VOAL

VOAL

Please Wait ...
0%

Më 18 korrik, Thaçi në Bruksel do të shoqërohet nga Haradinaj e Veseli

By | July 13, 2018

Komentet

Parlamenti i Kosovës miraton edhe ekipin negociator për bisedimet me Serbinë

Me 59 vota të 61 deputetëve të pranishëm, parlamenti i Kosovës miratoi rezolutën dhe ekipi negociator për procesin e dialogut për normalizimin e marrëdhënieve në mes të Kosovës dhe Serbisë.

Rezoluta është hartuar nga Partia Socialdemokrate në opozitë, e cila bëhet pjesë e ekipit negociues të propozuar nga qeveria e Kosovës. Projekt rezoluta përfshinë parimet e bisedimeve me Serbinë dhe në të kërkohet që çdo marrëveshje e mundshme të kalojë përmes parlamentit të Kosovës.

Delegacioni do të udhëhiqet nga kryetari i Partisë Socialdemokrate Shpend Ahmeti dhe zëvendëskryeministri i Kosovës, Fatmir Limaj. Pjesë e delegacionit do jenë edhe zëvendëskryeministri Enver Hoxhaj, Avni Arifi nga Aleanca për Ardhmërinë e Kosovës, ministri i jashtëm Behgjet Pacolli, ministri nga radhët e pakicës turke, Mahir Yagcilar, zëvendëskryeministri Dardan Gashi, një përfaqësues i shoqërisë civile, si dhe dy vende janë të rezervuara për dy partitë opozitare Lidhjen Demokratike të Kosovës dhe lëvizjen Vetëvendosje.

Shefi i grupit parlamentar të Partisë Socialdemokrate, Visar Ymeri, tha se rezoluta përfshinë të gjitha çështjet e ngritura në diskutimin publik e parlamentar për bisedimet. Sipas tij vendimmarrja në këtë proces ka kaluar te delegacioni shtetëror i cili edhe mandatohet edhe i jep llogari parlamentit.

“Me rezolutë zotohemi e me platformën shtetërore do të konfirmohen pacenueshmëria dhe patjetërsueshmëria e sovranitetit shtetëror, integritetit territorial dhe karakterit unitar të Republikës së Kosovës. Përmes këtij procesi të dialogut përfundimisht Serbia do të obligohet të njohë Kosovën si shtet i pavarur dhe sovran përndryshe nuk do të ketë marrëveshje me Serbinë. Republika e Kosovës nuk do të zbatojë asgjë njëanshëm”, tha ai.

Lidhja Demokratike dhe Lëvizja Vetëvendosje bojkotuan seancën ndërsa kërkuan legjitimitet qytetarë para se të formohet çfarëdo ekipi negociator.

Shefi i grupit parlamentar të Lidhjes Demokratike të Kosovës, Avdullah Hoti, numëroi dy çështje që sipas tij janë të rëndësishme për të ardhmen e bisedimeve.

“E para që platformë e vetme për dialog është vetëm kushtetuta e Kosovës, nuk mund të ketë kurrfarë platforme që del mbi kushtetutën e Kosovës dhe e dyta nuk mund të simulojmë ekipe për dialog, pasi ekip për dialog është vetëm qeveria që ka legjitimitet qytetarë, qeveri e shumicës që flet në emër të shumicës së qytetarëve normalisht me rolin shumë të rëndësishëm në atë ekip në të ardhmen të opozitës, të shoqërisë civile”, tha zoti Hoti.

Shefi i grupit parlamentar i lëvizjes Vetëvendosje, Glauk Konjufca, tha se qeveria aktuale nuk ka legjitimitet për të shkuar në bisedime me Serbinë.

“Kapaciteti jonë si spektër politik i Kosovës për të ndaluar projektin i cili është në tavolinë, vetëm një projekt sot ekziston, projekti i Hashim Thaçit. Kur t’i mbyllet këtij projekti dera dhe Hashim Thaçi të jap përgjegjësi për këto dëme që ja ka shkaktuar Kosovës atëherë kjo është masë preventive, por atëherë ne jemi të sigurt në shtetin tonë, pastaj hapi i dytë dhe i tretë janë zgjedhjet e reja në Kosovë”, tha zoti Konjufca.

Presidenti i Kosovës, Hashim Thaçi, shkroi menjëherë në rrjetet sociale se “e mirëpret vendimin e rëndësishëm për krijimin e ekipit negociator për bisedimet me Serbinë. Pres të punoj me ta për të arritur marrëveshjen përfundimtare gjithëpërfshirëse që do të hapë dyert e OKB-së, NATO-s dhe BE-së për Kosovën”,

I welcome the important decision today on creation of the Negotiations Team for the dialogue with #Serbia co-headed by Mr. Limaj & Mr. Ahmeti. I look forward working with them together in reaching final, comprehensive settlement that will open UN, NATO and EU doors for #Kosovo.

— Hashim Thaçi (@HashimThaciRKS) December 15, 2018

Më herët gjatë ditës, kryeministri i Kosovës, Ramush Haradinaj, tha se me votimin e rezolutës, parlamenti merr rolin kryesor në bisedime, ndërsa presidenti Thaçi vazhdon me detyrat e tij sipas kushtetutës.

Miratimi i rezolutës shihet edhe si kundërvënie ndaj ideve për prekjen e kufijve që u hodhën gjatë verës nga presidenti i Kosovës, Hashim Thaçi dhe ai i Serbisë, Aleksandër Vuçiç.

Kryetari i Kryetari i parlamentit të Kosovës, Kadri Veseli, tha se seanca ka për synim të dëshmojë se Kosova nuk e bllokon procesin e bisedimeve.

Bisedimet tashmë kanë ngecur dhe Beogradi ka kushtëzuar vazhdimin e tyre me heqjen e tarifave prej 100 për qind ndaj mallrave serbe, një vendim që qeveria e Kosovës e vendosi më 21 nëntor si kundërpërgjigje ndaj siç është thënë, fushatës agresive serbe ndaj shtetësisë së Kosovës.

Tensionet ndërmjet të dyja vendeve u shtuan pas votimit të së premtes në parlamentin e Kosovës për ndryshimin e mandatit të Forcës së Sigurisë, duke i hapur rrugë procesit të themelimit të ushtrisë së saj, një veprim që zemëroi Beogradin i cili tha se do të përdorë forcën nëse ajo keqpërdoret për të sulmuar serbët e Kosovës.

Vendet që mbështetën votimin për ushtrinë kërkuan që Kosova t’u ripërkushtohet bisedimeve. John Bolton, këshilltar për siguri kombëtare i presidentit amerikan, Donald Trump, shkroi në twitter se një marrëveshje ndërmjet Kosovës dhe Serbisë duhet të ndodhë sa më parë.

I welcomed Foreign Minister Miro Cerar of Slovenia to the White House today. As NATO Allies, we discussed our shared economic and security interests in Europe and the need for Serbia and Kosovo to reach an agreement as soon as possible. I much appreciated his insights.

