Anëtare e Partisë Demokratike prej vitit 1996 e pjesë aktive qysh prej viteve ’90 e strukturës së kësaj force politike në atë që aktualisht quhet Njësia Vendore numër 9.

Lindur e rritur në një familje autoktone tiranase, po në Njësinë 9 të Tiranës, e shtresës së pronarëve dhe sipërmarrësve të Tiranës në fillim vitet ‘900 me kontribut të jashtëzakonshëm në mbrojtjen e zhvillimin e qytetit.

Stërmbesë e Muharrem Lleshit, pushkatuarit nga komunistët në eventin më dramatik të historisë së Tiranës e quajtur “Masakra e Tiranës”, e nëntorit të 1944. Muharrem Lleshi ishte patriot, antikomunist, atdhetar e nacionalist, është vlerësuar nga Presidenti i Republikës Martir e Nderi i Kombit.

Stërmbesë e klerikut, atdhetarit, mësuesit Ramazan Cali, emrin e të cilit mban sot një rrugë e Tiranës po në Njësinë 9, i vlerësuar nga Presidenti i Republikës “Për Veprimtari Patriotike”.

Mbesë e të burgosurit politik nga komunistët, tregtarit e sipërmarrësit Qazim Alimehmeti, i dënuar me 12 vite burg nga diktatura. Qe një nga ekspertët më të mirë të industrisë dhe sipërmarrjes së tekstileve në Tiranën e fillim viteve ‘900 me eksperiencë bashkëpunimi profesional me Italinë e Greqinë, i arrestuar më 1952 nga regjimi komunsit i cili i sekuestroi familjes së Qazim Alimehmetit pasuritë, pronat e tokat.

Bashkëshorte e nënë e dy djemve pêr të cilët thotë se janë mbështetja e saj më e fortë.

Rritur e formuar me frymën e antikomunizmit, antidiktaturës e idealet e së djathtës që bazohet në pilastrat e shenjta të lirisë së individit, të profesionit, të drejtat njerëzore, identitare, familjes e pronës.

Fotmimin e parë universitar e ka kryer në Fakultetin Histori-Filologji. Me profesionin Historiane lektore, ka punuar në studime shkencore, analiza e rekuperime të materialeve dokumentare e arkivore, të manipuluara nga diktatura komuniste, mbi zbardhjen e të vërtetave të historisë së qytetit të lindjes Tiranë e të patriotëve të trevës tiranase.

Autore e shumë aktiviteteve e materialeve të publikuara në media mbi figurat patriotike të Tiranës antikomuniste.

Si historiane e pjesë e grupeve studimore të ekspertëve, ka punuar për ngritjen e Pavionit të Genocidit në Muzeun e Tiranës me kontribut në mbledhjen e materialeve muzeale, dëshmive historike të martirëve të pushkatuar, të burgosurve e të persekutuarve nga regjimi komunist, si dhe mjaft ekspozitave historike etnografike për evidentimin e identitetit e kontributit autoktonas në qytetin e Tiranës.

Ështe një nga anëtaret e grupit të punës për kthimin në Muze e hapjen e Kullës së Sahatit si simbol i qytetit të Tiranës e identitetit urban, historik e arkitektonik të tij.

Në vitin 2000 emigron në Itali, në qytetin Romë.

Ka kryer formimin në Profesionin Gazetari- Reporter. E nisi bashkëpunimin si gazetare redaktore me organizatën Free Lance International Press.

Është specializuar në Universitetin San Tommaso D’Aquino, Angelicum në Romë, në shkencat sociale.

Është specializuar në Journalism and Public Information, pranë United Nations Interegional Crime and Justice, Institutit Ndërkombëtar i OKB mbi analizën ndaj krimit e drejtësisë, UNICRI.

Është specializuar në te drejtat e gruas e fëmijëve në sistemin e punës pranë ILO, International Labour Organization.

Prej viteve 2000 është pjesë aktive e medias shqiptare me analiza, publikime, informacione në shtypin e shkruar e televiziv, bazuar në misionin e shenjtë të gazetarisë: e vërteta.

Për disa vite rradhazi ka bashkëpunuar me Gazetën Standart e prej vitit 2013 si korrespondente nga Italia për UTV News.

Më pas prej vitit 2015 nisi bashkëpunimin si gazetare, reporter për Italinë me RTV ORA e Ora News dhe me Syri Tv.

Gjatë dhjetëvjecarit të fundit është një nga zërat më të fortë të gazetarisë shqiptare duke përcjellë për publikun shqiptar megaskandalet më të mëdha të qeverisjes socialiste.

Raportimet e intervistat eskluzive që ka realizuar me Krerët më të lartë të Antikrimit, Antidrogës, Antimafias e Guardia di Finanza Italiane zbardhën të vërteten e fshehur nga regjimi socialiste se Shqipëria ishte kanabizuar, e se si, gati çdo natë, nga brigjet shqiptare niseshin drejt brigjeve italiane tonelata me marijuanë, kanabis e armë.

