, pasi nuk duhet të ekspozohet ndaj dritës.

Ruhet në frigorifer për 12 deri në 18 muaj duke ruajtur të gjitha vlerat kurative.

Sëmundjet që Trajtohen

Vlerësohet si një super ushqim i fuqishëm për shkak të vlerave që ai mbart.

Qumështi i Bletës përmban ujë, lëndë minerale, yndyrna, proteina, karbohidrate, vitamina etj.

Sipas të dhënave të cilave i referohet AgroWeb.org, qumueshti i bletës përdoret për kurimin e një sërë sëmundjesh si:

Hipertiroidisëm,

Diabeti,

Hiperkolesterolemi,

hipertrigliceridemi (kolesterol dhe trigliceride të larta),

sëmundje të zemrës dhe enëve të gjakut,

sëmundje kronike të mushkërive,

sëmundje të gojës,

probleme me mishrat e dhëmbëve, probleme të fytit,

sëmundje të veshkave, artrite reumatoide,

probleme me riprodhimin,

ndihmon në periudhat e premenopauzës etj.

Ka efekt qetësues dhe çlodhës, ul nivelin e hormoneve të tiroides.

Pastrues fantastik për organizmin nga toksinat

Ndihmon funksionimin e veshkave, rrit jetëgjatësinë e njerëzve, duke ruajtur rininë e enëve të gjakut.

Zgjeron enët e gjakut, ndihmon në uljen e kolesterolit dhe triglicerideve dhe rrit imunitetin.

Ky qumësht ndihmon në formimin e rruazave të kuqe të gjakut, këshillohet në anemi dhe ndihmon në mikrohemorragji.

Në lëkurë, rregullon prodhimin e yndyrës.

Ndihmon në funksionimin e mëlçisë dhe sëmundjet e saj, hepatite dhe rigjeneron strukturën e mëlçisë.

* Ky informacion ka për qëllim të plotësojë, të mos zëvendësojë këshilla nga mjeku juaj ose ofruesi i kujdesit shëndetësor dhe nuk ka për qëllim të mbulojë të gjitha përdorimet e mundshme, masat paraprake, ndërveprimet ose efektet negative. Ky informacion mund të mos i përshtatet rrethanave tuaja specifike shëndetësore.