— John Bolton (@AmbJohnBolton) December 14, 2018

Por, ndërsa themelimi i ushtrisë mori 107 vota në parlamentin 120 vendesh, rezoluta e së shtunës mezi u votua dhe u deshën shumë orë për të filluar seancën e parlamentit.

Pa LDK-në dhe VV-në, miratohet rezoluta për dialogun me Serbinë

Nadie Ahmeti

Kuvendi i Kosovës, me 59 vota për dhe dy abstenime, ka miratuar rezolutën mbi procesin e dialogut për normalizimin e marrëdhënieve në mes Republikës së Kosovës dhe Republikës së Serbisë.

Seanca e jashtëzakonshme është mbajtur më kërkesë të 42 deputetëve, kryesisht të partive politike në pushtet Partisë Demokratike të Kosovës (PDK), Aleancës për Ardhmërinë e Kosovës, (AAK), Nismës Socialdemokrate dhe partisë në opozitë Partisë Socialdemokrate.

Në këtë rezolutë, thuhet se delegacioni shtetëror do të përbëhet nga përfaqësues politikë të votuar nga Kuvendi i Republikës së Kosovës.

Delegacioni shtetëror sipas rezolutës, ka dy bashkëdrejtues që vijnë nga radhët e opozitës dhe pushtetit. Të dy bashkëdrejtuesit do të duhej të votoheshin nga Kuvendi, së bashku me delegacionin shtetëror.

Qeveria e Kosovës në muajin shtator ka propozuar që kryetari i partisë Nisma Socialdemokrate dhe zëvendëskryeministri Fatmir Limaj të marrë rolin e kryesuesit të ekipit negociator, ndërkaq se fundmi është përfolur se Shpend Ahmeti mund të jetë bashkëkryesues i ekipit negociues, së bashku me Fatmir Limajn.

Në seancën që është mbajtur të shtunën nuk kanë marrë pjesë subjektet opozitare, Lidhja Demokratike e Kosovës dhe Lëvizja Vetëvendosje.

Avdullah Hoti, shef i Grupit Parlamentar të Lidhjes Demokratike të Kosovës, ka thënë se kërkesa për seancë të jashtëzakonshme është përpjekje e kotë e qeverisë pa legjitimitet, që tash e ka marrë prapa edhe PSD-në.

“Draft-rezoluta është përpjekje e dështuar e PSD-së për të mbuluar koalicionin e fshehtë me koalicionin PAN. Duhet ta kenë të qartë të gjithë se dialogu nuk mund të zhvillohet nga ata që nuk kanë legjitimitet”, ka shkruar Hoti në Facebook.

Kurse Glauk Konjufca, shef i Grupit Parlamentar të Lëvizjes “Vetëvendosje”, ka thënë se Partia Socialdemokrate është bërë faktori kryesor i mbijetesës se Qeverisë se Kosovës, pasi sipas tij, pas dështimit të Kosovës për anëtarësim në Interpol dhe mosliberalizim të vizave, kjo qeveri është dashur të japë dorëheqje.

“Rënia e kësaj qeverie ka qenë shumë e sigurt, nuk ka pasur rrugë tjetër kjo qeveri vetëm të japë dorëheqje dhe të shkojë në shtëpi. Por doli në skenë në momentet më kritike Partia Socialdemokrate për t’ju gjetur kësaj qeverie në ditët e saj më të vështira dhe është duke shpëtuar këtë qeveri nga rënia e saj e sigurt sepse po bëhet asistencë e kësaj qeverie me negociatat me Serbinë”, tha Konjufca.

Qeveria e Kosovës, për disa ditë kishte vazhduar përpjekjet për gjetjen e një konsensusi që do t’i siguronte mbështetjen e opozitës për të marrë rolin prijës në dialogun politik me Serbinë. Dialogu në këtë nivel, kryesisht është udhëhequr nga presidenti i Kosovës, Hashim Thaçi, por, së fundmi, zyrtarët e Qeverisë i kanë intensifikuar përpjekjet e tyre për t’i dhënë Qeverisë rol prijës në këtë proces.

Po ashtu, duke synuar përfaqësimin sa më të gjerë dhe të barabartë të vullnetit të qytetarëve të Kosovës, sipas rezolutës, do që duhej që një përfaqësues të jetë nga shoqëria civile, si anëtar i rregullt i delegacionit shtetëror. Edhe ky anëtar, do të duhej të merrte votat nga Kuvendi i Kosovës, në kuadër të votimit të platformës për dialog. Delegacioni shtetëror është paraparë që të ketë 11 anëtarë.

Kosova ime-urime Ushtrinë! Faleminderit AMERIKË! – Nga GANI QARRI

Ëndrra shekullore për arritjen e lirisë, ushtrinë dhe sovranitet tonë shtetëror u bë realitet. Votimi historik dhe vendimi sovran i parlamentit të Kosovës për formimin e ushtrisë ka domethënie të madhe dhe simbolikë të veçantë për Dardaninë e vjetër sa vet toka dhe të gjithë shqiptarët kudo që ata jetojnë.

Dita kur Kuvendi i Kosovës miratojë 3 projektligjet e fundit që i hapën rrugën krijimit të ushtrisë së shtetit, deri tek e cila kemi arritur duke kaluar nëpër shumë sfida dhe peripeci të mëdha u bë histori.

Ndaj, 14 dhjetori i vitit 2018, do të hyj në kronikat e lavdisë si datë e veçantë për Kosovën dhe popullin e saj, shtet ndërtimin dhe epokën më të re të Republikës së Kosovës.

Votimi unanim në seancën plenare në Kuvend, nga të gjithë deputetët e vendit, për formimin e Ushtrisë së Kosovës u shndrrua në mision të arritjes kombëtare të realizuar me shumë sukses .

Ma gëzofsh Ushtrinë, lirinë dhe shtetin e ëndërruar për shekuj e shekuj me radhë-Kosova ime!

Një ditë si kjo është një nga ditët më të veçanta në historinë tënde më të re, tanimë shtet sovran e i pavarur dhe me ushtri të formuar.

Mërgimtarët kudo, rrallëherë mund të kenë qenë më të lumtur se në këtë ditë të bekuar për Kosovën dhe popullin e saj.

Kosova ka të drejtë ta ketë ushtrinë e vet,ndaj të gjithë presin me padurim që edhe votimi të jetë unanim nga partitë dhe deputetët autokton,të vetëdijshëm se formimi i ushtrisë nënkupton edhe vulosjen e sovranitetit dhe garantimin e integritetit territorial të Republikës së Kosovës, të rrezikuar keq, kohët e fundit nga presidenti kuisling Hashim Thaçi, arsye që obligon Qeverinë për zhveshjen e ushtrisë tonë të sapoformuar nga mbështetsit e tij.