Në arkivin mediatik të mediave shqitpare janë të dokumentuara me qindra materiale e intervista që ka realizuar duke zbardhur të vërteta që mbaheshin fshehur se si dhe nëndetëse përgatiteshin nga shqiptarë për të trafikuar kokainë e drogë drejt Europës.

Raportet ekskluzive të përcjella e të dokumentuara i dhanë zë një aksioni opozitar, që mbahej nën heshtje publike, dhe zbardhën se në Shqipëri, afaret e drogës e të grupeve kriminale po orientonin ekonominë dhe po e mbushnin vendin me para të fituara nga aktivitete të paligjshme.

Ka përcjellë për mediat shqiptare dosjet më të nxehta që vijojnë të jenë dhe sot flamuri i betejës opozitare të Partisë Demokratike.

Mega opearcioni e dosja “Rosa dei venti”, që përcolli nën riskun e presionin më dramatik për familjen e dy djemtë e saj, zbardhi se si klani Habilaj përdorte makinën e Ministrit të Brendshëm Tahiri për të trafikuar kokainë e se si me urdhër institucional fikeshin radarët për të mos kontrolluar skafet e gomonet që niseshin me thasë me drogë drejt Italisë.

Nëse sot opinionin publik është i informuar mbi skandalin e inceneratorit falë aksionit opozitar të Partisë Demokratike, gjithçka nisi me zbardhjen e skandalit e operacionit të koduar “Isola Scaligera”, që gazetarja pëcolli nga Verona me dokumentet ekskluzive marrë nga Komuna e këtij qyteti, ku u zbardh se si elementë të klanit ndranghetist kalabrez Arena, kishin vënë nën zotërim menaxhimin e mbetjeve të Veronës me të cilat kishin nënshkruar kontratëtn kompania ECO Tirana, AGSM HOLDING e AMIA Verona.

Kjo dosje hodhi dritë për herë të parë mbi aferën e inceneratorit, landfillin e paekzistueshëm, parashikimet për ndërtimin të një hidrocentrali, si dhe të një deficiti financiar që Eco Tirana kishte ndaj Veronës e jo transparencën që këshillarët e Bashkisë së Veronës sinjalizonin çdo mbledhje me preokupimet mbi Tiranën.

Megaskandali i dosjes “Basso Profilo”, qe një nga dosjet më të nxehta që solli në mediat shqiptare, ku u evidentua se si klanet mafioze shqiptare e të huaja kishin shtrirë duart në ekonominë e Tiranës falë të të ashtuquajturve punëmbarues, të cilët kërkonin 20% për çdo tender publik, leje ndërtimi e afera të lidhura me Bashkinë e Tiranës dhe qeverinë shqiptare.

Dosje e nxehtë që fakteqësisht u bllokua nga presioni politik qe dhe skandali që zbardhi mbi trafikun e pakigjshëm të ilaçeve në kohën e Covidt në të cilin u ndalua në Itali, djali i Ministrit Bledi Çuçi.

Një tjetër megaoperacion “Brasile low cost” që përcolli për publikun shqiptar zbardhi se si shqiptarët nuk quheshin më grupe por kartela kokaine e që në Amerikën Latine kishin marrë rolin parësor të kontratuesve të drejtpërdrejtë për aferat në Europë.

Po ashtu një tjetër megaskandal i zbardhur me dosjen “ Pizza Conection” përcolli për publikun shqiptar, ishte pastrimi i dhjetra miliona euro që një sipërmarrës palermitan, i cili vepronte për llogari të mafias siciliane Cosa Nostra po pastronte në një bankë në Tiranë, falë premtimeve korruptive me eksponentë të lartë të qeverisë socialiste në Shqipëri.

Me dhjetra intervista eskulzive që ka realizuar me eskpertët më të mirët të antikrimit ndërkombëtar kanë kontribuar në informimin e dokumentimin e një aksioni opozitar në nivel mediatik e publik.

Çdo ditë të punës si profesioniste gazetare e vë në shërbim të zbardhjes së të vërtetave ndaj një sistemi gjithnjë e më teknokratik e autokratik shqiptar.

Aktualisht është Zëvendës Presidente e Urdhërit të Gazetarëve të Huaj në Itali e Presidente e Organizatës Botërore të Grave gazetare e shkrimtare, dega Itali.

Është autore librash e redaktore.

Aktualisht është Sekretare e Përgjithshme e UGSHPD, Shoqata e Gazetarëve Profesionistë të Diasporës me seli në Zvicër.

Jeta e Diasporës, problematikat e tyre, suksesi i emigrantëve shqiptarë në Itali e vota e Diasporës ka qënë pjesë e aktivitetit të saj profesional e civil gjatë viteve të fundit.

Me punën e profesionin e saj ka përcjellë për opionin publik shqiptar intervista me krerët më të lartë të qeverisë italiane gjatë 15 viteve të fundit.

Aktualisht është Këshilltare Bashkiake e Partisë Demokratike për Tiranën.