Nëse kjo masë e domosdoshme për çfarërdo arsyetimi shtyhet a zhagitet,atëherë kjo do të shihet dhe trajtohet me dyshim si tradhti piksëpari ndaj SHBA-s,NATO-s dhe vendeve tjera mike që na përkrahën dhe ndihmuan në formimin e ushtrisë tonë, sepse “gjeneralët” të cilët u graduan me shitjen e tokave të Kosovës nga Hashim Thaçi & C0, nuk mund tu besohet mbrojtja e shteteve të huaja ,ku NATO mund ti dërgojë me mision ushtarak.

Ndaj kjo duhet të ndodhë edhe për faktin që ne, nga sot dhe në të ardhmen me të drejtë të ndjehemi shumë krenar dhe me plot fat, të adhuruar deri në qiell edhe nga vet Zoti,kur dihet se në rrugëtimin tonë historik, në vijimësi kemi gëzuar dhe gëzojmë mbështetjen e vendosur dhe të pareshtur të shteteve dhe fuqive më të mëdha e më progresive në botë, si SHBA, Mbretëria e Bashkuar, Gjermania dhe aleatëve të tjerë ndërkombëtar, të cilët nuk guxojmë ti zhgënjejmë as pas formimit të Ushtrisë së shtetit tonë të lirë.

Në këtë mënyrë edhe 14 dhjetori i vitit 2018, jo vetëm se do të na gëzojë më shumë, bëjë më të sigurt dhe pafundësisht krenar, por për të gjithë qytetarët do të jetë një datë e paharruar e cila do të shënohet me germa të arta në piedestalin më të lartë të historisë më të re të shtetit tonë Kosovës.

Ushtrinë e Kosovës, askush më nuk mund ta ndal as e konsiderojë të rrezikshme, përveç Serbisë fashiste që ende ëndërron ta shkelë dhe pushtojë vendin tonë me zjarr e hekur, siç veproi disa herë për më tepër se 80 vite me radhë, por kjo ëndërr e trishtë, nuk do të përsëritet më kurrë dhe me datën e 14 dhjetorit 2018 përgjithmonë do të fundoset dhe perëndojë edhe për këtë shtet okupator.

Formimi i ushtrisë nuk ka asgjë negative dhe as destabilizuese, madje një gjë e tillë nuk ka arsye as të diskutohet, tha edhe shkëlqesia e tij, Ruairi O’Connell, ambasador i Britanisë së Madhe në vendin tonë.

Përkundrazi pas kërcënimeve të vazhdueshme të Serbisë se do të intervenojë sot, do të ndërhyjë nesër ,se në çdo moment mund të sulmojë vendin tonë me forcat e saj etj, e bëri të domosdoshme që Kosova përfundimisht të krijoj ushtrinë e vet dhe forcat e nevojshme për vetëmbrojtje nga ky shtet tipik pushtues.

Pra për shumë arsye dita e 14 dhjetorit po hynë në histori si datë e veçantë për Kosovën dhe pas pritjes shekullore për liri,çlirim e shtet të pavarur, Kosova përfundimisht, e zgjodhi edhe problemin e mbetur pezull tash e sa kohë për krijimin e Ushtrisë së saj.

Ndaj me të drejtë edhe u prit me kaq ngazëllim seanca plenare në Kuvend për votimin e ligjeve të parapara si dhe jetësimin e agjendës shtetërore të shndërrimit të FSK-së në Ushtri të Kosovës.

Fatmirësisht, ne nga SHBA, siç kemi marrë përkrahjen e plotë për formimin e Ushtrisë,po ashtu na u tha vëllazërisht se do marrim në vijimësi edhe ndihma tjera konkrete për ngritjen e kapaciteteve tona të nevojshme ushtarake.

Ngase ushtria, si njëra nga komponentët më të qenësishme për garantimin e mëvetësisë së shtetit tonë të pavarur, ka për detyrë ta ruaj sovranitetin dhe  integritetin cep me cep të territorit,si dhe të parandalojë fushëveprimin e armikut në vendin tonë.

NATO, në përfundim të ndërhyrjes së saj ajrore kundër Serbisë në vitin 1999 u vendos këtu për t’u dhënë fund mizorive të forcave serbe në Kosovë.

Por fushata e pareshtur agresive kundër shtetësisë së Kosovës dhe qasja kërcënuese në vazhdimësi e Serbisë ndaj nesh edhe tash, njëjtë si në të kaluarën, e cila asnjëherë nuk pushoi, e bëri të domosdoshme që Kosova me në fund, ta formojë ushtrinë e vet!

Madje duke parë nevojën që kemi për vetëmbrojtje nga ky shtet okupator, komandanti i Forcave të NATO-s më seli në Napoli, admirali amerikan, James Foggo, nga Shkupi deklaroi se “transformimi i Forcës së Sigurisë në Ushtri, është një vendim sovran, që duhet ta ndërmarrin deputetët e Kosovës”.

Të mërkurën edhe ambasadori britanik në Kosovë, Ruairi O’Connell, gjithashtu theksoi se Kosova ka të drejtë ta ketë ushtrinë e vet, ndaj edhe vendi i tij mbështetë pa asnjë rezervë krijimin e Ushtrisë së Kosovës.

Për aq më tepër ambasadori i sapoardhur amerikan në vendin tonë, z.Philip Kosnett, transformimin e Forcës së Sigurisë e konsideroi hap historik për Kosovën,si vend sovran dhe i pavarur, duke shtuar se “Shtetet e Bashkuara të Amerikës, e kanë mbështetë dhe do ta mbështesin plotësisht zhvillimin profesional dhe ndryshimin organizativ të Forcës së Sigurisë në Ushtri të Kosovës!

Kosova, përkundër sjelljeve agresive të Serbisë, edhe në vigjilje të krijimit të ushtrisë së saj,u tregua e kujdesshme dhe siguroi serbët në vendin tonë, se ushtria nuk është e drejtuar kundër asnjë qytetari të saj, ndërsa pohimet agresive të qeveritarëve serb, janë thjeshtë “propagandë e qëllimshme nga ana e Serbisë”.

Megjithatë në orët e mbrëmjes së të enjëtës, Policia u njoftua edhe për një mjet të dyshuar në afërsi të rrugës magjistrale Prishtinë-Mitrovicë, konkretisht në rrugicën e hyrjes së Gazimestanit ku u gjetën 15 kilogram eksploziv.

Ky ishte vetëm njëri nga tentimet për ta destabilizuar brenda për brenda vendin tonë nga armiqtë, pak para votimit të ushtrisë së shtetit të Kosovës.

Përkundër të gjithave Ushtria e Kosovës u formua dhe shndërrua në realitet  dhe atë jo vetëm Serbia, por nuk ka forcë më që do të mund ta ndalojë.

Ushtria e Kosovës, u tha se do ti ketë 5 mijë trupa aktiv dhe 3 mijë rezervë të armatosur lehtë, fakt që nuk paraqet asnjë kërcënim për Serbinë,ndaj shteti okpator serb jo vetëm habit por edhe bëhet pafundësisht qesharak me reagimet kaq agresive kundër Ushtrisë së Kosovës e cila me përkrahjen e fuqishme të SHBA-ve, dhe aleatëve tjerë ndërkombëtar, pas formimit mëton të bëhet pjesë e NATO-s, ku shihet edhe e ardhmja e Republikës së Kosovës si shtet i pavarur e sovran.

Urime dhe mbarësi të pafund; Ushtrisë, Shtetit dhe gjithë Popullit të Republikës së Kosovës!

Haradinaj: Kudo ku shkonte Krasniqi, njerëzit bëheshin luftëtarë

Nën patronatin e Qeverisë së Kosovës dhe shoqatave të dala nga lufta është mbajtur sot akademia përkujtimore në 20-vjetorin e rënies heroike të komandant Mujë Krasniqit, i njohur me nofkën “Kapuçi” dhe 40 bashkëluftëtarëve të tjerë.

Kryetari i Kuvendit të Kosovës, Kadri Veseli me këtë rast ka nisur fjalimin me urimin për Ushtrinë e Kosovës, meqë sipas tij, edhe data 14 dhjetori nuk ishte caktuar rastësisht, por në ditën e përvjetorit të rënies së Mujë Krasniqit.

“Në këtë ditë të formimit të ushtrisë po na mungon ish-komandanti i UÇK, Sylejman Selimi, për të cilin presim të triumfojë për lirimin e tij. Komandant Mujë Krasniqi kujtohet sot për kontributin dhe sakrificën e tij për lirinë e Kosovës dhe pavarësinë”, ka thënë Veseli.

Kryeministri i Kosovës, Ramusha Haradinaj tha mes tjerash se Mujë Krasniqi kishte një aftësi të madhe për të shtuar radhët e ushtrisë me ushtarë të rinj. Ai tha se humbja e një luftëtari si ajo e Mujë Kransinqit, do mbetet gjatë në memorien e popullit si një ndër humbjet më të mëdha, që ka përjetuar ndonjëherë Kosova.

“Ku do që ishte Muja, njerëzit u bënin luftëtarë… Kemi pasur edhe shumë beteja me humbjen e ushtarëve, por kjo me Mujë Krasniqin ka qenë humbja më e madhe”, theksoi Haradinaj.

Marinsat amerikanë urojnë Ushtrinë e Kosovës

Marinsat e ushtrisë amerikane urojnë ushtrinë e Kosovës, bile këtë duke e bërë Shqiponjën më duar.

Djaloshi me prejardhje kosovare, Robert Shala është pjesëtar i Ushtrisë Amerikane.

Ai së bashku me kolegët e tij kanë shkrepur një fotografi ku shihen duke bërë Shqiponjën me duar.
Me anë të një postimi në Facebook, Shala uron formimin e ushtrisë së Kosovës.

Forcohet prania e KFOR-it në veri të Mitrovicës

PRISHTINË – Derisa në Kuvendin e Kosovës në Prishtinë votohej për projektligjet mbi transformimin e Forcave të Sigurisë së Kosovës(FSK) në Ushtrinë e Kosovës, prania e forcave të KFOR-it në Mitrovicën Veriore është rritur, raporton Anadolu Agency (AA).

Forcat e KFOR-it janë vendosur në urën në lumin Ibër, që ndan qytetin e Mitrovicës në pjesën veriore me shumicë serbe dhe atë jugore shqiptare. Në pjesën veriore të Mitrovicës janë vendosur flamuj serbë që nga mëngjesi, ndërsa flamuri amerikan valëvitet në pjesën jugore.

Është njoftuar se studentët serbë përpara zyrës së UNMIK-ut dhe EULEX-it në veri të Mitrovicës do të kryejnë performancë të re pikërisht, simbolikisht sipas Rezolutës 1244 të OKB-së për Kosovën.

Kujtojmë se në seancën e sotme, Kuvendi i Kosovës me një shumicë absolute miratoi tre projektligjet për transformimin e FSK-së në ushtri, respektivisht projektligjin për formimin e Ministrisë së Mbrojtjes, projektligjin për transformimin e FSK-së në ushtri, si dhe projektligjin për shërbim në FSK.

Votimi i projektligjeve të sotme pritet të dekretohet nga presidenti Thaçi, pas së cilës Kosova zyrtarisht bëhet me ushtri.

Lideri invalid, partia patericë! – Nga Florim Zeqa

Ideja e këtij shkrimi më lindi gjatë bisedës së Sekretarit të Përgjithshëm të LDK-së në një emision në mediumin publik, të datës 12 dhjetor 2018. Në pyetjen e moderatorit të emisionit në fjalë, rreth liderit të partisë, sekretari Ismet Beqiri u përgjigj, po citoj; “Ne e kemi liderin, ai tani i është kthyer partisë, edhe pse nuk është prezent në zyrat e partisë, ai po e kryen punën rreth 70 %”!

Thënë ndryshe, sipas sekretarit të partisë, z. Ismet Beqiri, lideri i LDK-së ka mungesë të prezencës në vendin e tij të punës dhe mungesë të theksuar të aftësive për të udhëhequr me partinë më të madhe opozitare.
Mirëpo, edhe përkundër mungesës dhe aftësive të kufizuara të liderit, LDK-ja ka vendosur t’i mbajë zgjedhjet e rregullta partiake në afatin e përcaktuar statutor të saj kah fundi i vitit 2019!
Kjo i bie, që për grupet e interesit dhe klanet e rreshtuara pas liderit, më i rëndësishëm për ta është Isa Mustafa se sa partia, përkatësisht më të rëndësishme janë interesat personale të individëve se sa interesi shtetëror!
Ndryshe nuk ka si të interpretohet mbajtja e liderit invalid në krye të partisë.
Në rrethanat e krijuara politike, partisë më të madhe opozitare i duhet një liderë i shëndetshëm, energjik, i guximshëm, aktiv dhe prezent në të gjitha aktivitetet e partisë, për të motivuar dhe rritur akoma më shumë opozitarizmin e LDK-së kundrejt kapësve dhe uzurpatorëve të shtetit.
Mbajtja në krye të partisë e një lideri invalid, përkatësisht e një njeriu me aftësi të kufizuara, përveqse shprehje e mentalitetit të kaluar komunist, është mendësi e primitive e dhunimit të demokracisë së brendshme partiake.
Për më tepër se kaq, mbajtja e mëtutjeshme në krye të partisë, e njeriut që e dëmtoi më shumë se askush tjetër LDK-në, është veprim sa i dëmshëm, po aq shkatërrimëtarë për subjektin më të vjetër të skenës politike kosovare.
Veprimet antidemokratike, sjelljet jo njerëzore ndaj zërave ndryshe dhe instalimi i formave më të vrazhda të diktaturës dhe kërcënimeve ndaj oponentëve brenda partisë, e kanë shëndrruar Isa Mustafën në liderë diktatorial të LDK-së.

Të heshtur në pritje të pushtetit

Mbajtja e Isa Mustafës në krye të LDK-së deri në afatin e rregullt zgjedhor dhe shkuarja eventuale e vendit në zgjedhje të parakohshme nacionale, LDK-së do t’i kushtoj me humbje të radhës, ndërsa qytetarëve me fundosjen e shpresave për ndryshime dhe jetë në vendin e tyre.
Paradoksalisht, përderisa partitë më të vogla, me liderë analfabet dhe handicap politik po qeverisin me vendin, subjekti më i madh opozitar-LDK-ja ka zgjedhur heshtjen, duke e pritur “peshkun” (pushtetin) e gatshëm nga zgjedhjet apo në tavolinën e bisedimeve me uzurpatorët e shtetit, pa e ndërmarrë asnjë veprim të vetëm konkret, gjegjësisht të organizimit të ndonjë proteste kundër pushtetarëve të inkriminuar.
Heshtja vrastare për shtetin e LDK-së, është duke iu shkuar për shtati partive në pushtet, por jo edhe qytetarëve të vendit, të cilët me shpresa të thyera, me lotë ndër sy janë duke e braktisur vendin e tyre të lindjes, shtetin për të cilin pritën gjatë dhe sakrifikuan jashtëzakonisht shumë.

LDK-ja patericë e opozitarizmit kosovar

Qëllimi i këtij shkrimi nuk janë dështimet dhe gabimet e Isa Mustafës nga ardhja me PUÇ politik në krye të LDK-së, as ndihma dhe mbajtja në pushtet e PDK-së, as zgjedhja e Hashim Thaçit president dhe as shpërdorimet e ‘fondit të 3 %’, por është parandalimi i rënjës së mëtutjeshme të LDK-së.
Për shkak se, është pak më tepër se irrituese për qytetarët e Kosovës, të shohin partinë shtetndërtuese (LDK-në) si patericë të partive të vogla dhe liderëve uzurpator të shtetit të Kosovës.
Po ndodh pikërisht kështu për faktin se LDK-së i mungon lideri që e meriton, e si pasojë e kësaj i mungojnë edhe nismat dhe iniciativat e shëndosha për realizimin e kthesës së madhe politike në vend.
Si pasojë e këtij vakumi politik, jo vetëm se po fuqizohet pushteti i inkriminuar, dita-ditës po zbehet edhe opozitarizmi i LDK-së në Kuvendin e Kosovës.
LDK-ja, dikur prijëse e të gjitha proceseve në Kosovë, sot me liderin invalid, egoist dhe të papërgjegjshëm politikë është shndërruar edhe në patericë të opozitarizmit në Kosovë.
E quajta egoist dhe të papërgjegjshëm liderin e LDK-së, për faktin se vendit i duhet një parti e fortë e qëndres së djathtë, me orientim të qartë europerëndimorë, me liderë të shëndoshë e të pastër, të pa korruptuar dhe pa involvuar në veprime kriminale.
Ndryshe, në rrethana normale, një humbës (serik) i zgjedhjeve siq është Isa Mustafa do duhej të ndiqte shëmbullin e liderit të PD-së në Shqipëri, z. Sali Berisha, i cili lëshoj timonin e partisë si akt moral të humbjes së zgjedhjeve.
Ndërsa Isa Mustafa, si në rrethana normale, ashtu edhe në ato abnormale (shkaku i shëndetit të kufizuar) nuk e ka ndërmend të largohet i gjallë nga kreu i LDK-së!
Vetëm tërheqja e Isa Mustafës nga posti i kryetarit të partisë dhe kërkimfalja ndaj qytetarëve për dëmin që i shkaktoi vendit me lidhjen e kurorës së panatyrshme me PDK-në në vitin 2014 (kur Kosova ishte në pragë të ndryshimit historik), do ta ndihmonte LDK-në rrugëtimin e saj politik, për çka do të krijohej edhe një standard i ri politik në vendin tonë.

Imoraliteti politik i Isa Mustafës

Të qëndruarit dhunshëm në krye të partisë përveqse e tregon fytyrën dhe imoralitetin politik të Isa Mustafës, në kundërshtim me shëndetin e tij dhe vullnetin e elektoratit, lë të hapura mëdyshjet për misionin e tij shkatërrimtarë në LDK!
Pas shkuarjes në amshim të liderit shpirtëror të LDK-së, presidentit historik Ibrahim Rugova, rrahagjoksit e frymës rugoviane, pushtetin e shfrytëzuan vetëm për interesat e tyre personale, asnjëherë nuk u moren me problemet e qytetarëve, e më së paku me zbardhjen e vrasjes së bashkëpartiakëve të tyre.
Fjalëve dhe hipokrizisë politike më nuk ju beson askush, rugovizmi mbrohet me vepra e jo me fjalë!
Në asnjë rrethanë politike, ndryshim pozitiv për vendin nuk do të sjellin ata që ishin dhe janë akoma suporti më i madh i Hashim Thaçit, përkatësisht ata që ngritën duart lartë për votimin e Thaçit president dhe marrëveshjeve fatkeqe për vendin të nënshkruara nga ai.
Pa reformim e thellë dhe përnbajtësorë të LDK-së, jo vetëm që nuk do të ndodh asnjëherë ndryshimi në këtë parti, do të kemi vetëm vazhdimësi, rikonfigurim dhe riciklim të figurave politike të klanit të Isa Mustafës.
Çdo tentim ikje nga realiteti dhe e vërteta e hidhur është shprehje e imoralitetit politik dhe hipokrizi e skajshme e liderit të LDK-së, i cili mund të jetë çkado tjetër por jo asnjëherë liderë shpirtërorë i subjektit më të vjetër në hapësirën politike shqiptare.

Gjermania dhe Turqia, eksportueset kryesore të mallrave në Kosovë

Fatlum Jashari

Gjermania dhe Turqia janë dy vendet që kanë marrë vendin e parë për kah niveli i eksportit të mallrave në drejtim të Kosovës. Këto dy shtete, prijnë për kah eksporti i mallrave në Kosovë që prej vendimit të Qeverisë së Kosovës për vendosjen e taksës 100 për qind për produktet me origjinë nga Serbia dhe Bosnja, më 21 nëntor.

Deri para tri javësh, listës së shteteve prej të cilave Kosova blinte më së shumti mallra i printe Serbia. Pas saj, në top-pesëshe renditeshin Gjermania, Turqia, Kina dhe Italia. Ndërsa, Shqipëria renditej në vendin e gjashtë të listës së shteteve, nga të cilat Kosova importonte më së shumti.

Sipas zëdhënësit të Doganës së Kosovës, Adriatik Stavileci, në tri javët e para të taksës, në top- pesëshe të vendeve të importit nuk figuron më Serbia, ndërsa Gjermania zë vendin e parë, e Shqipëria shënon ngritje nga vendi i gjashtë në të katërtin.

“Duke përfshirë këto ditë, që nga vendosja e taksës, kemi rreth 21 milionë euro mallra import nga Gjermania, 21 (milionë euro) nga Turqia, 17 (milionë euro) nga Kina, 12 (milionë euro) nga Shqipëria dhe 10 nga Italia. Do të thotë, çka ka ndodhur në listën e top -pesë importuesve është se vetëm është hequr Serbia nga top-pesëshja”, bën të ditur Stavileci.

Ai thotë se para vendimit për taksën 100 për qind, Kosova importonte nga Serbia mesatarisht 36 milionë euro mallra, çdo muaj.

“Nëse e shohim në aspektin ditor, nga Serbia ka pasur një mesatare të eksportit ditor në Kosovë, të produkteve të tyre me rreth 1.2 milionë euro në ditë, derisa tërë vitin ka eksportuar rreth 440 milionë euro”, shton zëdhënësi i Doganës, Stavileci.

Në Odën Ekonomike të Kosovës thonë se bizneset kosovare kanë filluar të kërkojnë alternativa për zëvendësimin e produkteve të Serbisë dhe Bosnjës, që kur fillimisht ishte vendosur taksa prej10 për qind.

Kreu i këtij institucioni, Berat Rukiqi, thotë se pas rritjes së taksës në 100 për qind, pothuajse tërësisht bizneset janë orientuar në gjetjen e tregjeve të reja furnizuese.

Duke marrë shembull rritjen e importit të hekurit nga Shqipëria, gjatë kësaj periudhe, si zëvendësim për atë nga Bosnja, Rukiqi thotë se kjo tregon që tregu shqiptar shërben kryesisht për import të lëndës së parë, ndërsa vendet tjera për produktet finale.

“Pra, kryesisht fokus i zëvendësimit të importeve në rastin e Shqipërisë, mund të jetë lënda e parë, për shkak të afërsisë, transportit, për shkak të kostos. Sa u përket produkteve finale, sigurisht në vendet tjera mund të gjenden alternativa dhe nuk mund të ketë ndikime edhe në çmime”, shpjegon Rukiqi.

Sipas Rukiqit, tregu i ri që po krijohet pas vendosjes së taksës për produktet me origjinë nga Serbia dhe Bosnja, mund të jetë i qëndrueshëm vetëm nëse kjo masë mbetet në fuqi për një kohë më të gjatë, pasi shfuqizimi i saj, konsideron ai, do të mund të rikthente lidhjet me tregun e këtyre vendeve.

“Sa është e qëndrueshme, kjo mbetet të shihet varësisht nga kohëzgjatja e taksës. Çdo ditë më shumë që mbetet taksa, çdo ditë më shumë rritet edhe potenciali që një pjesë të mirë të tregut që Serbia e ka pasur në Kosovë edhe ta humbë përfundimisht, për shkak se në shumë raste krijohen lidhje afat-gjate, tash edhe këto gjetjet reja, të burimeve të reja, normalisht që krijojnë lidhje tjera dhe kjo pastaj ndikon që të humbë interesimi që të importohet nga Serbia”, shton kreu i Odës Ekonomike të Kosovës.

Më 21 nëntor, Qeveria e Kosovës mori vendim për rritjen e taksës doganore në 100 për qind, për mallrat që importohet nga Serbia dhe Bonje e Hercegovina.

Pavarësisht kërkesës së Bashkimit Evropian dhe Shteteve të Bashkuara të Amerikës për heqjen e kësaj takse, kryeministri i Kosovës, Ramush Haradinaj, ka përsëritur disa herë që kjo masë do të mbetet në fuqi derisa Serbia ta njohë Republikën e Kosovës.

Haradinaj vendos t’i kthehet dialogut me Serbinë, propozon marrëveshje

Kryeministri i Republikës së Kosovës, Ramush Haradinaj, pas një refuzimi gati dy vjeçar që të merret me çështjen e dialogut me Serbinë, sot ka bërë një veprim që do ta infiltrojë atë direkt në negociatat Kosovë-Serbi, raporton Gazeta Express.

Në një takim me përfaqësuesit e vendeve e Quint-it, kreu i Qeverisë, ka paraqitur draftin e parë të marrëveshjes gjithëpërfshirëse ligjërisht obligative ndërmjet Republikës së Kosovës dhe Serbisë.

Ky draft-dokument iu është dërguar edhe të gjitha partive politike dhe bartëseve të institucioneve pra edhe presidentit Thaçi, dhe pritet që të diskutohet gjatë ditëve në vijim.

“Sot, përpara ambasadorëve të vendeve të Quint-it, kam paraqitur draftin e parë të Marrëveshjes Gjithëpërfshirëse Ligjërisht Obligative ndërmjet Republikës së Kosovës dhe Republikës së Serbisë. Ky draft-dokument është dokument mbështetës për procesin ekzistues të dialogut, si dhe aspektet që ndërlidhen me përshpejtimin e këtij procesi”, ka njoftuar Haradinaj përmes profilit të tij zyrtar në facebook, raporton Gazeta Express.

Shefi i Dialogut Teknik, Avni Arifi, në këtë takim ka prezantuar kapitujt, që për ne do të përbëjnë parametrat kryesorë të marrëveshjes, e cila do t’i hapë rrugë normalizimit ndërmjet Kosovës dhe Serbisë.

“Draft-dokumenti me anekset përcjellëse, iu është dorëzuar edhe të gjithë bartësve të institucioneve dhe kryetarëve të të gjitha subjekteve politike. Në ditët dhe javët në vijim, ky draft-dokument do të diskutohet me të gjitha palët në shoqërinë tonë, për të arritur te dokumenti përfundimtar, ku do të përfshihet ekspertiza e të gjithëve”, përfundon njoftimi.

Deri tani dialogun me Serbinë e ka udhëhequr presidenti i Kosovës, Hashim Thaçi./GazetaExpress/

Kandiç: Procedimi i krimeve të luftës i pamundur, për shkak të mos bashkëpunimit Kosovë-Serbi

PRISHTINË – Numri më i madh i të dyshuarve për krime lufte në Kosovë, janë gjetur në Serbi, ndërsa mungesa e bashkëpunimit institucional pamundëson madje edhe ngritjen e akuzave kundër tyre, u tha sot në Prishtinë në konferencën “Ndjekja penale e krimeve të luftës: Bashkëpunimi-përvojat rajonale dhe sfidat”.

Konferenca e sotme u organizua nga Fondi për të Drejtën Humanitare në Kosovë me partnerët “Dokumenta” nga Zagrebi dhe Qendra për të Drejtën Humanitare në Beograd.

Natasha Kandiç, themeluese e të Drejtës Humanitare dhe koordinatore për KOMRA ka thënë se në saje të Tribunalit të Hagës sot ne e dimë identitetin e rreth 20.000 viktimave të krimeve të luftës si dhe rrethanat në të cilat ata kanë humbur jetën apo janë zhdukur.

Kandiç ka shtuar se për të përcaktuar rrethanat e vdekjes së viktimave, duke iu referuar gjenezës së krimit dhe të autorëve të drejtpërdrejt dhe atyre që janë përgjegjës për nga përgjegjësia komanduese. Ajo gjithashtu tha se Gjykata e Hagës dënoi 161 persona, që nuk është e mjaftueshme, por është një kontribut i madh për të siguruar të dhëna dhe fakte në lidhje me ngjarjet e janarit të vitit 1991 deri në fund të vitit 2001.

“Tribunali i Hagës përfundoi mandatin e vet. Disa shtete janë të kënaqura me disa vendime, për disa vendime nuk janë, por nuk ka asnjë shtet në territorin e ish-Jugosllavisë i cili ka vërejtje në gjetjet e fakteve në lidhje me viktimat e krimeve të luftës. Nuk ka pasur gabime nga Tribunali i Hagës, as nga Prokuroria për provat, as gjyqtarëve në vlerësime, kur është fjala për viktimat e krimeve të luftës”, tha Kandiç.

Natasha Kandiç theksoi se pajtimi kërkon bashkëpunim rajonal, por situata është e tillë që bashkëpunimi mes institucioneve të Kosovës dhe Serbisë nuk ekziston.

“Ende nuk është gjetur një hapësirë e duhur në kuadër të Traktatit të Brukselit për të lejuar bashkëpunimin e institucioneve në mënyrë profesionale dhe juridike me qëllim të kushteve themelore për bashkimin me komunitetin evropian dhe ky është bashkëpunimi rajonal, i cili më pas ndikon në vendosjen e marrëdhënieve të mira fqinjësore”, tha ajo, duke shtuar se nga pikëpamja e shoqërisë civile është shumë e rëndësishme të krijohet një mekanizëm, veçanërisht një komision ndërshtetëror rajonal që do të përqendrohet në viktimat.

Drita Hajdari, prokurore e Departamentit për Krime Lufte në Prokurorinë Speciale të Kosovës theksoi se EULEX-i ka marrë 840 raste të krimeve të luftës, në kuadër të së cilës ka identifikuar 1,018 njerëz si autorë të mundshëm të krimeve të luftës. Hajdari vuri në dukje se problemi është se si të arrijnë tek këta njerëz, sepse shumica e tyre janë në Serbi.

“Prokuroria nuk mund të ngrejë aktakuzë në mungesë të të pandehurit, së pari duhet të marrë në pyetje dhe të ngrihet aktakuzë. Pra, nuk kemi mundësi as të ngremë padi, e lëre më paraqitjen e tyre para gjykatës. Siç është e njohur në Kosovë nuk mund të gjykohet në mungesë, që do të thotë se opsioni i vetëm që ka prokuroria është të kryejë hetime, të mbledh prova aq sa mund dhe të presin”, tha Hajdari.

Ajo tha se problemi qëndron në mungesën e bashkëpunimit midis Kosovës dhe Serbisë dhe se përkundër përpjekjeve të saj personale, ajo nuk arriti të krijojë bashkëpunim me institucionet serbe.

Paul Flynn, menaxher në Prokurorinë e EULEX-it, tha se problemi i të dyshuarve ekzistonte gjatë UNMIK-ut, edhe pse në atë kohë kishte të paktën një bashkëpunim me Beogradin. Flynn tha se Kosova është i vetmi vend në rajon pa një strategji për krimet e luftës, gjë që paraqet rrethana rënduese për të arritur përparim në lëndët e krimeve të luftës. Sipas tij, politikanët duhet t’i shtyjnë gjërat dhe të angazhohen për zgjidhjen e krimeve të luftës nëpërmjet mekanizmave rajonalë të bashkëpunimit me institucionet e zbatimit të ligjit. aa

Nisin intervistimet nga Prokuroria Speciale

Amra Zejneli-Loxha

Prokuroria Speciale për krime të luftës në Kosovë, me seli në Hagë, ka nisur të intervistojë personat e ftuar, që kryesisht vijnë nga radhët e ish-Ushtrisë Çlirimtare të Kosovës (UÇK). Bazuar në ligjin, ata janë të obliguar që t’i përgjigjen ftesës për intervistim.

Njëri nga të intervistuarit e parë është ish-pjesëtari i UÇK-së për Zonën e Pashtrikut, Safet Syla. Ai në një konferencë për media tha se për dy ditë nga nëntë orë është intervistuar nga Prokuroria Speciale. Por, sipas tij, ai është intervistuar në zyret e misionit për sundim të ligjit, EULEX në Prishtinë.

“Jam intervistuar për 18 orë nga Gjykata Speciale dhe më kanë marrë pa ftesë. Nga pyetjet e bëra kam kuptuar që me kanë intervistuar për rolin tim në luftë”, ka deklaruar Syla.

Qeveria e Kosovës ka shprehur gatishmërinë që në çdo moment të ofrojë ndihmën e nevojshme për mbrojtje ligjore për “luftëtarët e lirisë”.

Nga Këshilli për Mbrojtjen e të Drejtave dhe Lirive të Njeriut, thonë se deri më tash ftesat e për intervistim i kanë marrë shtatë persona dhe se vetëm në një rast është thënë që personi është ftuar në cilësinë e dëshmitarit. Ky Këshill ka shprehur dronë që personat që janë ftuar për intervistim mund të arrestohen.

Siç kanë konfirmuar avokatët deri më tash, për intervistim në Hagë, më 14 janar të vitit të ardhshëm, janë ftuar: ish-komandanti i UÇK-së për zonën e Llapit, Rrustem Mustafa-Remi dhe ish-komandanti i UÇK-së në Drenicë, Sami Lushtaku.

Nga data 22 deri më 24 janar do të intervistohet Nazif Mehmeti. Ftesa për intervistim i është bërë edhe Sokol Dobrunës, ish-kryetar i gjykatës së UÇK-së. Ata kanë konfirmuar se do t’i përgjigjen ftesës dhe se bëhet fjalë vetëm për “ftesë për intervistim”.

Një tjetër person i ftuar nga Prokuroria Speciale është edhe Remzi Shala, ish-pjesëtar i njësitit special të Shtabit të Përgjithshëm të UÇK-së. Ai është ftuar të paraqitet para Prokurorisë së Specializuar më 17 janar të vitit të ardhshëm. Por, siç ka bërë të ditur vetë Shala, ai nuk do të paraqitet vullnetarisht në këtë Prokurori, duke thënë se nuk e njeh këtë institucion.

Ndonëse aktualisht nuk dihet se në çfarë cilësie janë të ftuar, në bazë të Ligjit për Dhomat e Specializuara dhe Zyrën e Prokurorit të Specializuar, secili person që gjendet në Kosovë dhe të cilit i bëhet ftesa në cilësinë e dëshmitarit, është i obliguar që t’i përgjigjet ftesës dhe të dëshmojë.

Gjithashtu, në përputhje me të drejtat e të akuzuarve, të gjithë personat juridik dhe fizik në Kosovë, janë të obliguar që të bashkëpunojnë me Dhomat e Specializuara dhe me Prokurorin e Specializuar.

Në Prokurorinë e Specializuar nuk kanë dhënë informata lidhur me hetimet, por kanë theksuar që janë të vetëdijshëm që individët ose avokatët e tyre japin deklarata për mediat, në të cilat thonë se janë të ftuar për biseda në Hagë.

Dhomat e Specializuara dhe Zyra e Prokurorit të Specializuara, të cilat ndryshe njihen si Gjykata Speciale, janë përgjegjës për hetimin e krimeve kundër njerëzimit, krimeve të luftës dhe krimeve tjera penale në lidhje me akuzat nga Raporti i Këshillit të Evropës i vitit 2011. Në atë raport thuhet që krimet gjoja se i kanë bërë pjesëtarët e Ushtrisë Çlirimtare të Kosovës, në periudhën prej vitit 1998 e deri në vitin 2000.

Ky institucion është formuar pas miratimit të legjislacionit të nevojshëm nga Kuvendi i Kosovës dhe është funksionalizuar në tërësi në korrik të vitit 2017, kur është miratuar Rregullorja për procedurat dhe provat për kryerjen e procedurës penale. Në Dhomat e Specializuara dhe Zyrën e Prokurorit të Specializuar punojnë rreth 150 persona, të cilët vijnë nga shtete të ndryshme nga e gjithë bota. Gjykatësit, të cilët janë 20, vijnë nga 14 vende.

Kosova, ndër vendet prijëse në botë që i kushton rëndësi vaksinimit

Ariana Kasapolli – Selani

Kosova njihet si vend me mbulueshmëri të mirë të imunizimit (vaksinimit). Sipas profesionistëve nga fusha e shëndetit publik, Kosova renditet në mesin e shteteve më të suksesshme në botë sa i përket imunizimit, me 95 për qind të popullatës së vaksinuar. Kurse sfidë më vete mbetet mbulueshmëria e vaksinimit të 5 për qind të popullatës, që i përkasin komuniteteve romë, ashkali e egjiptian.

Përkundër përpjekjeve të bëra nga zyrtarë të Institutit Kombëtar të Shëndetit Publik të Kosovës, kjo kategori e shoqërisë vazhdon të mos jetë tërësisht e vaksinuar.

Sipas ekspertëve të fushës së shëndetësisë, vaksinat mund të mbrojnë nga 23 viruse të ndryshme dhe dy lloje kanceri. Vitet e fundit janë duke u zhvilluar një numër më i madh vaksinash, përfshirë një për virusin HIV, që shkakton sëmundjen e AIDS-it apo SIDA-s. Por, me gjithë këto përparime, shumë njerëz në botë zgjedhin të mos bëjnë vaksina as për vete, as për fëmijët e tyre.

Ndërkaq, në Kosovë disa vite të fundit ishte përhapur lajmi se vaksina kundër fruthit shkakton autizmin. Si rrjedhojë, shumë prindër edhe në Kosovë menduan që fëmijët e tyre të mos i vaksinojnë.

Nisur nga lajmet e shumta për efektet anësore të vaksinave, Leonita Bajraktari, nënë e dy fëmijëve, tha për Radion Evropa e Lirë se edhe ajo i kishte rezervat e veta pse dyshonte në vaksinim.

“Jam nënë e dy vajzave. I kam vaksinuar me rregull fëmijët, por megjithatë vajzës së vogël disa muaj ia kam shtyrë vaksinën kundër fruthit, pasi lexoja vazhdimisht se pikërisht kjo vaksinë po e shkakton autizmin. Megjithatë, pas lajmit se në Evropë është rishfaqur fruthi, unë kam vendosur ta vaksinoj, duke e ditur se virusi i fruthit mund të shkaktojë edhe vdekje. Unë si nënë nuk munda ta marrë atë përgjegjësi dhe mos ta vaksinoj vajzën, pasi i gjithë stafi mjekësor ishin kategorik se fëmija duhet vaksinuar”, thotë Leonita.

Epidemiologia Isme Humolli, thotë se vaksina kundër fruthit nuk e shkakton autizmin, duke demantuar informatat që jepen nga njerëz të ndryshëm në lidhje me vaksinimin.

“Vaksina kundër fruthit nuk e shkakton autizmin. Mendoj se çdo informatë që është kundër vaksinimit normal ka ndikuar negativisht. Por, paraqitja e rasteve të fruthit automatikisht e ngriti vetëdijen e popullatës dhe kërkesën për t’u vaksinuar dhe ata vetë u lajmëruan për vaksinim”, tha Humolli.

Pikërisht epidemia e fruthit ishte përhapur në Evropë, por edhe në Kosovë me një shpejtësi më të madhe, ku numri i njerëzve të infektuar që nga viti 2007 ishte trefishuar. Vitin e kaluar, në Evropë më tepër se 14 mijë njerëz u prekën nga fruthi. Numrin më të madh të rasteve e pati Rumania. Ndërkaq në Kosovë nga muaji qershor i vitit 2017, kur edhe ishin lajmëruar rastet e para të fruthit në Kosovë, viti është përmbyllur me 1,005 persona të prekur me këtë virus ku prej tyre 552 janë hospitalizuar në Klinikën Infektive në Qendrën Klinike Universitare të Kosovës.

Sali Ahmeti, infektolog tha për Radion Evropa e Lirë se gjatë vitit 2018, në muajin janar dhe shkurt ka pasur raste më të shpeshta të paraqitjes së fruthit, derisa më pas ka rënë intensiteti i virusit.

“Gjatë këtij viti ka pasur raste që kanë kërkuar ndihmë mjekësore nga fruthi, por që kanë qenë sporadike. Nuk ka pasur epidemi fruthi, siç ka qenë për shembull vitin e kaluar. Njerëzit që kanë qenë të pavaksinuar janë prekur me fruth, derisa popullata tjetër ka qenë imune, pasi kanë qenë të vaksinuar”.

“Besoj se tashmë edhe ata të pavaksinuarit e kanë kryer virusin dhe më pas nuk janë paraqitur raste të reja, pasi që duhet cekur se Kosova ka një mbulim të mirë me imunizim ose vaksinim”, tha Ahmeti.

Sidoqoftë, në disa vende në botë tashmë janë forcuar ligjet për çështjen e vaksinimit. Në Kaliforni, sipas Zërit të Amerikës, nuk lejohet që fëmijët të mos vaksinohen, me përjashtim të rasteve kur ka një arsye shëndetësore.

Në Australi, Qeveria ofron falas vaksina për virusin HPV. Ky virus shkakton kancerin në qafën e mitrës, kanceri i dytë më i përhapur në mbarë botën te gratë.

Derisa në Kosovë vaksina kundër kancerit të qafës së mitrës nuk është në kalendarin e vaksinimit, andaj edhe gratë nuk e kanë mundësinë të vaksinohen.

Ndryshe, vetëm për pesë muajt e parë të këtij viti, 50 femra janë prekur me kancer të qafës së mitrës. Ndërkaq, gjatë vitit 2017, kanë qenë 130 raste, të cilat janë paraqitur në Institutin Onkologjik në Qendrën Klinike Universitare të Kosovës me këtë sëmundje.

Nga aspektin global, kanceri i qafës së mitrës është një sëmundje që prek rreth 400 mijë gra në vit, kurse 200 mijë të tjera vdesin brenda vitit.